Phunzilani kufumila kuli Yesu pa nkhani yolalikila mwakhama

1. Kansi ŵanthu a Yehova osiyana tyani na Akhilisitu awenye?

CHINTHU chimozi chusiyanisha atumiki a Yehova na Akhilisitu awenye ni kukata ntchito yolalikila molipeleka. (Tito 2:14) Koma olo n’tetyo, nthawe ziyakine mungawone kuti n’kovuta kukata ntchito yolalikila mosangalala. Payakine mulimvwa molingana na mwechinenela nkulu muyakine wolipeleka wamene enena kuti: “Nthawe ziyakine, newo nufunalini kulalikila.”

2. Kansi n’chinji chingachitishe kuti kulalikila mwakhama kunkhale kovuta nthawe ziyakine?

² Nthawe ziyakine tingosangalala ngako kuchita mautumiki ayakine opatulika m’gulu ya Mulungu kusiyana na kukata ntchito yolalikila. Ndaŵa yanji? Keno tukata ntchito yomanga olo kuwamyasoti Ng’anda za Ufumu, kuyavya pakachitika ngozi zam’chilengedwe olo kutang’isha enekwasu, tukwanisha kuwona vokonkhapo vake viweme mokulumija. Keno tukata ntchito pamozi na enekwasu na akalongosi, tuwoneshana chikondi komasoti tunkhala mwantendele, tuwonasoti kuti ŵanthu otembeja vatuchita. Koma mosiyana na vamene ivi, payakine tankhala tulalikila kwa vyaka vinyinji mugawo imo na imo, koma ŵanthu anyinji omvwishilalini uthenga wasu. Nthawe ziyakine tingakumane na ŵanthu amene okana kumvwishila uthenga wasu. Komasoti tuziŵa kuti mapeto a chino chalo pakuvwendela, ŵanthu anyinji angayambe kutishusha ngako. (Mat. 10:22) Kansi n’chinji chingatiyavye kuti tiyangijile khama yasu pokata ntchito yolalikila?

3. Kansi tuphunzila chinji kufumila pa fanizo ya Yesu ili pa Luka 13:6-9?

³ Tingaphunzile vinthu vofunika pa nkhani yokata ntchito yolalikila mwakhama tikaganizila chisanzo cha Yesu. Pa utumiki wake wonse, yove aliyeleke kulalikila molipeleka. Utumiki wake pewenzefwika kumapeto, yove eyamba kulalikila molipeleka ngako. (Ŵelengani Luka 13:6-9.) Molinga na mulimi wampesa wamene esila vyaka vitatu osamalila chimuti cha nkhuyu chamene chenzetwalalini, Yesu naye elalikila kuli Ayuda kwa vyaka vitatu, koma anyinji mwa ove ekana kumumwishila. Koma olo n’tetyo, molingana na mwechichitila mulimi wampesa wamene aliyeleke kuyembekezela vitwazi va chimuti cha nkhuyu, Yesu naye aliyechite ulesi kuyavya ŵanthu, olo kuleka kuchita vinyinji pokata ntchito yolakilila. Mmalo mwake, yove eyangijila khama yake kuti aŵafwike pantima ŵanthu na uthenga wake.

4. Kansi ni vinthu 4 votyani vechichita Yesu vatikuti tikambilane?

⁴ Munkhani ino, tikambilane vechichita Yesu powonesha kuti enze wolipeleka, ngako-ngako pa myezi 6 yosilijila ya utumiki wake. (Luk. 10:1.) Kuphunzila vinthu vechiphunzisa komasoti kukonkheja vinthu venzechita yove, kungatiyavye nase kuti tikolalikila mwakhama masiku ŵano. Tiyeni tiwone vatingaphunzile kufumila pa chisanzo cha Yesu munjila 4 zokonkhapo: (1) Yove enzeganizila ngako venzefuna Yehova kuli yove, (2) enzeganizila ngako maulosi a m’Baibolo, (3) enzedalila Yehova kuti akomuyavya, komasoti (4) enzekhulupilila kuti ŵanthu ayakine azamvwishile uthenga wake.

