Hulda ekwanilisha cholinga chake

KU Indonesia pansuwa iyakine itontho ya Sangir Besar, kuli alongo ŵasu atatu. Vyaka vinyinji kuvuli, alongo amene aŵa enzekatila ntchito pamozi kunyanja iyakine. Alongo amene aŵa ni oziŵika luweme pa nsuwa yamene iyi chifukwa cha utumiki wawo—kuyavya ŵanthu kuti aimvwishe luweme Baibolo. Koma poyamba, ove enzekata ntchito iyakine yamene ni yosiyana ngako na yamene iyi.

Poyamba, alongo amene aŵa enzeyenda mmanzi, kusakila miyala yolema, komasoti kuinyamula. Iyakine mwa miyala yamene iyo yenze ikulu ngako monga ni bola. Pavuli pake, alongo amene aŵa enzenkhala patumasituli tutontho-tutontho twamapulanga noyamba kufwaya miyala yamene iyo n’tuvidunswa tutontho-tutontho kupambana malungu ankhuku pokatishila ntchito nsando. Pavuli pake, ove enzelongela miyala yamene iyo m’mabaketi a pulasitiki nokwela makata kuluta kwenzenkhala. Pasogolo pake, ove enzelongela miyala yamene iyo m’voikamo vikulu-vikulu kuti makabewu-bewu anyamule nakuyaikatishila ntchito pa ntchito zokonza misewu.

M’monzi mwa alongo amene aŵa enze Hulda. Chifukwa cha mwevenzele vinthu pa moyo wake, yove enze na mwayi wokata ntchito yamene iyi kwa nthawe ikulu kusiyana na ayake. Nthawe zonse yove enzekatishila ntchito ndalama zonse zenzefwana pantchito yake pogula vofunikila vapang’anda. Koma panthawe yamene iyi, yove enzefuna kukatishila ntchito ndalama zake kuti agulesoti chinthu chiyakine. Yove enzefuna tabuleti chamene nichipangizo chamakono kuti akokwanisha kukatishila ntchito pulogilamu ya JW Library^®. Hulda enzeziŵa kuti mavidiyo komasoti vinthu viyakine vamene vili mu pulogilamu yamene iyi, vingamuyavye kuti ayangijile luso yake muutumiki komasoti kuti akoimvwisha luweme Baibolo.

Hulda enzekata ntchito kwa maawazi aŵili m’mawa mulimonse kwa mwezi na hafu ofwaya miyala kuti azuje kabewu-bewu ntontho. Ndipo pamapeto pake, yove efwana ndalama zokwanila kugula tabuleti.

Hulda enena: “Olo kuti nenzekumvwa kufoka m’muŵili komasoti kuŵaŵiŵa chifukwa chonkhala nthawe itali nufwaya miyala, newo niluŵa mokulumija ngako ululu komasoti ntchito ikulu yenikata peniyamba kukatishila ntchito tabuleti yangu yanyowani, yamene iniyavya kuyangijila luso yangu muutumiki komasoti kukonzekela mosavuta misonkhano yachikhilisitu.” Yove enenasoti kuti tabuleti yamene iyo imuyavya kumayambililo kwa mulili pa nthawe yamene ntchito za mpingo zenzepanamikiwa mokonkhejana-konkhejana. Nise okondwela ngako kuti Hulda ekwanilisha cholinga chake.