Katishilani ntchito pedji yoyambilila ya JW.ORG mu utumiki

Pedji yoyambilila ya webisaiti yasu, ili na nkhani komasoti mavidiyo amene epangiwa kuti akokopa chidwi ŵanthu a mitima iweme amene ni amboni lini. (Mac 13:48) Kanyinji-kanyinji, pedji yamene iyi yufotokoza nkhani za m’manyuzi pepala, kapena vokhuza maganizo olo vakulaŵila ŵanthu ayakine.

Kansi mwewo mungaikatishile ntchito tyani pedji yoyambilila ya jw.org mu utumiki wanu?

• Mukoloŵa pa webisaiti moweleja-weleja. Onani pa mbali yakuti vinthu vaikiwamo lombapano, ndipo ganizilani mwamungavikatishilile ntchito poyavya munthu wamene wawonesha chidwi. (Kuti mufwane nkhani ziyakine zamene zafumyiwa kwalombapano, tinyani polemba kuti “Onani Zambiri.”) Kuziŵa vinyinji vokhuza webisaiti yamene iyi kuzakuyavyeni kuti muyambe kulalikila mu njila yanyowani.

• Katishilani ntchito nkhani na mavidiyo amene ali pa pedji yoyambilila kuti muyambe kukambilana. Vinthu vamene ivi vingatiyavye kuziŵa vakuganiza ŵanthu am’gawo yasu.

• Mukoŵawonesha ŵanthu pedji yoyambilila. Awonesheni mitu ngayo-ngayo yamene ilipo, noŵawonesha mwangafwanile nkhani pa webisaiti.

• Mukoŵatumijila linki. Ŵanthu ayakine ofunalini kulaŵila nase pamenso na pamenso, koma ove ni okonzeka kuloŵa pa webisaiti yasu. N’chifukwa chake osawaya-waya kutumijila ŵanthu achidwi linki yoŵayavya kufwana pedji yoyambilila komasoti nkhani na mavidiyo amene opezeka pamene apo.