MUTU 16
Kansi Yesu echita votyani alipano pa chalo?
Ŵanthu anyinji akaganizila za Yesu okumbukila monga, awona mwana wamene wayonekewa molyelamo vifuwo, monga mneneli wanzelu kapena olo kukumbukilasoti mwechifwela. Koma kansi kuphunzila vokhuza moyo wa Yesu penze pano pa chalo kungatiyavye tyani kumuziŵa luweme?
1. Kansi ni ntchito yotyani yofunika ngako yenzekata Yesu?
Yesu enzekata ntchito yofunika ngako yamene ni “kulengeza uthenga uweme wa Ufumu wa Mulungu.” (Ŵelengani Luka 4:43.) Yove enzelalikila uthenga uweme wakuti Mulungu azankhazikishe ufumu, olo boma, yamene ikuti izapulumushe ŵanthu osiyana-siyana ku mavuto ŵawo.a Kwa vyaka vitatu na hafu, Yesu ekata ntchito mwakhama ngako kuti auje ŵanthu uthenga wamene uyu motang’a ntima.—Mateyu 9:35.
2. Kansi vodabwisa venzechita Yesu venze na cholinga chotyani?
Baibolo yufotokoza “ntchito zamphamvu, na vodabwisa komasoti vizindikilo vinyinji vechichita Mulungu kupitila mwa [Yesu].” (Machitidwe 2:22) Na mphamvu za Mulungu Yesu ekwanisha kulamulila mphepo, elyesha ŵanthu masauzande anyinji, kuchija olwala, komasoti mpaka kuusha akufwa. (Mateyu 8:23-27; 14:15-21; Maliko 6:56; Luka 7:11-17) Vodabwisa venzechita Yesu venzewonesha patuŵa kuti yove etumiwa chendi na Mulungu. Vodabwisa vamene ivi viwoneshasoti patuŵa kuti Yehova ali na mphamvu zotipulumusha ku mavuto ŵasu.
3. Kansi tingaphunzilepo chinji pa vinthu venzechita Yesu?
Yesu enzemvwila Yehova pa chochitika chilichonse. (Ŵelengani Yohane 8:29.) Olo kuti enzeshushiwa, Yesu echita vinthu vonse vechimusenga Atata ŵake kuti achite. Yove echita vamene ivi na moyo wake wonse pano pa chalo olo kuti anyinji enzeyeja-yeja kumulesha. Yove ewonesha patuŵa kuti n’vokwanishika ŵanthu kutumikila Mulungu, olo kuti okumana na vinthu vovuta pa moyo. Tetyo, yove etisiila “chisanzo [sewo] kuti tikonkheje maluwayo ŵake.”—1 Petulo 2:21.
VATI TIPHUNZILE
Tikambilane mwamene Yesu mwechiujila ŵanthu uthenga uweme komasoti vodabwisa venzechita.
4. Yesu elalikila uthenga uweme
Yesu eyenda maulwendo atali-atali mmisewu ya lukungu, kuti alalikile uthenga uweme kuli ŵanthu anyinji. Ŵelengani Luka 8:1, ndipo pavuli pake mukambilane makonsho aŵa:
Kansi Yesu elalikila tyala ŵala ŵanthu amene enzesonkhana kuti amumvwishile?
Kansi Yesu eyeja-yeja tyani kuti afwane ŵanthu?
Mulungu enenelatu kuti Mesiya azalalikile uthenga uweme. Ŵelengani Yesaya 61:1, 2, ndipo pavuli pake mukambilane makonsho aŵa:
Kansi Yesu ekwanilisha tyani ulosi wamene uyu?
Kansi mwewo muganiza kuti ŵanthu masiku ŵano angafunike kumvwa uthenga uweme wamene uyu?
5. Yesu ephunzisa mfundo zinyinji zofunika zachendi
Kuyangijila pa kulalikila uthenga wa Ufumu wa Mulungu, Yesu ephunzisa mfundo zothandiza. Tiyeni tiwone visanzo viyakine va Ulaliki wotchuka wapa Lupili. Ŵelengani Mateyu 6:14, 34 na 7:12, ndipo pavuli pake mukambilane makonsho aŵa:
Kansi Yesu epeleka malangizo othandiza otyani pa mavesi amene aŵa?
