Mwakutiyavyila Yehova kuti tikokwanisha kupilila mavuto

1. Ndaŵa yanji tufunikila kupilila, ndipo ni ŵani angatiyavye kuti tikwanishe kupilila? (1 Petulo 5:10)

MASIKU ŵano osilija komasoti ovuta, tonse tukumana na mavuto osiyana-siyana, tetyo nthawe ziyakine tingawone monga tingakwanishelini kupilila mavuto amene aŵa mpaka pa mapeto. Ayakine olwala matenda akulu. Ayakine eluza ŵanthu ŵenzekonda. Komasoti ayakine oshushiwa nenekwawo komasoti akulu-akulu aboma. (Mat. 10:18, 36, 37) Ziŵani kuti vuto iliyonse yamungakumane nayo ni Yehova yeka angakuyavyeni kuti mukwanishe kupilila.—Ŵelengani 1 Petulo 5:10.

2. Kansi ni chinji chuyayva Akhilisitu kuti akwanishe kupilila?

² Kupilila kutanthauza kunkhala mphela wokhulupilika kwa Yehova komasoti kumutumikila mosangalala olo tikakumana na mavuto komasoti mayeselo ayakine. Koma kuti tikwanishe kupilila tufunika kukhulupililasoti kuti mavuto onse azasile. Monga Akhilisitu, tukwanishalini kupilila chifukwa cha mphamvu zasu, koma chifukwa cha mphamvu yofumila kwa Yehova yamene ni “mphamvu yopambana yovyalika nayo.” (2 Ako. 4:7) Mu nkhani ino, tikambilane vinthu 4 vawatipasa Yehova vamene vingatiyavye kuti tikwanishe kupilila. Tiwonesoti mwatingakatishile ntchito vinthu 4 vamene ivi. Yehova watipasa vinthu vofunika kuti tikwanishe kupilila.

MUKOPEMPHELA KWA YEHOVA

3. Ndaŵa yanji tinganene kuti pemphelo ni njila imozi yatulaŵijilana na Yehova?

³ Yehova watipasa mphaso zapadela zamene zingatiyavye kuti tikwanishe kupilila. Olo kuti nise ochimwa Yehova otipasa mwayi wakuti tikolaŵila naye ndipo otimvwishila. (Ahe. 4:16) Mwachisanzo, ganizilani ivi: Tingapemphele kwa Yehova nthawe iliyonse komasoti tingamuuje nkhani iliyonse. Yove otimvwishila mu chilaŵilo chilichonse komasoti kulikonse kwatingankhale olo tili paseka komasoti keno tili mudjeli. (Yoh. 2:1, 2; Ntchi. 16:25, 26) Keno tili na nkhaŵa ngako ndipo tuziŵalini vatingamuuje komasoti mwatumvwila, Yehova oziŵa vinthu vili mu ntima mwasu. (Alo. 8:26, 27) Kulaŵila chendi, pemphelo ni chimozi mwa vinthu vapadela vawatipasa Yehova kuti tikokwanisha kulaŵila naye!

4. Ndaŵa yanji tinganene kuti mapemphelo ŵasu osenga kuti tikwanishe kupilila onkhala okatijana na chifunilo cha Yehova?

⁴ Kupitila mu Mawu ŵake Yehova otisimikijila kuti “chilichonse chatingamusenge mokatijana na vakufuna, otimvwila.” (1 Yoh. 5:14) Kansi tingamusenge Yehova kuti atiyavye kupilila? Eye! Kuchita vamene ivi ni kokatijana na chifunilo chake. Ndaŵa yanji tulaŵila tetyo? Keno tupilila mayeselo, tuchitisha kuti Yehova akwanishe kuyankha wala omutonja, wamene ni Satana Mdyelekezi. (Miy. 27:11) Ndipo Baibolo yunena kuti Yehova ni wofunishisha ‘kuwonesha mphamvu zake kuli ŵanthu olipeleka na ntima wonse kuli yove.’ (2 Mbiri 16:9) Osati tikokaikila kuti Yehova ali na mphamvu komasoti ofunishisha kutiyavya kuti tikokwanisha kupilila mavuto.—Yes. 30:18; 41:10; Luk. 11:13.

