NKHANI YOPHUNZILA N.° 13
NYIMBO N.° 4 “Yehova ni mchiŵeta wangu”
Kwanja ya Yehova niifupilini
“Kansi kwanja ya Yehova niifupi?”—NUM. 11:23.
CHOLINGA CHA NKHANI INO
Nkhani ino, itiyavye kuti tikokhulupilila ngako kuti Yehova akotipasa vinthu vatufunikila pa moyo wasu nthawe zonse.
1. Kansi Mose ewonesha tyani kuti enzedalila Yehova pechisogolela Aisilaeli pofuma mu Iguputo?
BUKU ya Ahebeli yutomola ŵanthu amene enzekhulupilila Yehova. Mmozi mwa ŵanthu amene awo enze Mose wamene enze na chikhulupililo chikulu ngako. (Ahe. 3:2-5; 11:23-25) Yove ewonesha chikhulupililo pechisogolela Aisilaeli pofuma mu Iguputo. Yove aliyeiyope mfumu Falao komasoti masodja ŵake ankhondo. Mose enzemudalila ngako Yehova ndipo esogolela ŵanthu a Mulungu poluta ku Nyanja Isweta komasoti muchipululu. (Ahe. 11:27-29) Aisilaeli anyinji eyamba kukaikila kuti Yehova angakwanishe kuŵapasa vinthu vakufunikila, koma Mose epitilija kudalila Mulungu. Chikhulupililo cha Mose, chiliye mukatishe mwala chifukwa Yehova epeleka chakulya na manzi modabwisa kuli ŵanthu ŵake penze muchipululu chiliye manzi.a—Eks. 15:22-25; Sal. 78:23-25.
2. Kansi n’chinji chechitisha kuti Mulungu akonshe Mose kuti: “Kansi kwanja ya Yehova niifupi”? (Numeri 11:21-23)
2 Olo kuti Mose enze na chikhulupililo chotang’a, pavuli pa chaka chimozi kufumila pechisogolela Aisilaeli kufuma ku ukapolo, yove ekaikila kuti Yehova angakwanishe kupeleka nyama kuli ŵanthu ŵake. Munsasa wa Aisilaeli mwenze analume okwana 600. 000, komasoti mwenze anakazi na ŵana ndipo muchipululu mwenzeve chakulya. Poyankha, Yehova ekonsha Mose kuti: “Kansi kwanja ya Yehova niifupi?” (Ŵelengani Numeri 11:21-23.) Pa lemba yamene iyi, mawu akuti “kwanja ya Yehova” otanthauza mzimu utuŵa wa Mulungu olo mphamvu yake yochitila vinthu. Mwanjila iyakine tinganene kuti Yehova enzekonsha Mose kuti ‘Kansi uganiza kuti ningakwanishelini kuchita vanalonjeza?’
3. Ndaŵa yanji vinthu vechitikila Mose komasoti Aisilaeli nivochitisha chidwi?
3 Kansi nthawe ziyakine mukaikila kuti Yehova angakusamalileni mwewo pamozi na banja yanu pokupasani vinthu vamufunikila mwakuthupi? Keno vili tetyo olo yayi, tiyeni tikambilane vechitikila Mose na Aisilaeli amene enzekaikila kuti Yehova angaŵasamalile mwakuthupi. Tikambilanesoti mfundo ziyakine za m’Malemba zamene zitiyavye kuti tikokhulupilila ngako kuti kwanja ya Yehova niifupilini.
