Tingankhale na moyo wosasila

1. Kansi kuganizila za lonjezo ya Yehova ya moyo wosasila kutiyavya tyani?

YEHOVA olonjeza kuti ŵanthu amene omumvwila azalondele “moyo wosasila.” (Aro. 6:23) Keno tuganizila vakutipasa Yehova, tuyamba kumukonda ngako. Ganizilani ivi: Atata ŵasu ŵakululu otikonda ngako ndipo atisiyelini.

2. Kansi lonjezo ya moyo wosasila yutiyavya tyani?

² Lonjezo ya Mulungu ya moyo wosasila yutiyavya kupilila mayeselo ŵatukumana nawo. Olo kuti adani ŵasu atiyofye kuti atipaye, tilekelini kutumikila Yehova. Ndaŵa yanji? Chifukwa chimozi n’chakuti tuziŵa kuti keno tingafwe tili okhulupilika kwa Yehova, yove azatiushe ndipo tizankhale na chiyembekezo chakuti tizafwelinisoti. (Yoh. 5:28, 29; 1 Akor. 15:55-58; Ahe. 2:15) Ndaŵa yanji tingankhale osimikijila kuti n’vokwanishika kunkhala na moyo wosasila? Tiyeni tikambilane vifukwa viyakine.

YEHOVA ANKHALEPO MPAKA KALE-KALE

3. Ndaŵa yanji tingankhale osimikijila kuti Yehova angakwanishe kutipasa moyo wosasila? (Salimo 102:12, 24, 27)

³ Tuziŵa kuti Yehova angakwanishe kutipasa moyo wosasila chifukwa yove ni Chisime cha moyo ndipo ankhalepo mpaka kale-kale. (Sal. 36:9) Onani tyala nkhani ziyakine za m’Baibolo zamene zutisimikijila kuti Yehova wankhalapo ndipo ankhalepo mpaka kale-kale. Lemba ya Salimo 90:2 yunena kuti Yehova alipo “kuyambila kale-kale mpaka kale-kale.” Ndipo Salimo 102 yunenasoti mfundo yamene iyi. (Ŵelengani Salimo 102:12, 24, 27.) Ndipo mneneli Habakuku ponena za Atata ŵasu ŵakululu elemba kuti: “Mwewo Yehova, mwewo mwankhalapo kuyambila kale-kale. Mwewo  Mulungu wangu, Mulungu wangu Ntuŵa, mwewo mukufwalini.”—Hab. 1:12.

4. Kansi tufunika kudandaula keno tumvwishalini mfundo yakuti Yehova wankhalapo kuyambila kale-kale? Fotokozani.

⁴ Kansi vukuvutani kumvwisha mfundo yakuti Yehova “ni Mulungu mpaka kale-kale”? (Yes. 40:28) Ŵanthu anyinji vuŵavutasoti kumvwisha mfundo yamene iyi. Ponena za Mulungu, Elihu enena kuti: “Vyaka vake n’vosaŵelengeka.” (Yobu 36:26) Koma olo kuti tumvwishalini viyakine, vutanthauzalini kuti n’vawenye. Mwachisanzo, olo kuti tingamvwishelini bwino-bwino mwakuyendela kungweleŵela, kansi vamene ivi vutanthauza kuti kuliye kungweleŵela? Yayi n’tetyolini! Molingana na vamene ivi, sewo taŵanthu payakine tingamvwishelini bwino-bwino mwavilili kuti Yehova wankhala alipo kuyambila kale-kale ndipo ankhalepo mpaka kale-kale. Koma ivi vutanthauzalini kuti Mulungu ankhalepolini mpaka kale-kale. Choonadi chunena za Nyamalenga wasu chudalilalini pa vinthu vatumvwisha olo vatingalekemvwisha. (Aro. 11:33-36) Yove enkhalapo—vinthu vonse va m’chilengedwe vikaliyenkhalapo—kupamikijapo zuŵa na nyenyezi. Yehova otisimikijila kuti yove niye “epanga chalo na mphamvu zake.” Ndipo yove enzepo kale ‘akaliyetambulula kululu.’ (Yer. 51:15; Mac. 17:24) Kansi n’chifukwa chiyakine chotyani chutisimikijila kuti n’vokwanishika kunkhala na moyo wosasila?

