Pitilijani kuyenda mosogolelewa na chikhulupililo

1. Ndaŵa yanji ntumwi Paulo enzekhutila akaganizila vinthu vechisankha kuvuli pa moyo wake?

NTUMWI Paulo enzeziŵa kuti wasala patontho kufwa, koma enze wokhutila na moyo wake ndipo enze na vifukwa vokwanila. Yove enena kuti: “Nautuka pampikishano wamene uyu mpaka pamapeto. Nankhala mphela na chikhulupililo.” (2 Tim. 4:6-8) Paulo enzepanga vosankha mwanzelu pautumiki wake wa Chikhilisitu, ndipo enzekaikilalini kuti Yehova enzesangalala naye. Nasesoti tufuna kupanga vosankha mwanzelu kuti Yehova akokondwela nase. Kansi tingachite tyani vamene ivi?

2. Kansi kuyenda mosogolelewa na chikhulupililo kutanthauza chinji?

² Ponena za yove komasoti Akhilisitu ayake okhulupilika, Paulo enena kuti: “Tuyenda mosogolelewa na chikhulupililo, osati mosogolelewa na vinthu vuwoneka na menso.” (2 Ako. 5:7) Kansi Paulo enzetanthauza chinji? M’Baibolo mawu akuti, “kuyenda” nthawe ziyakine otanthauza vinthu vakudalila munthu akafuna kupanga vosankha pa moyo wake. Keno munthu oyenda mosogolelewa na vinthu vakuwona na menso, opanga vosankha mokatijana na vinthu vakukwanisha kuwona, vakumuuja ŵanthu, mwakumvwila komasoti mwakuganizila. Koma mosiyana na vamene ivi, keno munthu oyenda mosogolelewa na chikhulupililo osankha vinthu vokatijana na chikhulupililo chali nacho kwa Yehova Mulungu. Vinthu vakuchita vuwonesha kuti okaikilalini kuti Mulungu azamudalise, komasoti kuti kukonkheja malangizo opezeka m’Mawu ŵake n’koyavya.—Sal. 119:66; Ahe. 11:6.

3. Kansi tupindula tyani keno tuyenda mosogolelewa na chikhulupililo? (2 Akolinto 4:18)

³ N’chendi kuti vosankha viyakine vatupanga, vunkhala vokatijana na vinthu vatukwanisha kuwona na menso ŵasu. Koma olo n’tetyo, tingakumane na mavuto keno tudalila tyala vinthu vatukwanisha kuwona na kumvwa tikafuna kupanga vosankha pankhani zikulu-zikulu. Ndaŵa yanji? Chifukwa chakuti vinthu vatukwanisha kuwona na kumvwa, nthawe ziyakine vunkhala vosadalilika. Keno tudalila tyala vinthu vatukwanisha kuwona, kumvwa, olo mwatumvwila muntima mwasu tikafuna kupanga vosankha, mwapatontho na patontho tingachite vinthu vasakondwela navo Yehova. (Mlal. 11:9; Mat. 24:37-39) Koma keno tuyenda mosogolelewa na chikhulupililo, vizativutelini kupanga vosankha vamene ni ‘vovomelejeka kwa Ambuye.’ (Aife. 5:10) Keno tukonkheja malangizo a Mulungu, tizankhale na ntendele wamuntima komasoti osangalala ngako. (Sal. 16:8, 9; Yes. 48:17, 18) Komasoti tikapitilija kuyenda mosogolelewa na chikhulupililo, tizafwane moyo wosasila.—Ŵelengani 2 Akolinto 4:18.

4. Kansi munthu angaziŵe tyani keno oyenda mosogolelewa na chikhulupililo olo na vinthu vakukwanisha kuwona?

⁴ Kansi tingaziŵe tyani keno tuyenda mosogolelewa na chikhulupililo olo na vinthu vatukwanisha kuwona? Tonse tingachite luweme kulikonsha kuti: Kansi n’chinji chanudalila nikafuna kupanga vosankha? Kansi nudalila tyala vinthu vanukwanisha kuwona? Olo nudalila Yehova kuti akonisogolela? Tiyeni tikambilane vatingachite kuti tipitilije kuyenda mosogolelewa na chikhulupililo pa vinthu vitatu vokonkhapo vamene ni vofunika ngako: Tikafuna kusankha ntchito, tikafuna kusankha munthu watingalungulane naye komasoti tikalondela malangizo a gulu yasu. Pa mfundo iliyonse, tikambilane vinthu vatingafunikile kuganizila kuti tipange vosankha mwanzelu.