PHUNZILANI KUFUMILA KULI MOSE KOMASOTI AISILAELI
4. Ndaŵa yanji Aisilaeli anyinji eyamba kukaikila kuti Yehova angaŵasamalile?
4 Kansi n’chinji chechitisha kuti Aisilaeli anyinji ayambe kukaikila kuti Yehova angakwanishe kuŵasamalila? Aisilaeli pamozi na “gulu ya ŵanthu amitundu yosiyana-siyana” amene enzelini Aisilaeli, enkhala m’chipululu chikulu kwa nthawe itali penzefuma ku Iguputo kuluta mu Chalo Cholonjezewa. (Eks. 12:38; Deut. 8:15) Ŵanthu amitundu iyakine komasoti Aisilaeli ayakine anyinji enze eŵeŵa kulya mana ndipo eyamba kung’ung’uzika. (Num. 11:4-6) Ŵanthu amene awo eyamba kuyewa nyama komasoti vakulya viyakine venzekulya ku Iguputo. Mose pechiwona kuti ŵanthu amene aŵo omukakamija, eganiza kuti achitepo kanthu payeka kuti aŵapase nyama.—Num. 11:13, 14.
5-6. Kansi vechichita Aisilaeli anyinji chifukwa cha kuyavijana kwawo na ŵanthu amitundu iyakine vingatiphunzise chinji?
5 Vuwoneka kuti Aisilaeli ephunzila ntima wosatembeja kufumila kuli ŵanthu amitundu iyakine ŵenze nawo pamozi. Nasesoti tingayambe kutolela ntima wosatembeja wali nawo ŵanthu ayakine noyamba kusakhutila na vinthu vakutipasa Yehova. Vamene ivi vingatichitikile tikayamba kuganizila ngako vinthu vetenze navo kale olo kukumbwila vinthu va ayasu mwadjelasi. Koma olo n’tetyo, tingankhale osangalala ngako tikaphunzila kunkhala okhutila mosasamala kanthu kuti vinthu vilityani pamoyo wasu.
6 Payakine Aisilaeli, enzekumbukila vechiŵalonjeza Mulungu kuti akeloŵa m’Chalo Cholonjezewa, akankhale na vinthu vinyinji mwakuthupi. Koma ove enzefunika kuyembekezela kukwanilishiwa kwa lonjezo yamene iyo mu Chalo Cholonjezewa, osati panthawe yenzeyenda m’chipululu. Molingana na vamene ivi, mmalo moganizila ngako vinthu vamene payakine tingavifwanelini muli chino chalo chiipa, tingachite luweme kuganizila ngako vakutilonjeza Yehova muchalo chanyowani. Tufunikilasoti kuganizila Malemba amene angatiyavye kuti tikokhulupilila ngako Yehova.
7. Kansi ndaŵa yanji tingakhulupilile kuti Yehova niwokonzeka nthawe zonse kutiyavya?
7 Koma payakine mungadabwe kuti ndaŵa yanji Mulungu ekonsha Mose kuti: “Kansi kwanja ya Yehova niifupi?” Payakine Yehova enzefuna kumuyavya Mose kuti akoganizilasoti vaingakwanishe kuchita kwanja ya Yehova, mmalo moganizila tyala kupaka kwa mphamvu zake. Mulungu sembe ekwanisha kupeleka nyama yokwanila kuli Aisilaeli olo kuti enzekutali m’chipulu. Mulungu ewonesha kuti niwamphamvu ngako pechikatishila ntchito “kwanja ya mphamvu komasoti kwanja yotambulula.” (Sal. 136:11, 12) Tetyo, tikakumana na mavuto osati tikokaikila kuti Yehova angakwanishe kutiyavya aliyense payeka-payeka, viliye kanthu kuti tili kuni.—Sal. 138:6, 7.
8. Kansi n’chinji chingatiyavye kuti tipewe kuphoniyesha vinthu monga nimwechichitila ŵanthu anyinji m’chipululu? (Onanisoti chithunzi.)
