Mwatingayambile makambilano pokatishila ntchito tumapepala

Kufumila mu January 2018, pachikuto cha Moyo komasoti Utumiki m’Kabuku kamisonkhano muwela njila ziyakine za mwatingayambishile makambilano a chidule. Njila zamene izi zutiyavya kulaŵila na ŵanthu, osati kungoŵasiyila tyala chofalisa. Pofuna kuyavya ofalisa pambali yamene iyi, pali mavidiyo na makambilano a chidule amene owonesha mwatingayambishile makambilano pokatishila ntchito Baibolo. Koma niye kuti vamene ivi vutanthawuza kuti tufunika lini kukatishila ntchito vofalisa mu utumiki? Yayi tufunika kukatishila ntchito. Mwachisanzo, tumapepala twasu n’tuweme ngako kuyambishila makambilano. Mungakatishile ntchito kamozi ka tumapepala twamene utu munjila izi:

1. Konshani konsho ili pa kapepala.

2. Muwonesheni yankho ya m’Baibolo pokatishila ntchito lemba ili mkati mwa kapepala. Keno ali na nthawe, mungaŵelenge nokambilana naye mfundo ziyakine zili m’kapepala kamene ako.

3. Mupaseni kapepala munecho wang’anda, ndipo mulimbikiseni kuti aŵelenge mfundo ziyakine m’kapepala kamene ako panthawe iyakine.

4. Mukaliye luta, muwonesheni konsho ili na kamutu kakuti “Konsho yakuti mukolingilila” ndipo siyani ulwendo woweleja kuti muzamuwoneshe yankho ya m’Baibolo yakonsho yamene iyo.

Paulwendo woweleja, muwonesheni yankho soti siyani konsho iyakine yakuti muzakambilane ulwendo wokonkhapo. Mungakonshe konsho imo yamene yupezeka pasaiti ya jw.org olo yupezeka muvofalisa vasu pa pedji yosilijila yaka kapepala.Keno n’vokwanishika, muwonesheni kabulosha kakuti, Uthenga uweme wofumila kuli Mulungu! Olo chofalisa chupezeka pa vinthu vatukashila ntchito pophunzisa.