Kansi n’chinji chuchitika munthu akamwalila?

Kansi mwewo mweluzako kale munthu wemwenzekonda mu imfwa? Pa chochitika chovuta monga ni chamene ichi payakine mwewo mungalikonshe kuti: ‘Kansi n’chinji chuchitika munthu akamwalila? Kansi niyekuti nizamuwonelinisoti munthu wenenzekonda?’ M’mutu wamene uno komasoti wokonkhapo tiwone mayankho ofumila m’Baibolo amene angatitonthoje ngakosoti.

1. Kansi n’chinji chuchitika munthu akamwalila?

Yesu elinganija imfwa na tulo. Munthu wamene wayona tulo twakufwa nato oziŵalini vinthu vuchitika pafupi na yove. Kansi imfwa yulingana na tulo mu njila yotyani? Pavuli pakuti munthu wamwalila paliye chilichonse chakuganiza. Yove akumvwalini kuŵaŵa ndipo otamanalini. “Akufwa oziŵalini chilichonse” yunena tetyo Baibolo.​—Ŵelengani Mlaliki 9:5.

2. Kansi kuziŵa chendi chokhuza imfwa kutiyavya tyani?

Ŵanthu anyinji ochita wowa na kufwa​—komasoti ochita wowa na ŵanthu echifwa. Koma tikaziŵa vayuphunzisa Baibolo pankhani ya imfwa, sewo tingaleke kuchita wowa. Yesu enena kuti: “Ndipo choonadi chizakumasuleni.” (Yohane 8:​32) Vipembezo vinyinji pa chalo chonse vuphunzisa kuti munthu akamwalila pali mzimu upitilija kunkhala na moyo koma Baibolo yuphunzisalini vamene ivi. Olo ntetyo paliye otamana pavuli pakuti wafwa, molingana na vamene ivi ŵanthu akufwa angatichitilelini vinthu viipa chifukwa chakuti ove paliye chilichonse chakuziŵa komasoti vuchitika. Tetyo tufunikalini kuchita vinthu vingaŵakondweleshe, kuŵalambila olo kuŵapemphelela.

Ayakine onena kuti tingakwanishe kulaŵila na akufwa. Koma vamene ivi ni vosakwanishika. Lomba takwanisha kuwona kuti akufwa oziŵalini chilichonse. Keno munthu muyakine oganiza kuti angakwanishe kulaŵila na shamwali wake olo wabanja wake wamene emwalila kulaŵila chendi onkhala kuti olaŵila na viŵanda vamene vuyejelela munthu wala amene emwalila. N’chifukwa chake kuziŵa chendi chokhuza imfwa kutiteteza ku viŵanda. Yehova otiuja kuti tufunikalini kuyeja kulaŵila na ŵanthu akufwa, chifukwa oziŵa kuti viŵanda vingatiike pa ngozi.​—Ŵelengani Deuteronomo 18:10-​12.

3. Phunzilani chendi chokhuza akufwa

Pa chalo chonse ŵanthu ali na maganizo osiyana pa vamene vuchitika munthu akamwalila. N’chendi kuti ni maganizolini onse amene angankhale achendi.

• Kudela kwamunkhala mwewo kansi ŵanthu oganiza kuti nichinji chuchitika munthu akamwalila?

VIDIYO: N’chinji chuchitika tikafwa?​—Kambali kafupi (1:​19)

Ŵelengani Mlaliki 3:​20, ndipo pavuli pake mukambilane makonsho aŵa:

• Mokatijana na vesi yamene iyi n’chinji chuchitika munthu akamwalila?

• Kansi lemba yamene iyi yunena kuti munthu akamwalila moyo wake kapena mzimu wake upitilija kunkhala na moyo kumalo ayakine?

Baibolo yutiuja za imfwa ya Lazaro shamwali nkulu wa Yesu ŵelengani Yohane 11:11-​14, onani vechinena Yesu vokhuza vinthu vechitikila Lazaro. Ndipo pavuli pake mukambilane makonsho aŵa:

• Kansi Yesu elinganija imfwa na chinji?

