Mwamungayavyile pakachitika masoka achilengedwe

Masoka achilengedwe opitilija kuchitika m’madela anyinji masiku ŵano. Pakachitika masoka achilengedwe, ntchito yopeleka thandizo yufunika kulinganijiwa bwino komasoti mwadongosolo. Kuti vamene ivi vikwanishike, Bungwe Yutonga ikonza zakuti pa ofesi ya nthambi iliyonse pankhazikishiwe Dipatimenti Yothandiza pakachitika Masoka.

Abale a m’dipatimenti yamene iyi akaziŵa kwamene kwachitika masoka, nthawe yamene iyo olaŵila na akulu kuti aziŵe thandizo yakufunikila wofalisa aliyense. Keno ngozi yamene iyo ni ikulu ngako mwakuti ofalisa a m’dela yamene iyo angakwanishelini kulisamalila, ofesi ya nthambi yusankha abale oyenelela kuti asogolele pa ntchito yopeleka thandizo. Abale amene aŵa angasenge antchito olipeleka olo vopeleka viyakine vofunikila, olo payakine angagule vinthu viyakine vofunikila m’dela yamene iyo noŵayaŵila.

Kuchita vinthu mwa njila yamene iyi n’koyavya ngako. Ivi vuchitisha kuti tipewe kukata ntchito zosafunika ngako, chisokonezo, olo kuwononga ndalama, vamene vingachitike keno abale ochita vinthu mwa kufuna kwawo pamene aliyeujiwe.

Abale osankhiwa na ofesi ya nthambi angasankhe kupaka kwa ndalama na ŵanthu olipeleka amene angafunikile pa ntchito yopeleka thandizo. Angaziŵanesoti na akulu-akulu a m’dela yamene iyo, amene kanyinji-kanyinji angatiyavye kuti ntchito yasu yopeleka thandizo ichitike mokulumija. Tetyo, ŵanthu ofunikalini kuyamba ni ove paŵeka kusonkha ndalama, kutumija vinthu vothandizila, olo kuyenda kudela yamene yakhuziwa na masoka, peka-peka keno asengewa kuchita vamene ivo.

Olo n’tetyo, pakachitika masoka, tufunishisha kuyavyako. (Ahe 13:16) Sewo tuŵakonda abale ŵasu! Lomba kansi tingaŵayavye tyani? Chofunika ngako, tingaŵapemphelele amene akhuziwa na masoka komasoti ŵala opeleka thandizo. Tingapelekesoti ndalama zothandizila pa ntchito ya pachalo chonse. Mosogolelewa na Bungwe Yutonga, maofesi a nthambi niye oziŵa bwino kwazingayavye ngako ndalama zamene izi. Ndipo keno tufuna kuyavyako mwa kupezekapo, tingawoneshe kuti nise ofunishisha mwa kulemba Fomu ya Wofuna Kutumikira Mongodzipereka M’dipatimenti Yoona za Mapulani ndi Zomangamanga (DC–50).

LOLELANI VIDIYO YAKUTI, MADZI OSEFUKIRA OMWE ANAWONONGA KU BRAZIL, NDIPO PAVULI PAKE YANKHANI KONSHO IYI:

Kansi n’chinji chukuchitishani chidwi na ntchito yopeleka thandizo yechichita a Mboni za Yehova pavuli pa kusefukila kwa manzi ku Brazil mu 2020?