5. Kansi pemphelo ingatiyavye tyani kunkhala na ntendele wamu ntima? (Yesaya 26:3)

⁵ Baibolo yunena kuti tikopemphela komasoti kufotokoza nkhaŵa zasu mofumila pansi pa ntima, “ntendele wa Mulungu wamene ŵanthu angakwanishelini kuumvwisha, uzateteze mitima [yasu] na maganizo [ŵasu].” (Afil. 4:7) Onani tanthauzo ya vamene ivi. Ŵanthu amene otumikilalini Yehova okumana na mavuto ndipo oyeja njila zosiyana-siyana kuti afwane ntendele wa mu ntima. Mwachisanzo, ayakine okatishila ntchito njila zosiyana-siyana kuti asilije maganizo aipa komasoti nkhaŵa zali nazo. Munthu akochita vinthu vamene ivi koma okwanishalini kulamulila maganizo ŵake, angayambe kusogolelewa na viŵanda. Ndipo kuchita vamene ivi ni koyofya ngako. (Yelekezelani na Mateyo 12:43-45.) Ndipo olo kuti ŵanthu angankhale osangalala akokatishila ntchito njila zamene izi, onkhala aliye ntendele ngawo-ngawo wofumila kwa Yehova wamene ni uweme ngako. Tikopemphela kwa Yehova, tuwonesha kuti tumudalila na ntima wonse ndipo yove otipasa “ntendele wosasila.” (Ŵelengani Yesaya 26:3.) Njila imozi yakuchitila vamene ivi Yehova, ni kutiyavya kukumbukila mfundo zake zotang’isha zatuphunzila mu Mawu ŵake. Mfundo zamene izi zutikumbusha mwakutikondela Yehova komasoti kuti ofuna kutiyavya, chifukwa cha vamene ivi tunkhala osangalala ngako.—Sal. 62:1, 2.

6. Kansi mungachite tyani kuti mukoukatishila ntchito luweme mwayi wa pemphelo? (Onanisoti chinthunzi.)

⁶ Vinthu vamungachite. Pa nthawe yamupilila mayeselo, ‘mukotulila Yehova nkhaŵa zanu’ nomusenga kuti akupaseni ntendele wake. (Sal. 55:22) Mukomusenga soti kuti akupaseni nzelu kuti mukwanishe kulimbana na mavuto ŵamukumana nawo. (Miy. 2:10, 11) Pa nthawe yamupeleka mapemphelo osenga thandizo kuti mukwanishe kupilila, osati mukoluŵa kumutembeja Yehova mu mapemphelo amene awo. (Afil. 4:6) Mukoganizila mwakukuyavyilani nsiku iliyonse kuti mukwanishe kupilila ndipo mukomutembeja chifukwa cha thandizo yake komasoti vinthu viweme vakukuchitilani. Olo kuti muvutika chifukwa cha mayeselo, mufunikalini kuluŵa vinthu vinyinji vawakuchitilani Yehova kuti mukwanishe kupilila.—Sal. 16:5, 6.

TIKOPHUNZILA MAWU A MULUNGU

7. Kansi kuphunzila Baibolo kungakuyavyeni tyani kuti mukwanishe kupilila?

⁷ Yehova watipasa mawu ŵake kuti tikokwanisha kupilila. Mu Baibolo muli mavesi anyinji amene otisimikijila kuti Yehova otiyavya. Ganizilani tyala chisanzo chimozi. Lemba ya Mateyo 6:8 yunena kuti: “Atata ŵanu oziŵa vamufunikila olo mukaliye noŵasenga kumo.” Yesu elaŵila mawu amene aŵa chifukwa omuziŵa luweme Yehova kupambana munthu aliyense. Tetyo, tingankhale osimikija kuti patukumana na mavuto Yehova oziŵa vinthu vatufunikila ndipo azatiyavye. Mu Baibolo muli mfundo ziweme zofumila kwa Yehova zamene zingatipase mphamvu kuti tikwanishe kupilila mavuto.—Sal. 94:19.

