Njila Iweme Yolambilila Mulungu

1. Kansi niŵani angatiuje njila iweme yolambilila Mulungu?

VIPEMBEZO vinyinji vulaŵila kuti vuphunzisa chendi chokhuza Mulungu. Koma uyu ni wenye, chifukwa chakuti vuphunzisa vinthu vosiyana vokhuza Mulungu na mwatingamulambilile. Kansi tingaziŵe tyani njila iweme yolambilila Mulungu? Ni Yehova yeka angatiuje mwatingamulambilile.

2. Kansi mungaiziŵe tyani njila iweme yolambilila Mulungu?

² Yehova watipasa Baibolo kuti tiziŵe njila iweme yomulambilila. Tetyo phunzilani Baibolo, chifukwa Yehova akuyavyeni kuti mupindule na viphunziso vake chifukwa chakuti yove osamala ngako za mwewo.—Yesaya 48:17.

3. Kansi Mulungu ofuna kuti tikochita chinji?

³ Ŵanthu ayakine olaŵila kuti Mulungu ovomekeja vipembezo vonse, koma Yesu aliye phunzise tetyo. Yove elaŵila kuti: “Ni onselini olaŵila kuli newo kuti, ‘Ambuye, Ambuye,’ ati akaloŵe Ufumu wa kululu yayi, koma tyala wala ochita chifunilo cha Atata ŵangu ŵa kululu.” Tetyo ni chinthu chofunika kuli sewo kuziŵa chifunilo cha Mulungu nochichita. Iyi ni nkhani yofunika ngako chifukwa chakuti Yesu elinganija ŵanthu asamvwila Mulungu na vigaŵenga, olo kuti “ŵanthu osamvwila malamulo.”—Mateyu 7:21-23.

4. Kansi Yesu elaŵila chinji pa nkhani yokhuza kuchita chifunilo cha Mulungu?

⁴ Yesu etichenjeja kuti keno tufuna kuchita chifunilo cha Mulungu, tikumane na mavuto. Yove elaŵila kuti: “Loŵani pamuliyango wopapatija, pakuti nsewu ukulu na wotambalala ukuya ku chiwonongeko, soti ŵanthu anyinji oyenda mwamene umo, koma muliyango uloŵela ku moyo ni wopapatija komasoti nsewu wake ni wofyandikija, ndipo oufwana ni oŵelengeka.” (Mateyu 7:13, 14) Nsewu wopapatija, olo kuti njila iweme yolambilila Mulungu, yusogolela ŵanthu ku moyo wosasila. Nsewu ukulu, olo kuti njila iipa yolambilila Mulungu, yusogolela ŵanthu ku imfwa. Koma Yehova ofunalini kuti munthu aliyense akawonongeke. Yove opasa munthu aliyense mwayi wophunzila vinthu vokhuza yove.—2 Petulo 3:9.

NJILA IWEME YOLAMBILILA MULUNGU

5. Kansi mungaŵaziŵe tyani ŵanthu olambila Mulungu m’njila iweme?

⁵ Yesu elaŵila kuti tingaŵaziŵe ŵanthu olambila Mulungu m’njila iweme. Tingaŵaziŵe tikafuna kuziŵa luweme vinthu vakukhulupilila na vakuchita. Yove elaŵila kuti: “Mukaŵaziŵe na vitwazi vawo.” Ndipo eyangijila kuti: “Chimuti chilichonse chiweme chutwala vitwazi viweme.” (Mateyu 7:16, 17) Ivi vutanthauzalini kuti ŵala olambila Mulungu ni ŵanthu angwilo. Koma atumiki a Mulungu oyeja-yeja kuchita vinthu viweme nthawe zonse. Lomba tiwone chingatiyavye kuziŵa ŵanthu olambila Mulungu m’njila iweme.

6, 7. Ndaŵa yanji ŵanthu olambila Mulungu m’njila iweme okonkheja mfundo za m’Baibolo? Kansi tuphunzilapo chinji pa chisanzo cha Yesu?

