“Nkhalani otang’a, osanyang’anyika”

1-2. Kansi Mkhilisitu olingana tyani na ng’anda itali ya mmululu? (1 Akorinto 15:58)

CHAM’MA 1970 ku Japan m’chigawo cha Toyko, kwenzemangiwa ng’anda iyakine ya mmululu yamene yenze itali ngako. Ŵanthu enzekaikila kuti ng’anda yamene iyo ingapitilije kunkhala yotang’a, chifukwa mu tauni yamene iyo mwenzechitika vivomelezi kaŵili-kaŵili. Kansi ŵanthu amene enzemanga ng’anda yamene iyo, echita tyani kuti ikwanishe kupilila kuvivomelezi? Akaswili amene emanga ng’anda yamene iyo eipanga kuti inkhale yotang’a koma yokwanisha kunyang’anya mosavuta na cholinga chakuti ikokwanisha kupilila kuvivomelezi. Akhilisitu, ali monga ni ng’anda itali yamene iyo. Mwanjila yotyani?

² Mkhilisitu ofunikila kupitilija kuwona vinthu mwa njila iweme pankhani ya kunkhala wotang’a komasoti kukwanisha kuchinja vinthu mosavuta. Yove ofunikila kunkhala wotang’a komasoti wosanyang’anyika pokonkheja malamulo a Yehova komasoti mfundo zake. (Ŵelengani 1 Akorinto 15:58.) Yove ni “wokonzeka kumvwila” ndipo owaya-waya lini. Mwanjila iyakine ofunikila kunkhala “wololela” kapena kuti wokwanisha kuchinja mosavuta keno kuchita vamene ivo n’kokwanishika komasoti n’kofunikila. (Yak. 3:17) Mkhilisitu wamene okwanisha kuwona vinthu mwa njila iweme, azapewe kunkhala wotang’a monyanyila kapena wololela monyanyila. Munkhani ino, tikambilane vokhuza mwatingankhalile osanyang’anyika. Tikambilane soti njila 5 zakukatishila ntchito Satana pofuna kutifokesha, komasoti vatingachite kuti tipewe mayeselo ŵake.

KANSI TINGAKHALE TYANI OTANG’A?

3. Kansi Wopeleka malamulo Nkulu epeleka malamulo otyani pa Machitidwe 15:28, 29?

³ Monga Wopeleka malamulo Nkulu, Yehova nthawe zonse wankhala opeleka malamulo omvwika luweme kuli ŵanthu ŵake. (Yes. 33:22) Mwachisanzo, bungwe yutonga ya mu nthawe ya Akhilisitu oyambilila itomola njila zitatu zamene Akhilisitu zenzefunikila kupitilija kukonkheja kuti ankhale otang’a: (1) mwakupewa kulambila mafano, nolambila Yehova yeka, (2) mwakulemekeza kupatulika kwa milopa, komasoti (3) mwakumvwila lamulo ya m’Baibolo ya kupewa minkhalidwe yachiwele-wele. (Ŵelengani Machitidwe 15:28, 29.) Kansi Akhilisitu a masiku ŵano angachite tyani kuti apitilije kunkhala mphela otang’a mwa kukonkheja njila zitatu zamene izi?

4. Ndaŵa yanji sewo tulambila Yehova yeka? (Chivumbulutso 4:11)

⁴ Sewo tukana kulambila mafano, ndipo tulambila Yehova yeka. Mulungu elamula Aisiraeli kuti akolambila Yehova yeka. (Deut. 5:6-10) Ndipo penzeyesewa na Mdyelekezi, Yesu enena momvwika luweme kuti sewo tufunika kulambila Yehova yeka. (Mt. 4:8-10) Chifukwa cha vamene ivo, sewo tulambilalini mafano. Komasoti sewo tufunikalini kulambila ŵanthu—mwachisanzo, tingafunikelini kuchita vinthu na asogoleli achipembezo, andale, olo akaswili outuka, kapena oimba monga kuti—ove ni milungu. Sewo tunkhala kumbali ya Yehova nolambila yove yeka wamene “epanga vinthu vonse.”—Ŵelengani Chivumbulutso 4:11.

