PHUNZILO 14

Kumvwikisha mfundo zikulu-zikulu za nkhani

Aheberi 8:1

MFUNDO IKULU: Yavyani omvwishila kuti akokukonkhani pamulaŵila nkhani yanu, yeja-yejani kuti mfundo iliyonse ikulu ikokatijana na mutu wa nkhani.

Nkhalani na cholinga. Mufunika kuziŵilatu keno nkhani yanu ikankhale yophunzisa omvwishila, yoŵayavya kuti akhulupilile komasoti yoŵatang’isha. Nkhalani osimikija kuti mfundo zikulu-zikulu zukwanilisha cholinga chanu.

Likonsheni kuti: ‘Kansi omvwishila akankhale na makonsho otyani pa nkhani iyi? Kansi makonsho amene awo akaŵakonshe m’njila yotyani?’ Pavuli pake ndandamikani mfundo kulingana na makonsho amene awo kuti nkhani yanu ikamvwike luweme.
Gogomezelani mutu wa nkhani. Pamulaŵila nkhani, moweleja-weleja mukokatanija luweme mfundo na mutu ukulu wa nkhani pokatishila ntchito mawu amene ni olinganako.
Mvwikishani mfundo ikulu ya nkhani yanu. Salulani tyala mfundo zikulu-zikulu zamene zukatijana na mutu wa nkhani yati mulaŵile kulingana na nthawe yamwapasiwa. Salulani tyala mfundo zitontho, mukopumulako patontho mukasilija mfundo imozi mukaliyelaŵila iyakine, soti mukokatanija luweme pofuma pa mfundo yamwalaŵila kuya pa mfundo iyakine.

Mungafotokoze mfundo zikulu-zikulu m’mawu ŵanu oyambilila kuti muyavye omvwishila kuti akokukonkhani luweme pamulaŵila nkhani, komasoti mungazifotokoze m’mawu osilijila kuti muyavye omvwishila kuzikumbukila.