Kghani Kufuze Ngilise Ukutjhayela?
SELE kuphele iminyaka utjhayela. Uyakuthanda ukutjhayela ikoloyakho. Nanyana kunjalo, umndeni nabangani bakho batshwenyekile ngawe begodu bafuna ulise ukutjhayela. Awuzwisisi bona kubayini batshwenyekile.
Kghani uqalene nobujamo obufanako? Nakunjalo, khuyini ongayenza ukwazi bona ungaragela phambili utjhayela namkha awa?
Kezinye iinarha, abatjhayeli esele bafike eminyakeni ethileko, nabafuna ukuvuselela ikarada labo lokutjhayela, kufuze bahlolwe ngudorhodera. AmaKrestu ahlala eenarheni ezenza njalo enza ngokuvumelana nemithetho neenqunto zenarha ahlala kiyo. (Rom. 13:1) Kodwana kunganandaba bona uhlala kuphi ungakghona ukuhlolisisa bona usese sebujamweni obuhle bokuthi ungatjhayela na.
HLOLA INDLELA OTJHAYELA NGAYO
Njengombana kuhlongozwa izinzolwazi ye-National Institute on Aging (NIA) ye-United States, ungathoma ngokuzibuza imibuzo elandelako:
Ukufumana kubudisi na ukubona amatshwayo wendlela namkha ukubona ebusuku?
Kghani ngikufumana kubudisi ukujikisa ihloko ngiqale iimpili neendawo ezifihlekileko?
Ngisakghona na ukwenza izinto msinyana, njengokususa inyawo emafutheni ngigadange ibrigi?
Kghani ngitjhayela ngebelo eliphasi khulu kangangokuthi abanye abatjhayeli bathikaziseke?
Kghani pheze waba sengozini kanengana mvanje nekoloyakho ipotokapotokile ngebanga lokuthi utjhayisa izinto?
Kwenzekile na bona ngijanyiswe mapholisa ngebanga lendlela engitjhayela ngayo?
Khengabanjwa sithongwana ngitjhayela?
Kunemitjhoga engiyiselako na engangibangela bona ngingatjhayeli kuhle?
Kghani amalunga womndenami aveze ukutshwenyeka ngendlela engitjhayela ngayo?
Nange uphendula ngo-iye embuzweni munye namkha kemibili, kungaba kuhle bona ucabangele ukwenza amatjhuguluko. Ngokwesibonelo, ungakhetha ukungasatjhayeli khulu, khulukhulu ebusuku. Hlala utjhejisisa bona utjhayela kuhle na. Bawa ilunga lomndeni namkha umngani bona aqale indlela otjhayela ngayo begodu bakwazise ukuthi bacabangani. Mhlamunye ungabe ungenele iimfundo zokutjhayela ngokuphepha. Kodwana nawuphendula ngo-iye emibuzweni embalwa, kungaba kuhle bona ungasatjhayeli.a
NQOTJHISWA ZIINKAMBISOLAWULO ZEBHAYIBHELI
Kungenzeka singalemuki bona indlela esitjhayela ngayo ayisese yihle. Kungasizwisa ubuhlungu nakufuze silise utjhayela. Ngiziphi iinkambiso zeBhayibheli ezingasisiza bona siyiqale kuhle indaba leyo begodu senze isiqunto esihlakaniphileko? Akhesicoce ngezimbili.
Hlala uthobekile. (IzA. 11:2) Nasiluphalako, amehlo, iindlebe, umzimba nendlela esenza ngayo izinto kuthoma ukubogaboga. Ngokwesibonelo, abantu abanengi esele baluphele bayalisa ukudlala imidlalo ethileko ngombana bayalemuka bona kulula ukuzilimaza. Singaqala nokutjhayela ngendlela efanako. Kuzokufika isikhathi lapha kungaba kuhle bona umuntu olupheleko alise ukutjhayela ngebanga lokuphepha kwepilwakhe. (IzA. 22:3) Abanye nabaveza ukutshwenyeka, umuntu othobekile uzokwamukela lokho begodu uzozimisela ukulalela.—Madanisa neyesi-2 kaSamyela 21:15-17.
Asifuni ukufaka ukuphila kwabantu engozini. (Dut. 22:8) Ikoloyi ingaba yingozi nayingasetjenziswa kuhle. Umuntu otjhayela ngitjho nalokha angasakghoni, angafaka ukuphila kwakhe nekwabanye engozini. Begodu singabe besibangele nokuhlongakala kothileko, lokho kusenze sibe nomlandu weengazi.
Nawuqalene nesiqunto esibudisi sokulisa ukutjhayela, ungacabangi bona uzokulahlekelwa sithunzi sakho. UJehova ukuthanda ngebanga lobuntu bakho obuhle, okuhlanganisa ukwazi bona amandlakho aphelelaphi, ukuthobeka nokutshwenyeka ngehlalakuhle yabanye. Begodu uthembisa bona uzokutlhogomela bekakududuze. (Isa. 46:4) Angeze akulahla. Yeke mbawe bona akusize usebenzise ukuhlakanipha njengombana uqunta bona uzokuragela phambili utjhayela namkha awa.
a Nawufuna ilwazi elingeziweko, funda isihloko esithi, “Ingabe Uphephile Ezingozini Zezimoto?” kuPhaphama! ka-August 22, 2002