⁶ Vakuchita polambila vufumila m’Baibolo. Baibolo yunena kuti: “Malemba onse eujiliwa na Mulungu, soti opindulisha pa kuphunzisa, kuzuzula, kuyondolola vinthu na kulangiza m’chilungamo, kuti munthu wa Mulungu ankhale woyenelela luweme komasoti wokonzeka mokwanila kuchita ntchito iliyonse iweme.” (2 Timoteyo 3:16, 17) Ntumwi Paulo elembela Akhilisitu kuti: “Pemwilondela mawu a Mulungu ŵemwichimvwa kuli sewo, muliye ŵalondele monga ni mawu a ŵanthu yayi, koma monga mwalili chendi, mawu a Mulungu.” (1 Atesalonika 2:13) Tetyo ŵanthu olambila Mulungu m’njila iweme okatishila ntchito Mawu a Mulungu, Baibolo. Ove oyendelalini maganizo a ŵanthu, miyambo ya ŵanthu olo pa chinthu chiyakine chilichonse.

⁷ Chilichonse chenzephunzisa Yesu chenzefumila m’Mawu a Mulungu. (Ŵelengani Yohane 17:17.) Yove nthawe zonse enzekata mawu a m’Malemba. (Mateyu 4:4, 7, 10) Atumiki achendi a Mulungu okonkha chisanzo cha Yesu ndipo vonse vakuphunzisa vufumila m’Baibolo.

8. Kansi Yesu ephunzisa chinji pa nkhani yokhuza kulambila Yehova?

⁸ Ove olambila tyala Yehova yeka. Lemba ya Salimo 83:18 yunena kuti: “Kuti ŵanthu aziŵe kuti mwewo, zina yanu nimwe Yehova, mwewo mweka nimwe Wapalulu ngako, mutonga chalo chonse.” Yesu enzefuna kuti ŵanthu aziŵe kuti Mulungu wachendi niŵani, soti ephunzisa ŵanthu zina ya Mulungu. (Ŵelengani Yohane 17:6.) Yesu elaŵila kuti: “Yehova Mulungu wako niye waufunikila kulambila, ndipo ufunika kutumikila tyala yove yeka.” (Mateyu 4:10) Tetyo, atumiki achendi a Mulungu, okonkha chisanzo cha Yesu. Olambila tyala Yehova yeka, okatishila ntchito zina yake, komasoti ophunzisa ŵanthu ayakine za zina ya Mulungu na vinthu vati azatichitile.

9, 10. Kansi Akhilisitu achendi owonesha tyani kuti okonda ŵanthu ayakine?

⁹ Ofunika kunkhala na chikondi ngacho-ngacho kuli ŵanthu. Yesu ephunzisa ophunzila ŵake kuti akokondana. (Ŵelengani Yohane 13:35.) Viliye kanthu kuti onkhala kuni, ali mu ntundu uni, ni olemela olo osauka. Chikondi chawo pali muyake na muyake chuŵaunganija pamo monga abale na alongo. (Akolose 3:14) Tetyo olutalini kunkhondo na kuyapaya ŵanthu. Baibolo yunena kuti: “Ŵana a Mulungu komasoti ŵana a Mdyelekezi owonekela luweme na mfundo iyi: Aliyense wala asachita chilungamo ofumilalini kwa Mulungu, chimozi-mozisoti wamene asakonda mkwake.” Ndipo yuyangijila kuti: “Tikokondana, osati monga ni Kaini, wamene efumila kwa Satana nopaya mkwake.”—1 Yohane 3:10-12; 4:20, 21.

¹⁰ Okatishila ntchito nthawe yawo, mphamvu zawo, na chuma chawo pofuna kuyavyana nolimbikisana muyake na muyake. (Aheberi 10:24, 25) “Tuchitila ŵanthu onse viweme.”—Agalatiya 6:10.