• Lomba kulinganija kwamene uku kutiphunzisa chinji vokhuza vuchitika munthu akamwalila?

• Kansi mwewo muganiza kuti vayunena Baibolo ni vomvwika?

4. Kuziŵa chendi chokhuza imfwa kungatiyavye ngakosoti

Tikaziŵa chendi chokhuza imfwa, kungatichitishe kusilija wowa wokhuza za akufwa. Ŵelengani Mlaliki 9:​10, ndipo pavuli pake mukambilane konsho iyi:

• Kansi akufwa angatichite chiipa chilichonse?

Tikaziŵa chendi cha m’Baibolo tingakhulupililelini wenye wakuti tufunika kukondwelesha ŵanthu echifwa olo kuŵalambila. Ŵelengani Yesaya 8:​19 na Chivumbulutso 4:​11, ndipo pavuli pake mukambilane konsho iyi:

• Kansi muganiza kuti Yehova akumvwa tyani akawona munthu osenga munthu wamene emwalila kale kuti amuyavye olo kumulambila?

5. Tunkhala omasuka tikaziŵa chendi chokhuza za ŵanthu emwalila

Ŵanthu anyinji ophunzila kuti akazakufwa azatamanishiwe chifukwa cha vinthu viipa vechichita. Koma n’vokondwelesha ngako kuziŵa kuti tutamanishiwalini pavuli pakuti tafwa olo kuti tenze tichitako vinthu viipa. Ŵelengani Aroma 6:7, ndipo pavuli pake mukambilane konsho iyi:

• Baibolo yunena kuti munthu akamwalila onkhala womasuka ku uchimo wake, olo kuti kwa Mulungu machimo ŵake afyimvyiwa, molingana na vamene ivi, kansi mwewo, muganiza kuti munthu akafwa akapitilije kutamanishiwa chifukwa cha machimo ŵechichita?

Tikaphunzila vinyinji vokhuza Yehova, tumvwisha luweme kuti Yehova angachitishelini kuti ŵanthu akufwa akotamana. Ŵelengani Deuteronomo 32:4 na 1 Yohane 4:8, ndipo pavuli pake mukambilane makonsho aŵa:

• Kansi Mulungu wamene ali na minkhalidwe iweme yatawona mu mavesi aŵa angatamanishe munthu pavuli pakuti wamwalila?

• Kansi mwewo mukumvwa bwino kuziŵa chendi chokhuza vinthu vuchitika munthu akamwalila? Ndaŵa yanji?

MFUNDO ZACHIDULE

Munthu akafwa, paliye chilichonse chakuziŵa. Akufwa otamanalini ndipo angavutishelini ŵanthu amoyo.

Makosho oweleja

• N’chinji chuchitika munthu akamwalila?

• Kansi kuziŵa chendi chokhuza imfwa kutiyavya tyani?

• Ndaŵa yanji kuziŵa chendi chokhuza imfwa n’kothandiza?

PHUNZILANI VINYINJI

Onani tanthauzo ya m‘Baibolo ya mawu akuti “moyo”.

“Kansi moyo ni chinji”? (N’khani yapa webisaiti)

Ziŵani keno Mulungu okatishila ntchito mulilo potamanisha ŵanthu aipa.

Kansi Mulungu onyesha ŵanthu pamulilo? (3:​07)

Kansi niyekuti tingochita wowa na ŵanthu echifwa?

Kodi Mizimu ya Akufa ​—Ilipodi? (bulosha)

Onani mwamene mwanalume muyakine mwechinkhalila womasuka pavuli pophunzila chendi chokhuza vuchitika munthu akamwalila.

“Nifwana mayakho okata ntima, amakonsho ŵangu” (Nsanja ya Olonda, 1 February, 2015)