Malifalensi a Utumiki komasoti Moyo wasu wachikhilisitu kabuku kamisonkhano
© 2022 Christian Congregation of Jehovah’s Witnesses
JANUARY 2-8
CHUMA CHUPEZEKA M’MAWU A MULUNGU | 2 MAFUMU 22-23
“Ndaŵa yanji tufunika kunkhala olichefya?”
w00 15/9 pedji 29-30
Yosiya wamene enze wolichefya ekondewa na Yehova
Kufumila m’mamawa, ŵanthu enzewamya kachisi amene awo enzekata ntchito mwakhama. N’chendi kuti Yosiya otembeja Yehova chifukwa cha ŵanthu okata ntchito yowamya mbali za ng’anda ya Mulungu, zamene makolo ŵake ayakine aiipa zechiwononga. Ntchito ili nkati, Safani ofwika nomuuja vinthu viyakine. Kansi chamene ichi cha wanyamula n’chinji? Wanyamula mpukutu!. Ndipo ofotokoza kuti Hilikiya Nkulu wa ansembe wafwana “buku ya chilamulo ya Yehova yolembewa na kwanja ya Mose”. (2 Mbiri 34:12-18) Mosakaikila buku yamene iyi yechifwana—ni buku ngayo-ngayo ya Chilamulo!
Yosiya ofunishisha kumvwa mawu onse a m’buku yamene iyo. Safani pakuŵelenga, mfumu yufunishisha kuwona mwamene lamulo iliyonse mwayukatila ntchito kuli yove komasoti kuli ŵanthu ŵake. Makamaka okondwela ngako na mwayufotokozela buku yamene iyo vokhuza kulambila kwa chendi na kunenelatu za milili na kuchosewa m’chalo vamene vingachitike keno ŵanthu angaziloŵeshe m’chipembezo cha wenye. Lomba poziŵa kuti malamulo ayakine a Mulungu aliye konkhejewe, Yosiya okezula chovwala chake nouuja Hilikiya, Safani na ayakine kuti: ‘Nkhoyani mukakonshe kwa Yehova za mawu a m’buku yamene iyi; pakuti ukali wa Yehova wamene watiyakila sewo ni ukulu ngako; pakuti makolo ŵasu aliye mvwile mawu a m’buku yamene iyi.’—2 Mafumu 22:11-13; 2 Mbiri 34:19-21.
w00 15/9 pedji 30 ndim. 2
Yosiya wamene enze wolichefya ekondewa na Yehova
Nthumi (ŵala etumiwa) na Yosiya eluta kwa mneneli mwanakazi zina yake Hulida ku Yerusalemu ndipo owelako na lipoti. Hulida waŵauja mawu a Yehova akuti masoka elembewa m’buku yamene yapezeka kwalombapano azafwike chendi pa ntundu wopanduka wamene uyo. Komalomba chifukwa cha kulichefya kwake pa menso pa Yehova Mulungu, Yosiya azawonelini masoka amene awo. Azamutole nonkhala pafupi na makolo ŵake ndipo azaikiwe m’manda mwa ntendele.—2 Mafumu 22:14-20; 2 Mbiri 34:22-28.
Kusakila-sakila Mfundo zingatiyavye
w01 15/4 pedji 26 ndim. 3-4
Mungakwanishe kuchita bwino olo kuti muliyelelewe luweme
Olo kuti penzechitika vinthu viipa pa nthawe yaulumbwana wake, Yosiya echita voyenela pa menso pa Yehova. Ulamulilo wake wenze wopambana ndipo Baibolo yunena kuti: “Paliyesoti mfumu iyakine yove akaliye nkhala mfumu yamene ijokela kwa Yehova na ntima wake wonse, na moyo wake wonse, na mphamvu zake zonse, mokatijana na chilamulo chonse cha Mose. Olo pavuli pake paliye nkhalesoti mfumu iyakine monga ni yove.”—2 Mafumu 23:19-25.
Vechichita Yosiya n’chisanzo cholimbikisa kuli ŵala amene ekumana na vinthu viipa paulumbwana wawo. Kansi chisanzo chamene ichi chingatiphunzise chinji? N’chinji chiyavya Yosiya kusankha njila iweme nopitilija mphela kuikonkheja?
JANUARY 9-15
CHUMA CHUPEZEKA M’MAWU A MULUNGU | 2 MAFUMU 24-25
“Pitilijani kunkhala a khama”
w01 15/2 pedji 12 ndim. 2
Nsiku ya Yehova yopeleka chiweluzo ili pafupi!
