Yavyani wophunzila Baibolo wanu kuti ayambe kutumikila Yehova

1-2. (a) Ndaŵa yanji ophunzila Baibolo ayakine owaya-waya kuti ayambe kutumikila Yehova? (b) Kansi tikambilane chinji munkhani ino?

KANSI mwewo mwenzewaya-waya kuti munkhale wa Mboni za Yehova? Payakine mwenzeyopa ayanu akutchito, azishamwali, olo enekwanu kuti akokushushani. Olo payakine mwenzeganiza kuti mungakwanishelini kuti mukokonkheja mfundo zolungama za Mulungu pamoyo wanu. Keno ni tetyo, mungamvwishe mosavuta mukawona wophunzila Baibolo owaya-waya kuti ayambe kutumikila Yehova.

² Yesu enzeziŵa kuti vinthu monga ni vamene ivi, vingakangishe munthu mosavuta kuti akule mwauzimu. (Mat. 13:20-22) Koma yove aliyeleke kuyavya ŵanthu amene enzewaya-waya kuti ankhale ophunzila ŵake. Mmalomwake, yove ephunzisa ophunzila ŵake kuziŵa mwangayavyile ŵanthu otetyo kuti (1) aziŵe vinthu vuŵakangisha kupita pasogolo, (2) kumukonda ngako Yehova, (3) kuika vinthu vofunika ngako pa malo oyamba, komasoti (4) kuziŵa vangachite polimbana na mavuto. Kansi tingavikatishile tyani ntchito vinthu vechilaŵila Yesu patukatishila ntchito buku ya Sangalalani na moyo kosasila! poyavya wophunzila Baibolo wasu kuti ayambe kutumikila Yehova?

YAVYANI WOPHUNZILA BAIBOLO WANU KUZIŴA VINTHU VAMENE VUMUKANGISHA KUTI AYAMBE KUTUMIKILA YEHOVA

3. Kansi vuwoneka kuti ni chinji chenzemukang’isha Nikodemo kunkhala wophunzila wa Yesu?

³ Nikodemo wamene enze nsogoleli woziŵika luweme wa Ayuda, enzekumana na vinthu vamene venzemukangisha kuti ankhale wophunzila wa Yesu. Pepita tyala miyezi 6 kufumila pechiyamba utumiki wake Yesu kuti Nikodemo aziŵe kuti Yesu etumiwa na Mulungu. (Yoh. 3:1, 2) Koma olo ni tetyo, Nikodemo eluta kuyakumana na Yesu usiku mosawonekela chifukwa chakuti “enzeyopa Ayuda.” (Yoh. 7:13; 12:42) Payakine yove enzeyopa kuti angaluze vinthu vinyinji akankhala wophunzila wa Yesu.a

4. Kansi Yesu emuyavya tyani Nikodemo kuziŵa vinthu venzefuna Mulungu kuli yove?

⁴ Nikodemo enzechiziŵa luweme Chilamulo, koma enzefunikila kuyavyiwa kuti amvwishe luweme venzefuna Yehova kuli yove. Kansi Yesu emuyavya tyani Nikodemo? Yesu enze wokonzeka kulaŵila na Nikodemo nthawe iliyonse, olo usiku. Ndipo Yesu emuuja momvwika luweme venzefunikila kuchita kuti ankhale wophunzila wake kuti ofunikila kulapa machimo ŵake, kubatizika mmanzi komasoti kukhulupilila Mwana wa Mulungu.—Yoh. 3:5, 14-21.

5. Kansi tingamuyavye tyani wophunzila Baibolo wasu kuziŵa vinthu vumukangisha kupita pasogolo?

⁵ Olo wophunzila Baibolo wamene oŵaziŵa luweme malemba, angafunikile kuyavyiwa kuti aziŵe vinthu vamene vumukangisha kuti apite pasogolo mwauzimu. Ntchito yolembewa komasoti kushushiwa na akwake vingamukangishe kukwanilisha volinga vake vauzimu. Tetyo, mukomuyavya kuti akokumasukilani. Mungamusenge kuti muchitile pamozi vinthu vosiyana-siyana monga kumwa tiyi olo kuyanyunga. Keno muchita vamene ivi angakumasukileni nokufotokozelani mavuto ŵakukumana nawo. Mukomulimbikisa wophunzila wanu kuti achinje vinthu pamoyo wake kuti akondweleshe Yehova, osati kuti akondweleshe mwewo.

