Kansi mwewo muli na chikhulupililo?

Kuti tikondweleshe Yehova, sewo tufunikila kunkhala na chikhulupililo. Koma Baibolo yunena kuti “ni ŵanthulini onse amene ali na chikhulupililo.” (2 Ates. 3:2) Ntumwi Paulo pechilaŵila mawu amene aŵa, enzenena za “ŵanthu aipa ngako,” kapena kuti ŵanthu amene enzemutamanisha. Koma vinthu vechilaŵila vokhuza chikhulupililo vukatasoti ntchito kuli ŵanthu ayakine. Ŵanthu ayakine okana kukhulupilila umboni ulipo wamene uwonesha kuti kuli Mulungu—wamene ni Nyamalenga. (Alo. 1:20) Ŵanthu ayakine okhulupilila kuti pali chinthu chiyakine chakuganiza kuti ni mphamvu za kululu. Koma chikhulupililo chamene ichi n’chosakwanila kuti munthu akondweleshe Yehova, chifukwa chikhulupililo choteti n’chatyala-tyala.

Sewo tufunika kusimikijila kuti Yehova aliko chendi komasoti kuti “opeleka mphaso” kuli ŵanthu amene okhulupilila ngako muli yove. (Ahe. 11:6) Chikhulupililo ni nkhalidwe yakunkhala nayo ŵanthu moyavyiwa na mzimu utuŵa. Ndipo kuti tinkhale na mzimu utuŵa tufunikila kumusenga Yehova m’pemphelo. (Luk. 11:9, 10, 13) Chisinsi chiyakine kuti tilondele mzimu utuŵa, ni kuŵelenga Mawu oujiliwa a Mulungu. Komasoti n’chinthu chofunika kuganizila vinthu vatuŵelenga m’Baibolo novikatishila ntchito pamoyo wasu. Mwanjila yamene iyi Yehova angatipase mzimu wake utuŵa pofuna kutiyavya kuti tinkhale na chikhulupililo chakukondwela nacho yove.