2 Mosakaikila, kulosela kwa Zefaniya kwichitisha Yosiya wamene enze wachilumbwana kuziŵa ngako za kufunika kochosa kulambila kuiipa m’chalo cha Yuda. Komalomba, veichita mfumu poyeja-yeja kuti isilije kulambila kwa wenye m’chalo chamene icho, kuliyesilije kuiipa konse pakati pa ŵanthu amene awo olo kusilija machimo ŵa asikulu ŵake, Mfumu Manase, amene “ejuja Yerusalemu na milopa ya ŵanthu osalakwa.” (2 Mafumu 24:3, 4; 2 Mbiri 34:3) Tetyo nsiku ya Yehova yopeleka chiweluzo ichiza fwika mphela.
w07 15/3 pedji 11 ndim. 10
Mfundo zikulu-zikulu za m’buku ya Yeremiya
Chaka cha 607 B.C.E. chenze chaka cha 11 cha ulamulilo wa mfumu Zedekiya. Ndipo Mfumu Nebukadinezara yaku Babulo, apa lomba yenze izinga Yerusalemu kwa miyezi 18. Pa nsiku ya 7 ya mwezi wa 5, m’chaka cha 19 cha ulamulilo wa Nebukadinezara, nkulu wa masodja oteteza mfumu zina yake Nebuzaradani, ‘ewela,’ kapena kuti efwika ku Yerusalemu. (2 Mafumu 25:8) Payakine Nebuzaradani enzefumila ku misasa yenze emanga kunja kwa mpanda wa Yerusalemu, kwamene kwenze echiyawona tauni yamene iyo kuti awone mwangazaiwonongela. Penze pepita tyala masiku atatu, pa nsiku ya 10 ya mwezi wamene uyo, Nebuzaradani ‘ewela,’ kapena kuti eloŵa mu Yerusalemu, ndipo eshoka tauni yamene iyo na mulilo.—Yeremiya 52:12, 13.
Kusakila-sakila Mfundo zingatiyavye
w05 1/8 pedji 12 ndim. 1
Mfundo zikulu-zikulu za m’buku ya 2 Mafumu
24:3, 4. Chifukwa chakuti Manase enze na mulandu wopaya ŵanthu, Yehova “aliyefune kukhululukila” Yuda. Mulungu owona kuti milopa ya ŵanthu osalakwa ni yofunika. Osati tikokaikila olo patontho kuti Yehova azawejele ŵanthu ocheka milopa ya ŵanthu osalakwa poŵawononga.—Masalimo 37:9-11; 145:20.
JANUARY 16-22
CHUMA CHUPEZEKA M’MAWU A MULUNGU | 1 MBIRI 1-3
“Baibolo — ni buku yachendi, osati yopeka”
w09 1/9 pedji 14 ndim. 1
Kansi Adamu na Hava—enze ŵanthu ngawo-ngawo?
Mwachisanzo, onani ndondomeko ya makolo achiyuda otomolewa m’Baibolo m’buku ya 1 Mbiri chapitala 1 mpaka 9 komasoti uthenga uweme wa Luka chapitala 3. Buku ya 1 Mbiri yufotokoza momvwika luweme makolo a mibadwo 48 ndipo Luka naye ofotokoza mibadwo ya makolo 75. Buku ya Luka yufotokoza m’mbadwo wa makolo a Yesu Khilisitu, pamene buku ya 1 Mbiri yufotokoza za mibadwo ya ansembe a ntundu wa Isiraeli. Mabuku onse amene aŵa otomola mazina a ŵanthu oziŵika luweme monga Solomo, Davide, Yakobo, Isaki, Abulahamu na Nowa ndipo posilijila pake otomola Adamu. Mazina onse ŵatatomola m’mabuku amene aŵa ni a ŵanthu ngawo-ngawo, ndipo Adamu naye enze munthu ngaye-ngaye pa ndondomeko iliyonse.
w08 1/6 pedji 3 ndim. 4
Chigumula cha Nowa—chichitika chendi, ni nthano lini
Nkhani ziŵili za m’Baibolo zamene zutomola nzela wovyalikila wa ŵanthu, zuwonesha kuti Nowa enze munthu ngaye-ngaye. (1 Mbiri 1:4; Luka 3:36) Onse aŵili Ezara na Luka, amene elemba nkhani zamene izi enze ŵanthu oziŵa kufufuza luweme nkhani. Luka efufuza ndipo efwana kuti Nowa enze mu gulu ya makolo a Yesu Khilisitu.
w09 1/9 pedji 14-15
Kansi Adamu na Hava—enze ŵanthu ngawo-ngawo?