MUKAFUNA KUSANKHA NTCHITO

5. Kansi tufunika kuganizila chinji tikafuna kusankha ntchito?

⁵ Tonse tufuna kuti tikokwanisha kufwana vofunika pa moyo wasu komasoti wa ŵanthu am’banja mwasu. (Mlal. 7:12; 1 Tim. 5:8) Ntchito ziyakine zili na malipilo aweme kupambana ziyakine. Ndipo zingatiyavye kulipila vinthu vofunika nosungako ndalama ziyakine. Koma ntchito ziyakine ni za malipilo atontho, mwakuti tingakwanishe kulipila tyala vofunika pa moyo wa banja yasu. Keno tuganizila ntchito yatingakate, nivowonekelatu kuti tingaganizilesoti malipilo ŵake. Koma olo n’tetyo, keno munthu oganizila tyala vinthu vamene ivi, niye kuti oyenda mosogolelewa na vinthu vakuwona na menso ŵake.

6. Kansi tingayende tyani mosogolelewa na chikhulupililo keno tusakila ntchito? (Ahebeli 13:5)

⁶ Keno tuyenda mosogolelewa na chikhulupililo, tizaganizilesoti mwaungakhuziliwe ushamwali wasu na Yehova chifukwa cha ntchito yatingasankhe. Tingalikonshe kuti: ‘Kansi pokata ntchito yamene iyi nizafunikesoti kuchita vinthu viyakine vasakondwela navo Yehova?’ (Miy. 6:16-19) ‘Kansi ikonikangisha kusonkhana, kulalikila mokwanila, kuphunzila Baibolo komasoti nikankhale kutali na banja yangu kwa nthawe itali?’ (Afil. 1:10) Keno mwayankha kuti eye pamakonsho monga ni amene aŵa, mungachite luweme kukana ntchito yamene iyo olo kuti ntchito nizosoŵa. Chifukwa chakuti tuyenda mosogolelewa na chikhulupililo, tupanga vosankha vamene vuwonesha kuti tukaikilalini kuti Yehova azatisamalile mulimonse mwavingankhalile.—Mat. 6:33; ŵelengani Ahebeli 13:5.

7-8. Kansi mkwasu muyakine waku mʼMwela kwa America eyenda tyani mosogolelewa na chikhulupililo? (Onanisoti chithunzi.)

⁷ Mkwasu muyakine waku m’Mwela kwa America zina yake Javier,a ewona kuti kuyenda mosogolelewa na chikhulupililo nikofunika ngako. Yove enena kuti: “Nenze nefwana ntchito ya ndalama zinyinji kuwelejela kaŵili pa ntchito yenenzekata kale.” Koma olo n’tetyo, Javier enzefuna ngako kuchita upainiya. Yove enenasoti kuti: “Pavuli pake, wolemba ntchito eniita kuti akanikonshe makonsho. Wolemba ntchito akaliyeyamba kunikonsha, newo nipemphela kwa Yehova kuti aniyavye chifukwa nenzekhulupilila kuti Yehova oziŵa vinthu vamene vinganiyavye. Newo nenzefuna kuti nikochita vinyinji kuntchito komasoti kuti nikolondela ndalama zinyinji, koma nenzefunalini kuti ntchito yamene iyo inikangishe kukwanilisha volinga vangu vauzimu.”

⁸ Javier enena kuti: “Wolemba ntchito penzenikonsha, eniujasoti kuti tikokotoka mochelwa nthawe zonse. Mowama ntima nemuuja kuti ningakwanishelini kuchita vamene ivi chifukwa chautumiki wangu.” Javier eikana ntchito yamene iyo. Pavuli pamasondo aŵili, yove eyamba kuchita upainiya. Kumapeto kwa chaka chamene icho, yove efwana ntchito yama awazi atontho. Javier enena kuti: “Yehova echimvwa pemphelo yangu ndipo enipasa ntchito yokatijana na ndandanda yangu yaupainiya. Nusangalala ngako kuti nukata ntchito yamene yunipasa nthawe ikulu kuti nikotumikila Yehova pamozi na enekwasu na akalongosi.”