8. (a) Pelekani chisanzo cha mfundo zamu Baibolo zamene zingatiyavye kuti tikwanishe kupilila. (b) Kansi ni chinji chingatiyavye kuti tikokumbukila mfundo zamu Baibolo pakafunikila?

⁸ Mfundo zamu Baibolo zingatiyavye kuti tikwanishe kupilila. Ndipo mu buku yamene iyi muli nzelu zamene zingatiyavye kusankha vinthu mwanzelu. (Miy. 2:6, 7) Baibolo yutiuja kuti osati tikodela nkhaŵa za vinthu vingatichitikile kusogolo, koma mmalo mwake tikodalila Yehova nsiku iliyonse. (Mat. 6:34) Tikoŵelenga Baibolo nsiku iliyonse noganizila ngako mfundo zataŵelenga, vingankhale vosavuta kukumbukila malangizo amu Baibolo pa nthawe yatufunikila kupanga vosankha komasoti kuziŵa vatingachite kuti tikwanishe kupilila mavuto ŵatukumana nawo.

9. Kansi nkhani za ŵanthu otomolewa mu Baibolo zutiyavya tyani kuti tikodalila thandizo ya Yehova?

⁹ Mu Baibolo mulisoti nkhani za ŵanthu monga ni sewo amene enzedalila Yehova ndipo yove eŵayavya. (Ahe. 11:32-34; Yako. 5:17) Tikoganizila nkhani zamene izi tuyamba kukhulupilila kuti Yehova niye “pothaŵila pasu komasoti mphamvu yasu, thandizo yupezeka mosavuta pa nthawe ya mavuto.” (Sal. 46:1) Ndipo tikaganizila kukhulupilika kwa atumiki a Yehova akale, tutang’ishiwa kuti tikokonkheja chikhulupililo chawo komasoti kupilila kwawo.—Yako. 5:10, 11.

10. Kansi mungachite tyani kuti mukokatishila ntchito mokwanila mphaso ya Mawu a Mulungu?

¹⁰ Vinthu vamungachite. Mukoŵelenga Baibolo nsiku iliyonse ndipo mukolemba mavesi ŵamuwona kuti ni oyavya ngako. Ŵanthu anyinji owona kuti lemba ya nsiku ni njila iweme yoyambila nsiku na mfundo zotang’isha zamu Baibolo. Kalongosi muyakine zina yake Mariea ewona kuti mfundo yamene iyi niya chendi pa nthawe yamene makolo ŵake onse aŵili pechifwaniwa na matenda a kansa. Kansi chemuyavya ni chinji kuti akwanishe kupilila pa myezi yosilijila yenzeŵasamalila? Yove enena kuti: “Nsiku iliyonse mmawa nenzeŵelenga ka buku ka Kuphunzila Malemba nsiku iliyonse noganizila ngako mfundo zanaphunzilapo. Vamene ivi veniyavya kuti nsiku iliyonse nikoganizila vokhuza Yehova komasoti vinthu vodabwisa venenzephunzila kupitila mu mawu ŵake mmalo moganizila za mavuto ŵenenzekumana nawo.”—Sal. 61:2.

MUKOFWANA NTHAWE YOTANDALA NA AKWASU NA AKALONGOSI

11. Ndaŵa yanji tutang’ishiwa ngako tikaziŵa kuti ni sewolini seka amene tukumana na mavuto?

¹¹ Yehova watipasa akwasu na akalongosi kuti akotiyavya kupilila mavuto ŵatukumana nawo. Kuziŵa kuti “akwasu pachalo chonse okumanasoti na mavuto monga namene aŵa” kutisimikijila kuti tililini seka. (1 Pet. 5:9) Vamene ivi vutanthauza kuti pali akwasu na akalongosi amene ekumanapo na mavuto monga ni amene awo ndipo enkhala mphela okhulupilika kwa Yehova. Tetyo, nase tingankhale osimikija kuti tingakwanishe kupilila!—Ntchi. 14:22.