Mwachisanzo, Onani nkhani ya m’Baibolo yokhuza dipo yamene ŵanthu anyinji opemphela—oiwona kuti niyofunika ngako. Mawu akuti dipo otanthauza kuti Yesu Khilisitu epeleka moyo wake wangwilo monga nsembe yopulumusha ŵanthu ku uchimo. (Mateyu 20:28; Yohane 3:16) Monga ni mwatuziŵila, dipo ni ntengo wokwanila kulipilila olo kugulasoti chinthu chamene chitayika kapena kuwonongeka. N’chifukwa chake Baibolo yunena kuti Yesu ni ‘dipo yokwanila.’ (1 Timoteyo 2:6) Kapena tingakonshe kuti, kansi dipo yokwanila n’chinji? Baibolo yuyankha kuti: “Monga mwa Adamu onse akufwa, mwamene umosoti mwa Khilisitu onse azapasiwe moyo.” (1 Akorinto 15:22) Moyo wangwilo wechipeleka Yesu kuti awombole ŵanthu omvwila wenze wolingana na moyo wangwilo wechitaya Adamu pechichimwa m’munda wa Edeni. (Aroma 5:12) Kulaŵila chendi, kuti Adamu enzelini munthu ngaye-ngaye, niye kuti nsembe ya dipo yechipeleka Khilisitu sembe yenzeve tanthauzo.
Kusakila-sakila Mfundo zingatiyavye
it-1 pedji 911 ndim. 3-4
Ŵanthu a m’banja
Mazina ŵa Anakazi. Nthawe ziyakine anakazi enzetomolewa m’Baibolo, keno ofuna kuti awoneshe mbili ya ŵanthu pa vochitika viyakine. Vuwoneka kuti Sarai (Sara) etomolewa pa Genesis 11:29, 30, chifukwa chakuti Mbewu yolonjezewa ichizafumila muli yove, osti muli mwanakazi muyakine wa Abulahamu. Vuwoneka kuti Milika otomolewa pa vesi yamene iyi chifukwa chakuti enze ambuya ŵake a Rabeka wamene enze nkazi wa Isaki, vamene vuwonesha kuti Rabeka enze mu nzela wenekwake ŵa Abulahamu, chifukwa pala tuziŵa kuti Isaki enzefunikalini kulungula mwanakazi wamene enze wa ntundu uyakine. (Ge 22:20-23; 24:2-4) Pa Genesis 25:1, etomolapo za mwanakazi muyakine wa Abulahamu zina yake Ketura. Vamene ivi vuwonesha kuti Sara pechimwalila, Abulahamu elungulasoti ndipo enze akali na mphamvu zakuti angakwanishe kuvyala, olo kuti penze pepita vyaka vopitilila 40 kufumila pechimupasasoti mphamvu zamene izi Yehova. (Aro 4:19; Ge 24:67; 25:20) Vamene ivi viwonesha kuti penze ukwawo pakati pa Aisiraeli na Amidiyani komasoti mitundu iyakine ya Aluya.
Leya, Rakele, komasoti azakazi (a ntchito anakazi) a Yakobo etomolewa pamozi na ŵana ŵawo. (Ge 35:21-26) Vamene ivi vutiyavya kumvwisha mwechizachitila vinthu Mulungu na ŵana amene aŵa papita nthawe. Anakazi ayakinesoti etomolewa m’Baibolo pa vifukwa volingana na vamene ivi. Ove enzetomolewa mazina keno enze oyenelela kulondela cholowa (chinthu chiyakine). (Nu 26:33) Komalomba Tamara, Rahabi na Rute enze apadela. Anakazi onse amene aŵa echita chinthu chiyakine chapadela chamene chechitisha kuti ankhale mu nzela mwechizavyalikila Mesiya, Yesu Khilisitu. (Ge 38; Ru 1:3-5; 4:13-15; Mt 1:1-5) Malemba ayakine otomola mazina ŵa anakazi m’Baibolo ni 1 Mbiri 2:35, 48, 49; 3:1-3, 5.
JANUARY 23-29
CHUMA CHUPEZEKA M’MAWU A MULUNGU | 1 MBIRI 4-6
“Kansi mapemphelo ŵangu owonesha kuti nine munthu wotyani?”
w10 1/10 pedji 23 ndim. 3-7
“Wakumvwa pemphelo”
Yabezi enze munthu enzekonda kupemphela. Yove eyamba pemphelo yake nosenga madaliso kwa Mulungu. Pavuli pake esenga vinthu vitatu vamene vuwonesha kuti enze na chikhulupililo chotang’a.
Choyamba, Yabezi esenga Mulungu, kuti: “Mukulishe chalo changu.” (Vesi 10) Munthu wamene uyu wolemekezeka enzelondalini malo a ŵanthu ayakine, olo kukumbwila vinthu ŵanthu ayakine. Vuwoneka kuti yove enzeganizila za ŵanthu osati malo. Payakine enzesenga kuti dela yake ikule, iŵe na ntendele na cholinga chakuti munkhale ŵanthu anyinji olambila Mulungu wa chendi.
