Vamungachite kuti mukopindula mokwanila na Baibolo

Kansi mwewo pemwifuna kuyambisha ntchito ikulu mweiwona kunkhala yovuta ngako? Kuti muchefyeko mavuto pa ntchito yamene iyo, mwewo mungaigaŵe muvigawo vitontho-vitontho komasoti m’njila yosavuta. N’chimozi-mozisoti na chendi chatuŵelenga m’Baibolo. Mwewo mungalikonshe kuti: Kansi ningayambile pani? M’mutu uno, tikambilane vinthu viyakine vosavuta vamungachite, vamene vingakuyavyeni kukonda kuŵelenga komasoti kuphunzila Baibolo.

1. Ndaŵa yanji tufunika kuŵelenga Baibolo nthawe zonse?

Munthu oŵelenga Baibolo nthawe zonse, olo kuti “chilamulo cha Yehova,” onkhala wosangalala komasoti vinthu vumuyendela luweme. (Ŵelengani Salimo 1:1-3.) Poyamba, yejani kuŵelenga kwa maminesi atontho nsiku iliyonse. Koma mwewo mukapitilija kuyoloŵela Mawu a Mulungu, muyambe kukonda ngako kuŵelenga Baibolo.

2. Kansi n’chinji chingakuyavyeni kuti mupindule na kuŵelenga Baibolo?

Kuti tipindule ngako tikoŵelenga Baibolo, tufunika kupanama na kuganizila ngako pa vinthu vataŵelenga. Tufunika kuŵelenga na “kusinkhasinkha vamene ivo.” (Yoswa 1:8) Mukoŵelenga, likonsheni makonsho aŵa: ‘Kansi vamene ivi vuniuja chinji vokhuza Yehova Mulungu? N’nga ningavikatishile ntchito tyani pamoyo wangu? Kansi ningakatishile ntchito tyani mavesi amene aŵa kuti niyavye ŵanthu ayakine?’

3. Kansi Mungaifwane tyani nthawe yoŵelenga Baibolo?

Kansi mwewo muli na vuto yakuti mukwanishalini kufwana nthawe yakuti muŵelenge Baibolo? Anyinji asewo tilinayo vuto yamene iyi. Yeja-yejani “kukatishila ntchito luweme nthawe yanu.” (Aefeso 5:16) Mungachite vamene ivi mwa kupatula nthawe yakuti mukoŵelenga Baibolo nsiku iliyonse. Ŵanthu ayakine opatula nthawe yakuti aŵelenge Baibolo kukali mmawa ngako. Ayakine osalula kanchingulo, olo nthawe ziyakine nzuŵa panthawe yakulya. Koma ayakine oŵelenga Baibolo usiku, akaliye yona. Kansi njila iweme ngako kuli mwewo niyotyani?

VATI TIPHUNZILE

4. Phunzilani kuti mukokonda kuŵelenga Baibolo

Vingankhale vovuta kuyamba kuŵelenga Baibolo. Olo vili tetyo tingakwanishe kuphunzila “kukonda” kuŵelenga Baibolo, monga ni mwatingaphunzilile kukonda kulya chakulya chatikaliyelyapo. Ŵelengani 1 Petulo 2:2, ndipo pavuli pake mukambilane konsho iyi:

• Kansi muganiza kuti kuŵelenga Baibolo nsiku zonse kungakuyavyeni kuti muyambe kuikonda ngako nokuchitishani kufuna kuŵelenga vinyinji?

Lolelani VIDIYO kuti muwone mwamene ŵanthu ayakine mwechiyambila kukonda kuŵelenga Baibolo. Pavuli pake mukambilane makonsho aŵa okonkhapo.

VIDIYO: Achilumbwana ophunzila kukonda Mawu a Mulungu (5:33)

• Mu vidiyo yamene iyi, kansi ni mavuto otyani ŵakukumana nawo achilumbwana?

• Kansi n’chinji chiŵayavya kuti akwanilishe cholinga chawo choŵelenga Baibolo nthawe zonse?

