Okubuzwa Bafundi Bakamagazini Lo . . .

Kubayini AboFakazi BakaJehova Batjhumayela Umuzi Nomuzi?

▪ EBhayibhilini sifumana umlayo kaJesu lo awunikela abalandeli bakhe: “Khambani-ke, niye ebantwini boke . . . nibenze abafundi.” (Matewu 28:19, 20) Kghani umlayezo lo usebenza kiwo woke amaKrestu? Abafundi bakaJesu bangekhulu lokuthoma bebazi bona uyasebenza. Isibonelo, uPitrosi wathi: “Wasilayeza [uJesu] bona sitjhumayele iindaba ezimnandi ebantwini, besifakaze.” (IZenzo 10:42) Begodu umpostoli uPowula watlola wathi: “Ngombana ngifanele ukuzitjhumayela. Kungaba kumbi kwamambala, nangingazitjhumayeliko iindaba ezimnandi.” (1 KwebeKorinte 9:16)

Akusi nguPowula noPitrosi kwaphela abalalela umlayezo kaJesu, kodwana ngiwo woke amaKrestu wekhulu lokuthoma. Enza ukutjhumayela kwaba yinto eza qangi kiwo woke umsebenzabo. (IZenzo 5:28-32, 41, 42) AboFakazi BakaJehova namhlanje nabo balinga ukwenza njalo. Batjhumayela umlayezo ofanako njengombana kwenza uJesu, ‘uMbuso wamazulu.’—Matewu 10:7.

Umlayezo woMbuso kufuze utjhunyayelwe kibobani? UJesu wathi kufuze utjhunyayelwe kibo boke abantu nakiyo yoke indawo. Watjela abafundi bakhe: ‘Nizaba bofakazi bami eJerusalema, . . . kufikela emaqintelweni wephasi.’ (IZenzo 1:8) Godu wabikezela bona ngaphambi kobana ukuphela kwephaseli kufike, “iindaba ezimnandi ngombuso kaZimu zizatjhunyayelwa ephasini loke, kube bufakazi.” (Matewu 24:14) Ngalokho, amaKrestu wekhulu lokuthoma enza umzamo wokukhuluma nabo boke abantu, ingasi nabantu abaziko kwaphela namtjhana nabantu abanganalo isondo. (KwebeKholose 1:23; 1 KuThimothi 2:3, 4) Ngokufanako, aboFakazi BakaJehova namhlanje balinga ukufikelela woke umuntu.a

Ngiyiphi indlela ephumelela khulu yokurhatjha iindaba zoMbuso? UJesu, oyaziko indlela yokufikelela abantu abanengi ngendlela okungakghoneka ngayo, wathumela abafundi bakhe emadorobheni, emizini nemakhaya wabantu. (Matewu 10:7, 11, 12) Ngemva kokufa nokuvuka kwakaJesu, abafundi bakhe baragela phambili nokutjhumayela ‘emizini yabantu.’ (IZenzo 5:42) Njengombana kwenza uJesu, godu batjhumayela kiyo yoke indawo lapho bahlangana khona nabantu neendaweni zomphakathi. (IZenzo 5:42) Namhlanje, aboFakazi BakaJehova basebenzisa indlela efanako ukutjhumayela kibo boke abantu.

UJesu wathi akusibo boke abantu abazokulalela. (Matewu 10:14; 24:37-39) Kghani lokho bekufuze kuliye amaKrestu ukutjhumayela? Cabangela ukumadanisa nakhu: Nengabe bewungomunye wabantu besizo elirhabako ngemva kokusikinyeka kwephasi okukhulu, bewuzokulisa ukufuna ngombana kunabantu abambalwa kwaphela abaphulukileko abatholakele ngemva kwesikhatjhana? Awa, uzokuragela phambili solankana kunethemba lokobana kunomuntu ozomphulusa. UJesu walayela abafundi bakhe bona baphikelele solankana kunethemba lokufumana abantu abazokuthabela iindaba ezimnandi zoMbuso kaZimu. (Matewu 10:23; 1 KuThimothi 4:16) Ngokufuna abanjalo emzini nomuzi, aboFakazi BakaJehova batjengisa ithando ngoZimu nangabomakhelwana babo, labo ukuphila kwabo okuyame ekuzweni nekusabeleni emlayezweni woMbuso.—Matewu 22:37-39; 2 KwebeTesalonika 1:8.

Umagazini omfundako lo udlulisa umlayezo weBhayibhili onjalo. Bona ufumane imininingwana engeziweko, sibawa ukhulume naboFakazi BakaJehova nebakuvakatjhelako ngesikhathi esilandelako, namtjhana utlolele abagadangisi bakamagazini lo.

[Umtlolo waphasi]