Kansi tingaphunzile chinji kufumila mu nyimbo zasu?

Kansi ni nyimbo zotyani pa nyimbo zasu zamukonda? Ndaŵa yanji? Kansi muwona kuti uthenga wa muvidiyo ukatijana na moyo wa nsiku na nsiku? Tili na nyimbo zinyinji zatingakonde zamene zili na mitu yosiyana-siyana. Olo n’tetyo, nyimbo zasu komasoti nyimbo za mavidiyo zutichitisha lini kuti tikosangalala tyala.

Nyimbo iliyonse pa nyimbo zasu zutiphunzisa vinthu vatingakatishile ntchito pa moyo wasu wa chikhilisitu komsoti mu utumiki. Nyimbo ziyakine zunena nkhani yocheleza, m’gwilizano, ushamwali, kutang’a ntima, chikondi na chikhulupililo. Nyimbo ziyakine zunena za kujokela kwa Yehova, kukhululukilana, kuchita vinthu viweme nthawe zonse komasoti kuyeja-yeja kukwanilisha volinga vauzimu. Pali soti nyimbo yunena za mwatingakatishilile ntchito mafoni mu njila yoyenelela. Kansi ni vinthu viyakine votyani vamwaphunzilapo pa nyimbo zasu?

LOLELANI VIDIYO YA NYIMBO ZASU YAKUTI DZIKO LATSOPANO LILI PAFUPI; PAVULI PAKE YANKHANI MAKONSHO AŴA:

• Kansi banja iyi yachikulile yuganizila madaliso otyani ŵakusogolo?​—Ge 12:3

• Kansi tingayangijile tyani chikhulupililo chasu chakuti Yehova azakwanilishe malonjezo ŵake?

• Kansi ni vosangalasa votyani vamene vili pafupi?

• Kansi Ufumu watulindilila ungatiyavye tyani kupilila viyeso vatukumana navo?​—Aro 8:25