6. Kansi mungamuyavye tyani wophunzila Baibolo wanu kunkhala wotang’a ntima noyamba kutumikila Yehova? (1 Akolinto 16:13)

⁶ Wophunzila Baibolo wanu akayamba kukhulupilila kuti Yehova amuyavye kuti akokatishila ntchito mfundo za mu Baibolo pa moyo wake, angatang’e ntima noyamba kukatishila ntchito vinthu vakuphunzila. (Ŵelengani 1 Akolinto 16:13.) Udindo wamuli nawo pophunzisa ŵanthu ni wosasiyana na wakunkhala nawo aticha kusikulu. Kansi ni aticha otyani wemwenzekonda ngako mukali pasikulu? Ni vosakaikisha kuti mwenzekonda ngako aticha amene enzekuyavyani moleza ntima kuti muleke kulikaikila. Molingana na vamene ivi, mphunzisi muweme wa Baibolo oujalini tyala wophunzila Baibolo wake kuti Mulungu ofuna kuti tikochita vakuti-vakuti, koma omusimikijilasoti kuti Yehova angamuyavye kuchinja vinthu vakufunikila pa moyo wake. Kansi mungachite tyani kuti munkhale mphunzisi muweme?

YAVYANI WOPHUNZILA BAIBOLO WANU KUTI AKOKONDA NGAKO YEHOVA

7. Kansi Yesu eŵayavya tyani ŵanthu enzemumvwishila kuti akokonda ngako Yehova?

⁷ Yesu enzeziŵa kuti kukonda ngako Mulungu, kungaŵayavye ophunzila ŵake kuti akokatishila ntchito vinthu vakuphunzila. Nthawe zinyinji, yove enzeŵaphunzisa vinthu vamene sembe veŵayavya kuti akokonda ngako Atata ŵawo akululu. Mwachisanzo, yove eyelekezela Yehova na munthu wamene opasa ŵana ŵake vinthu viweme. (Mat. 7:9-11) Vuwoneka kuti ŵanthu ayakine enzemvwishila Yesu, atata ŵawo aliyeŵawonesheko chikondi chotetyo. Ganizilani mwechimvwila ove Yesu pechiŵafotokozela fanizo ya tata wachikondi wamene elondela luweme mwana wake wosamvwila pechijokela kung’anda. Ove ekwanisha kuwona kuti Yehova oŵachitila chifundo ngako ŵana ŵake ali pano pa chalo.—Luk. 15:20-24.

8. Kansi mungamuyavye tyani wophunzila Baibolo wanu kuti akokonda ngako Yehova?

⁸ Namwesoti mungakwanishe kuyavya wophunzila wanu kuti akokonda ngako Yehova keno mumusimikijila ngako minkhalidwe iweme ya Mulungu pa nthawe yamuphunzila naye. Nthawe iliyonse yamuphunzila naye, mukowoneshesha kuti wophunzila wanu okwanisha kuwona chikondi cha Mulungu kupitila mu vinthu vakuphunzila. Keno mukambilana nkhani ya dipo, muyavyeni kuwona mwayumukhuzila yove payeka. (Alo. 5:8; 1 Yoh. 4:10) Wophunzila wanu angavutikelini kuyamba kukonda Yehova akamvwisha kuti Mulungu omukonda monga munthu payeka.—Agal. 2:20.

9. Kansi ni chinji cheyavya Michael kuti achinje moyo wake?

⁹ Ganizilani vokhuza Michael, wamene onkhala ku Indonesia. Yove ekulila mu banja ya Mboni koma enzefunalini kubatizika. Pechikwanisha vyaka 18, yove eluta kuyakata ntchito yoyendesha mathilaki kuchalo chiyakine. Pavuli pake elungula mwanakazi, koma esiya banja yake noluta kuyapitilija ntchito yake. Pa nthawe yamene iyo, mwanakazi wake pamozi na mwana wake mwanakazi, eyamba kuphunzila Baibolo ndipo epita pasogolo. Amayi ŵake pechimwalila, Michael ejokela kwawo kuti akasamalile atata ŵake ndipo evomela kuphunzila Baibolo. Michael ekhuziwa ngako mu ntima mwake penzephunzila mbali yakuti “Vati tiphunzile” pa phunzilo 27 ya buku ya Sangalalani na moyo kosasila! Pechiganizila mwevimuŵaŵila Yehova muntima mwake penzewona Mwana wake otamanishiwa, Michael eponesha misozi. Yove eyamba kutembeja ngako nsembe ya dipo ndipo echinja moyo wake nobatizika.

YAVYANI WOPHUNZILA BAIBOLO WANU KUTI AKOIKA VAKUFUNA YEHOVA PAMALO OYAMBA

10. Kansi Yesu eŵayavya tyani ophunzila ŵake oyambilila kuziŵa vinthu vakufunikila kuika pamalo oyamba? (Luka 5:5-11) (Onanisoti chithunzi.)

