Makonsho Ofumila Kuli Oŵelenga

Kansi Yesu enzetanthauza chinji pechilaŵila kuti: “Osaganiza kuti nileta ntendele”?

Yesu enzelalikila uthenga wa ntendele. Koma pa nthawe iyakine euja atumwi ŵake kuti: “Osaganiza kuti nileta ntendele pano pachalo, niliyelete ntendele koma chibemba. Pakuti niwela kuzayaŵanisha ŵanthu. Niwela kuzachitisha munthu kushushana na atata ŵake, mwana mwanakazi kushushana na amayi ŵake komasoti msimbi wolunguliwa kushushana na apongozi ŵake anakazi.” (Mt. 10:34, 35) Kansi Yesu enzetanthauza chinji?

Sikuti Yesu enzefuna kulekanisha ŵanthu apachibale. Koma enzeziŵa kuti venzephunzisa vingachitishe kuti mabanja ayakine ayaŵikane. Tetyo, ŵala ofuna kubatiziwa nonkhala ophunzila a Khilisitu ofunika kuziŵa vokonkhapo va chosankha chawo. Nthawe ziyakine keno oshushiwa na mwanalume olo nkazi wawo komasoti achibale ŵawo amene ni Mbonilini, vingankhale vovuta kukonkheja vechiphunzisa Yesu.

Baibolo yulimbikisa Akhilisitu kuti ‘akonkhala mwantendele na ŵanthu onse.’ (Aro. 12:18) Koma vechiphunzisa Yesu vingankhale monga ni “chibemba” m’mabanja ayakine. Vamene ivi vuchitika keno mmozi m’banja mwamene umo walola kukonkheja vechiphunzisa Yesu—pamene ayakine okana. Vikachitika tetyo, achibale amene awo onkhala “adani” a munthu wamene uyo ophunzila choonadi.—Mt. 10:36.

Ophunzila a Khilisitu amene ali m’mabanja amene ŵanthu ŵake ni osiyana vipembezo, nthawe ziyakine okumana na vinthu vuŵachitisha kuti awoneshe keno okonda ngako Yehova na Yesu. Mwachisanzo, achibale ŵawo amene ni Mbonilini angaŵakakamije kuti achite nawo holide iyakine yachipembezo. Lomba akakumana na mayeselo amene aŵa, kansi angasankhe kukondwelesha ŵani? Yesu enena kuti: “Okonda ngako atata ŵake olo amayi ŵake kupambana newo, oyenelelalini kuli newo.” (Mt. 10:37) Koma olo n’tetyo, Yesu enzetanthauzalini kuti ŵala asankha kunkhala ophunzila ŵake osati akokonda makolo ŵawo. Mmalomwake, enzesindika mfundo yakuti akowona vinthu vamene n’vofunika ngako. Tetyo, keno achibale amene ni Mbonilini oshusha kulambila kwasu tupitilija kuŵakonda, koma tuziŵa kuti chofunika ngako ni kukonda Mulungu.

N’vowonekelatu kuti kushushiwa na achibale kungankhale koŵaŵa ngako. Koma olo n’tetyo, ophunzila a Yesu okumbukila mawu ŵake akuti: “Aliyense wosalondela chimuti chake chotamanilapo nonikonkheja, oyenelelalini kuli newo.” (Mt. 10:38) Tinganene kuti Akhilisitu owona kuti kushushiwa na achibale ŵawo, ni ayakine mwa mayeselo ŵakufunika kunkhala okonzeka kuŵapilila. Koma olo n’tetyo, pa nthawe imozi na imozi yamene iyo, ove oyembekezela kuti nkhalidwe yawo iweme ichitishe achibale ŵawo amene awo kuchinja noyamba kufuna kumvwa uthenga wa m’Baibolo.—1 Pet. 3:1, 2.