8 Yehova ekwanilisha vechilonjeza, ndipo etumijila ŵanthu ŵake gulu ikulu ya tunyoni tuyakine tuitiwa kuti tumbuŵa. Koma olo n’tetyo, Aisilaeli aliyewoneshe kutembeja chodabwisa chamene icho chechiŵachitila Mulungu. Mmalo mwake, ŵanthu anyinji ewonesha ntima wadyela. Ove ekata tunyoni nzuŵa na usiku kumo pofuna kuti akate tunyinji. Yehova ekalipa ngako chifukwa chakuti ŵanthu amene awo “ewonesha ntima wadyela,” ndipo eŵapasa chilango. (Num. 11:31-34) Tingaphunzilepo kanthu kufumila pachisanzo chamene ichi. Tufunikila kunkhala osamala kuti tipewe ntima wadyela. Keno nise olemela olo osauka, tufunikila kuunjika ‘chuma chasu kululu’ mwakunkhala paushamwali uweme na Yehova komasoti Yesu. (Mat. 6:19, 20; Luk. 16:9) Tikachita tetyo, tingankhale osimikijila kuti Yehova azatipase vinthu vatufunikila pamoyo wasu.
Kansi ni ntima wotyani uipa wechiwonesha ŵanthu anyinji penze m’chipululu, ndipo tingaphunzilepo chinji pa chochitika chamene ichi? (Onani ndime 8.)
9. Kansi tukhulupilila kuti Mulungu azatichitile chinji?
9 Yehova otambulula kwanja yake pofuna kuyavya ŵanthu ŵake masiku ŵano. Koma olo n’tetyo, vamene ivi vutanthauzalini kuti tingakumanelini na mavuto azachuma olo kusoŵa vakulya.b Koma Yehova angatisiyelini. Yove azatisamalile pamavuto osiyana-siyana. Kansi tingawoneshe tyani kuti tukhulupilila kuti Yehova akotisamalila? Tiyeni tiwone mwatingachitile vamene ivi pavochitika viŵili ivi vokonkhapo: (1) tikafuna kusankha ntchito yamene ingatiyavye kuti tikosamalila banja yasu, komasoti (2) keno tudela nkhaŵa kuti tikofwana tyani ndalama tikezekalamba.
KENO TUKUMANA NA MAVUTO AZACHUMA
10. Kansi ni mavuto otyani azachuma ŵatingakumane nawo?
10 Mapeto achino chalo chiipa pakuvwendela, tingayembekezele kukumana na mavuto akulu azachuma. Mavuto okhuza ndale, mikangano, masoka am’chilengedwe olo milili, angachitishe kuti vinthu vidule mosayembekezeleka. Tingaluze ntchito, katundu wasu olo kusoŵa malo onkhala. Tingafunikile kusakila ntchito iyakine olo kufulukila kudela iyakine kuti tikwanishe kufwana vinthu vatufunikila pamoyo wasu. Kansi n’chinji chingatiyavye kupanga chosankha chamene chingawoneshe kuti tudalila Yehova?
11. Kansi n’chinji chingakuyavyeni kulimbana na mavuto azachuma? (Luka 12:29-31)
11 Chinthu chofunika ngako komasoti chingakuyavyeni, nikumufotokozela Yehova nkhaŵa zanu zonse. (Miy. 16:3) Mukomusenga Mulungu kuti akupaseni nzelu zamufunikila kuti mupange vosankha mwanzelu nokuyavyani kuti munkhale odekha kuti mupewe “kuvutika muntima” chifukwa cha mavuto ŵamukumana nawo. (Ŵelengani Luka 12:29-31.) Musengeni kuti akuyavyeni kunkhala okhutila na vinthu vofunika vamuli navo pamoyo wanu. (1 Tim. 6:7, 8) Sakilani malangizo m’mabuku ŵasu kuti muwone vamungachite polimbana na mavuto azachuma. Ŵanthu anyinji ayavyiwa na nkhani zupezeka pa jw.org zamene zufotokoza vokhuza mavuto azachuma.
