“Osamupasa mpata Mdyelekezi”

Yakobo enzeziŵa kuti Yehova ni Mulungu yeka ali na udindo wolambiliwa, olo kuti enzekaliye landilako lamulo yonena vamene ivi. (Eks 20:3-5) N’chifukwa chake Yehova pechiuja Yakobo kuti ajokele ku Beteli, Yakobo euja ŵala ŵenzekuya nawo pamozi kuti enzefunika kumasuka ku mafano aliwonse ŵenze nawo. Pamane apo ove etola mafano ŵala noŵafwichila kupamikijapo mphete zenzevwala monga vithumwa. (Ge 35:1-4) Kulaŵila chendi Yehova ekondwela ngako na vechichita Yakobo.

Kansi sewo masiku ŵano tingalambile tyani Yehova yeka? Chinthu choyamba chatingachite pa vonse, nikutaya kutali chilichonse chukatijana na kulambila mafano olo kukhulupilila viŵanda. Vamene ivi vutanthauza kutaya kutali chilichonse chukatijana na kulambila mafano. Komasoti n’vofunika ngako kuganizila poyamba tikaliye sankha vosangalasa. Mwachisanzo likonsheni kuti: ‘Kansi newo nukonda kusangalala na vinthu monga mavidiyo a vamasenga, vaufwiti olo vosangalasa vachiwawa? Kansi nuwona kuti vosangalasa viyakine vanukonda muli mbali ziyakine zitontho-zitontho zukhuzana na vamasenga, vachiwawa olo vaufwiti kunkhala vosayofya?’ Tufunika kunkhala kutali na chilichonse chakunyasiwa nacho Yehova.—Sl 97:10.

LOLELANI VIDIYO YAKUTI “SHUSHANI MDYELEKEZI,” PAVULI PAKE YANKHANI MAKONSHO AŴA:

• Kansi n’chinji chenzechitikila wophunzila Baibolo muyakine zina yake Paula?

• Ndaŵa yanji tufunika kusakila thandizo ya akulu keno munthu muyakine ovitishiwa na viŵanda?

• Keno tufuna thandizo ya Yehova, kansi tufuna kumasuka kuchinji?

• Kansi Paula esalula kuchita chinji?

• Kansi mwewo mungathaŵe tyani vochitika va viŵanda?