Kansi mukumbukila?

Kansi mwiŵelenga bwino-bwino magazini a Nsanja za Mulonda za chino chaka? Chabwino, yejani kuyankha makonsho aŵa ali mnyansi:

Kansi ni chisanzo chotyani chiweme chakutipasa Yehova pankhani ya mwatingachitile vinthu na anakazi?

Mulungu oŵasankhalini anakazi, olo kuchita vinthu mokondela analume. Mulungu omvwishila mapemphelo ŵa anakazi, okhuziwa na mwakumvwila, komasoti nkhaŵa zawo. Komasoti yove waŵapasa mautumiki osiyana-siyana.—Nsanja ya Mulonda 01/2024, pedji 15-16.

Kansi tingaŵakonkheje tyani malangizo ali pa Aifenso 5:7, amene onena kuti: “Osati mukochita vakuchita ove”?

Ntumwi Paulo, enzetichenjeja kuti tufunikalini kukatijana na ŵanthu amene angatikangishe kukonkheja mfundo za Mulungu mokhulupilika. Nkatijano uipa wamene uyu, ukhuzasoti ŵanthu ŵatutandala nawo pamenso na pamenso komasoti pamalo otandalila apa intaneti.—Nsanja ya Mulonda 03/2024 pedji 22-23.

Kansi tufunikila kuliteteza kunkhani zantundu wanji zawenye?

Tufunikila kunkhala osamala na nkhani ziliye umboni zofumila kuli ayasu, ma imelo ofumila kuli ŵanthu ŵatisaziŵa, komasoti ŵanthu ampatuko amene oyopejela kuti ali na chidwi na chonadi.—Nsanja ya Mulonda 04/2024, pedji 12.

Kansi nivinthu votyani vatuziŵa komasoti vatisaziŵa vokhuza vakuti azachite Yehova poweluza Mfumu Solomo, ŵanthu amene echifwa mutauni ya Sodomu na Gomola, komasoti ŵanthu amene echifwa pa Chigumula?

Kulaŵila chendi, sewo tuziŵalini keno Yehova eweluza ŵanthu amene awo kuti azankhalelinisoti na moyo. Koma olo n’tetyo, sewo tuziŵa kuti Mulungu oziŵa nkhani yonse komasoti kuti ni wachifundo chikulu ngako.—Nsanja ya Mulonda 05/2024, pedji 3-4.

Kansi kuziwa kuti Mulungu ni “Mwala” kutisimikijila chinji? (Deut. 32:4)

Sewo tingafwane malo othaŵilako kuli Yehova. Yove ni wodalilika, ndipo nthawe zonse okwanilisha malonjezo ŵake. Komasoti yove ni wosanyang’anyika, ndipo ochinjalini umunthu wake komasoti volinga vake.—Nsanja ya Mulonda 06/2024, pedji 26-28.

Kansi n’chinji chingakuyavyeni kuti mudjaile mpingo wanyowani?

Mukodalila Yehova wamene angakuyavyeni molingana na mwechiyavyila atumiki ŵake masiku akuvuli. Mukopewa kuyelekezela mpingo wanu wanyowani na wakale. Nkhalani na vochita vinyinji mumpingo wanu wanyowani, ndipo yeja-yejani kufwana azishamwali anyowani.—Nsanja ya Mulonda 07/2024, pedji 26-28.

Kansi nimaphunzilo otyani ŵatingafwane pamafanizo atatu ali pa lemba ya Mateyo chapitala 25?

Fanizo ya mbelele na mbuzi yusimikijila ngako kuti tufunika kunkhala okhulupilika. Fanizo ya ndola zochenjela na zopusa, yuwonesha kuti tufunikila kunkhala menso komasoti okozekela. Ndipo fanizo ya matalente yusimikijila ngako kuti tufunikila kunkhala akhama komasoti olimbikila.—Nsanja ya Mulonda 09/2024, pedji 20-24.

Kansi lukolo ya kachisi wa Solomo yenze itali tyani?

Pa 2 Mbiri 3:4, mipukutu iyakine yunena kuti lukolo yamene iyo yenze itali “manja 120,” kutanthauza mamita 53 kuluta mmululu. Koma mabuku ayakine odalilika onena kuti yenze itali “manja 20,” kutanthauza mamita 9. Mfundo yamene iyi yosilijila yukatijana na kukula kwa ntika wachipupa chakachisi.—Nsanja ya Mulonda 10/2024, pedji 31.

Kansi mawu akuti ntumiki woyavya ofunikila kunkhala ‘mwanalume wa mwanakazi mmozi’ otanthauza chinji? (1 Tim. 3:12)

Mawu amene aŵa otanthauza kuti yove ofunikila kulungula mwanakazi mmozi ndipo ofunikilalini kuchita chigololo. Kuyangijila pamene apo, yove ofunikilalini kukumbwila mwanakazi muyakine.—Nsanja ya Mulonda 11/2024, pedji 19.

Ndaŵa yanji tinganene kuti lemba ya Yohani 6:53 yunenalini vakufunikila kuchita ŵanthu panthawe ya Chakulya cha Nchingulo cha Ambuye?

Lemba ya Yohani 6:53, yunena za kufunika kwakulya muŵili wa Yesu komasoti kumwa milopa yake. Yesu elaŵila mawu amene aŵa mu 32 C.E., ku Galileya, penzelaŵila na Ayuda amene enze akaliyeyamba kumukhulupilila. Koma olo n’tetyo, mwambo wa Chakulya cha Nchingulo cha Ambuye, wenkhazikishiwa m’chaka chokonkhapo penze ku Yelusalemu. Panthawe yamene iyo, Yesu enzelaŵila na ŵanthu amene akuti akalamulile naye pamozi kululu.—Nsanja ya Mulonda 12/2024, pedji 10-11.