¹⁰ Ophunzila oyambilila, eziŵa mokulumija ngako kuti Yesu ni Mesiya wolonjezewa, koma ezefunikila kuyavyiwa kuti akoika utumiki pa malo oyamba. Petulo na Andeleya, enze kale ophunzila pa nthawe yechiŵaita Yesu kuti akoyenda naye pamozi nthawe zonse. (Mat. 4:18, 19) Vuwoneka kuti ove enzekata ntchito yopaya nsomba pamozi na Yakobo komasoti Yohani, ndipo bizinesi yamene iyo yenzeŵayendela luweme ngako. (Mko. 1:16-20) Petulo na Andeleya ‘pechisiya akombe ŵawo,’ kuti akoyenda pamozi na Yesu, payakine enze epanga makonzedwe ayakine kuti akosamalila mabanja ŵawo uku oyenda pamozi na Yesu. Kansi nichinji cheŵayavya kuti akoika vinthu vofunika ngako pamalo oyamba? Nkhani ili mu buku ya Luka yufotokoza kuti Yesu echita chodabwisa chiyakine chamene cheŵayavya kukhulupilila kuti Yehova akoŵasamalila.—Ŵelengani Luka 5:5-11.

11. Kansi tingakatishile tyani ntchito vinthu vatakumana navo pa moyo wasu kuti titang’ishe wophunzila Baibolo wasu?

¹¹ Sewo tiliye mphamvu zochitila vodabwisa monga ni Yesu, koma tingakwanishe kufotokoza vinthu vechikumana navo ŵanthu ayakine. Vinthu vamene ivi, ni umboni wamphamvu wowonesha kuti Yehova osamalila ŵanthu amene omuika pamalo oyamba pa moyo wawo. Mwachisanzo, kansi mwewo mukumbukila mwechikuyavyilani Yehova pemwiyamba kupezeka pamisonkhano? Payakine mwenzefunikila kukumana na abwana ŵanu noŵafotokozela kuti mupitilijelini kukata ntchito kwa ma awazi oyangijila kuti mukopezeka pamisonkhano. Pamufotokozela wophunzila Baibolo wanu vinthu vemwikumana navo pa moyo wanu, mufotokozeleni mwechitang’ila chikhulupililo chanu Yehova pechikuyavyani kuti mukoika vinthu vokhuza kulambila pamalo oyamba.

12. (a) Ndaŵa yanji tufunikila kusenga ofalisa osiyana-siyana kuti atipelekeje ku phunzilo yasu? (b) Kansi mungakatishile tyani ntchito mavidiyo kuti muphunzise wophunzila Baibolo wanu mokata ntima? Pelekani chisanzo.

¹² Wophunzila Baibolo wanu angapindulesoti kumvwa vechichita Akhilisitu ayakine kuti akoika vinthu vofunika ngako pamalo oyamba. Tetyo, mukosenga Akhilisitu ayanu avinkhalidwe vosiyana-siyana kuti akupelekejeni kuphunzilo yanu. Mukoŵasenga kuti afotokoze mwechiziŵila choonadi komasoti vechichita kuti akoika kutumikila Yehova pamalo oyamba pa moyo wawo. Kuyangijila pamene apo, mukopatula nthawe kuti mwewo pamozi na wophunzila Baibolo wanu mulolele mavidiyo opezeka mu mbali yakuti “Vati tiphunzile” komasoti “Phunzilani vinyinji”, amene opezeka mu buku ya Sangalalani na moyo kosasila! Mwachisanzo, keno mukambilana mutu 37 wa buku yamene iyi, mungachite luweme kumuyavya wophunzila Baibolo wanu kuti amvwishe luweme mfundo zamu vidiyo yakuti Yehova azatisamalile.

YAVYANI WOPHUNZILA BAIBOLO WANU KUZIŴA VANGACHITE KENO AYAKINE OMUSHUSHA

13. Kansi Yesu eŵayavya tyani ophunzila ŵake kuti akonzekele kutamanishiwa na adani ŵawo?

¹³ Yesu moweleja-weleja euja ophunzila ŵake kuti akoshushiwa na ŵanthu ayakine komasoti enekwawo. (Mat. 5:11; 10:22, 36) Yesu pechisala patontho kusilija utumiki wake wa pano pachalo, echenjeja ophunzila ŵake kuti azakumane na mavuto osiyana-siyana komasoti kuluza moyo. (Mat. 24:9; Yoh. 15:20; 16:2) Yove eŵachenjeja kuti akochita vinthu mosamala potumikila Mulungu. Eŵaujasoti kuti akopewa kukangana na ŵanthu oshusha choonadi, komasoti kuti akochita vinthu mochenjela ngako kuti akwanishe kupitilija kulalikila.

