Kansi mwewo mukonzekela Chikumbukilo?

Pasika wosilijila wechichita Yesu wenze wofunika ngako. Chifukwa chakuti imfwa yake yenze pafupi ngako, tetyo yove ekonzekela kuyakulya pasika pamozi na ophunzila ŵake ndipo kulaŵila chendi eyambisha mwambo wanyowani wa, Chakulya Chanchingulo cha Ambuye. Tetyo Yesu etumija Petulo na Yohane kuti akawamye chipinda chakuti akachitilemo Pasika. (Lu 22:7-13; onani chithunzi cha pachikuto.) Vamene ivi vutiphunzisa kuti nase tufunika kukonzekela mwambo wa Chikumbukilo, wamene ukuti uzachitike pa 27 March. Mosakaikila, mipingo ipanga kale makonzedwe a wolaŵila nkhani, ŵanthu akuti akapange vizindikilo komasoti vinthu viyakine. Kansi mwewo mungachite chinji kuti mukonzekele Chikumbukilo?

Konzekeleshani ntima wanu. Mukoŵelenga Baibolo mu nthawe ya Chikumbukilo komasoti kuganizila ngako vamwaŵelenga. Mungafwane ndondomeko mu kabuku ka Kuphunzira Malemba Tsiku ndi Tsiku. Olo yayi mungafwanesoti ndondomeko iyakine yoyangijila mu kabuku kakuti Kabuku Kothandiza Kuphunzira Mawu a Mulungu. (Onanisoti Kabuku kamisonkhano ka Moyo komasoti Utumiki ka mwezi wa April 2020.) Kuti mufwane nkhani ziyakine zokhuza kufunika kwa dipo zamungakatishile ntchito pa kulambila kwapa banja, onani pa Laibulale ya Mboni za Yehova Lofufuzira Nkhani olo Buku la Mboni za Yehova Lofufuzira Nkhani.

Itilani ŵanthu ayakine ku Chikumbukilo. Yeja-yejani kuita ŵanthu anyinji keno vingakwanishike. Ganizilani za ŵanthu amufuna kuita, mwachisanzo maulwendo ŵanu oweleja, ŵanthu ŵemwenzephunzila nawo Baibolo, ŵanthu ŵamuziŵa komasoti achibale ŵanu. Akulu nawo ofunika kukumbukila kuitila ŵala efoka. Kumbukilani kuti keno munthu onkhalalini mudela yanu, mwewo mungafwane nthawe na malo kwaukuti ukachitile mwambo wa Chikumbukilo kudela yakunkhala munthu wamene uyo, mukaluta papedji yoyambilila pa jw.org tinyani batani yakuti ZA SEWO pavuli pake tinyani pa “Chikumbukilo.”

Kansi tingachitesoti chinji kuti tikonzekele Chikumbukilo?