Kuyangijila luso yasu mu utumiki—Mukonkhala okonzeka kuchinja ulaliki

NDAŴA YANJI KULI KOFUNIKA: Ozozewa komasoti a nkhosa ziyakine oyita ŵanthu amitundu yonse kuti “azamwe manzi mwamahala”. (Chv 22:17) Fanizo ya manzi amene aŵa yupanamila vinthu vonse vakupeleka Yehova kuti apulumuse ŵanthu ku uchimo na imfwa. Kuti tiyavye ŵanthu ochita miyambo komasoti avikhulupililo vavipembezo vosiyana-siyana, tufunika “kuŵapasa uthenga uweme wosasila” munjila yakukonda aliyense payeka-payeka.—Chv 14:6.

KANSI MUNGACHITE TYANI VAMENE IVI:

• Salulani nkhani komasoti malemba angafwike pa ntima ŵanthu a mugawo yanu. Mungasalule makambilano achidule a chisanzo olo kusalula nkhani zamukatishila ntchito mwomvwika luweme. Kansi ni nkhani zotyani komasoti malemba otyani ŵakukonda ŵanthu? Kansi m’maganizo a ŵanthu muli nkhani yachitika kwalombapano? Kansi ni nkhani zotyani zingakope munalune olo munakazi?

• Pa makambilano ŵanu mungayanjilepo mwamungapelekele moni komasoti na miyambo yoziŵika ngako mudela yanu.—2Ak 6:3, 4

• Mukoziŵa mabuku na mavidiyo amene opezeka pa mbali yasu ya vinthu vatukatishila ntchito pophunzisa, kuti muyavye aliyense waonesha chidwi.

• Mukotola vinthu pa saiti muchilaŵilo cha ŵanthu ŵamungapeze mugawo yanu.

• Mukosintha nkhani yanu kuti ikatijane na vosowa va munecho wa ng’anda. (1Ak 9:19-23) Mwachisanzo, kansi mungachite tyani keno mwaziŵa kuti munecho wa ng’anda efwelewa kwalombapano?

LOLELANI VIDIYO, PAVULI PAKE YANKHANI MAKONSHO AŴA:

• Kansi wofalisa uyu ni nkhani yotyani yakukambilana na munecho wa ng’anda?

• Kansi n’chinji chuchitikila munecho wa ng’anda pa moyo wake?

• Kansi ni malemba otyani enzefunika pa chochitika chamene ichi, soti ndaŵa yanji?

• Kansi muchinja tyani ulaliki wanu kuti ukope ŵanthu a m’gawo yanu?