14. Kansi tingamuyavye tyani wophunzila Baibolo wasu kuti akonzekele kushushiwa? (2 Timoteyo 3:12)

¹⁴ Tingachite luweme kuŵakonzekelesha ophunzila ŵasu poŵafotokozela kuti ŵanthu ŵakukata nawo ntchito, azishamwali komasoti enekwawo angayambe kuŵavutisha. (Ŵelengani 2 Timoteyo 3:12.) Ayawo ayakine akuntchito angoŵaseka chifukwa cha vinthu vechichinja pamoyo wawo. Ŵanthu ayakine olo akwawo ngawo-ngawo angoŵanyoza chifukwa cha mfundo zamu Baibolo zakukhulupilila. Tikaŵakonzekelesha mokulumija ophunzila Baibolo ŵasu, azankhale okonzekela luweme kulimbana na ŵanthu oshusha choonadi.

15. Kansi ni chinji chingamuyavye wophunzila Baibolo kuti apilile keno oshushiwa na enekwake?

¹⁵ Keno wophunzila wanu oshushiwa na enekwake, mungachite luweme kumuyavya kuziŵa vinthu vuchitisha kuti akwake akoshusha vinthu vakukhulupilila. Payakine ove oganiza kuti yove waloŵa gulu ya ŵanthu aipa olo osangalalalini na Amboni za Yehova. Nayesoti Yesu ŵanthu ŵenzekonda enzemuganizila vinthu viipa. (Mko. 3:21; Yoh. 7:5) Mukomuyavya wophunzila Baibolo wanu kuti apitilije kunkhala woleza ntima komasoti kuti akolaŵila mowama ntima na ŵanthu ayakine, kupamikijapo enekwake.

16. Kansi tingamuyavye tyani wophunzila Baibolo wasu kuti akofotokoza mwaluso vinthu vakukhulupilila?

¹⁶ Enekwake akafuna kuziŵa vinyinji vokhuza Baibolo, wophunzila ofunikila kupewa kufotokoza vinthu vinyinji kamo na kamo. Kufotokoza vinthu vinyinji panthawe imozi, kungafokeshe enekwake amene awo ndipo angafunelini soti kukambilana naye vinthu vakukhulupilila. Tetyo, mutang’isheni wophunzila wanu kuti akochita vinthu mwanzelu akafuna kulaŵila vinthu vakukhulupilila kuti akope chidwi cha ŵanthu ayakine kuti apitilije kuphunzila vinyinji. (Akol. 4:6) Angachitesoti luweme kuuja enekwake vokhuza webisaiti ya jw.org. Webisaiti yamene iyi ingaŵayavye kuziŵa vinyinji vokhuza Mboni za Yehova ali paŵeka.

17. Kansi mungamuyavye tyani wophunzila Baibolo wanu kulimbana na maganizo ophoniyeka ŵangankhale nawo ŵanthu ayakine okhuza Mboni za Yehova? (Onanisoti chithunzi.)

¹⁷ Mungakatishile ntchito nkhani zapa jw.org zakuti “Makonsho okonshewa kaŵili-kaŵili” kuti muyavye wophunzila wanu kukonzekela kuti akoyankha mosavuta makonsho ŵangamukonshe ayake akuntchito. (2 Tim. 2:24, 25) Kumapeto kwa phunzilo iliyonse, mukokambilana mbali yakuti “Ŵanthu ayakine onena kuti”, mu buku ya Sangalalani na moyo kosasila! Mukomulimbikisa wophunzila wanu kuyeselela mwangafotokozele kuli ayake vinthu vawaphunzila. Mukomupasa malangizo pakafunikila kuti ayangijile luso yake. Kuchita vamene ivi kungamuyavye kuti akofotokoza vinthu vakukhulupilila motang’a ntima.

