Kansi muwamila kuchitanji kuti banja yanu iŵe yotemwa?

1. Kansi kulungulana mokonkheja malamulo kungakuyavyeni tyani kuti banja yanu iŵe yotemwa?

Uthenga uweme ufumila kuli Yehova, Mulungu wotemwa. Yove ofunishisha ngako kuti mabanja yawokuŵa yotemwa. (1 Timoteyo 1:11) Mulungu niye eyambisha chikwati. Chikwati chalamulo chupangisha banja kuŵa yotemwa, chikomo chakuti ŵana olelewa m’banja yotetyo, akuŵa ochingilijiwa. Akhilisitu owamila kumvwila malamulo a boma olaŵila za kulembesha chikwati.—Ŵelengani Luka 2:1, 4, 5.

Kansi Mulungu ochiwona tyani chikwati? Yove ofuna kuti chikwati chinkhale kukatijana kwa mwanalume na mwanakazi. Yehova ofuna kuti mwanalume awochetekeleka kwa mwanakazi wake. (Aheberi 13:4) Yove ozonda kusilija chikwati. (Malaki 2:16) Koma yumo akachita uchende, Mulungu olola kusilija chikwati nolungula soti.—Ŵelengani Mateyu 19:3-6, 9.

2. Kansi mwanalume na mwanakazi wake owamila kuchitilana vinthu motyani?

Yehova epanga mwanalume na mwanakazi kuti awoyavyana m’chikwati. (Genesis 2:18) Mwanalume niye mutu wa banja, yove owamila kusakilila banja yake vinthu vofunika pa umi, noyiphunzisa za Mulungu. Owamila soti kulitwala mwa chikondi kwa mwanakazi wake. Mwanalume na mwanakazi owamila kutemwana na kulemekezana. Pakuŵa kuti onse ni ochimwa, kukhululukilana niye kungayavye kuti chikwati chawo chiŵe chotemwesha.—Ŵelengani Aefeso 4:31, 32; 5:22-25, 33; 1 Petulo 3:7.

3. Kansi muwamila kuchithaŵa chikwati keno muli matamano?

Keno mwakumana na matamano muchikwati chanu, monse mwaŵili muwamila kuyeja-yeja kuchitilana vinthu mwa chikondi. (1 Akorinto 13:4, 5) Malizu ya Mulungu, yolimbikisha lini kupatukana kunkhala njila yosilijila matamano yatontho-yatontho amene agayambe m’chikwati.—Ŵelengani 1 Akorinto 7:10-13.

4. Ŵanamwe, kansi Mulungu ofuna kuti muŵe na umi wotyani?

Yehova ofuna kuti mokuŵa otemwa. Yove wakupani malangizo aweme ngako, okuyavyani kuti motemwa na umi pamukali alumbwana. Mulungu ofuna kuti mukopindula na nzelu za makolo ŵanu, komasoti na vinthu vakuziŵa. (Akolose 3:20) Yehova ofunasoti kuti mokuŵa otemwa potumikila yove Nyamalenga, na Mwana wake.—Ŵelengani Mlaliki 11:9–12:1; Mateyu 19:13-15; 21:15, 16.

5. Mwewo makolo, kansi mungachite tyani kuti ŵana ŵanu awosangalala?

Muwamila kuseŵenza na mphamvu zanu, kuti musakilile ŵana ŵanu vakulya, poyona, na vovwala. (1 Timoteyo 5:8) Koma kuti ŵana ŵanu aŵe otemwa, muwamila kuŵaphunzisa kuti awomutemwa Mulungu, komasoti kutolela chisanzo chake. (Aefeso 6:4) Keno ŵana ŵanu owona kuti mwewo mutemwa Mulungu, nawo angatolele chisanzo chanu. Keno malangizo ŵanu ofumila m’malizu ya Mulungu, akoŵayavya kulingilila luweme.—Ŵelengani Deuteronomo 6:4-7; Miyambo 22:6.

Ŵana otemwa kuŵalimbikisha noŵa tembeja. Koma akaphoniya mufunikila kuŵapasa chilango kapena kuŵazuzula. Kuŵalanga koteti kungaŵachingilije ku minkhalidwe iipa. (Miyambo 22:15) Olo n’tetyo chilango chuwamila lini kuŵa chonyanyila olo chankhanza.—Ŵelengani Akolose 3:21.

Mboni za Yehova zulemba mabuku yosiyana-siyana kuti yakoyavya makolo na ŵana. Nkhani zake zufumila m’Baibolo.—Ŵelengani Salimo 19:7, 11.