TIKOKUMBUKILA VAKUFUNA YEHOVA KULI SEWO

5. Kansi Yesu ewonesha tyani kuti enzeganizila ngako kuchita chifunilo cha Mulungu?

⁵ Yesu enzelalikila mwakhama “uthenga uweme wa Ufumu”, chifukwa chakuti enzeziŵa kuti niye venzefuna Mulungu kuti yove achite. (Luk. 4:43) Yesu enzewona kuti kulalikila uthenga uweme niye chinthu chofunika ngako pa moyo wake. Olo chakumapeto kwa utumiki wake, yove eyenda “tauni na tauni komasoti munzi na munzi,” ndipo enzephunzisa ŵanthu. (Luk. 13:22) Komasoti yove ephunzisa ophunzila ŵake ayakine kuti nawo akokata ntchito yophunzisa ŵanthu.—Luk. 10:1.

6. Kansi ntchito yolalikila yukatijana tyani na ntchito ziyakine zatingakate mu gulu ya Mulungu? (Onanisoti chithunzi.)

⁶ Masiku ŵanosoti, kulalikila uthenga uweme ni ntchito yofunika ngako yakufuna Yehova komasoti Yesu kuti tikoikata. (Mat. 24:14; 28:19, 20) Ntchito iliyonse yatukatila Yehova, yunkhala yokatijana ngako na ntchito yolalikila. Mwachisanzo, keno tukata ntchito zomanga m’gulu yasu, olo kutumikila pa Beteli tunkhala kuti tuyavya pa ntchito yolalikila. Keno tuyavya enekwasu na akalongosi pakachitika ngozi zam’chilengedwe, tuŵayavyalini tyala kuti afwane vinthu vakufunikila mwakuthupi, koma kuti ayambesoti kuchita vinthu vauzimu vamene vupamikijapo kulalikila uthenga uweme. Keno tuziŵa kuti ntchito yolalikila niyofunika komasoti tukumbukila kuti niye ntchito ikulu yakufuna Yehova kuti tikokata, ntima wasu ungofunishisha kulalikila uthenga uweme nthawe zonse. Nkulu muyakine waku Hungary zina yake János, enena kuti, “Newo nulikumbusha kuti paliye utumiki uliwonse watingachite mu gulu ya Yehova wamene niwofunika ngako kupambana ntchito yolalikila.”

7. Ndaŵa yanji Yehova ofuna kuti tipitilije kulalikila? (1 Timoteyo 2:3, 4)

⁷ Tingankhale akhama ngako pa ntchito yolalikila keno tuwona ŵanthu monga ni mwakuŵawonela Yehova. Yove ofuna kuti ŵanthu anyinji amvwe uthenga uweme kuti azapulumuke. (Ŵelengani 1 Timoteyo 2:3, 4.) Pofuna kuti vamene ivi vikwanishike, yove otiphunzisa kuziŵa vatingachite kuti tikophunzisa mokata ntima uthenga wopulumusha moyo. Mwachisanzo, kabulosha kakuti Kondani ŵanthu—Nopanga ophunzila, kali na malangizo aweme amene angatiyavye kuti tiyambe kukambilana na ŵanthu noŵaphunzisa Mawu a Mulungu. Olo kuti ŵanthu aleke kumvwishila uthenga wasu pali pano, angezenkhala na mwayi wochita vamene ivo nkati mwachisauso chikulu. Uthenga watuuja ŵanthu pali pano, payakine ungaŵayavye kuti azachinje kusogolo. Koma vamene ivi vingachitike peka-peka keno sewo tupitilija kulalikila.

MUKOŴAMVWISHA LUWEME MAULOSI A M’BAIBOLO NDIPO MUKOCHITA VINTHU MOKATIJANA NA VAKUNENA

8. Kansi kumvwisha luweme maulosi kwemuyavya tyani Yesu kuti akatishile ntchito nthawe yake mwanzelu?

⁸ Yesu enzeziŵa luweme mwakuti azakwanilishiliwe maulosi am’Baibolo. Yove enzeziŵa kuti utumiki wake uzatole vyaka vitatu na hafu kuti usile. (Dan. 9:26, 27) Enzeziŵasoti vewinena ulosi vokhuza nthawe yakuti azafwe komasoti ntundu wa imfwa yenzeyembekezela. (Luk. 18:31-34) Chifukwa chakuti enzeziŵa venzenena maulosi, Yesu ekatishila ntchito nthawe yake mwanzelu ngako. Chifukwa cha vamene ivi yove elalikila mwakhama ndipo ekwanisha kusilija ntchito yechimupasa Mulungu kuti akate.

