Makonsho Ofumila Kuli Oŵelenga
Davide pechilemba mawu apa Salimo 61:8 enena kuti azatamande zina ya Mulungu “mpaka kale-kale,” kansi vamene ivi venzetanthauza kuti yove azafwelini?
Yayi. Vechilemba yove venze vachendi komasoti venze vomvwika.
Ganizilani vechilemba mu vesi yamene iyi komasoti m’mavesi olingana na yamene iyi, yove elemba kuti: “Nizaimbe nyimbo zotamanda zina yanu mpaka kale-kale, kuti nikwanilishe malonjezo ŵangu nsiku na nsiku.” “Nukutamandani mwewo Yehova Mulungu wangu na ntima wangu wonse.” “Ndipo nizatamande zina yanu mpaka kale-kale, ndithu kosasila.”—Sal. 61:8; 86:12; 145:1, 2.
Davide pechilemba mawu a m’mavesi amene aŵa, enzeziŵa kuti azafwe. Yove enzeziŵa kuti Yehova elamula kuti ŵanthu akokufwa chifukwa chakuti ni ochimwa, ndipo Davide evomeleja kuti enze munthu wochimwa. (Gen. 3:3, 17-19; Sal. 51:4, 5) Yove enzeziŵa kuti olo ŵanthu amene enze okhulupilika kwa Mulungu, monga Abulahamu, Isaki, na Yakobo, echifwa. Ndipo Davide naye enzeziŵa kuti azafwe. (Sal. 37:25; 39:4) Koma mawu ŵake opezeka pa Salimo 61:8, owonesha kuti yove enzefunishisha kutamanda Mulungu mpaka kale-kale, kapena kuti panthawe yonse ya moyo wake.—2 Sam. 7:12.
Nthawe ziyakine Davide enzelemba vinthu vimuchitikila pa moyo wake, monga mwatuwonela mawu apalulu apa Salimo chapitala 18, 51, na 52. Mu Salimo chapitala 23, Davide eyelekezela Yehova na chiŵeta wamene osogolela, kupeleka mpumulo, komasoti chitetezo. Davide enze chiŵeta wotetyo. Ndipo yove enzefuna kutumikila Mulungu ‘pa moyo wake wonse.’—Sal. 23:6.
Kumbukilani kuti Yehova niye eujila Davide kuti alembe vinthu vonse vechilemba. Vamene ivi vupamikijapo maulosi onena za vinthu vamene panthawe yamene iyo venze vikaliyechitika. Mwachisanzo, mu Salimo 110, Davide enena za nthawe yamene Ambuya ŵake “azankhale ku kwanja ngayo [ya Mulungu]” kululu, nolondela mphamvu zapadela. Kuti achite chinji? Kuti agonjese adani a Mulungu na “kupeleka chiweluzo pakati pa ŵanthu a mitundu iyakine” pachalo. Davide enze kolo ya Yesu, wamene enze Mesiya. Ndipo Mesiya azalamulile ali kululu, nonkhala “wansembe mpaka kale-kale.” (Sal. 110:1-6) Yesu esimikijila kuti ulosi wapa Salimo 110 wenzenena chendi za yove, ndipo uzakwanilishiwe kusogolo.—Mt. 22:41-45.
Kulaŵila chendi, Davide eujiliwa kulemba vinthu va m’nthawe yake komasoti vakusogolo, pa nthawe yati azaushiwe notamanda Yehova mpaka kale-kale. Vamene ivi vutiyavya kuwona kuti lemba ya Salimo 37:10, 11, 29, yufotokoza mwevenzele vinthu mu Isiraeli wakale komasoti vikuti vizachitike pachalo chonse kusogolo, pa nthawe yamene Mulungu yati azakwanilishe malonjezo ŵake onse.—Onani ndime 8 mu nkhani yakuti “Wewo uzankhale na newo m’Paladaiso” m’magazini ino.
Lemba ya Salimo 61:8 komasoti mavesi ayakine, owonesha kuti Davide enzefuna kutamanda Yehova mu Isiraeli wakale pa moyo wake wonse. Komasoti owonesha kuti Davide azapitilije kutamanda Yehova akazaushiwa kusogolo.