5. Ndaŵa yanji sewo tumvwila lamulo ya Yehova yokhuza kupatulika kwa moyo na milopa?

⁵ Sewo tuchilikiza lamulo ya Yehova yokhuza kupatulika kwa moyo na milopa. Ndaŵa yanji? Chifukwa chakuti Yehova onena kuti, milopa yupanamila moyo wamene ni mphaso ya ntengo wapatali yofumila kuli yove. (Lev. 17:14) Panthawe yoyamba pamene Yehova pechilola ŵanthu kuti akokulya nyama, yove eŵalagiza kuti osati akokulya milopa. (Gen. 9:4) Mulungu ewelejela lamulo yamene iyi panthawe yenzepeleka Chilamulo cha Mose mu nthawe ya Aisiraeli. (Lev. 17:10) Komasoti yove esogolela bungwe yutonga ya munthawe ya Akhilisitu oyambilila, kuti ipeleke lamulo kuli Akhilisitu onse yunena za “kupitilija kupewa . . . milopa.” (Mac. 15:28, 29) Sewo tumvwila lamulo yamene iyi motang’a mtima pa nthawe yatusankha thandizo yakuchipatala.b

6. Kansi tuyeja-yeja kuchita tyani kuti tikokonkheja mfundo za palulu za Yehova za minkhalidwe iweme?

⁶ Sewo tukonkheja mosamala mfundo zapalulu za Yehova za minkhadwe iweme. (Ahe. 13:4) Pokatishila ntchito mawu ophiphilisila omvwika luweme, ntumwi Paulo etilangiza kuti ‘payani’ vizo va muŵili wanu—vamene ivi vutanthauza kuti sewo tufunika kuyeja-yeja kuchita vonse vatingakwanishe kuti tinkhale omasuka kuchilako-lako chilichonse chiipa. Sewo tupewa kulolesha kapena kuchita chinthu chilichonse chamene chingatichitishe kuchita chiwele-wele. (Akol. 3:5; Yobu 31:1) Tikakumana na chiyeso, sewo mokulumija tuleka kuganizila, olo kuchita vinthu vamene vingawononge ushamwali wasu na Mulungu.

7. Kansi tufunikila kusimikija ntima kuchita chinji, ndipo ndaŵa yanji?

⁷ Yehova oyembekezela kuti sewo ‘tikomumvwila kufumila pansi pa mtima.’ (Aro. 6:17) Vakutiuja kuti tikochita nthawe zonse ni viweme kuli sewo, ndipo sewo tingakwanishelini kuchinja malamulo ŵake. (Yes. 48:17, 18; 1 Akor. 6:9, 10) Sewo tuyeja-yeja kuchita vinthu vokondwelesha Yehova komasoti tunkhala na maganizo ŵechinena wa Masalimo muyakine akuti: “Nasimikija ntima kukonkheja malangizo ŵanu mpaka kale-kale, n’chendi kwa moyo wangu wonse.” (Sal. 119:112) Koma olo tetyo, Satana azayeje-yeje kuchitisha kuti kunkhala wotang’a kunkhale kovuta kuli sewo. Kansi yove okatishila ntchito njila zotyani?

KANSI SATANA OYEJA TYANI KUTIFOKESHA PA KUSIMIKIJA NTIMA KWASU?

8. Kansi Satana okatishila ntchito tyani chinzunzo pofuna kutifokesha pa kusimikija ntima kwasu?

⁸ Chinzunzo. Mdyelekezi otifokesha pa kusimikija ntima kwasu potiwononga mwakuthupi komasoti mwa mmaganizo. Cholinga cha yove n’chakuti “atimelele” kuti awononge ushamwali wasu na Yehova. (1 Pet. 5:8) Akhilisitu amu nthawe ya atumwi eyofyejewa, kuniyatiwa, komasoti kupaiwa, chifukwa cha kusimikija ntima kwawo kupitilija mphela kunkhala otang’a. (Mac. 5:27, 28, 40; 7:54-60) Satana akalipitilija mphela kukatishila ntchito chinzunzo masiku ŵano. Vamene ivi vuwonekela luweme pa nkhanza zakukumana nazo abale na alongo ŵasu ku Russia na m’vyalo viyakine, komasoti nkhanza zofumila kuli ŵanthu amene otishusha.

9. Pelekani chisanzo chowonesha chifukwa chake tufunikila kunkhala osamala na viyeso vosawonekela.

⁹ Viyeso vosawonekela. Kuyangijila pa chinzunzo, Satana okatishila ntchito “vochita vachinyengo.” (Aef. 6:11) Ganizilani vamene vichitikila m’bale muyakine zina yake Bob, wamene enze eyonekewa kuchipatala poyembekezela kuti achitiwe opaleshoni ikulu. Yove euja madokota kuti angalole lini kuikiwa milopa zivute zityani. Dokota wamene enzeyembekezela kuti amuchite opaleshoni, evomela kuti achite mokatijana na chosankha chake. Koma olo n’tetyo, nsiku iyakine usiku akaliye muchita opaleshoni, dokotala muyakine ewela kuzawona Bob pavuli pakuti abanja ŵake ajokela kung’anda. Yove euja Bob kuti n’voziŵikilatu kuti madokota azaikatishilelini ntchito milopa, koma ove azankhale nayo pafupi kuchitila kuti azaikatishile ntchito pakazafunikila. Payakine dokotala wamene uyo enzeganiza kuti payakine Bob angachinje maganizo ŵake paliye achibale ŵake pafupi. Koma Bob epitilija mphela kunkhala wotang’a, yove sembe aliyelole kuikiwa milopa mosasamala kanthu za vingamuchitikile.