12. Kansi nimakonsho otyani amene angayavye Nkhilisitu wamene ali pabanja kuti apange chosankha chiweme?
12 Ŵanthu anyinji ovomela kuyakata ntchito kutali na banja yawo, koma nthawe zinyinji kuchita vamene ivo nikusaganiza luweme. Mukaliyevomela ntchito iliyonse yanyowani, mukoganizila mwaingakhuzile moyo wanu wauzimu osati tyala malipilo aweme ŵamungalondele pantchito yamene iyo. (Luk. 14:28) Mungalikonshe kuti: ‘Kansi n’chinji chingachitikile muyangu wamuukwati nikaluta kuyakatila ntchito kutali? Kansi nikokwanisha kupezeka pamisonkhano yonse, kuloŵa muutumiki wakumunda komasoti kutandala na enekwasu na akalongosi?’ Keno muli na ŵana mungafunikilesoti kulikonsha konsho iyi yofunika yakuti: ‘Kansi nikokwanisha tyani “kuŵalela poŵapasa malangizo komasoti kuŵaphunzisa mokatijana na vakunena Yehova” nikavomela kuyakatila ntchito kutali na ove?’ (Aife. 6:4) Mukolola kuti maganizo a Mulungu akokusogolelani, mmalo mosogolelewa na maganizo ŵa akwanu olo azishamwali ŵanu amene olemekezalini mfundo za m’Malemba.c Tony wamene onkhala kum’Chingulo kwa Asia, epasiwa mwayi moweleja-weleja kuti akakate ntchito muchalo chiyakine. Koma olo n’tetyo, pavuli popemphela komasoti kukambilana na mwanakazi wake vokhuza nkhani yamene iyo, yove ekana mwayi wamene uyo wantchito nosankha moyo wosafuna vinthu vinyinji. Pokumbukila vechitika, Tony enena kuti: “Nankhala na mwayi woyavya ŵanthu anyinji kuti aziŵe Yehova ndipo ŵana ŵasu osangalala ngako na chonadi. Banja yasu yaphunzila kuti keno tukonkheja malangizo amene ali pa Mateyo 6:33, Yehova otisamalila potipasa vinthu vatufunikila pamoyo wasu.”
KENO MUKONZEKELA VINTHU VINGEZEKUYAVYANI MUKEZEKALAMBA
13. Kansi nivinthu votyani vatingachite palipano kuti tizakwanishe kulisamalila tikezekalamba?
13 Kukhulupilila kwasu thandizo ya Yehova kungayesewesoti tikayamba kuganizila mwati vizankhalile vinthu pamoyo wasu tikezekalamba. Baibolo yutilimbikisa kuti tikokata ntchito mwakhama kuti tifwane vinthu vingezetiyavya kusogolo. (Miy. 6:6-11) Keno nivokwanishika, vunkhala luweme kusunga ndalama zamene zingezetiyavya kusogolo. Ndalama zutiyavya kunkhala otetezeka. (Mlal. 7:12) Komo olo n’tetyo, tufunikila kupewa kuwona kuti chuma niye chinthu chofunika ngako pa moyo wasu.
14. Kansi lemba ya Ahebeli 13:5 ingatiyavye tyani kuti osati tikodela nkhaŵa ngako vokhuza sogolo yasu?
14 Yesu elaŵila fanizo iyakine yamene yuwonesha kuti nikusaganiza luweme kuliunjikila ndalama zinyinji ‘paliye kunkhala wolemela kwa Mulungu.’ (Luk. 12:16-21) Paliye angaziŵe mwaukuti uzankhalile moyo wake mailo. (Miy. 23:4, 5; Yako. 4:13-15) Monga ophunzila a Khilisitu, sewo tukumana na mavuto anyinji. Yesu enena kuti tufunikila kunkhala okonzeka ‘kusiya’ chuma chasu chonse kuti tinkhale ophunzila ŵake. (Luk. 14:33) Akhilisitu oyambilila aku Yudeya, ekwanisha kusiya katundu wawo mosangalala. (Ahe. 10:34) Masiku ŵano enekwasu anyinji ololela kuluza ntchito zawo chifukwa chokana kuvotela chipani chilichonse. (Chiv. 13:16, 17) Kansi n’chinji chuŵayavya kuti akwanishe kuchita vamene ivi? Ove okhulupilila na ntima wonse vechilonjeza Yehova kuti: “Nizakusiyenilini olo kukutayani na patontho kumo.” (Ŵelengani Ahebeli 13:5.) Tuchita vonse vatingakwanishe pokonzekela vakusogolo, koma vinthu vosayembekezeleka vikatichitikila, tukhulupilila kuti Yehova atiyavye.