Chachiŵili, Yabezi esenga kuti “kwanja” ya Mulungu inkhale naye. Mawu ophiphilisila akuti kwanja ya Mulungu, otanthauza mphamvu zakukatishila ntchito Mulungu poyavya ŵanthu omutumikila. (1 Mbiri 29:12) Kuti apasiwe vamene ivi vechisenga kuchokela pansi pa ntima, Yabezi edalila Mulungu wamene opasa molowa manja kuli ŵanthu omukhulupilila.—Yesaya 59:1.
Chachitatu, Yabezi epemphela kuti: “Muniteteze ku soka, kuti osati iniwononge.” Mawu akuti “osati iniwononge” owonesha kuti Yabezi aliye senge kuti osati akumane na masoka, koma kuti osati akodela nkhaŵa ngako na soka yamene iyo, kapena kugonja akakumana na vinthu viipa.
Pemphelo ya Yabezi yuwonesha kuti yove enzeganizila ngako za kulambila kwachendi ndipo enzekhulupilila na kudalila wakumvwa pemphelo. Kansi Yehova emuyankha tyani? Nkhani yamene iyi yachidule yusila na mawu akuti: “Tetyo Mulungu ekwanilisha vamene ivo vechisenga yove.”
Kusakila-sakila Mfundo zingatiyavye
w05 1/10 pedji 9 ndim. 7
Mfundo zikulu-zikulu za m’buku ya 1 Mbiri
5:10, 18-22. M’masiku a Mfumu Sauli, mafuko amene enze ku m’mawa kwa Yorodano egonjesa Ahagiri olo kuti chiŵelengelo cha Ahagiri chenze chikulu kuyangijila kaŵili pochilinganija na chamafuko amene aŵa. Ivi venze tetyo chifukwa chakuti analume amphamvu a mafuko amene aŵa edalila Yehova kuti azaŵa yavye. Tiyeni tidalile Yehova na ntima wonse patupitilija kuniyata nkhondo yawuzimu na adani amene na nyinji kupambana sewo.—Aefeso 6:10-17.
JANUARY 30–FEBRUARY 5
CHUMA CHUPEZEKA M’MAWU A MULUNGU | 1 MBIRI 7-9
“Mungakwanishe kukata ntchito zovuta moyavyiwa na Yehova”
w05 1/10 pedji 9 ndim. 8
Mfundo zikulu-zikulu za m’buku ya 1 Mbiri
9:26, 27. Alevi ololela miliyango enze na udindo wofunika ngako. Ove epasiwa makiyi osegulila malo opatulika osiyana-siyana a pakachisi. Enze okhulupilika posegula miliyango nsiku iliyonse. Nase tapasiwa mwayi wofunikila kuli ŵanthu a m’ngawo yasu kuŵayavya kuyamba kutumikila Yehova. Kansi tufunika kunkhala odalilika na okhulupilika monga ni mwechichitila a Alevi ololela miliyango?
w11 15/9 pedji 32 ndim. 7
Kansi nimwe otang’a ntima monga ni Pinihasi?
Pinihasi enze na udindo ukulu mu Isiraeli wakale koma ekwanisha kusilija mavuto bwino-bwino chifukwa chaku tang’a ntima, kumvwisha vinthu, komasoti kudalila Mulungu. Komasoti vechichita Pinihasi posamalila mpingo wa Mulungu vikondwelesha ngako Yehova. Papita vyaka 1.000 Ezara eujiliwa kulemba kuti: “Pinihasi mwana wa Eleazara niye enze nsogoleli wawo wakale, ndipo Yehova enze naye.” (1 Mbiri 9:20) Mawu amene aŵa ofunika soti kukata ntchito kuli ŵala osogolela ŵanthu a Mulungu masiku ŵano komasoti Akhilisitu onse amene otumikila Mulungu mokhulupilika.
Kusakila-sakila Mfundo zingatiyavye
w10 15/12 pedji 21 ndim. 6
Imbilani Yehova!
6 N’chendi, kupitila muli aneneli ŵake, Yehova elamula kuti ŵanthu omulambila akomutamanda na nyimbo. Ŵanthu oimba nyimbo ofumila mu fuko ya ansembe, enzelolewalini kukata ntchito ziyakine zamene Alevi ayakine zenzekata na cholinga chakuti akonkhala na nthawe yokwanila yopanga nyimbo noyeja kuziimba.—1 Mbiri 9:33.