9. Kansi kumvwisha luweme maulosi a m’Baibolo kutiyavya tyani kuti tipitilije kulalikila mwakhama?

⁹ Kumvwisha luweme maulosi a m’Baibolo kungatiyavye kuti tikolalikila mwakhama. Sewo tuziŵa kuti nthawe yasala kuti chino chalo chiipa chiwonongewe ni itontho ngako. Tuziŵa kuti vinthu vuchitika muli chino chalo komasoti minkhalidwe yali nayo ŵanthu masiku ŵano vukatijana na veinenelatu Baibolo vokhuza masiku osilijila. Sewo tuwona kuti kulimbilana ulamulilo kwapakati pa Ulamulilo Wamphamvu Pachalo chonse wa Britain na America komasoti Russia na vyalo viyakine vili kumbali yake, kukwanilisha ulosi wokhuza mfumu ya kum’mwela na mfumu yakumpoto “mu nthawe yamapeto.” (Dan. 11:40) Tuziŵasoti kuti mendo a chifanizilo cha muulosi wapa Danieli 2:43-45, opanamila Ulamulilo Wamphamvu pachalo chonse wa Britain na America. Tukaikilalinisoti vakunena maulosi am’Baibolo kuti kwalombapano ngako—Ufumu wa Mulungu uzawononge maulamulilo onse a ŵanthu. Maulosi onse amene aŵa owonesha kuti tili kumapeto ngako-ngako kwa masiku osilijila. Tetyo, tufunikila kukatishila ntchito nthawe yasu mwanzelu ngako polalikila uthenga uweme.

10. Kansi maulosi a m’Baibolo angatiyavyesoti tyani kuti tikolalikila mwakhama?

¹⁰ Maulosi a m’Baibolo alisoti na uthenga uyakine wamene tufunishisha kuujako ŵanthu. Kalongosi muyakine zina yake Carrie wamene otumikila ku Dominican Republic enena kuti: “Nikaganizila vinthu viweme vawalonjeza Yehova kuti azachite kusogolo, nuwona kuti nufunikila kuujako ayakine vokhuza vinthu vamene ivi.” Yove enenasoti kuti: “Nikawona mavuto ŵakukumana nawo ŵanthu masiku ŵano, nuwona kuti malonjezo amene aŵa aweme okhuzalini newo neka, koma okhuzasoti ove.” Maulosi a m’Baibolo owonesha kuti Yehova niye otiyavya pa ntchito yamene iyi ndipo vamene ivi vutitang’isha kuti tipitilije kulalikila. Leila, waku Hungary, enena kuti: “Lemba ya Yesaya 11:6-9 yunitang’isha kuti nikolalikila uthenga uweme olo kuli ŵanthu ŵanuwona kuti angamvwishilelini uthenga wangu. Newo nuziŵa kuti munthu aliyense angakwanishe kuchinja moyavyiwa na Yehova.” Komasoti Christopher, mkwasu waku Zambia, enena kuti: “Mokatijana na ulosi uli pa Maliko 13:10, uthenga uweme ulalikiliwa pa chalo chonse, ndipo nuwona kuti ni mwayi ukulu ngako kukata nawo ntchito yoyavya pokwanilisha ulosi wamene uyu.” Kansi ni maulosi otyani ali m’Baibolo amene okutang’ishani kuti mupitilije kulalikila?

MUKODALILA YEHOVA KUTI AKOKUYAVYANI

11. Ndaŵa yanji Yesu enzefunikila kudalila Yehova kuti apitijie kulalikila mwakhama? (Luka 12:49, 53)

¹¹ Yesu enzedalila Yehova kuti akomuyavya kuti apitilije kulalikila mwakhama. Olo kuti Yesu enzelalikila mwaluso, yove enzeziŵa kuti uthenga wa Ufumu uzayambishe mikangano iipa komasoti ŵanthu akotishusha. (Ŵelengani Luka 12:49, 53.) Chifukwa chakuti Yesu enzelalikila, asogoleli achipembezo enzefuna kumupaya moweleja-weleja. (Yoh. 8:59; 10:31, 39) Koma olo n’tetyo, Yesu epitilija kulalikila chifukwa enzeziŵa kuti Yehova ali naye. Yove enena kuti: “Nuweluzalini neka, koma newo pamozi na Atata amene enituma tuweluzila pamozi . . . . Yove aliye nisiye neka chifukwa nuchita vinthu vamene vumukondwelesha nthawe zonse.”—Yoh. 8:16, 29.