11. Ndaŵa yanji tuvomekeja Yesu kunkhala njila yofwikila kwa Mulungu?

¹¹ Ove omvwila Yesu chifukwa chakuti yove niye njila yofwikila kwa Mulungu. Baibolo yunena kuti: “Chipulumuso chupezeka lini muli munthu aliyense, pakuti paliye zina iyakine pano pansi, yamene yapelekewa kuli ŵanthu, yamene tufunikila kupulumushiwa nayo.” (Machitidwe 4:12) M’Mutu 5 wa buku ino, tiphunzila kuti Yehova etumija Yesu kuti azapeleke moyo wake monga dipo kuli ŵanthu omvwila. (Mateyu 20:28) Yehova wasankha Yesu kuti atonge monga Mfumu pachalo chonse. Niye chifukwa chake Baibolo yutiuja kuti tufunikila kumvwila Yesu keno tufuna kunkhala na moyo wosasila pano pachalo.—Ŵelengani Yohane 3:36.

12. Ndaŵa yanji Akhilisitu achendi otolamolini mbali mu ndale?

¹² Ove otolamolini mbali m’ndale. Yesu aliyetolemo mbali m’ndale. Penzeyesewa, euja wolamulila Wachiroma zina yake Pilato kuti: “Ufumu wangu ulilini mbali ya chino chalo.” (Ŵelengani Yohane 18:36.) Monga ni Yesu, Akhilisitu achendi onkhala okhulupilika ku Ufumu wa wakululu wa Mulungu, ndipo pa chifukwa chamene ichi, otolamolini mbali m’ndale mosasamala kanthu kuti onkhala mu chalo chotyani. Koma Baibolo yulamula Akhilisitu kuti akomvwila “otonga akulu-akulu,” kutanthauza kuti maboma. (Aroma 13:1) Omvwila malamulo a mu chalo chakunkhala. Koma keno malamulo a mu chalo chakunkhala osiyana na malamulo a Mulungu, ove okonkheja chisanzo cha atumwi amene elaŵila kuti: “Sewo tufunika kumvwila Mulungu monga wotonga, osati ŵanthu.”—Machitidwe 5:29; Maliko 12:17.

13. Kansi Akhilisitu achendi olalikila uthenga wotyani wokhuza Ufumu wa Mulungu?

¹³ Ove olalikila kuti Ufumu wa Mulungu niye tyala njila yosilijila mavuto pano pachalo. Yesu elaŵila kuti “uthenga uweme uyu wa Ufumu” uzalalikiliwe pachalo chonse. (Ŵelengani Mateyu 24:14.) Paliye boma ya umunthu yamene ingachite vinthu vaukuti uzatichitile Ufumu wa Mulungu. (Salimo 146:3) Yesu etiphunzisa kupemphelela Ufumu wa Mulungu pechilaŵila kuti: “Ufumu wanu uwele. Chifunilo chanu chichitike, monga n’kululu, chimozi-mozisoti na pano pansi.” (Mateyu 6:10) Baibolo yutiuja kuti Ufumu wa Mulungu uzawononge maboma onse aumunthu soti “uzankhalepo mpaka kale-kale.”—Danieli 2:44.

14. Kansi muwona kuti niŵani olambila Mulungu m’njila iweme?

¹⁴ Pavuli pakuti mwaphunzila mfundo zonse izi, likonsheni kuti: ‘Kansi ni ŵanthu achipembezo chotyani ophunzisa mfundo zofumila m’Baibolo? Kansi niŵani oujako ayakine za zina ya Mulungu? Kansi niŵani owonesha chikondi ngacho-ngacho ku muyake na muyake, nokhulupilila kuti Mulungu etumija Yesu kuti azatipulumushe? Kansi niŵani asatolamo mbali m’ndale za chino chalo? Kansi niŵani olalikila kuti ni Ufumu wa Mulungu weka ungasilije mavuto ŵasu?’ Ni a Mboni za Yehova tyala.—Yesaya 43:10-12.

KANSI MWEWO MUCHITE CHINJI?

15. Kansi tufunika kuchita chinji keno tufuna kuti Mulungu avomekeje kulambila kwasu?

¹⁵ Kukhulupilila tyala kuti Mulungu aliko n’kosakwanila. Olo viŵanda navo vukhulupilila kuti Mulungu aliko, koma vumumvwilalini. (Yakobo 2:19) Keno tufuna kuti Mulungu avomekeje kulambila kwasu, tufunikalini kukhulupilila tyala kuti yove aliko, koma tufunika kuchita vinthu vakutiuja.

