Kansi tingachite tyani kuti tisamalile Ng’anda yasu ya Ufumu?

Ng’anda ya Ufumu iliyonse ya Mboni za Yehova yulengeza zina ituŵa ya Mulungu. Tetyo tuwona kuti ni mwayi kuyavya pa ntchito yopyela noisamalila kuti ikowoneka luweme, na kuti ntchito yamene iyi ni mbali yofunika ngako pa kulambila kwasu kwachendi. Tonse tingatoleko mbali pa ntchito yamene iyi.

Mungalitwale kuti mupyele pavuli pa misonkhano. Pavuli pa misonkhano, abale na alongo olitwala kuti apyele mu Ng’anda ya Ufumu patali-patali. Kamozi pa sondo, opyelapo bwino-bwino. Nkulu olo ntumiki wothandiza opanamila ntchito yamene iyi, soti okonkha ndandanda ya vinthu vofunika kuchita. Molingana na ntchito zilipo, abale na alongo olitwala kuti apyele, asuke pansi pa Ng’anda ya Ufumu, apukute-pukute na kuika luweme mipando. Ayakine opyela m’vimbuzi notilamo mankhwala, osuka mawindo na magilasi oziloleshelapo, otaya vinyanswa olo kupyela panja. Kamozi pa chaka, ponkhala ntchito ikulu yokonza malo onse. Mwa kuseŵenza ntchito yamene iyi pamozi na ŵana ŵasu, tuŵaphunzisa kuti akolemekeza malo ŵasu olambilila.​—Mlaliki 5:1.

Mungayavye kukonza vinthu vowonongeka. Kamozi pa chaka, Ng’anda ya Ufumu oiwona mosamala ngako kunja na mkati. Molingana na vinthu vapeza, ponkhala ntchito yokonza vinthu kaŵili-kaŵili kuti Ng’anda ya Ufumu ikowoneka luweme. Vamene ivi vuyavya kuti osati pakochenekeka ndalama zinyinji. (2 Mbiri 24:13; 34:10) Ng’anda ya Ufumu yaukhondo komasoti yosamalika luweme ni malo aweme kulambililamo Mulungu wasu. Mwa kukata ntchito yamene iyi, tuwonesha kuti tukonda Yehova na maloasu olambilila. (Salimo 122:1) Vamene ivi vupeleka chithunzi chiweme ku ŵanthu onse a m’dela yamene iyo.​—2 Akorinto 6:3.

• Ndaŵa yanji tuwamila lini kunyalanyaza malo ŵasu olambilila?

• Kansi ponkhala makonzedwe otyani kuti Ng’anda ya Ufumu ikonkhala yaukhondo?