UMosisi—INdoda EThobekileko

KUYINI UKUTHOBEKA?

Ukuthobeka kutjho ukungaziphakamisi namtjhana ukungazikhakhazisi. Umuntu othobekileko akaqali abanye njengabaphasi kunaye. Nanyana ngimuphi umuntu ongakapheleli othobekileko kufuze azehlise, atjheje ukulinganiselwa kwakhe.

UMOSISI WAKUTJENGISA NJANI UKUTHOBEKA?

UMosisi akhenge akuvumele ukuba negunya kwakhe kumbalekele ehloko. Kanengi, umuntu nekafumana igunya elithileko, msinyana ukuzithoba kwakhe kuyancipha. Umtloli weminyakeni yekhulu lethoba uRobert G. Ingersoll wathi: “Abantu abanengi bangabukghodlhelelela ubudisi. Kodwana newufuna ukwazi bona umuntu kwamambala unjani, mnikele igunya.” Ngomqondo loyo, uMosisi wabeka isibonelo esinamandla sokuthobeka. Njani?

UMosisi wafumana igunya elikhulu, ngombana uJehova wamthuma bona arhole ama-Israyeli. Nokho, amandla layo akhenge amenze azikhukhumeze. Ngokwesibonelo, cabanga ngendlela yokuthobeka asingatha ngayo umbuzo obudisi omalungana namalungelo welifa. (Numeri 27:1-11) Umbuzo lo bewubudisi khulu, ngombana isiquntweso besizokuthinta neenzukulwana ezisezako.

Bekazokusabela njani uMosisi? Kghani bekazokucabanga bona njengombana amrholi wama-Israyeli, bekakufanelekela ukwenza isiqunto endabeni le? Bekazokuthembela ekghonweni lakhe lemvelo, eminyakeni yokuhlangabezanwe nakho, nanyana elwazini lakhe elisekelwe emcabangweni kaJehova?

Mhlamunye indoda ezikhukhumezako ingenza njalo. Kodwana ingasi uMosisi. Umlando weBhayibhili uyasitjela: “UMosisi waletha indaba le phambi kwakaJehova.” (Numeri 27:5) Cabanga nje! Ngitjho nangemva kweminyaka ema-40 yokurhola isitjhaba sama-Israyeli, uMosisi gade angazithembi yena, kodwana bekathemba uJehova. Lapha siyabona bonyana uMosisi bekathobeke kwamambala.

UMosisi bekangasimarhamaru ngegunya lakhe. Wathaba lokha uJehova nekavumela amanye ama-Israyeli bona abe baporofidi kunye naye. (Numeri 11:24-29) Lokha ufaderakhe nekaphakamisa umbono wokobana abele abanye omunye womsebenzakhe, uMosisi wasisebenzisa iselulekweso. (Eksodosi 18:13-24) Lokha nekuya emaphethelweni wokuphila kwakhe, ngitjho nanyana gade asesenamandla, uMosisi wabawa uJehova bona amkhethele umuntu ozomlandela esikhundleni. UJehova nekakhetha uJoshuwa, uMosisi walisekela ngehliziyo epheleleko isokaneli, wakhuthaza abantu bona balandela uJoshuwa njengomrholi ozobangenisa eNarheni Yesithembiso. (Numeri 27:15-18; Duteronomi 31:3-6; 34:7) Siyaqiniseka bona uMosisi wakuqala njengelungelo ukurhola ama-Israyeli ekukhulekeleni. Kodwana akhenge abeke igunya lakhe ngaphambi kwehlalakuhle yabanye.

NGIZIPHI IIMFUNDO ESINGAZIFUMANA?

Asifuni ukuvumela amandla, igunya nanyana amakghono wemvelo asibalekele ehloko. Khumbula: Nesizakusebenziseka kuJehova, ukuthobeka kwethu ngaso soke isikhathi kufuze kube ngaphezu kwamakghono wethu. (1 Samuweli 15:17) Nesithobeke kwamambala, sizokulwela ukusebenzisa isiluleko seBhayibhili esihlakaniphileko: “Thembela kuJehova ngayo yoke ihliziyo yakho, ungayami ngelwazi lakho.”—IzAga 3:5, 6.

Godu isibonelo sakaMosisi sisifundisa bona singaqali amagunya esinawo njengaqakatheke khulu.

Siyazuza na ngokulingisa isibonelo sakaMosisi sokuthobeka? Akubuzwa! Nesihlawulela ukuthobeka kwamambala, senza ukuphila kwabantu abahlangana nathi kube lula, siyathandeka nakibo. Okuqakatheke khulu, siyathandeka nakuJehova uZimu otjengisa ifanelo ehle le. (IRhalani 18:35) “UZimu ujamelana nabazikhukhumezako, kodwana ubehlisela umusa abazithobileko.” (1 Pitrosi 5:5) Qala bona sizathu esihle kangangani sokulingisa ukuthobeka kwakaMosisi!