Kansi muwona kuti malangizo amene aŵa angankhale othandiza kuli ŵanthu masiku ŵano?
6. Yesu echita vinthu vodabwisa
Yehova emupasa mphamvu Yesu kuti achite vodabwisa vosiyana-siyana. Kuti muwone chisanzo chimozi, ŵelengani Maliko 5:25-34 olo lolelani VIDIYO. Ndipo pavuli pake mukambilane makonsho aŵa:
Kansi mwanakazi watawona mu vidiyo enzekhulupilila chinji?
Kansi n’chinji chamwakondwela nacho pa chochitika chamene ichi?
Ŵelengani Yohane 5:36, ndipo pavuli pake mukambilane konsho iyi:
Kansi vodabwisa va Yesu vemuchitila “umboni wotyani” olo vimusimikijila chinji, ponena za yove?
Kansi muziŵa?
Vinthu vinyinji vokhuza moyo wa Yesu vupezeka m’mabuku okwana 4 a m’Baibolo oitiwa kuti Uthenga Uweme—Mabuku amene aŵa ni Mateyu, Maliko, Luka, na Yohane. Wolemba aliyense efotokoza vinthu vosiyana-siyana vokhuza Yesu. Tikoŵelenga mabuku amene aŵa, tumvwisha luweme vinthu vichitika pa moyo wa Yesu.
MATEYU
niye eyamba kulemba Uthenga Uweme. Buku yamene iyi yutiuja vinthu vinyinji, maka-maka vechiphunzisa Yesu vokhuza Ufumu wa Mulungu.
MALIKO
niye elemba buku ifupi ngako pa mabuku a Uthenga Uweme. Buku-yamene iyi yutiuja vinthu vinyinji vochitisha chidwi.
LUKA
buku yamene iyi yunena kuti Yesu enzewona kuti pemphelo niyofunika ngako pa moyo wake komasoti kuti enzechita vinthu mwachifundo na anakazi.
YOHANE
niye efotokoza minkhalidwe inyinji ya Yesu. Tunena tetyo chifukwa chakuti elemba vinthu vinyinji vamene Yesu venzekambilana na azishamwali ŵake apantima komasoti ŵanthu ayakine.
ŴANTHU AYAKINE ONENA KUTI: “Yesu enze tyala munthu muweme, koma yove enzelini Mesiya.”
Kansi mwewo muganiza tyani?
MFUNDO ZACHIDULE
Yesu enzelalikila vokhuza Ufumu wa Mulungu, echita vodabwisa, komasoti emvwila Yehova pa chochitika chilichonse.
Makonsho oweleja
Kansi ntchito ikulu yenzekata Yesu pano pa chalo yenze yotyani?
Kansi vodabwisa va Yesu venzesimikijila chinji?
Kansi ni mfundo zothandiza zotyani zenzephunzisa Yesu?
PHUNZILANI VINYINJI
Kansi ni nkhani yotyani yenzekonda kukambilana na ŵanthu Yesu?
“Yesu enzewona Ufumu wa Mulungu—kunkhala wofunika ngako” (Nsanja ya Olonda, 1 October, 2014)
Sakilani kuti muwone chifukwa chake tingafunike kukhulupilila kuti Yesu echita vodabwisa.
“Kansi pa vodabwisa va Yesu—mungaphunzilepo chinji?” (Nsanja ya Olonda, 15 July, 2004)
Ŵelengani iyi nkhani kuti muziŵe mwechisinthila munthu muyakine pechiphunzila kuti Yesu enzekonda ngako ŵanthu ayakine.
“Nenze munthu wolikonda ngako” (Nsanja ya Olonda, 1 October, 2014)
Onani vochitika vikulu-vikulu vokhuza utumiki wa Yesu mokatijana na nthawe yevichitika.
M’mutu 31-33 tizakambilane vinyinji vokhuza Ufumu wa Mulungu wamene uyu.