Kansi Ufumu wa Mulungu uzachite chinji?

VINTHU VAWACHITA KALE UFUMU WA MULUNGU

Mu nkhani yapita, tiwona chizindikilo chechipeleka Yesu. Chizindikilo chamene ichi ni umboni woonekelatu wotisimikijila kuti Ufumu wa Mulungu winkhazikishiwa kululu ndipo Yesu Khilisitu niye esankhiwa kuti ankhale Mfumu.

Baibolo yufotokoza kuti Yesu pechinkhala Mfumu, epitikisha Satana pamozi na viŵanda vake kululu. Lomba Satana na viŵanda vake ali pano pansi, chamene ichi n’chimozi mwa vifukwa vapangisha kuti vinthu viipe ngako pano pachalo kufumila mu chaka cha 1914.​—Chivumbulutso 12:7, 9.

Olo kuti vinthu n’vovuta pano pachalo, Ufumu wa Yesu wiyamba kale kuyavya ŵanthu pachalo chonse. Molingana na mwechifotokozela Yesu za vinthu viti vizachitike, ŵanthu anyinjii ophunzila na kukatishila ntchito mfundo za m’Baibolo pa moyo wawo soti ochita vamene ivi moyavyiwa na pulogilamu yophunzilila Baibolo yamene yuchitika pachalo chonse. (Yesaya 2:2-4) Ŵanthu mamiliyoni anyinji aphunzila kunkhala na maganizo aweme pankhani ya ntchito, mwangankhalile na banja yosangalala komasoti kusangalala na vinthu vakuthupi koma osankhala akapolo a chuma. Ŵanthu amene aŵa ophunzila mwangankhalile na moyo wosangalala palipano komasoti mwangankhalile ntundu wa ŵanthu wakufuna Mulungu kuti azankhale pano pachalo kusogolo.

KANSI UFUMU WA MULUNGU UZACHITE VINTHU VOTYANI KUSOGOLO?

Yesu otonga kale kululu, koma chalo chikali tongewa na ulamulilo wa ŵanthu. N’chifukwa chake, Mulungu euja Yesu kuti: “Nkhoya ukagonjese ŵanthu pakati pa adani ŵako.” (Salimo 110:2) Lombapano Yesu azawononge adani ŵake onse ndipo azalete chipulumuso kuli ŵala omvwila Mulungu na ntima wonse.

Nthawe yamene iyi ikazafwika, Ufumu wa Mulungu uzachite vinthu ivi:

• Kuwononga chipembezo chawenye. Vipembezo vamene vuphunzisa ŵanthu vinthu vawenye vokhuza Mulungu komasoti vuchitisha mavuto pa moyo wa ŵanthu vizasile. Chifukwa cha machimo ya chipembezo chawenye Baibolo yuchilinganija na hule. Chiwonongeko chake chizawele mozizimusha kuli ŵanthu anyinji.​—Chivumbulutso 17:15, 16.

• Kuwononga ulamulilo wa ŵanthu. Ufumu wa Mulungu udzechitapo kanthu posilija maboma onse a ŵanthu.​—Chivumbulutso 19:15, 17, 18.

• Kuwononga ŵanthu aipa. Kansi n’chinji chiti chizachitikile ŵanthu osankha kuchita vinthu viipa komasoti asafuna kumvwila Mulungu? “Koma ŵanthu aipa azachosewe pachalo, aukhuluku azajuliwemo.”​—Miyambo 2:22.

• Kuwononga Satana pamozi na viŵanda vake. Satana pamozi na viŵanda vake azakwanishe lini “ kuluŵilishasoti mitundu ya ŵanthu.”​—Chivumbulutso 20:3, 10.

Kansi ni vinthu viweme votyani viti vizachitikile ŵanthu omvwila malamulo a Ufumu wa Mulungu?

VATI UZACHITE UFUMU WA MULUNGU KULI ŴANTHU

Vinthu vati azachite Yesu monga Mfumu, vingalingane lini olo patontho na vinthu vilivonse vangachite wolamulila wa umunthu. Yesu azayavyiwe na ŵanthu okwana 144.000, amene osankhiwa pano pachalo kuti akalamulile naye pamozi kululu. (Chivumbulutso 5:9, 10; 14:1, 3) Yesu azawonesheshe kuti chifunilo cha Mulungu chuchitika pachalo. Kansi Ufumu wa Mulungu uzaŵachitile chinji ŵanthu onkhala pachalo?

• Uzachose matenda na imfwa. “Paliye munthu ati azankhale m’nchalo chameneicho ati azalaŵile kuti: ‘Newo nulwala,’” komasoti “imfwa izaŵepolinisoti.”​—Yesaya 33:24; Chivumbulutso 21:4.

• Uzalete ntendele ngawo-ngawo na chitetezo. “Ntendele wa ŵana ŵako uzankhale unyinji,” komasoti “Aliyense azankhale m’nyansi mwa chimuti chake cha mpesa, na chimuti chake cha nkuyu, ndipo pazaŵeve woŵayofya.”​—Yesaya 54:13; Mika 4:4.

• Uzapeleke ntchito yatanthauzo kwa onse. “Ŵanthu ŵangu osaluliwa mwapadela azapindule mofwikapo na ntchito ya manja ŵawo. Azakate lini ntchito patyala.”​—Yesaya 65:22, 23.

• Uzakonze kuwonongeka kwa chilengedwe. “Chipululu komasoti malo aliye manzi vizakondwele. Dela yachipululu izakondwele ndipo izachite maluŵa nonkhala iweme n’nga liluŵa ya safiloni.”​—Yesaya 35:1.

• Uzaphunzise ŵanthu vinthu vakufunikila kuchita kuti azankhale na moyo wosasila. “Pakuti moyo wosasila akaufwane akophunzila, noziŵa za mwewo mweka Mulungu wachendi, na wala wemwitumija, Yesu Khilisitu.”​—Yohane 17:3.

Mulungu ofunishisha ngako kuti mwewo muzalondele madaliso amene aŵa. (Yesaya 48:18) Nkhani yokonkhapo izafotokoze vinthu vamufunikila kuchita kuti munkhale na sogolo iweme.