12. Kansi Akhilisitu ayasu angatiyavye tyani, ndipo sewo nase tingaŵachitile chinji? (2 Akolinto 1:3, 4)

¹² Akwasu na akalongosi angatitang’ishe kuti tikwanishe kupilila kupitila mmawu ŵakulaŵila komasoti vochita vawo. Ntumwi Paulo ewona kuti mfundo yamene iyi ni yachendi. Nthawe zinyinji yove enzetembeja ŵanthu amene enzemuyavya pa nthawe yenze mudjeli yosafuma pang’anda ndipo enzeŵatomola mazina ŵawo. Akwasu na akalongosi amene awo enzemutonthoja Paulo, kumutang’isha komasoti kumupasa vinthu venzefunikila. (Afil. 2:25, 29, 30; Akol. 4:10, 11) Masiku ŵano akwasu na akalongosi angatitonthojesoti kuti tikwanishe kupilila tikakumana na mavuto. Sewo nase tingachite chimozi-mozi poŵayavya kuti apilile akakumana na mavuto.—Ŵelengani 2 Akolinto 1:3, 4.

13. Kansi ni chinji chiyavya kalongosi muyakine zina yake Maya kuti akwanishe kupilila?

¹³ Kalongosi muyakine waku Russia zina yake Maya, akwasu emutang’isha ngako pechikumana na mavuto. Mu 2020, apolisi aku Russia eloŵa mung’anda mwake mwazizizi noyamba kusecha paliponse mu ng’anda yamene iyo. Pavuli pake, yove enzefunikila kulaŵila motang’a ntima kukhoti chifukwa cha vinthu venzekhulupilila. Maya enena kuti: “Akwasu na akalongosi enitang’isha ngako pa nthawe yovuta yamene iyo.” Yove enenasoti kuti: “Pa nthawe yenenze wofoka ngako, akwasu na akalongosi enzenitang’isha ponitumila foni, kunilembela makalata komasoti enzenisimikijila kuti onikonda. Nthawe zonse nenzeziŵa kuti nili mu banja ikulu komasoti yachikondi. Tetyo kuyambila mu 2020 neyamba kuŵakhulupilila ngako.”

14. Kansi tingachite tyani kuti Akhilisitu ayasu akotiyavya pa nthawe yatulimbana na mavuto? (Onanisoti chithunzi.)

¹⁴ Vinthu vamungachite. Pa nthawe yamukumana na mayeselo mukolaŵijana pafupi-pafupi na akwasu na akalongosi notandala nawo. Osati mukowaya-waya kusenga kuti akulu akuyavyeni. Ove angankhale “malo ofisamilapo mphepo komasoti malo ofisamilapo mvula ya chimphepo.” (Yes. 32:2 mawu a mnyansi) Tikokumbukilasoti kuti nawosoti Akhilisitu ayasu opilila mavuto. Kuchita vinthu mowama ntima kuli ŵanthu amene ofunikila thandizo kuzakuyavyeni kuti mupitilije kupilila mosangalala.—Ntchi. 20:35.

YEHOVA WAKUPASANI CHIYEMBEKEZO CHA KUSOGOLO

15. Kansi chiyembekezo cha kusogolo chemuyavya tyani Yesu, ndipo sewo nase chigatiyavye tyani? (Ahebeli 12:2)

¹⁵ Yehova watipasa chiyembekezo chosimikijilika chamene chutiyavya kuti tikwanishe kupilila mavuto mpaka pa mapeto. (Alo. 15:13) Mukokumbukila kuti Yesu epilila pa nsiku yovuta ngako pa moyo wake penze pano pa chalo, chifukwa enzeyembekezela mwachidwi vinthu vechimulonjeza Yehova. (Ŵelengani Ahebeli 12:2.) Yesu enzeziŵa kuti kukhulupilika kwake kuzayavye kuti zina ya Yehova ilemekezewe. Yesu enzeyembekezela soti kukumana na Atata ŵake komasoti kutumikila pamozi na akwake ozozewa a 144.000 mu Ufumu wakululu. Molingana na vamene ivi chiyembekezo chasu chakuzankhala na moyo kosasila mu chalo chanyowani cha Mulungu, chutiyavya kuti tikopilila mavuto aliwonse ŵatingakumane nawo muli ichi chalo cha Satana.

16. Kansi chiyembekezo chiyavya tyani kalongosi muyakine kuti akwanishe kupilila, ndipo muphunzila chinji kufumila pa mawu ŵechilaŵila?

