Kansi Mulungu ni ŵani?

1. Kansi ndaŵa yanji tuwamila kumulambila Mulungu?

Tuwamila kumulambila Mulungu ndaŵa yove epanga vinthu vonse, komasoti etipa umi. Mulungu aliye poyambila komasoti aliye polekejela. (Salimo 90:2) Yove niye etipasa uthenga uweme watufwana m’Baibolo.—1 Timoteyo 1:11; Ŵelengani Chivumbulutso 4:11.

2. Kansi Mulungu ni wotyani?

Mulungu ni mzimu, paliye angamuwone ndaŵa yove ali na moyo wapalulu ngako kusiyana na vonse vechipanga. (Yohane 1:18; 4:24) Koma tikaloleshesha vechipanga tingaziŵe minkhalidwe yake. Mwachisanzo, epanga vitwazi vamitundu yosiyana-siyana, na maluŵa, vameneivi vutiwonesha chikondi na nzelu zake. Tikaloleshesha nyenyezi, zuŵa na kukula kwa chalo, kutiwonesha kuti yove ni wamphamvu.—Ŵelengani Aroma 1:20.

Njila iyakine yoziŵila Mulungu ni kuŵelenga Baibolo. Mwachisanzo, Yove yutiuja vakukonda na vasakonda Mulungu. Komasoti yutiuja mwakuchitila na ŵanthu, chifukwa cha minkhalidwe yake iweme.—Ŵelengani Salimo 103:7-10.

3. Kansi Mulungu ana zina?

Ee ana zina. Yesu elaŵila kuti: ‘Atata ŵasu mulikululu, zina yanu ituŵishiwe.’ (Mateyu 6:9) Chilaŵilo chili chonse chinanjila yake motomolela zina ya Mulungu. Mu chinsenga tunena kuti “Yehova”. Koma ayakine onena kuti “Yawe.”—Ŵelengani Salimo 83:18.

Zina ya Mulungu eyifumiyamo m’mabaibolo anyinji. M’malo mwake, eyikamo mazina aulemu monga akuti Mulungu, olo Nyamalenga. Koma peyilembewa Baibolo zina yakuti Yehova yenzopezekamo nthawe 7.000. Yesu eziŵisha ŵanthu za zina yamene iyi poŵaphunzisa za Mulungu.—Ŵelengani Yohane 17: 26.

4. Mwa Yehova osamala za sewo?

Ee osamala za sewo. Koma ŵanthu ayakine akawona matamano pachalo, onena kuti Yehova niye ochitisha. Koma kansi nichendi chameneichi? Yai niwenye.—Ŵelengani Yakobo 1:13.

Mulungu etipasa ufulu wosalula zochita. N’kuweme ngako kusalula vochita pa umi wasu. (Yoswa 24:15) Vuto ni yakuti ŵanthu anyinji oukatishilalini ntchito luweme, ochita vinthu viipa. Vamene ivi vuchitisha kuti ŵanthu anyinji akotamana. Yehova onyansiwa na kusoŵa chilungamo koteti.—Ŵelengani Genesis 6:5, 6.

Yehova ofuna kuti taotemwa na umi pachalo. Lombapano azefumyepo matamano, pamozi na ŵala oŵachitisha. Koma pali pano ali na chikomo chomvweka choŵalekela matamano kwakanthawe katontho. Kusogolo m’Mutu 8 tizamvwishe chifukwa chake kuti n’chotyani.—Ŵelengani 2 Petulo 2:9; 3:7, 13.

5. Mwa tingamuvwendelele tyani Mulungu?

Yehova otisenga kuti timuvwendelele pafupi mwa pemphelo. Yove ali na chidwi na aliyense wa sewo. (Salimo 65:2; 145:18) Niwofunishisha kutikhululukila. Chinthu chiyakine chatufunikila kuchita ni kuyeja-yeja kuchita viweme olo kuti nthawe ziyakine tukangiwa. Olo kuti nise ophoniya, tingaŵe paushamwali uweme na Mulungu.—Ŵelengani Salimo 103:12-14; Yakobo 4:8.

Tuwamila kumukonda Yehova kuposha munthu aliyense chifukwa etipa umi. (Maliko 12:30) Mwa mungawoneshe tyani kuti mumukonda? Mungawoneshe mwa kuphunzila vinyinji va yove, nochita vakukusengani. Mukatetyo ushamwali wanu na Mulungu ukulile-kulile.—Ŵelengani 1 Timoteyo 2:4; 1 Yohane 5:3.