Mukofwana malo aweme ophunzilila

Kansi mungasangalale kuti mukopindula ngako keno muphunzila pamweka? Vinthu ivi vokonkhapo vingakuyayveni kuti mukoika ngako maganizo ŵanu pa vinthu vamuphunzila:

• Mukosankha malo ŵamungaphunzile momasuka. Yeja-yejani kuti mufwane malo aukhondo komasoti ongweleŵela luweme kuti mukokwanisha kuŵelenga luweme. Mungasankhe kuŵelengela pathebo olo pamalo aliwonse aweme panja pang’anda.

• Sankhani malo ŵamungankhale pamweka. Yesu enzepemphela “mmawa ngako” ndipo enzechita vamene ivi “kumalo kuliye ŵanthu.” (Mko. 1:35) Keno mungakwanishelini kufwana malo asapita ŵanthu kuti muphunzile, mungachite luweme kuziŵisha am’banja mwanu olo ŵanthu ŵamunkhala nawo m’ng’anda imozi za nthawe yanu yamuphunzila Baibolo, noŵasenga kuti osati akokusokonezani nthawe yamene iyo ikakwana.

• Pitilijani kuganizila ngako vamuphunzila. Mukopewa vinthu vamene vingakusokonezeni. Keno mukatishila ntchito foni olo tabuleti yanu pophunzila, mungachite luweme kuiika pa sailenti olo kuyeja kuithaŵisha notiweki kuti mupewe vosokoneza. Keno muli nkati mophunzila mwayamba kuganizila vinthu viyakine vamufunikila kuti muchite, mungachite luweme kulemba pabuku kuti muvichite mukasilija kuphunzila. Keno vukuvutani kuika maganizo ŵanu pavinthu vamuphunila, mungachite luweme kuyamba mwapanama kuti mukayondolole mendo.