9. Kansi muphunzila chinji kufumila pa vechitikila Trésor?

⁹ Kansi tingachite tyani tikaziŵa kuti ntchito yatukata palipano yutilolalini kuti tikoyenda mosogolelewa na chikhulupililo? Ganizilani vechitikila Trésor waku Congo. Yove efotokoza kuti: “Ntchito yanyowani yenenzenifwana, niye ntundu wa ntchito yenenzekumbwila kufumila kale-kale. Nenzelondela ndalama zinyinji kuwelejela katatu pa ntchito yenenzekata poyamba ndipo ŵanthu enzenilemekeza.” Koma olo n’tetyo, Trésor enzepezekalini pamisonkhano nthawe zonse chifukwa chakuti enzekotoka mochelwa kuntchito kwake. Komasoti ayake akuntchito, enzemukakamija kuti atale wenye pakachitika vinthu viyakine viliye chilungamo. Trésor enzefuna kuleka ntchito yamene iyo, koma enzeyopa kuti angafwanelini ntchito iyakine. Kansi n’chinji chemuyavya? Yove enena kuti: “Lemba ya Habakuku 3:17-19, yeniyavya kuziŵa kuti olo nikezenkhala niliye ndalama, Yehova azanisamalile mulimonse mwavingankhalile. Tetyo, neileka ntchito yamene iyo.” Pamapeto pake, yove enena kuti: “Mabwana anyinji oganiza kuti munthu aliyense angalolele kuluza chilichonse, kupamikijapo banja yake komasoti vinthu vauzimu kuti osati aluze ntchito ya ndalama zinyinji. Nine wosangalala kuti neteteza ushamwali wangu na Yehova komasoti banja yangu. Pepapita chaka chimozi, Yehova eniyavya kuti nifwane ntchito iyakine iweme iliye malipilo anyinji yamene yenzenipasa nthawe ikulu yochita vinthu vauzimu. Keno tuika Yehova pa malo oyamba, nthawe ziyakine tingakumane na mavuto azachuma, koma Yehova akotisamalila.” N’vowonekelatu kuti keno tudalila malangizo komasoti vinthu vakutilonjeza Yehova tizapitilije kuyenda mosogolelewa na chikhulupililo ndipo yove azatidalise.

MUKAFUNA KUSANKHA MUNTHU WAMUNGALUNGULANE NAYE

10. Kansi n’chinji chingachitishe kuti tikodalila vinthu vatukwanisha kuwona tikafuna kusankha munthu watingalungulane naye?

¹⁰ Ukwati ni mphaso yofumila kwa Yehova, ndipo mwachibadwa ŵanthu ofuna kulungulana. Poganizila munthu muweme wangalungulane naye, payakine kalongosi angaganizile ngako minkhalidwe yali nayo mkwasu muyakine, mwakuwonekela, mbili yake, mwavilili vinthu pa moyo wake pankhani ya chuma, udindo walinawo kubanja kwawo, kupamikijapo mwakumvwila muntima mwake akaganizila vokhuza mkwasu wamene uyo.b Kuganizila vinthu monga nivamene ivi nikofunika. Koma olo n’tetyo, keno yove oganizila tyala vinthu monga nivamene ivi, angoyenda modalila vinthu vuwoneka na menso.

11. Kansi tingayende tyani mosogolelewa na chikhulupililo tikafuna kusankha munthu watingalungulane naye? (1 Akolinto 7:39)

¹¹ Yehova oŵamekela ngako enekwasu na akalongosi amene okonkheja malangizo ŵake posankha munthu wangalungulane naye! Mwachisanzo, ove omvwila malangizo ŵakupeleka Mulungu mofumila pansi pa ntima okhuza kuyembekezela kuti apitilile “pachimake paulumbwana” akaliyeyamba chibwenzi. (1 Ako. 7:36) Ove owoneshesha kuti munthu wakufuna kulungulana naye, ali na minkhalidwe iweme yakufuna Yehova kuli mwanalume komasoti mwanakazi. (Miy. 31:10-13, 26-28; Aife. 5:33; 1 Tim. 5:8) Ŵanthu amene otumikilalini Mulungu akaŵakonshela, ove okonkheja malangizo a Mulungu okhuza ‘kulunguliwa tyala mwa Ambuye,’ amene ali pa 1 Akolinto 7:39. (Ŵelengani.) Ove opitilija kuyenda mosogolelewa na chikhulupililo, chifukwa okaikilalini kuti Yehova oziŵa luweme mwakumvwila kupambana munthu aliyense.—Sal. 55:22.

