Kansi mweganizilako kale za kuyaloŵa Sikulu ya Akhilisitu Olalikila za Ufumu?

Kansi mwewo muli na vyaka vapakati pa 23 na 65 komasoti muli mu utumiki wa nthawe zonse? Kansi muli na thanzi iweme komasoti mungakwanishe kuyatumikila kufunikila olalikila anyinji? Keno mwayankha kuti inde pamakonsho amene aŵa, kansi mweganizilako kale za kuyaloŵa Sikulu ya Akhilisitu Olalikila za Ufumu? Kufumila pa nthawe yeiyamba sikulu, mabanja anyinji, abale osalungula komasoti alongo osalunguliwa elembako kale fomu. Olo vili tetyo, tufunishisha kuti abale anyinji akaliye lungula akonkhala okonzeka. Sengani Yehova kuti ayangijile chifuno chanu chomukondwelesha komasoti kukonkheja Mwana wake. (Sl 40:8; Mt 20:28; Ahe 10:7) Pavuli pake, ganizilani vinthu vamungachinje pa moyo wanu, kupamikijapo ntchito yanu komasoti maudindo ayakine amuli nawo, kuti muyenelele.

Kansi abale na alongo amene eloŵako sikulu yamene iyi ankhala na mwayi wotyani? Ophunzila ayakine etumijiwa kuti akatumikile ku malo kwamene ŵanthu olaŵila chilaŵilo chiyakine olo kuyalalikila mwapadela kumadela akulu-akulu kwamene kupezeka ŵanthu anyinji. Papita nthawe ayakine etumijiwa kuti akatumikile monga opanamila madela othandizila, opanamila madela, komasoti amishonale mmagawo. Ganizilani vinthu vamungachite mu ntchito ya Yehova, ndipo nkhalani monga ni mneneli Yesaya, wamene enena kuti: “Newo nilipo! Nitumijeni!”​—Yes 6:8.

LOLELANI VIDIYO YAKUTI AMISHONALE KU GAWO—AKUGWIRA NTCHITO YOKOLOLA, PAVULI PAKE YANKHANI MAKONSHO AŴA:

• 

  Kansi amishonale otumijiwa ku gawo osankhiwa tyani?

• 

  Kansi ni ntchito iweme yotyani yakuchita amishonale ku gawo?

• 

  Kansi ni madaliso otyani owela chifukwa chotumikila monga mmishonale?