PHUNZILO 2

Kulaŵila mwachibadwa

2 Akorinto 2:17

MFUNDO IKULU: Laŵilani mwachibadwa, mofumila pansi pa ntima kuti muyifotokoze kulingana na mwamumvwila nkhani yamene iyo komasoti vamuziŵa vokhuza omvwishila.

MWAMUNGACHITILE:

Pemphelani pokonzekela soti mukokonzekela mokwanila. Pemphelani kuti maganizo ŵanu ankhale pa uthenga, osati mukoganizila za mwewo. Ikani maganizo ŵanu pa mfundo zamufuna kufotokoza. Fotokozani mfundo zamene izo m’mawu ŵanu-ŵanu; m’malo mochitaŵelenga.

Keno mufuna kuŵelenga Baibolo olo buku iyakine, mufunika kuziŵa luweme vamuŵelenga kuti kaŵelengedwe kanu kakamvwike luweme. Keno muŵelenga mawu a munthu muyakine, kaŵelengengedwe kanu kakowonesha mwenzemvwila munthu wamene uyo, koma osachita vamene ivi mwa nthabwala.
Laŵilani mofumila pansi pantima. Ganizilani chifukwa chake omvwishila ofunikila kumvwishila nkhani yanu. Mukoganizila ngako omvwishila. Mufunika kuganizilasoti za kapanamidwe kanu, kukatishila ntchito magesicha, kulolesha omvwishila, kulaŵila mofumila muntima komasoti mwaubwenzi.

Kulaŵila mofumila muntima n’kosiyana na kudekha. Laŵilani m’njila yakuti uthenga wa nkhani yanu umvwike luweme pokatishila ntchito mawu osavuta kumvwa komasoti pokonkha malamulo a kalembedwe.
Mukololesha omvwishila. Keno kwamunkhala n’vololeka ŵanthu kuloleshana polaŵila, mungaloleshe munthu m’mozi panthawi imozi polaŵila nkhani ya ŵanthu wonse m’malo moyendesha-yendesha menso mwachisawawa m’gulu.