12. Kansi mwaphunzila chinji kufumila pa chisanzo cha Rosa?

¹² Ganizilani vechitikila kalongosi muyakine wamene ni mpainiya waku Colombia zina yake Rosa. Ntchito yenzekata ichitisha kuti akokumana moweleja-weleja na mwanalume muyakine wamene enzelini wa mboni ndipo eyamba kumuwonesha chidwi. Rosa enze ekopeka naye mwanalume wamene uyo. Yove enena kuti: “Enzewoneka monga ni munthu muweme ngako. Yove enzekata ntchito zoyavya ŵanthu mmunzi mwawo komasoti enze na thanzi iweme ngako. Nenzewamijiwa na mwenzechitila nane vinthu. Yove enze na chilichonse chenenzefuna kuli mwanalume, vuto yenze yakuti enzelini wa mboni tyala.” Rosa enenasoti kuti: “Venze vovuta kuti nimukane chifukwa chakuti pansi pa ntima nenzemufuna. Panthawe yamene iyo neyamba kulimvwa kuti nili neka, ndipo nenzefuna kulunguliwa koma niliyekwanishe kufwana munthu wokonda chonadi.” Koma olo n’tetyo, Rosa enzeganizilalini tyala vinthu vangakwanishe kuwona. Yove enzeganizilasoti mwavingakhuzile ushamwali wake na Yehova, tetyo eleka kutandala na mwanalume wamene uyo noyamba kuchita vinyinji potumikila Yehova. Pakaliyepita nthawe itali, yove eitiwa kuti akaloŵe Sikulu ya Akhilisitu Olalikila za Ufumu, ndipo palipano otumikila monga mpainiya wapadela. Rosa enena kuti: “Yehova waniyavya kuti ninkhale wosangalala ngako.” Nthawe ziyakine vingankhale vovuta ngako kuchita vinthu vangakondwele navo Yehova, ngako-ngako keno ntima wasu ukumbwila ngako chinthu chiyakine. Koma keno tulola kuti maganizo a Yehova atisogolele, tupindula nthawe zonse.

MUKALONDELA MALANGIZO A GULU YASU

13. Kansi n’chinji chingachitishe kuti tikoyenda modalila vinthu vatukwanisha kuwona tikalondela malangizo a gulu yasu?

¹³ Nthawe zinyinji tulondela malangizo—kufumila kuli akulu amumpingo, opanamila dela, ofesi ya nthambi—komasoti Bungwe Yutonga amene otisogolela pa kulambila kwasu. Koma kansi tingachite tyani keno tuŵamvwishalini luweme malangizo ŵatalondela? Nthawe ziyakine tingayambe kukaikila keno malangizo amene awo angatiyavye chendi. Tingayambesoti kuganizila vinthu vasachita luweme enekwasu amene atipasa malangizo amene awo.

14. Kansi n’chinji chingatiyavye kuti tikoyenda mosogolelewa na chikhulupililo tikalondela malangizo a gulu yasu? (Ahebeli 13:17)

¹⁴ Keno tuyenda mosogolelewa na chikhulupililo, tukaikilalini kuti malangizo amene awo ni ofumila kwa Yehova komasoti kuti yove oziŵa luweme mwavilili vinthu pa moyo wasu. Monga vokonkhapo vake, tuŵamvwila mokulumija ndipo tuchita vamene ivi tili na maganizo aweme. (Ŵelengani Ahebeli 13:17.) Tuziŵa kuti kumvwila kwasu kuyavya kuti mumpingo munkhale nkatijano. (Aife. 4:2, 3) Tuziŵa kuti enekwasu amene otisogolela ni ŵanthu aliye ungwilo, koma Yehova azatidalise keno tuŵamvwila. (1 Sam. 15:22) Tukaikilalinisoti kuti keno malangizo ayakine ŵatalondela ni osayavya chendi, Yehova azawonesheshe kuti awamyiwa pakapita nthawe.—Mik. 7:7.

