Kansi mwewo mupindula na kabuku ka Kuphunzira Malemba Tsiku ndi Tsiku?

Kansi mwewo mukonda kuŵelenga lemba ya nsiku na ndemanga zupezeka m’kabuku ka Kuphunzila Malemba Tsiku ndi Tsiku? Keno mukaliye yamba, tyani kuti muyambe kuchita vamene ivi nsiku iliyonse? Ŵanthu anyinji oŵelenga lemba ya nsiku mmawa, tetyo angakwanishe kusinkha-sinkha vaŵelenga nsiku yonse. (Yos 1:8; Sl 119:97) Kansi mwewo mungachite tyani kuti mukopindula ngako na kuphunzila lemba ya nsiku? Chisinsi chake ni kuŵelenga nkhani yonse ya lemba ya nsiku. Ivi vingakuyavyeni kumvwisha nkhani yonse m’njila iweme. Chinthu chiyakine chamungachite ni kuganizila chisanzo chimozi cha m’Baibolo chamene chukatijana na lemba ya nsiku yamene iyo. Pavuli pake fotokozani vamwaphunzila pa moyo wanu. Keno mukokatishila ntchito vayunena Baibolo pofuna kusankha vinthu, munkhale na chidalilo chakuti mukopindula nthawe zonse.​—Sl 119:105.

Mabanja a Beteli pa chalo chonse ochita Lemba ya nsiku pa chakulya cha mmawa. Kumapeto kwa chaka chilichonse, nkhani zinyinji za kulambila kwa mmawa zuikiwa pa JW Broadcasting^®, pa mbali yakuti MAPULOGALAMU NDI ZOCHITIKA. Kansi n’nthawe yanji pemwilolelako mbali imozi ya kulambila kwa mmawa? Payakine imozi mwa mavidiyo amene aŵa angankhale a vinthu vamufunikila ngako. Mwachisanzo, kansi mungaphunzilepo chinji pa chisanzo cha Loti mukafuna kusankha vinthu?

LOLELANI VIDIYO YAKUTI MUSAMAKONDE DZIKO (1YO 2:15), PAVULI PAKE YANKHANI MAKONSHO AŴA:

• Kansi lemba iyi ya m’Baibulo ya kulambila kwa mmawa yafumila kuni?

• Kansi tuphunzilapo chinji pa nkhani ya Loti yakuti osakonda chalo olo vinthu vam’chalo?—Ge 13:12; 14:12; 19:3, 12, 13, 24-26

• Kansi tuwonesha tyani kuti tukonda Yehova osati chalo olo vinthu vam’chalo?