10. Ndaŵa yanji tinganene kuti maganizo a ŵanthu asalemekeza mfundo za Yehova ni ukuka? (1 Akorinto 3:19, 20)

¹⁰ Maganizo a ŵanthu amene olemekezalini malamulo a Yehova. Keno sewo tingoganiza monga ni mwakuganizila ŵanthu amene olemekezalini malamulo a Yehova, nase soti tingayambe kunyalanyaza Yehova komasoti malamulo ŵake. (Ŵelengani 1 Akorinto 3:19, 20.) “Nzelu za ichi chalo” kanyinji-kanyinji zunkhala zokatijana na vilako-lako va muŵili. Akhilisitu ayakine oŵelengeka aku Pegamu komasoti ku Tiatira, etolelako maganizo a ŵanthu a munthawe yawo amene enze avigololo komasoti olambila mafano. Yesu epeleka malangizo amphanvu kuli mipingo yonse iŵili yamene iyi chifukwa chakuti ove enzelekelela minkhalidwe yavigololo. (Chiv. 2:14, 20) Masiku ŵano, tukumana na viyeso vamene vingatichitishe kuti tikowona vinthu mophoniyeka. Ŵanthu ŵatuziŵana nawo angayeje kutichitisha kuganiza kuti nise oyumisha vinthu ngako, komasoti kuti tufunikila kufwayako malamulo a Yehova. Mwachisanzo, ove anganene kuti ni chinthulini chofunika kupitilija kunkhala na minkhalidwe iweme, komasoti kuti mfundo za m’Baibolo za minkhalidwe iweme n’zakalekale ngako.

11. Pamene patili otang’a, kansi tufunikila kupewa kuchita chinji?

¹¹ Nthawe ziyakine, tingaganize kuti malangizo ŵakutipasa Yehova ni osamvwika luweme. Nthawe ziyakine soti sewo tingayesewe kuti ‘tipitilile vinthu vililembewe.’ (1 Akor. 4:6) Asogoleli achipembezo a mu nthawe ya Yesu, enze na mulandu wa chimo yamene iyi. Ove eyangijila miyambo yawo-yawo mu Chilamulo nochipangisha kunkhala chovuta ngako kuli ŵanthu wamba kuti akochimvwila. (Mt. 23:4) Yehova otipasa malangizo omvwika luweme kupitila m’Mawu ŵake komasoti mugulu yake. Sewo tiliye chifukwa chilichonse choyangijilila malangizo ŵakupeleka yove. (Miy. 3:5-7) Tetyo, tupitililalini vinthu vili lembewe m’Baibolo payakine kuikila malamulo okhulupilila ayasu pa nkhani za umwini zamene zutikhuzalini.

12. Kansi Satana olimbikisa tyani “chinyengo cha tyala-tyala”?

¹² Chinyengo. Satana okatishila ntchito “chiyengo cha tyala-tyala” komasoti “mfundo zamene ni maziko a moyo wa n’chalo” kuti aluŵilishe noyaŵanisha ŵanthu. (Akol. 2:8) Mu nthawe ya Akhilisitu oyambilila vamene ivi venzepamikijapo nzelu za ŵanthu, zamene zenze zozikiwa pa maganizo a ŵanthu asalemekeza Mulungu olo malamulo ŵake, viphunziso va Ayuda vamene venzelini vofumila m’malemba, komasoti chiphunziso chakuti Akhilisitu ofunikila kukonkheja Chilamulo cha Mose. Vinthu vamene ivi venze vachinyengo chifukwa vichitisha ŵanthu kuleka kuchita chidwi na Chisime cha nzelu, wamene ni Yehova. Masiku ŵano, Satana okatishila ntchito mawailesi na malo otandalila apa intaneti kuti afalise nkhani za chiŵembu komasoti nkhani za wenye zamene zakulimbikisa asogoleli a ndale. Tawona vinyinji vokhuza nkhani yamene iyi nkati mwa mulili wa COVID-19.c Amboni za Yehova amene enzemvwishila malangizo ofumila mugulu yasu, enzepewa nkhaŵa zosafunikila zenzenkhala nazo ŵanthu amene enzemvwishila nkhani za wenye.—Mt. 24:45.