15-16. Kansi n’chinji chiyavya mkwasu muyakine kuti akoyenda mosogolelewa na chikhulupililo penzekaikila malangizo ŵechilondela? (Onanisoti chithunzi.)

¹⁵ Ganizilani chochitika chiyakine chamene chuwonesha kuti kuyenda mosogolelewa na chikhulupililo n’koyavya. Olo kuti ŵanthu anyinji ku Peru olaŵila Chispanish, anyinji akankhala pang’anda olaŵila vilaŵilo vakwawo. Chimozi mwa vilaŵilo vamene ivo ni Chiquechua. Kwa vyaka vinyinji enekwasu na akalongosi olaŵila Chiquechua enzesakila ŵanthu olaŵila Chiquechua mu gawo yawo. Koma olo n’tetyo, pofuna kukonkheja malamulo a boma ove echinja njila zolalikilila kuti afwane kwakunkhala ŵanthu amene awo. (Alo. 13:1) Monga vokonkhapo vake, ayakine eyamba kudela nkhaŵa kuti njila zamene izo zisokoneze ntchito yolalikila mugawo yawo. Chifukwa chakuti enekwasu amene awo emvwila malangizo, Yehova edalisa khama yawo ndipo efwana ŵanthu anyinji olaŵila Chiquechua.

¹⁶ Nkulu muyakine wamumpingo wachilaŵilo cha Chiquechua zina yake Kevin, naye enze m’gulu ya ŵanthu enzekaikila vokhuza kuchinja kwamene uko. Yove efotokoza kuti: “Newo nenzelikonsha kuti, ‘Kansi tingakwanishe tyani kufwana ŵanthu olaŵila Chiquechua?’” Kansi Kevin echita tyani? Yove elaŵila kuti: “Nekumbukila lemba ya Miyambo 3:5. Ndipo neganizila chisanzo cha Mose. Yehova emupasa malangizo amene enzewoneka monga ni osayavya. Yove euja Mose kuti asogolele Aisilaeli ku Nyanja Isweta panthawe yenzefuma ku Iguputo, ndipo venzewoneka monga akwanishelini kuthaŵa Aiguputo amene enzeŵapitikisha chifukwa Nyanja yamene iyo yenzeŵachingilija. Koma olo n’tetyo, yove emvwila ndipo Yehova edalisa kumvwila kwake munjila yodabwisa ngako.” (Eks. 14:1, 2, 9-11, 21, 22) Pavuli pake, Kevin enzewokonzeka kuchinja utumiki wake. Kansi vokonkhapo vake venze votyani? Yove elaŵila kuti: “Newo nedabwa ngako peniwona mwechitidalisila Yehova. Poyamba, tenzeyenda ngako muutumiki ndipo nthawe ziyakine tenzefwana tyala munthu mmozi olo aŵili olaŵila Chiquechua. Koma palipano, tulalikila m’gawo mwamene muli ŵanthu olaŵila Chiquechua. Monga vokonkhapo vake, tulalikila kuli ŵanthu anyinji achilaŵilo chamene ichi, tuchita maulwendo oweleja kuli ŵanthu anyinji komasoti tili na maphunzilo anyinji a Baibolo. Chiŵelengelo cha ŵanthu opezeka pamisonkhano chayangijilika ngako.” N’vowonekelatu kuti keno tuyenda mosogolelewa na chikhulupililo, Yehova otidalisa nthawe zonse.

17. Kansi mwaphunzila chinji munkhani ino?

¹⁷ Munkhani ino, takambilana vatingachite kuti tipitilije kuyenda mosogolelewa na chikhulupililo pa vochitika vitatu vofunika ngako. Koma tufunika kupitilija kuyenda mosogolelewa na chikhulupililo pavochitika vonse pamoyo wasu, monga tikafuna kusankha mafilimu olo vinthu viyakine vosangalasa vatingachite panthawe yopumula, maphunzilo apalulu komasoti mwatingalelele ŵana ŵasu. Viliye kanthu kuti tufuna kupanga vosankha votyani, tufunika kupewa kudalila tyala vinthu vatukwanisha kuwona. Koma tikoganizilasoti ushamwali wasu na Yehova, malangizo ŵakutipasa komasoti lonjezo yake yakuti akotisamalila. Tikachita tetyo, tizakwanishe “kuyenda mu zina ya Yehova Mulungu wasu kosakila.”—Mik. 4:5.