18. Kansi mungamuyavye tyani wophunzila Baibolo wanu kuti ankhale wofalisa wosabatizika? (Mateyo 10:27)

¹⁸ Yesu etang’isha ophunzila ŵake kuti akolalikila uthenga uweme kuli ŵanthu onse. (Ŵelengani Mateyo 10:27.) Wophunzila akayamba mokulumija kuujako ayakine za chikhulupililo chake, niye pakuphunzilasoti mokulumija kudalila Yehova. Kansi tingamuyavye tyani wophunzila Baibolo wasu kunkhala na cholinga chamene ichi? Keno kumpingo alengeza za ntchito yapadela yolalikila, mungayavye wophunzila Baibolo wanu kuziŵa vangachite kuti ayenelele kunkhala wofalisa. Mufotokozeleni kuti akayamba kulalikila pantchito yapadela vingamuvutelini ngako kudjaila, molingana na mwakuchitila ofalisa anyinji. Yove angapindulesoti ngako na mbali ya kuphunzisa na luso, yamene yuchitika pamisonkhano ya mpingo ya nkati mwasondo. Keno oyeja-yeja kuti akwanilishe cholinga chamene ichi, angayangijile luso yake pofotokoza vinthu vakukhulupilila.

MUKOMUWONESHA WOPHUNZILA BAIBOLO WANU KUTI MUKHULUPILILA KUTI YOVE OFUNA KUKONDWELESHA YEHOVA

19. Kansi Yesu ewonesha tyani kuti enzeŵadalila ophunzila ŵake, ndipo tingamukonkheje tyani?

¹⁹ Yesu akaliyeluta kululu, euja ophunzila ŵake kuti kusogolo azayambesoti kunkhala pamozi. Ophunzila amene awo enze aliyeziŵe kuti Yesu otanthauza kuti ove azalute kululu. Olo ni tetyo, Yesu enzeganizila ngako kukhulupilika kwa ophunzila ŵake, osati ntima wawo wokaikila-kaikila. (Yoh. 14:1-5, 8) Yove enzeziŵa kuti penzefunikila nthawe ikulu kuti ophunzila ŵake amvwishe mfundo yakuti azalute kululu. (Yoh. 16:12) Sewo nase tikokhulupilila kuti ophunzila ŵasu ofuna kukondwelesha Yehova.

20. Kansi kalongosi muyakine waku Malawi ewonesha tyani kuti enzemudalila wophunzila Baibolo wake?

²⁰ Sewo tuziŵa kuti ŵanthu ŵatuphunzila nawo ofuna kuchita vinthu viweme. Ganizilani chisanzo cha kalongosi muyakine waku Malawi zina yake Chifundo. Yove enzephunzila Baibolo na nsimbi muyakine wa Katolika zina yake Alinafe, pokatishila ntchito buku ya Sangalalani na moyo kosasila! pechisilija kukambilana phunzilo 14 ya buku yamene iyi, Chifundo ekonsha wophunzila wake kuti oiwona tyani nkhani yokatishila ntchito mafano polambila. Alinafe ekalipa ngako ndipo eyankha kuti, “Chamene icho nichosankha cha aliyense payeka!” Chifundo eyamba kudela nkhaŵa ndipo ayamba kuganiza kuti Alinafe aleke kuphunzila Baibolo. Koma moleza ntima yove epitilija kuphunzila naye, ndipo enzeyembekezela kuti pakapita nthawe Alinafe azaimvwishe luweme mfundo yamene iyo. Papita miyezi itontho, Chifundo emukonsha konsho ili mu phunzilo 34 yamene yunena kuti: “Pofwika pano kansi kuphunzila Baibolo komasoti vokhuza Mulungu wachendi Yehova, kwakuyavyani tyani?” Pofotokoza vechiyankha Alinafe, Chifundo enena kuti: “Nechita chidwi na mfundo zinyinji zechifotokoza. Imozi mwa mfundo zamene izo ni yakuti Amboni za Yehova ochitalini vinthu vayulesha Baibolo.” Papita tyala nthawe itontho, Alinafe eleka kukatishila ntchito mafano ndipo ebatizika.

21. Kansi tingamuyavye tyani wophunzila Baibolo kuti akofunishisha kutumikila Yehova?

²¹ Olo kuti Yehova niye “okulisha” sewo tili na udindo ukulu woyavya wophunzila Baibolo wasu kuti apite pasogolo. (1 Ako. 3:7) Sewo tili na udindo ukulu ngako wophunzisa ŵanthu, osati tyala kuŵauja kuti Mulungu ofuna vakuti-vakuti. Tuŵayavya kuti akokonda ngako Yehova. Ndipo kuyangijila pamene apo, tuŵalimbikisa kuti akowonesha chikondi chamene icho poika vinthu vofunika ngako pamalo oyamba. Tuŵaphunzisasoti kuti akodalila Yehova akakumana na mavuto. Keno tuwonesha kuti tuŵadalila, chikhulupililo chawo chutang’a ndipo oyamba kukatishila ntchito mfundo zolungama za Yehova noyamba kumutumikila.