10 Kukhulupilika

VAMENE VUCHITIKA

Ŵanthu amene ni okhulupilika onkhala odalilika kuli makolo ŵawo, kuli azishamwali komasoti kuli mabwana ŵawo. Okonkheja malamulo, okwanilisha vinthu valonjeza ndipo olaŵila vachendi nthawe zonse.

NDAŴA YANJI KUGANIZILA NKHANI YAMENE IYI N’KOFUNIKA?

Nthawe zinyinji ŵanthu amene ankhala okhulupilika kwa nthawe itali niye opasiwasoti ufulu ukulu.

Sarahi enena kuti—“Makolo okudalila ngako keno nthawe zonse uchita vinthu monga ni munthu nkulu komasoti keno uchita vinthu moganiza luweme olo keno ove kuliye.”

MFUNDO YA M’BAIBOLO: “Pitilijani kuliyesa kuti muziŵe kuti nimwe munthu wotyani.”—2 Akorinto 13:5.

VAMUNGACHITE

Keno mufuna kuti makolo ŵanu akokukhulupililani olo keno enze eleka kukukhulupililani lomba mufuna kuti ayambesoti, izi mfundo zili mnyansi zingakuyavyeni.

Mukochita vinthu mwachilungamo. Ŵanthu oleka kukukhulupililani keno mukonda kutala wenye. Koma keno muvomekeja mosavuta komasoti mwachilungamo—olo mwaphoniyesha vinthu viyakine, pamene apo niye pakukukhulupililani ngako.

Caiman enena kuti—“Vunkhala vosavuta kulaŵila vachendi keno vinthu vuyenda luweme. Komalomba olo ŵanthu ayakine angakuzonde chifukwa chakuti uchita vinthu mwachilungamo, anyinji okuwona mphela kuti niwe wodalilika.”

MFUNDO YA M’BAIBOLO: “Pakuti tufuna kuchita vinthu vonse mwachilungamo.”—Aheberi 13:18.

Mukonkhala odalilika. Pa kafukufuku muyakine echitika ku United States, efwana kuti mabwana 78 pa 100 aliwonse, owona kuti munthu ofunika kunkhala wodalilika kuti amulembe ntchito. Mukoyeja-yeja kunkhala wodalilika palipano, vizakuyavyeni mukazakula.

Sarah enena kuti—“Makolo ŵangu okondwela ngako nikayamba kukata ntchito za pang’anda paliye kuchita kunikumbusha. Nikochita vamene ivi, onidalila ngako.”

MFUNDO YA M’BAIBOLO: “Nukulembela iyi kalata pokhulupilila kuti uchite vamene ivi. Nuziŵa kuti uchite olo kupambana ivi vananena.”—Filimoni 21.

Mukonkhala oleza ntima. Munthu akokula, ŵanthu owona kuti uyu munthu okula. Koma potola nthawe kuti ŵanthu awone kuti wayamba kuchita vinthu mwanzelu komasoti moganiza luweme.

Brandon enena kuti—“Vingachitikelini lelo na lelo kuti makolo ŵako olo azishamwali ŵako ayambe kukukhulupilila. Pofunika kuleza ntima komasoti nthawe yokwanila kuti vamene ivi vikwanishike.”

MFUNDO YA M’BAIBOLO: “Vwalani . . . kuleza ntima.”—Akolose 3:12.