FEBRUARY 6-12
CHUMA CHUPEZEKA M’MAWU A MULUNGU | 1 MBIRI 10-12
“Tangishani chifuno chanu chochita chifunilo cha Mulungu”
w12 15/11 pedji 6 ndim. 12-13
“Niphunziseni kuchita chifunilo chanu”
12 Davide enzetembejasoti Mfundo za n’chilamulo komasoti enzefunishisha kuzikonkheja. Ganizilani vechitika Davide pechinena kuti nufunishisha “kumwa manzi a m’chisime chaku Betelehemu.” Masodja atatu a Davide echiyaloŵa mwamphamvu m’tawuni yamene iyo—yamene pa nthawe yamene iyo yenze ilondewa na Afilisiti—ove echiyetapa manzi m’chisime chamene icho nowela nawo. “Koma, Davide ekana kumwa manzi amene awo, m’malo mwake eŵapeleka kwa Yehova mwa kuŵatila pansi.” Ndaŵa yanji aliye umwe? Davide efotokoza kuti: “Ningachitelini vamene ivi chifukwa nulemekeza Mulungu wangu!. Kansi nimwe milopa ya ŵanthu amene aŵa amene enze eika moyo wawo pangozi? Ove sembe etaya moyo wawo potapa manzi amene aŵa.”—1 Mbiri 11:15-19.
13 Davide enzeziŵa kuti chilamulo chunena kuti milopa yufunikalini kulyewa koma kupelekewa kwa Yehova. Yove enzeziŵa kuti “moyo wa nyama olo wa munthu uli m’milopa.” Komalomba, Davide ekana kumwa manzi osati milopa. Ndaŵa yanji ekana? Yove ekana chifukwa enzeziŵa mfundo za m’chilamulo. Davide enzewona kuti manzi amene awo enze antengo wapatali monga ni milopa ya analume amene awo atatu. Tetyo, yove ewona kuti n’kuifya ngako kumwa manzi amene awo. N’chifukwa chake yove aliye umwe koma eŵatila pansi.—Lev. 17:11; Deut. 12:23, 24.
w18.06 pedji 17 ndim. 5-6
Mukophunzisa chikumbuntima chanu malamulo komasoti Mfundo za Mulungu
5 Kuti malamulo a Mulungu akotiyavya, tufunika kuchita vinyinji osati tyala kungoŵelenga noŵaziŵa. Tikoŵakonda ngako komasoti tikoŵalemekeza. Pala Mawu a Mulungu onena kuti: “Zondanani na chiipa ndipo mukokonda chiweme.” (Amo 5:15) Koma kansi tingachite tyani vamene ivi? Chofunika ni kuwona vinthu mwakuviwonela Yehova. Tiyelekezele kuti muli na vuto yosoŵa tulo. Pavuli pake dokota okuwujani kuti mukochita masoŵela otang’isha muŵili, mukokulya vakulya viweme, komasoti muchinje vinthu viyakine pa moyo wanu. Pavuli pokonkheja malangizo amene awo mwayamba kufwana tulo. Mosakayikila mwewo mungamutembeje ngako dokota wamene uyo chifukwa chokuyavyani.
6 Nyamalenga wasu naye, otipasasoti malamulo amene angatiyavye kuti tinkhale na moyo uweme kuti osati tikokumana na mavuto chifukwa cha uchimo. Ganizilani mwatupindulila keno tukonkheja malamulo a m’Baibolo pa nkhani ya kutala wenye, chiwembu, kuyiŵa, chiwelewele, chiwawa, komasoti kuchita vamizimu. (Ŵelengani Miyambo 6:16-19; Chiv. 21:8) Tikaziŵa kuwama koyenda mu njila za Yehova, tuyamba kumukonda ngako komasoti kukonda malamulo ŵake.
Kusakila-sakila Mfundo zingatiyavye
it-1 pedji 1058 ndim. 5-6
Ntima
Kutumikila na “ntima wonse.” Ntima ngawo-ngawo ufunika kunkhala wamphumbulu kuti ukate luweme ntchito, koma ntima wophiphilisila ungankhale woyaŵanika. Davide epemphela kuti: “Nipaseni ntima wosayaŵanika kuti niyope zina yanu,” ivi vuwonesha kuti ntima wa munthu ungankhale woyaŵanika chifukwa cha vinthu vawukonda komasoti vawuyopa. (Sl 86:11) Munthu woteti angankhale na “mitima iŵili”—olo soti kunkhala wothuma potumikila Mulungu. (Sl 119:113; Chv 3:16) Angakwanishe kutumikila ambuye aŵili olo “mwachinyengo angolaŵila” vinthu viyakine koma ochita viyakine. (1 Mbiri 12:33; Sl 12:2) Yesu ezuzula mwamphamvu ŵanthu achinyengo amene onkhala na mitima iŵili.—Mt 15:7, 8.