13. Ndaŵa yanji tufunikila kunkhala osamala na vinthu vosokoneza?

¹³ Vosokoneza. Sewo tufunikila kuika maganizo ŵasu pa “vinthu vofunika ngako.” (Afil. 1:9, 10) Vinthu vosokoneza, vingatichitishe kuwononga nthawe yasu na mphanvu zasu zinyinji pa vinthu vosapindulisha ngako. Vinthu va masiku onse monga kulya, kumwa, vosangulusha, komasoti ntchito yolembewa, vingankhale vosokoneza keno sewo tingalole kuti vinthu vamene ivi vinkhale vofunika ngako pa moyo wasu. (Luka 21:34, 35) Kuyangijila pamene apo, nsiku iliyonse tikumvwa nkhani zinyinji zokhuza mikangano ya ŵanthu komasoti nkhani za ndale. Sewo tufunikalini kulola kuti mikangano yamene iyi itisokoneze. Kuleka kuchita vamene ivo, nkhani zamene izi zingayambe kuloŵelela mmaganizo na m’mitima yasu. Satana okatishila ntchito njila zamene izi zatatomola na cholinga chakuti afokeshe kusimikija ntima kwasu kuchita viweme. Tiyeni tikambilane vatingachite kuti osati tigonje pa viyeso vamene ivi, nopitilija mphela kunkhala otang’a.

KANSI TINGAPITILIJE TYANI KUNKHALA OTANG’A?

14. Kansi n’chinji chingatiyavye kuti tipitilije mphela kunkhala ku mbali ya Yehova?

¹⁴ Mukoganizila chifukwa chemulipelekela nobatizika. Mwewo mwichita vamene ivo chifukwa mwenzefuna kunkhala ku mbali ya Yehova. Ganizilani vamene vikuchitishani kukhulupilila kuti mwafwana choonadi. Mwewo mwimuziŵa Yehova ndipo mwiyamba kumulemekeza nomukonda monga Atata ŵanu a kululu. Chikhulupililo chanu chiyamba kukula ndipo chikuchitishani kuti mulape. Mwewo mwileka kuchita vinthu vakuzondana navo Yehova ndipo mwiyamba kuchita vinthu vomukondwelesha. Mwewo mwiyamba kumvwa bwino pa nthawe yemuziŵa kuti Mulungu wakukhululukilani. (Sal. 32:1, 2) Mwewo mwiyamba kupezeka pa misonkhano ya Chikhilisitu komasoti mwiyamba kuujako ŵanthu ayakine za vinthu viweme vemwenze phunzila. Monga Mkhilisitu wolipeleka komasoti wobatizika, mwewo lomba muyenda munjila yaku moyo ndipo muzachite vonse vamungakwanishe kuti mupitilije kuyenda munjila yamene iyi.—Mt. 7:13, 14.

15. Ndaŵa yanji kuphunzila komasoti kuganizila Mawu a Mulungu n’kopindulisha?

¹⁵ Mukophunzila Mawu a Mulungu noŵaganizila. Chimuti chingankhale chotang’a keno miju yake niyokata. Molingana na vamene ivi, keno sewo tili na chikhulupililo chotang’a mwa Yehova, tizakwanishe kunkhala otang’a. Chimuti chikakula, miju yake yukula nomwajikila ntali-ntali. Nase tikophuzila noganizila vataphunzila, tutang’isha chikhulupililo chasu komasoti tukulisha chidalilo chasu chakuti njila za Mulungu ni ziweme ngako. (Akol. 2:6, 7) Ganizilani mwamene malangizo na chitetezo cha Yehova mweviyavyila atumiki ŵake masiku akuvuli. Mwachisanzo, Ezekieli enkhala tchelu ngako pamene mngelo wa Yehova penzepima mosamala ngako kachisi wechiwona Ezekieli m’mesomphenya. M’mesomphenya amene awo emutang’isha Ezekieli, ndipo otiphunzisa mfundo zoyavya za mwatingakatishilile nchito mfundo za Yehova zokhuza kulambila kutuŵa.d (Eze. 40:1-4; 43:10-12) Nase tupindula tikopatula nthawe yophunzila komasoti kuganizila vokhuza nkhani zikulu-zikulu zamene zupezeka m’Mawu a Mulungu.