• Kansi ove echita chinji kuti kuŵelenga Baibolo kunkhale kosangalasa ngako?

Vinthu vamene vingakuyavyeni kuti muyambe kuŵelenga Baibolo:

• Salulani Baibolo yomasuliliwa molondola, komasoti yomvwika luweme. Yejani kuŵelenga Baibulo la Dziko Latsopano keno yupezeka n’chilaŵilo chanu.

• Poyamba ŵelengani mbali zukusangalasani ngako. Kuti muziŵe vinyinji, onani tchati yakuti “Yambani kuŵelenga Baibolo.”

• Mukochonga machapitala ŵamwaŵelenga. Katishilani ntchito tchati chakuti “Chongani machapitala amwaŵelenga kale” chili mubuku ino.

• Katishilani ntchito JW Library^®. Pamene apa mwewo mungakwanishe kumvwishila na kuŵelenga Baibolo kumalo aliwonse kwamungankhale pokatishila ntchito foni yatachi olo chipangizo chiyakine.

• Katishilani ntchito zakumapeto mu Baibulo la Dziko la Tsopano. Kupamikijapo mamapu, matchati komasoti mulozela mawu vingakuyavyeni kuti kuŵelenga Baibolo kwanu kukonkhala kosangalasa.

5. Konzekelani phunzilo yanu ya Baibolo

Ŵelengani Salimo 119:34, ndipo Pavuli pake mukambilane konsho iyi:

• Ndaŵa yanji tufunika kuchita pemphelo tikaliyeyamba kuŵelenga Baibolo olo tikaliyeyamba kukonzekela phunzilo ya Baibolo?

Kansi mwewo mungachite chinji kuti mukopindula ngako pa mbali iliyonse ya phunzilo? Pokonzekela mutu uliwonse mu mbali yamene iyi, yejani kukonkheja njila izi zokonkhapo:

Kansi mwewo muziŵa?

Amboni za Yehova akatishila ntchito Mabaibolo anyinji omasuliliwa munjila zosiyana-siyana. Olo n’tetyo tutembeja noikonda mwapadela Baibulo la Dziko Latsopano la Malemba Opatulika chifukwa yunena vachendi, niyomvwika luweme komasoti yukatishila ntchito zina ya Mulungu.—Onani Nkhani yapa webisaiti yakuti “Kansi a Mboni za Yehova ali na Baibolo yawo-yawo?”

MFUNDO ZACHIDULE

Kuti mukopindula ngako na Baibolo, fwanani nthawe yoŵelenga, pemphelani kuti mukomvwishisha vamuŵelenga komasoti konzekelani mbali iliyonse ya phunzilo ya Baibolo.

Makonsho oweleja

• Kansi n’chinji chingakuyavyeni kuti mukopindula ngako na Baibolo?

• Kansi ni nthawe yanji pamungafwane nthawe yoŵelenga na kuphunzila Baibolo?

• Ndaŵa yanji kukonzekela mbali za phunzilo ya Baibolo n’kofunika?

PHUNZILANI VINYINJI

Fwanani mfundo ziyakine zamene zingakuyavyeni kuti mukopindula ngako poŵelenga Baibolo.

“Kansi mungachite tyani kuti kuŵelenga Baibolo kukokusangalasani?” (Nsanja ya Olonda N.° 1 2017)

Phunzilani njila zitatu zamungakatishile ntchito poŵelenga Baibolo.

“Kansi Baibolo inganiyavye tyani?—Mbali 1: Kuganizila ngako mfundo za m’Baibolo” (Nkhani yapa webisaiti)

Onani mwamungasangalalile na kuŵelenga Baibolo.

“Kansi Baibolo inganiyavye tyani?—Mbali 2: Chitishani kuŵelenga Baibolo kunkhala kosangalasa” (Nkhani yapa webisaiti)

Fwanani njila ziyakine zophunzilila kufumila kuli ŵanthu amene aŵelenga Baibolo kwa vyaka vinyinji.

Phunzilo yapaweka yuyavya (2:06)