16. Ndaŵa yanji tufunika kufumamo m’chipembezo chawenye?

¹⁶ Kuti Mulungu avomekeje kulambila kwasu, tufunika kufumamo m’chipembezo chawenye. Mneneli Yesaya elemba kuti: “Fumamponi pakati pake, nkhalani atuŵa.” (Yesaya 52:11; 2 Akorinto 6:17) N’chifukwa chake tufunika kupewa chinthu chilichonse chukatijana na kulambila kwawenye.

17, 18. Kansi “Babulo Nkulu” ni chinji, soti ndaŵa yanji mufunika kufumamo kamangu?

¹⁷ Kansi chipembezo chawenye n’chinji? Ni chipembezo chilichonse chamene chuphunzisa ŵanthu kulambila Mulungu m’njila yosiyana na vakunena Mawu ŵake Baibolo. Baibolo yutomola kuti vipembezo vonse vawenye ni “Babulo Nkulu.” (Chivumbulutso 17:5) Ndaŵa yanji? Pavuli pa Chigumula cha m’nthawe ya Nowa, viphunziso vinyinji vawenye va vipembezo, viyambila mu tauni ya Babulo. Viphunziso vamene ivo vimwajikila pachalo chonse. Mwachisanzo, ŵanthu enzenkhala mu tauni ya Babulo enzelambila magulu a milungu itatu. Olo masiku ŵano, vipembezo vinyinji vuphunzisa kuti Mulungu ni Utatu, koma Baibolo yunena momvwika luweme kuti pali tyala Mulungu yumo wachendi, Yehova, komasoti kuti Yesu ni Mwana wake. (Yohane 17:3) Ŵanthu enzenkhala m’tauni ya Babulo enzekhulupililasoti kuti mbali iyakine ya munthu yupitilija kunkhala na moyo pavuli pakuti munthu wafwa na kuti mbali yamene iyo inganzunzike ku mulilo wa helo. Koma wamene uyu ni wenye.—Onani Mawu Akumapeto 14, 17, na 18.

¹⁸ Mulungu elaŵililatu kuti lombapano vipembezo vonse vawenye viwonongewe. (Chivumbulutso 18:8) Kansi mwamvwisha chifukwa chake mufunika kufumamo kamangu mu chipembezo chawenye? Yehova Mulungu ofuna kuti mufumemo manzi akali mu nkhokola.—Chivumbulutso 18:4.

19. Keno mwasankha kutumikila Yehova, kansi yove akusamalileni tyani?

¹⁹ Keno mwasankha kufumamo mu chipembezo chawenye nosankha kutumikila Yehova, ayakine mwa azishamwali ŵanu olo enekwanu angakondwelelini na chosankha chanu ndipo angayambe kukuvutishani. Koma Yehova angakusiyenilini. Munkhale mbali ya enekwasu a pachalo chonse ya ŵanthu mamiliyoni amane ali na chikondi ngacho-ngacho ku muyake na muyake, soti munkhale na chiyembekezo chakuzankhala na moyo wosasila m’chalo chanyowani cha Mulungu. (Maliko 10:28-30) Payakine ayakine mwa azishamwali ŵanu olo enekwanu amene oshusha chosankha chanu chotumikila Yehova, pavuli pake angayambe kuphunzila Baibolo.

20. Ndaŵa yanji ni chinthu chofunika ngako kulambila Mulungu mu njila yovomelejeka?

²⁰ Lombapano, Mulungu awononge ŵanthu onse aipa, soti Ufumu wake uzatonge pachalo chonse. (2 Petulo 3:9, 13) Kulaŵila chendi, yamene iyo izankhale nthawe yokondwelesha ngako! Aliyense azalambile Yehova mu njila yakuvomekeja. Tetyo ni chinthu chofunika ngako kuchitapo kanthu lombateti nolambila Mulungu mu njila yovomelejeka.