YEHOVA ETILENGA KUTI TINKHALE NA MOYO WOSASILA

5. Kansi banja yoyambilila yenze na chiyembekezo chotyani?

⁵ Yehova elenga vamoyo pachalo kuti vinkhale na moyo ufupi, kupatulapo tyala ŵanthu. Yove eŵapasa chiyembekezo chapadela chonkhala na moyo kosasila. Olo n’tetyo, Yehova echenjeja Adamu kuti: “Osalya vitwazi va m’chimuti chuziŵisha chiweme na chiipa. Ndaŵa nsiku yaukuti uzalye, uzafwe ndithu.” (Gen. 2:17) Kuti Adamu na Hava emvwila Yehova, sembe aliyeufwe. N’pomvwika kukhulupilila kuti m’kupita kwa nthawe, sembe Yehova eŵalola kulya “vitwazi va chimuti cha moyo.” Vamene ivi sembe viwonesha kuti ove okhulupilila kuti “ankhale na moyo mpaka kale-kale.”b—Gen. 3:22.

6-7. (a) Kansi n’chinthu chiyakine chotyani chuwonesha kuti ŵanthu aliyelengewe kuti akokufwa? (b) Kansi mwewo mufunishisha kuchita chinji? (Onani vithunzi.)

⁶ Asayansi ayakine afwana umboni uwonesha kuti tomfwe wasu ukwanisha kusunga vinthu vinyinji kupambana vatuphunzila pa moyo wasu. Vamene ivi n’vochitisha chidwi. Mu 2010, nkhani iyakine yamu nyunzipepala ya Scientific American Mind inena kuti tomfwe wasu ungakwanishe kusunga vinthu madjigabaiti 2.5 miliyoni, vamene vingawoneshewe pa mapulogilamu apa TV kwa ma awazi 3 miliyoni (vyaka vopitilila 300). Ndipo payakine tomfwe wasu ungasunge vinthu vinyinji kupambana pamene apa. Olo n’tetyo, vamene ivi vuwonesha kuti Yehova epanga tomfwe wasu kuti ukosunga vinthu vinyinji kupambana vatuphunzila tyala m’vyaka 70 olo 80.—Sal. 90:10.

⁷ Yehova etipasasoti ntima wofunishisha kupitilija kunkhala na moyo. Ponena za ŵanthu, Baibolo yunena kuti Mulungu “epasa ŵanthu ntima wofuna kunkhala na moyo mpaka kale-kale.” (Mlal. 3:11) Ichi n’chifukwa chimozi chatuwonela imfwa kunkhala mdani. (1 Akor. 15:26) Keno talwala ngako, kansi tungoyembekezela kuti tifwe osachitapo kalikonse? Yayi. Kanyinji-kanyinji, tuluta kuli adokota ndipo nthawe ziyakine tukumwa mankhwala kuti tipole matenda ŵatili nawo. Kulaŵila chendi, tuchita vonse vatingakwanishe kuti osati tifwe. Ndipo keno munthu watukonda wamwalila, viliyekanthu kuti ni nkulu olo n’tontho, tunkhala na chisoni chikulu. (Yoh. 11:32, 33) Tipitilije kuphunzila vinthu mpaka kale-kale, ndipo tufunishisha kunkhala na moyo wosasila chifukwa chakuti Nyamalenga wasu wachikondi niye mwechitilengela. N’vowonekelatu kuti yove azachitishe kuti tinkhale na moyo mpaka kale-kale. Koma tili na vifukwa viyakinesoti vomvwika vokhulupilila kuti tingankhale na moyo wosasila. Tiyeni tikambilane vinthu viyakine vechichita Yehova kuvuli komasoti vakuchita masiku ŵano vamene vuwonesha kuti cholinga chake choyambilila chiliyechinje.

CHOLINGA CHA YEHOVA CHILIYECHINJE

8. Kansi lemba ya Yesaya 55:11 yutiphunzisa chinji vokhuza cholinga cha Yehova kuli sewo?

⁸ Olo kuti Adamu na Hava echimwa nochitisha kuti ŵana ŵawo akokufwa, Yehova aliyechinje maganizo ŵake pa cholinga chake. (Ŵelengani Yesaya 55:11.) Yove akali na cholinga chakuti ŵanthu okhulupilika azankhale na moyo wosasila. Tuziŵa vamene ivi chifukwa cha vechinena na vechichita kuti akwanilishe cholinga chake.