12. Kansi Yesu eŵakonzekelesha tyani ophunzila ŵake kuti azapitilije kulalikila olo kuti enzeyembekezela kushushiwa na adani ŵawo?

¹² Yesu ekumbusha ophunzila ŵake kuti ofunikila kudalila Yehova kuti akoŵayavya. Yove enzeŵasimikijila moweleja-weleja kuti Yehova akoŵayavya olo pa nthawe yakutamanishiwa. (Mat. 10:18-20; Luk. 12:11, 12) Chifukwa chakuti enzeziŵa kuti ŵanthu anyinji akoshusha uthenga uweme, Yesu echenjeja ophunzila ŵake kuti ankhale osamala. (Mat. 10:16; Luk. 10:3) Yove eŵaujasoti kuti keno ŵanthu ofunalini kuŵamvwishila osati akoŵakakamija. (Luk. 10:10, 11) Komasoti eŵauja kuti akothaŵa akayamba kutamanishiwa. (Mat. 10:23) Olo kuti Yesu enze wolipeleka komasoti enzedalila Yehova, enzelolalini kuika moyo wake pa ngozi paliye vifukwa vomvwika.—Yoh. 11:53, 54.

13. Ndaŵa yanji mungakaikilelini kuti Yehova azakuyavyeni?

¹³ Tufunikila kuyavyiwa na Yehova kuti tikolalikila mwakhama tikayamba kushushiwa masiku ŵano. (Chiv. 12:17) Kansi ndaŵa yanji mufunikilalini kukaikila kuti Yehova azakuyavyeni? Ganizilani pemphelo ya Yesu ili pa Yohani chapitala 17. Yesu esenga Yehova kuti akololela atumwi ŵake, ndipo Yehova eyankha pemphelo yamene iyo. Buku ya Ntchito yufotokoza vechichita Yehova poyavya atumwi kuti akwanishe kulalikila molipeleka olo kuti enzetamanishiwa. M’pemphelo yechipeleka, Yesu esengasoti Yehova kuti akololela ŵanthu amene enzekhulupilila uthenga wa atumwi. Pemphelo yamene iyo yukhuzasoti mwewo. Yehova akalipitilija kuyankha pemphelo ya Yesu. Yove akokuyavyani molingana na mwenzeyavyila atumwi.—Yoh. 17:11, 15, 20.

14. Ndaŵa yanji tingankhale osimikijila kuti tizapitilije kulalikila mwakhama olo pa nthawe yovuta? (Onanisoti chithunzi.)

¹⁴ Mapeto pakuvwendela, vingankhale vovuta ngako kuti tikolalikila uthenga uweme molipeleka. Koma Yesu etisimikijila kuti akotiyavya kuti tipitilije kukata ntchito yamene iyi molipeleka. (Luk. 21:12-15) Molingana na mwenzechitila Yesu komasoti ophunzila ŵake, sewo tulola kuti ŵanthu akolisankhila ŵeka kumvwishila olo kukana uthenga wasu, komasoti tupewa kukangana nawo paliye vifukwa vomvwika. Olo boma ikalesha ntchito yasu, enekwasu na akalongosi opitilija kulalikila uthenga uweme chifuwa chakuti odalila Yehova osati mphamvu zawo. Molingana na mwechichitila Yehova munthawe ya Akhilisitu oyambilila pechipeleka mphamvu kuli atumiki ŵake, masiku ŵanosoti Yehova otipasa mphamvu pofuna kuti “ntchito yolalikila ichitike mokwanila”, mokatijana na mwakufunila yove. (2 Tim. 4:17) Osati mukokaikila kuti keno mudalila Yehova yove azakuyavyeni kuti mukolalikila molipeleka.