Munthu wamene ofuna kukondwelesha Mulungu ofunikalini kunkhala na ntima woyaŵanika kapena kuti mitima iŵili koma ofunika kumutumikila na ntima wonse. (1 Mbiri 28:9) Vamene ivi vufuna khama chifukwa ntima niwonyenga ndipo ufunishisha kuchita viipa. (Yer 17:9, 10; Ge 8:21) Vinthu vingatiyavye kuti tikotumikila na ntima wonse ni: kupemphela mofumila pansi pa ntima (Sl 119:145; Mlr 3:41), kuphunzila Mawu a Mulungu nthawe zonse (Eza 7:10; Miy 15:28), kukata nawo mwakhama ntchito yolalikila uthenga uweme (Yelekezelani na Yer 20:9), komasoti kuchita vinthu na ŵanthu amene otumikila Yehova na ntima wonse.—Yelekezelani na 2Mf 10:15, 16.
FEBRUARY 13-19
CHUMA CHUPEZEKA M’MAWU A MULUNGU | 1 MBIRI 13-16
“Vinthu vutiyendela luweme keno tukonkheja malangizo”
w03 1/5 pedji 10-11
Kansi mulikonsha kuti, “Alikuni Yehova?”
12 Likasa ya pangano peijokela ku Israeli ndipo peyinkhala vyaka vinyinji ku Kiriyati-Yearimu, Mfumu Davide yefuna kufulushila likasa yamene iyo ku Yerusalemu. Ekambilana na akulu-akulu amene enze sogolela ŵanthu ndipo eŵawuja kuti likasa ifulushiwe chifukwa vamene ivo ‘venze dalila ove kuwona keno Yehova angavomekeje.’ Koma ove aliye fufuze mokwanila kuti aziŵe maganizo a Yehova pa nkhani yamene iyo. Kuti echita vamene ivi, sembe aliye nyamule likasa yamene iyo pa galeta. Alevi Achikohati niye enzefunika kunyamula na papewa pawo, monga ni mwechiŵaujila Mulungu momvwika luweme. Olo kuti Davide nthawe zonse enzekonsha kwa Yehova, apa ekangiwa kuchita vamene ivi pa nthawe yamene iyi. Vokonkhapo vake venze vomvwisha chisoni ngako. Pepapita nthawe Davide evomekeja kuti: “Ukali wa Yehova Mulungu wasu witiphulikila, chifukwa tiliyekonkheje malamulo ŵake monga ni mwa mwambo wasu.”—1 Mbiri 13:1-3; 15:11-13; Numeri 4:4-6, 15; 7:1-9.
w03 1/5 pedji 11 ndim. 13
Kansi mulikonsha kuti, “Alikuni Yehova?”
13 Lomba Alevi pechifulusha Likasa ku Obedi-Edomu kuluta nayo ku Yerusalemu, ŵanthu eimba nyimbo yechilemba Davide. Ayakine mwa mawu amu nyimbo yamene iyo enze mawu ofumila pansi pa ntima oŵakumbusha kuti: “Sakilani-sakilani Yehova komasoti mphamvu zake, kumbukila ntchito zodabwisa zawachita, kumbukilani vodabwisa vake na vigamulo vofumila n’kamwa mwake.”—1 Mbiri 16:11, 12.
Kusakila-sakila Mfundo zingatiyavye
w14 15/1 pedji 10 ndim. 14
Lambilani Yehova, Mfumu yosasila
14 Davide eleta likasa ya pangano ku Yerusalemu yamene yenze yopatulika. Pa nthawe yamene iyi ŵanthu esangalala ngako ndipo Alevi eimba nyimbo yotamanda Mulungu. Mu nyimbo yamene iyo mwenze mawu amene ali pa 1 Mbiri 16:31 akuti: “Alaŵile pakati pa ŵanthu a mitundu iyakine kuti: ‘Yehova wankhala Mfumu!’” Pamene apa ayakine angadabwe kuti, ‘Powona kuti Yehova ni Mfumu yosasila, vingakwanishike tyani kuti enkhala Mfumu pa nthawe yamene iyo?’ Yehova onkhala Mfumu akachita vinthu vuwonesha kuti yove niye olamulila olo kapena akasankha muyakine kuti amupanamile mmalo mwa yove pa nthawe iyakine olo posilija vuto iyakine. Mfundo yamene iyi ingatiyavye kumvwisha mfundo ziyakine zokhuza ulamulilo wake. Davide akaliyemwalila, Yehova emulonje kuti ufumu wake uzasilelini. Enena kuti: “Pamene apo nizaushe mbewu yako ikuza pavuli pako, yamene ikuti izafume muluwunda mwako, ndipo nizankhazikishe chendi ufumu wake.” (2 Sam. 7:12, 13) Ndipo mawu amene aŵa azakwanilishiwe pakazapita vyaka 1.000. Kansi niŵani akuti azankhale “mbewu” yolonjezewa yamene iyo, ndipo eyamba nthawe yanji kulamulila?