16. Kansi kunkhala na ntima wotang’a kwimuteteza tyani Bob? (Salimo 112:7)

¹⁶ Tang’ishani ntima wanu. Mfumu Davide, elengeza kuti azalekelini kukonda Yehova pamene pechilemba kuti: “Ntima wangu wankhazikika, Mwewo Mulungu.” (Sal. 57:7) Nase tingankhale na ntima wonkhazikika keno tumudalila ngako Yehova. (Ŵelengani Salimo 112:7.) Ganizilani mwamene kuchita vamene ivi mwekuyavyila Bob watatomola poyamba. Yove pechiujiwa kuti milopa izankhale pafupi kuti azaikatishile ntchito pakazafunikila, yove mokulumija eyankha kuti keno angapezeke na vuto yamene ingafune kuti aikiwe milopa, yove mokulumija angafumemo mu chipatala chamene icho. Pavuli pake Bob enena kuti, “Newo nenzekaikila lini vokhuza chosankha changu chokana kuikiwa milopa, ndipo nenzedelalini nkhaŵa za vamene vingachitike pavuli pake.”

17. Kansi tingaphunzilepo chinji pa vichitikila Bob? (Onanisoti chithunzi.)

¹⁷ Bob ekwanisha kunkhala wotang’a chifukwa yove enze epangilatu chosankha kuti apitilije kunkhala wotang’a akaliye waluta ku chipatala. Choyamba, yove enzefunishisha kukondwelesha Yehova. Chachiŵili, yove enzephunzila mosamala vayunena Baibolo komasoti vakunena mabuku ŵasu ofotokoza Baibolo pa nkhani yokhuza kupatulika kwa moyo komasoti milopa. Chachitatu, yove enzekhulupilila kuti kukonkheja malangizo a Yehova kungalete madaliso osasila. Sewo nase tingankhale na ntima wotang’a mosasamala kanthu za mavuto ŵatingakumane nawo.

18. Kansi chisanzo cha Baraki chutiphunzisa tyani kudalila Yehova? (Onani chithunzi chapachikuto.)

¹⁸ Mukodalila Yehova. Ganizilani mweviyendela luweme vinthu pa moyo wa Baraki chifukwa chodalila malangizo a Yehova. Pa nthawe yamene iyo Aisiraeli enze osakonzekela kuniyata nkhondo. Ove enzeve olo vipangizo voniyatila nkhondo. Koma Yehova euja Baraki kuti akaniyatane na Sisera nkulu wa masodja Achikanani wamene enze na vida vinyinji va nkhondo. (Ower. 5:8) Mneneli mwanakazi Debora, euja Baraki kuti alute ku chinshambo kuti akaniyatane na Sisera wamene enze na magaleta 900 a nkhondo. Kuniyatila nkhondo pa malo osalala monga ni amene awo, sembe chinkhala chinthu chovuta ngako kuli Aisiraeli kuti alimbane na magaleta amene enzeutuka ngako. Koma olo kuti Baraki enzeziŵa vamene ivo, yove emvwila. Pa nthawe yamene masodja enze seluka Lupili ya Tabori, Yehova eponesha chimvula champhanvu. Magaleta ankhondo a Sisera enzeloŵela m’matika ndipo Yehova echitisha kuti Baraki apambane. (Ower. 4:1-7, 10, 13-16) Molingana na vamene ivi, Yehova azatiyavye kuti tipambane keno tumudalila yove na malangizo ŵake ŵakutipasa kupitila muli gulu yake.—Deut. 31:6.

NKHALANI OSIMIKIJA NTIMA KUPITILIJA MPHELA KUNKHALA OSANYANG’ANYIKA

19. Ndaŵa yanji mwewo mufuna kupitilija kunkhala otang’a?

¹⁹ Sewo tizafunikile kupitilija mphela kuchita vonse vatingakwanishe kuti tipitilije kunkhala otang’a. (1 Tim. 6:11, 12; 2 Pet. 3:17) Tiyeni tinkhale osimikija ntima kupitilija kunkhala osanyang’anyika chifukwa cha chinzunzo, viyeso vosawonekela, maganizo a ŵanthu asalemekeza Mulungu kapena malamulo wake, chinyengo chatyala-tyala, komasoti vinthu vosokoneza. (Aef. 4:14) Mmalo mwake, tiyeni tipitilije kunkhala otang’a polipeleka kwa Yehova nonkhala osanyang’anyika pomvwila malamulo ŵake. Pa nthawe imo na imo, sewo tufunikila soti kunkhala ololela. Mu nkhani yokonkhapo, tizakambilane mwamene Yehova na Yesu mwalili visanzo viweme ngako pa nkhani ya kulolela.