¹⁶ Onani mwamene chiyembekezo chakuzankhala na moyo wosasila mwechiyavyila kalongosi muyakine waku Russia zina yake Alla, mwanalume wake pechimangiwa noikiwa mudjeli poyembekezela kuti mulandu wake utongewe. Vamene ivi pevichitika Alla enena kuti: “Kutomola vinthu vatuyembekezela mu mapemphelo ŵasu komasoti kuganizila vinthu vamene ivo kutiyavya kuti osati tikotaya ntima ngako. Newo nuziŵa kuti pavuli pa mavuto amene aŵa tizafwane vinthu viweme ngako. Yehova azagonjese adani ŵake ndipo azatipulumushe.”

17. Kansi tingawoneshe tyani kuti tutembeja chiyembekezo chawatipasa Yehova? (Onanisoti chithunzi.)

¹⁷ Vinthu vamungachite. Mukofwana nthawe yoganizila za sogolo iweme ngako yawatilonjeza Yehova. Yelekezelani mwavikuti vizankhalile vinthu mu chalo chanyowani, ndipo ganizilani madaliso ŵati muzafwane mwewo pamozi na azishamwali ŵanu, enekwanu komasoti mwakuti azasangalalile munthu aliyense. Ndipo mavuto aliwonse ŵatukumana nawo palipano ni “osankhalisha komasoti atontho.” (2 Ako. 4:17) Komasoti mukochita vonse vamungakwanishe kuti mukoujako ayakine vinthu vamukhulupilila. Ganizilani mavuto ŵakukumana nawo ŵanthu amene otumikilalini Yehova. Ove okumana na mavuto anyinji ndipo oziŵalini vinthu viweme vawalonjeza Yehova. Mwewo mungaŵakope chidwi kuti aphunzile vinyinji vokhuza chiyembekezo chasu poŵauja tyala vinthu vitontho vatuyembekezela kusogolo.

18. Ndaŵa yanji tufunika kukhulupilila malonjezo a Yehova?

¹⁸ Pavuli pakuti wapilila mavuto anyinji nonkhala mphela wokhulupilika, Yobu enena kuti: “Lomba naziŵa kuti mwewo mukwanisha kuchita vinthu vonse komasoti kuti paliye chilichonse chamufuna kuchita chamene mungachikwanishelini.” (Yobu 42:2) Yobu ephunzila kuti paliye chinthu chilichonse chingamukangishe Yehova kukwanilisha vinthu vawalonjeza. Keno tukumbukila kuti Yehova azakwanilishe malonjezo ŵake nofumyapo mavuto onse, vutipasa mphamvu kuti tikwanishe kupilila. Mwachisanzo, tiyelekezele kuti mwanakazi muyakine wankhala olwala matenda kwa nthawe itali, ndipo ni wokhumudwa ngako chifukwa chakuti madokota osiyana-siyana akangiwa kumupojeka. Pavuli pake, dokota wamene oziŵa vinyinji komasoti wodalilika wamene oŵaziŵa luweme matenda ŵake, omufotokozela vakuti azachite kuti amupojeke. Nthawe yamene iyo mwanakazi wala akumvwa luweme muntima olo kuti matenda ŵake akaliyesila. Yove angakwanishe kupilila chifukwa chakuti oyembekezela vinthu viweme vamene ni kusila kwa matenda ŵake. Molingana na vamene ivi, sewo nase tingapitilije kupilila chifukwa tukaikilalini kuti lonjezo ya Mulungu yokhuza Paladaiso izakwanilishiwe.

19. Kansi tufunikila kuchita chinji kuti tikwanishe kupilila?

¹⁹ Monga ni mwatawonela, Yehova otiyavya kupilila mayeselo kupitila mu pemphelo, Mawu ŵake, Akhilisitu ayasu komasoti chiyembekezo chasu. Keno tuyeja-yeja kukatishila ntchito luweme vinthu vamene ivi, Yehova azatiyavye pa vuto iliyonse yatingakumane nayo mpaka nsiku yamene mavuto onse amuli ichi chalo cha Satana azasile.—Afil. 4:13.