FEBRUARY 20-26
CHUMA CHUPEZEKA M’MAWU A MULUNGU | 1 MBIRI 17-19
“Pitilijani kusangalala olo kuti mukumana na vokhumudwisa”
w06 15/7 pedji 19 ndim. 1
Ganizilani za kuwama kwa gulu ya Yehova
DAVIDE waku Isiraeli wakale ni mmozi mwa ŵanthu oziŵika ngako ofotokozewa m’malemba a Chiheberi. Munthu wamene uyu enze n’chiŵeta, woimba nyimbo, mneneli komasoti mfumu ndipo enzekhulupilila ngako Yehova Mulungu. Ushamwali wotang’a wamene Davide wenze nawo na Yehova, wimulimbikisa kunkhala wofunishisha kumangila Mulungu ng’anda. Ng’anda kapena kuti kachisi wamene uyo echizankhala likulu ya kulambila kwa chendi mu Isiraeli. Davide enzeziŵa kuti kachisi komasoti ntchito yamene yenzechitika pa kachisi wamene uyo izalete chisangalalo na madaliso kuli ŵanthu a Mulungu. Tetyo, Davide eimba kuti: “Wosangalala ni munthu [wamene mwewo Yehova] mwamusankha, nomuvwendeja kuli mwewo, kuti ankhale m’mabwalo ŵanu. Tizakhutile na vinthu viweme va m’ng’anda yanu, malo ŵanu atuŵa kapena kuti kachisi wanu ntuŵa.”—Masalimo 65:4.
Mukosangalala na utumiki wanu
11 Molingana na vamene ivi, sewo nase tingasangalale ngako keno tingankhale akhama pa chilichonse chatuchita potumikila Yehova. Nthawe zonse tufunika ‘tikotangwanika ngako’ na ntchito yolalikila ndipo tikolipeleka na ntima wonse pokata ntchito za mumpingo. (Mac 18:5; Ahe. 10:24, 25) Mukokonzekela luweme misonkhano na cholinga chakuti mukopeleka ndemanga zolimbikisa. Mukokonzekelasoti luweme mukapasiwa nkhani za mu sikulu komasoti za misonkhano ya nkati mwa sondo. Mukasengewa kuti mukate ntchito iyakine mumpingo, mukosunga nthawe komasoti mukonkhala wodalilika. Osawona kuti vinthu vamwasengewa n’vosafunika olo payakine kuwona kuti n’kungotaya tyala nthawe. Mukoyeja-yeja kuyangijila luso yanu. (Miy. 22:29) Mukalipeleka ngako pa utumiki wanu, niye pamupitasoti pasogolo ngako mokulumija ndipo musangalala. (Aga. 6:4) Vamene ivi vingakuyavyenisoti kuti mukosangalala keno ayanu apasiwa utumiki wamukumbwila mwewo.—Aro. 12:15; Aga. 5:26.
Kusakila-sakila Mfundo zingatiyavye
w20.02 pedji 12, bokosi
Tukonda ngako Atata ŵasu Yehova
Kansi Yehova oniŵelengela newo?
Kansi mwenze mweyamba mwalikonshapo kale kuti: ‘Pali ŵanthu mabiliyoni anyinji pachalo chonse, kansi Yehova anganiŵelengele newo?’ Keno vili tetyo mulilini mweka. Pala Mfumu Davide elemba kuti: “Mwewo Yehova, munthu niŵani kuti mumuganizile? Kansi mwana wa munthu wofumila ku lito niŵani kuti mumuŵelengele?” (Sl. 144:3) Koma Davide enzekaikilalini kuti Yehova enzemuziwa luweme. (1 Mbiri 17:16-18) Yehova okatishila ntchito Mawu ŵake komasoti gulu yake, potisimikijilasoti kuti otembeja chikondi chatumuwonesha. Mawu aŵa okonkhapo a m’Baibolo angatiyavye kuti osati tikokaikila mfundo yamene iyi:
• Menso ŵanu eniwona nikaliye vyalika.—Sl 139:16.
• Yehova oziŵa vili mu ntima mwanu komasoti vamuganiza.—1 Mbiri 28:9.
• Yehova omvwishila pemphelo yanu iliyonse.—Sl 65:2.
• Vochita vanu vumukhuza Yehova.—Miy. 27:11.
• Yehova wakudonsani kuti muwele kuli yove.—Yoh 6:44.