9. Kansi Mulungu elonjeza chinji? (Danieli 12:2, 13)

⁹ Yehova elonjeza kuti azaushe ŵanthu echifwa noŵapasa mwayi wonkhala na moyo wosasila. (Mac. 24:15; Tit. 1:1, 2) Yobu wamene enze munthu wokhulupilika enzeziŵa kuti Yehova ofunishisha kuzausha ŵanthu emwalila. (Yobu 14:14, 15) Mneneli Danieli enzeziŵa kuti ŵanthu oyembekezela kuushiwa nonkhala na mwayi wonkhala na moyo wosasila. (Sal. 37:29; ŵelengani Danieli 12:2, 13.) Ayuda a m’nthawe ya Yesu enzeziŵasoti kuti Yehova angakwanishe kupeleka “moyo wosasila” kuli atumiki ŵake okhulupilika. (Lk. 10:25; 18:18) Yesu enena za lonjezo yamene iyi moweleja-weleja, ndipo yove naye eushiwa na Atata ŵake.—Mt. 19:29; 22:31, 32; Lk. 18:30; Yoh. 11:25.

10. Kansi kuushiwa kwa ŵanthu a m’nthawe yakuvuli kusimikijila chinji? (Onani chithunzi.)

¹⁰ Yehova niye Wopeleka Moyo ndipo ali na mphamvu zousha ŵanthu. Yove epasa mphamvu mneneli Eliya kuti aushe mwana wa mwanakazi wamasiye waku Zarefati. (1 Maf. 17:21-23) Pavuli pake, moyavyiwa na Mulungu mneneli Elisa eusha mwana wa mwanakazi waku Sunemu. (2 Maf. 4:18-20, 34-37) Kuushiwa kwa ŵanthu amene aŵa komasoti ayakine ni umboni wakuti Yehova ali na mphamvu zousha ŵanthu. Penze pano pachalo, Yesu ewonesha kuti Atata ŵake emupasa mphamvu zousha ŵanthu. (Yoh. 11:23-25, 43, 44) Pano patunena, Yesu ali kululu ndipo epasiwa “ulamulilo wonse . . . kululu na pachalo.” Tetyo, yove ali na mphamvu zokwanilisha lonjezo yakuti “onse ali kumanda achikumbukilo” azaushiwe nonkhala na chiyembekezo chonkhala na moyo mpaka kale-kale.—Mt. 28:18; Yoh. 5:25-29.

11. Kasi dipo yuchitisha tyani kuti vinkhale vokwanishika kuzafwana moyo wosasila?

¹¹ Ndaŵa yanji Yehova elola kuti Mwana wake wokondewa afwe imfwa yoŵaŵa ngako? Yesu efotokoza chifukwa chake ponena kuti: “Mulungu ekonda ngako chalo mwakuti epeleka Mwana wake wovyalika yeka, kuti aliyense wamene angakhulupilile yove osati awonongeke, koma ankhale na moyo wosasila.” (Yoh. 3:16) Mwa kupeleka Mwana wake monga dipo yoziŵilija machimo ŵasu, Mulungu etipasa mwayi wofwana moyo wosasila. (Mt. 20:28) Ntumwi Paulo efotokoza mwachidule mbali yamene iyi yofunika ya cholinga cha Mulungu, pechilemba kuti: “Pakuti imfwa iwela kupitila muli munthu yumo, kuuka kwa akufwa kwiwelasoti kupitila muli munthu yumo. Pakuti monga mwa Adamu onse akufwa, mwameneumosoti mwa Khilisitu onse azapasiwe moyo.”—1 Akor. 15:21, 22.

12. Kansi Ufumu wa Mulungu uzayavye tyani kukwanilisha cholinga cha Yehova kuli sewo?

¹² Yesu ephunzisa ophunzila ŵake kupemphelela Ufumu wa Mulungu kuti uwele komasoti kuti chifunilo cha Mulungu chichitike pano pachalo. (Mt. 6:9, 10) Mbali iyakine ya cholinga cha Mulungu ni yakuti ŵanthu ankhale na moyo wosasila pano pachalo. Kuti vamene ivi vikwanishike, Yehova wasankha Mwana wake kunkhala Mfumu ya Ufumu wa Mesiya. Mulungu wasankha ŵanthu okwana 144.000 pano pachalo kuti azakate ntchito pamozi na Yesu pokwanilisha cholinga chake.—Chiv. 5:9, 10.