OSATI MUKOKAIKILA KUTI AYAKINE AZAMVWISHILE UTHENGA WANU

15. Kansi n’chinji chuwonesha kuti Yesu enzekaikilalini kuti ntchito yake yolalikila izankhale na vokonkhapo viweme?

¹⁵ Yesu enzekaikilalini kuti ŵanthu ayakine azamvwishile uthenga uweme wenzelalikila. Vamene ivi vemuyavya kuti apitilije kunkhala wosangalala komasoti kukata ntchito yolalikila mwakhama. Mwachisanzo, kumapeto kwa chaka cha 30 C.E., Yesu ewona kuti ŵanthu anyinji enzefunishisha kumvwishila uthenga wake, ndipo eŵalinganija na mbewu zokosa zofunikila kuweja. (Yoh. 4:35) Papita pafupi-fupi chaka chimozi, yove euja ophunzila ŵake kuti: “Pali vinthu vinyinji vufunika kuweja.” (Mat. 9:37, 38) Komasoti pavuli pake, yove esimikijilasoti ngako mfundo yamene iyi pechinena kuti: “Pali vinthu vinyinji vofunika kuweja . . . Sengani Munecho wa munda atumije antchito kuti akaweje.” (Luk. 10:2) Yesu enzeyembekezela mphela kuti ŵanthu azamvwishile uthenga wake, ndipo yove esangalala ŵanthu pechiyamba kumumvwishila.—Luk. 10:21.

16. Kansi mafanizo ŵechilaŵila Yesu otiyavya tyani kuti tikowona utumiki mwanjila iweme? (Luka 13:18-21) (Onanisoti chithunzi.)

¹⁶ Yesu euja ophunzila ŵake kuti akowona ntchito yolalikila mwanjila iweme, vamene ivi sembe viŵayavya kuti akolalikila molipeleka. Mwachisanzo, ganizilani vokhuza mafanizo aŵili ŵechipeleka. (Ŵelengani Luka 13:18-21.) Mufanizo iyakine yechilaŵila, Yesu elinganija uthenga wa Ufumu na kansele katontho kampilu kamene kekula nonkhala chimuti chikulu. Vamene ivi venzetanthauza kuti ŵanthu anyinji azamvwishile uthenga uweme ndipo paliye chilichonse chingakangishe kuti vamene ivo vichitike. Mufanizo iyakine, Yesu elinganija uthenga wa Ufumu na vofufumisha. Vili tetyo chifukwa chakuti uthenga wa Ufumu wenzeyembekezela kulalikiliwa m’madela anyinji kuzenguluka pa chalo chonse, komasoti kuyavya ŵanthu kuti achinje moyo wawo, olo kuti kuchinja kwamene uko kungawonekelelini mokulumija kuli ayakine. Pavuli pake, Yesu esimikijila ophunzila ŵake kuti uthenga uweme wenzelalikila uzayavye ŵanthu anyinji.

17. Kansi tili na vifukwa votyani viweme vamene vingatiyavye kuti tikowona utumiki mwanjila iweme?

¹⁷ Tikaganizila mwayuyavyila ŵanthu anyinji ntchito yolalikila pa chalo chonse, tutang’ishiwa kuti tipitilije kulalikila. Chaka chilichonse, ŵanthu mamiliyoni anyinji achidwi opezeka pa Chikumbukilo komasoti ovomela kuti tikophunzila nawo Baibolo. Ŵanthu masauzande anyinji obatizika noyamba kukata ntchito yolalikila pamozi na sewo. Tuziŵalini kuti niŵanthu anyinji tyani angamvwishile uthenga uweme watulalikila, koma chatuziŵa n’chakuti Yehova ounganija gulu ikulu ya ŵanthu amene akuti azapulumuke pachisauso chikulu. (Chiv. 7:9, 14) Yehova niye Munecho wa ntchito yoweja, ndipo okaikilalini kuti ŵanthu anyinji azamvwishile uthenga uweme. Chifukwa cha vamene ivi tufunikila kupitilija kulalikila.

18. Kansi tufuna kuti ŵanthu ayakine aziŵe votyani vokhuza sewo?

¹⁸ Kufumila kale-kale, ophunzila a Yesu ankhala oziŵika na mbili yolalikila mwakhama. Mwachisanzo, atumwi enzekata ntchito yolalikila motang’a ntima komasoti mosangalala mwakuti ŵanthu ayakine “eziŵa kuti enzeyenda na Yesu.” (Ntchi. 4:13) Nasesoti tufuna kulalikila uthenga uweme motang’a ntima komasoti mosangalala, ndipo chifukwa cha vamene ivi ŵanthu azawone kuti nase tukonkheja chisanzo cha Yesu.