15. Kansi nimaganizo otyani oyenelela ŵakufunikila kunkhala nawo makolo Achikhilisitu okhuza ŵana ŵawo? (Onanisoti chithunzi.)
15 M’madela ayakine cholinga chikulu cha ŵanthu nikuvyala ŵana chifukwa ofuna kuti ŵana amene awo akoŵapasa ndalama zokwanila poŵasamalila akezekalamba. Koma Baibolo yunena kuti makolo niye ofunikila kusamalila ŵana ŵawo. (2 Ako. 12:14) N’chendi kuti makolo oyembekezela kuti ŵana ŵawo akoŵayavya pakafunikila, ngako-ngako akakalamba ndipo ŵana anyinji osangalala kuyavya makolo ŵawo. (1 Tim. 5:4) Koma makolo amene odalila Yehova, oziŵa kuti angankhale osangalala ngako keno oyavya ŵana ŵawo kuti akotumikila Yehova, osati kuvyala ŵana na cholinga chakuti akezekalamba akoŵapasa ndalama zokwanila poŵasamalila.—3 Yoh. 4.
Banja ya Chikhilisitu yolipeleka kwa Mulungu yuchita vinthu mwanzelu poganizila mfundo za m’Baibolo popanga vosankha vokhuza sogolo yawo. (Onani ndime 15.)d
16. Kansi makolo angaŵakonzekeleshe tyani ŵana ŵawo kuti azakwanishe kulisamalila ŵeka mwakuthupi? (Aifenso 4:28)
16 Mukoŵaphunzisa ŵana ŵanu kuti akodalila Yehova kupitila muvochita vanu panthawe yamuŵaphunzisa kuti akokwanisha kulisamalila ŵeka. Panthawe yakali atontho, mukoŵayavya kuziŵa ubwino wokata ntchito mwakhama. (Miy. 29:21; ŵelengani Aifenso 4:28.) Akayamba kukula ayavyeni kuti akolimbikila kusikulu. Makolo Achikhilisitu, angachite luweme kusakila komasoti kukatishila ntchito mfundo za m’Baibolo kuti ayavye ŵana ŵawo mwangakatishile ntchito maphunzilo ŵawo mwanzelu. Vamene ivi vingayavye ŵana ŵawo kuti akokwanisha kulisamalila ŵeka, komasoti kuti akochita vinyinji potumikila Mulungu.
17. Kansi tingankhale osimikijila za chinji?
17 Atumiki okhulupilika a Yehova okhulupilila kuti Mulungu ali na mphamvu komasoti ofunishisha kuŵapasa vinthu vakufunikila mwakuthupi. Mapeto a chino chalo chiipa pakuvwendela, tingayembekezele kuti kukhulupilila kwasu Yehova kuzayesewe. Koma mulimonse mwavingankhalile, tufunikila kukhulupilila na ntima wonse kuti Yehova azakatishile ntchito mphamvu zake potipasa vinthu vatufunikila mwakuthupi. Tufunikilalini kukaikila kuti kwanja yake yamphamvu komasoti yotambulula izafupikelini nokangiwa kutiyavya.
NYIMBO N.° 150 Welani kwa Mulungu kuti muzapulumuke
a Onani “Makonsho ofumila kuli oŵelenga” mu Nsanja ya Mulonda ya Okutoba 2023.
b Onani “Mafunso Ochokera Kwa Owerenga” mu Nsanja ya Olonda ya 15 Sekutemba 2014.
c Onani nkhani yakuti “Simungatumikire Ambuye Awiri” mu Nsanja ya Olonda ya 15 Epulayelo 2014.
d MAWU OFOTOKOZA CHITHUNZI: Banja iyakine ya Chikhilisitu yolipeleka potumikila Mulungu, yulaŵila na mwana wawo kupitila pa vidiyo yapafoni wamene okata ntchito yomanga Ng’anda ya Ufumu pamozi na mwanalume wake.