Mwamungakatishilile Ntchito Mavidiyo pa Phunzilo ya Baibolo

Tili na mavidiyo okwana 4 ŵatingakatishile ntchito mu utumiki pochitisha phunzilo ya Baibolo. Kansi vidiyo iliyonse ikonzewa na cholinga chotyani?

• 

  Vidiyo yakuti Ndaŵa yanji mufunikila kuphunzila Baibolo?—Vidiyo yonse ikonzewa kuti iyavye ŵanthu kuchita nayo chidwi Baibolo, viliyekanthu na vinthu vakukhulupilila m’chipembezo chawo. Yulimbikisa ŵanthu kuti afufuze m’Baibolo mayankho a makonsho ofunika ngako okhuza moyo ndipo yuwonesha bwino kuti m’Baibolo muli mayankho omvwika luweme. Yufotokozasoti mwangachitile munthu kuti asenge phunzilo ya Baibolo.

• 

  Vidiyo yakuti Ndaŵa yanji tufunika ku phunzila Baibolo? (kambali kafupi) yulingana na vidiyo yonse, koma kuti ikwane yonse ingawelejele pafupi-fupi maulwendo atatu. Ingayavye ngako m’madela amene ŵanthu onkhalalini na nthawe ikulu yatingatandale  nawo.

• 

  Vidiyo yakuti N’chinji chuchitika pa phunzilo ya Baibolo? ikonzewa kuti ikokulisha chidwi cha ŵanthu pa phunzilo ya Baibolo yamene yuchitika mwamahala, na kuti ikoyankha makonsho ayakine ŵangankhale nawo komasoti kuziŵa mwangasengele phunzilo ya Baibolo.

• 

  Vidiyo yakuti Mwalondelewa ku phunzilo yanu ya Baibolo ikonzewa kuti ophunzila Baibolo akoilolela. Olo kuti vidiyo yamene iyi yuwoneshewa pa pedji 2 m’buku yakuti Sangalalani na moyo kosasila! ingawoneshewesoti pokambilana kabulosha kakuti Sangalalani na moyo kosasila! Vidiyo yamene iyi yufotokoza vili m’buku yamene iyi komasoti vangayembekezele wophunzila pokambilana.

Olo kuti vidiyo iliyonse ikonzewa na cholinga chake, tingamuwoneshe munthu olo kumutumijila keno pangafunikile. Ofalisa olimbikisiwa kuti akoŵaziŵa bwino mavidiyo amene aŵa komasoti kuŵakatishila ntchito luweme mu utumiki.