13. Kansi Yehova ochita chinji palipano, ndipo mwewo mufunika kuchita chinji?

¹³ Palipano Yehova ounganisha “gulu ikulu” ya ŵanthu noŵaphunzisa kuti ankhale nzika za Ufumu wake. (Chiv. 7:9, 10; Yak. 2:8) Olo kuti ŵanthu anyinji muli chino chalo ni oyaŵikana chifukwa cha chidani na nkhondo, a “gulu ikulu” ochita vonse vangakwanishe kuti achose ntundu uliwonse wa chidani. Ove eyamba kale kufula vibemba vawo kunkhala volimila mophiphilisa. (Mik. 4:3) Mmalo moniyata nawo nkhondo zamene zupaya ŵanthu anyinji, ove oyavya ŵanthu anyinji kufwana “moyo ngawo-ngawo” poŵaphunzisa vokhuza choonadi cha Mulungu na cholinga chake. (1 Tim. 6:19) Ove angoshushiwa na ŵanthu a m’banja mwawo, olo kuvutika kuti afwane ndalama chifukwa chonkhala kumbali ya Ufumu wa Mulungu, koma Yehova owoneshesha kuti ali na vinthu vonse vakufunikila pa moyo. (Mt. 6:25, 30-33; Lk. 18:29, 30) Mfundo zamene izi zutisimikijila kuti Ufumu wa Mulungu ni ngawo-ngawo ndipo upitilije kukwanilisha cholinga cha Yehova.

SOGOLO IWEME NGAKO

14-15. Kansi lonjezo ya Yehova yakuti azasilije imfwa mpaka kale-kale izakwanilishiwe tyani?

¹⁴ Yesu palipano ni Mfumu ya Ufumu wa Mulungu kululu, ndipo yove azakwanilishe malonjezo onse ŵechilonjeza Yehova. (2 Akor. 1:20) Kuyambila mu 1914, Yesu wankhala ogonjesa adani ŵake. (Sal. 110:1, 2) Kwalombapano, yove pamozi na olamulila ayake azagonjese adani ŵawo onse ndipo azawononge ŵanthu onse aipa.—Chiv. 6:2.

¹⁵ Mu Ulamulilo wa vyaka 1.000 wa Yesu, akufwa azaushiwe ndipo ŵanthu omvwila azankhale angwilo. Pavuli pa chiyeso chosilijila, ŵala akuti azaweluziwe na Yehova kuti ni olungama “azalondele chalo, ndipo azankhale mwamene umo mpaka kale-kale.” (Sal. 37:10, 11, 29) N’vokondwelesha kuti “imfwa nayo, monga mdani wosilijila, izawonongewe.”—1 Akor. 15:26.

16. Kansi cholinga chasu chikulu potumikila Yehova chufunika kunkhala chinji?

¹⁶ Monga mwatawonela, chiyembekezo chasu chonkhala na moyo wosasila ni chozikiwa pa Mawu a Mulungu. Chiyembekezo chamene ichi chingatiyavye kupitilija mphela kunkhala okhulupilika m’masiku ŵano osilijila ovuta. Koma kuti tikondweleshe Yehova, tufunika kuchita vinyinji kupambana tyala kungofuna kunkhala na moyo. Chifukwa chikulu chatunkhalila okhulupilika kwa Yehova na Yesu n’chakuti tuŵakonda ngako. (2 Akor. 5:14, 15) Chikondi chamene ichi chutichitisha kuti tikoŵakonkheja nolalikila ŵanthu ayakine za chiyembekezo chatili nacho. (Aro. 10:13-15) Tikaphunzila kunkhala na moyo wosafuna vinthu vinyinji nonkhala opasa, yove atisankhe kuti tinkhale azishamwali ŵake mpaka kale-kale.—Ahe. 13:16.

17. Kansi aliyense ali na udindo wochita chinji? (Mateyu 7:13, 14)

¹⁷ Kansi tizankhale m’gulu ya ŵanthu amene akuti azalondele moyo wosasila? Yehova watipasa mwayi wamene uyu. Palipano, tufunika kusankha kuyenda mu njila yaku moyo. (Ŵelengani Mateyu 7:13, 14.) Kansi moyo uzankhale tyani tikazalondela moyo wosasila? Tizakambilane yankho ya konsho yamene iyi mu nkhani ikuza.