• Yehova okuziŵani luweme ndipo olo kuti mufwe angazavutikalini kukuushani. Yove azapangesoti muŵili wanu nokuyavyani kunkhala na maganizo komasoti minkhalidwe yamulinayo palipano, muzakwanishe kukumbukila vinthu vonse vamuziŵa palipano.—Yoh 11:21-26, 39-44; Mac 24:15.
FEBRUARY 27-MARCH 5
CHUMA CHUPEZEKA M’MAWU A MULUNGU | 1 MBIRI 20-22
“Yavyani achilumbwana kupita pasogolo”
w17.01 pedji 29 ndim. 8
“Vinthu vamene ivo ukoviphunzisa kuli ŵanthu okhulupilika”
8 Ŵelengani 1 Mbiri 22:5. Davide sembe eyamba kuganiza kuti Solomo wachepa ndipo ntchito yamukulila. Pala kachisi wamene uyo enzefunika kunkhala ‘muweme komasoti waulemelelo ukulu,’ kuyangijila apo, Solomo enze akali “ntontho komasoti wosakhwima.” Koma Davide enzeziŵa kuti Yehova azamuyavye Solomo kuti azakate luweme ntchito yamene iyo. Tetyo Davide echita vonse vechikwanisha pomuyavya kukonzekela ntchito yamene iyo ikulu.
w17.01 pedji 29 ndim. 7
“Vinthu vamene ivo ukoviphunzisa kuli ŵanthu okhulupilika”
7 Davide sembe ekhumudwa ngako chifukwa chakuti yove enzefunishisha kumanga kachisi wa Yehova. Koma olo n’tetyo, eyavya ngako pokonzekela ntchito yati azakate Solomo. Epeza visulo, mkuwa, siliva, golide mapulanga komasoti ŵanthu akuti azakate ntchito yamene iyo. Yove aliye dandaule kuti akaleka kumanga kachisi wamene uyo atamandiwelini. Ndipo pechimangiwa enzeitiwa kuti kachisi wa Solomo. M’malo mwake elimbikisa Solomo kuti: “Lomba wewo mwana wangu, Yehova ankhale nawe, ndipo vinthu vikuyendele luweme kuti umange ng’anda ya Yehova Mulungu wako, monga ni mwechilaŵilila za wewo.”—1 Mbiri 22:11, 14-16.
w18.03 pedji 11-12 ndim. 14-15
Makolo, kansi muyavya ŵana ŵanu kuti ayenelele kubatiziwa?
14 Akulu mumpingo amene ni achiŵeta, angayavye makolo keno olimbikisa ŵana kuti ankhale na volinga vauzimu. Mulongo muyakine wamene echita upainiya kwa vyaka vopitilila 70 elaŵila mwamene Mbale Charles T. Russell mwechimulimbikisila penze na vyaka 6 tyala. Mulongo wamene uyo enena kuti: “M’bale wamene uyu ekambilana nane kwa maminesi 15 vokhuza volinga vangu vauzimu.” Ivi n’vowonekelatu kuti mawu aweme komasoti olimbikisa angayavye ŵanthu kwa nthawe itali. (Miy. 25:11) Akulu angasengesoti makolo na ŵana ŵawo kuti akoyavya pa ntchito zapa Ng’anda ya Ufumu. Angapase ntchito ŵana mokatijana na nsinkhu komasoti luso yawo.
15 Abale na alongo ayakine mumpingo angayavyesoti makolo polimbikisa ŵana ŵawo. Kuti achite vamene ivi, ofunika kunkhala tchelu kuti awone vakuchita ŵana mumpingo. Mwachisanzo, payakine mwana angapeleke ndemanga yochokela pansi pa ntima, kukamba nkhani olo kuchita chisanzo pa misonkhano ya nkati mwa sondo. Kapena payakine wankhala mphela wokhulupilika pechikumana na mayeselo olo payakine walalikila muyake waku sikulu. Mukawona vamene ivi osachelwa kuŵatembeja—na ntima wonse. Mungachitesoti luweme kunkhala na cholinga chakuti mukotandala na mwana mmozi misonkhano ikaliye yamba—olo ikasila. Mukochita vamene ivi, mungayavye ŵana kuziŵa kuti ni ofunika ngako “mu mpingo ukulu.”—Sl. 35:18.
Kusakila-sakila Mfundo zingatiyavye
w05 1/10 pedji 11 ndim. 6
Mfundo zikulu-zikulu za m’buku ya 1 Mbiri
21:13-15. Yehova elamula mngelo wamene uyo kuti apanamike mulili wamene uyo chifukwa Yove okhuziwa ngako na kuvutika kwa ŵanthu Ŵake. N’chendi, “chifundo chake n’chikulu.”