MUTU 18
Mwatingaŵaziŵile Akhilisitu ngawo-ngawo
Ŵanthu mamiliyoni anyinji onena kuti ni Akhilisitu. Koma onse amene aŵa okhulupililalini vinthu volingana, ndipo okonkhejalini mfundo zolingana. Kansi tingaŵaziŵe tyani Akhilisitu ngawo-ngawo?
1. Kansi Nkhilisitu n’chinji?
Akhilisitu ni ophunzila, olo osatila, a Yesu Khilisitu. (Ŵelengani Machitidwe 11:26.) Kansi ove osimikijila tyani kuti ni ophunzila a Yesu? Yove enena kuti: “Mukosunga mawu ŵangu nthawe zonse, niye kuti nimwe chendi ophunzila ŵangu.” (Yohane 8:31) Ivi vutanthauza kuti Akhilisitu ngawo-ngawo ofunika kumvwila venzephunzisa Yesu. Nthawe zonse Yesu enzephunzisa vayunena Baibolo. Ŵala omukonkheja ochitasoti chimozi-mozi.—Ŵelengani Luka 24:27.
2. Kansi Akhilisitu ngawo-ngawo owonesha tyani nkhalidwe ya chikondi?
Yesu euja osatila ŵake kuti: “Mukondane monga ni mwanachitilasoti newo kukukondani.” (Yohane 15:12) Kansi Yesu ewonesha tyani kuti enzekonda ophunzila ŵake? Enzetandala nawo, kuŵalimbikisa komasoti kuŵayavya. Yove epelekasoti moyo wake chifukwa cha ove. (1 Yohane 3:16) Molingana na Yesu, osatila ŵake ngawo-ngawo ongonenalini tyala na pakamwa kuti ali na chikondi. Ove owonesha m’mawu na m’vochita vawo kuti okondana muyake na muyake.
3. Kansi Akhilisitu ngawo-ngawo onkhala bize ngako pa ntchito yotyani?
Yesu eŵapasa ntchito ophunzila ŵake. “Yove eŵatuma kuti akalalikile Uthenga wa Ufumu.” (Luka 9:2) Akhilisitu m’masiku akuvuli enzelalikila, osati tyala pa malo ŵawo olambilila koma kumalosoti ayakine kwenzepezeka ŵanthu anyinji komasoti mmang’anda a ŵanthu. (Ŵelengani Machitidwe 5:42; 17:17.) Molingana na vamene ivi Akhilisitu masiku ŵano olalikila mfundo zachendi za m’Baibolo kulikonse kwangafwane ŵanthu. Ove okondasoti ayawo, n’chifukwa chake okatishila ntchito nthawe yawo komasoti mphamvu zawo kuti auje ayakine uthenga wa chiyembekezo komasoti wotonthoja.—Maliko 12:31.
VATI TIPHUNZILE
Tiphunzile mwatingaŵaziŵile Akhilisitu ngawo-ngawo pakati pa ŵanthu asakonkheja vechiphunzisa Yesu komasoti chisanzo chake.
4. Ove osakila choonadi cha m’Baibolo
Akhilisitu oyambilila enzekatishila ntchito Mawu a Mulungu
Ŵanthu ayakine amene onena kuti ni Akhilisitu ofwanalini choonadi cha m’Baibolo, olo kuchikatishila ntchito. Lolelani VIDIYO, ndipo pavuli pake mukambilane konsho iyi.
Kansi matchetchi ayakine amene onena kuti ni a Chikhilisitu ochita chinji kuti aleshe ŵanthu kuti osati aphunzile vechiphunzisa Yesu?
Yesu ephunzisa chendi chofumila mmawu a Mulungu. Ŵelengani Yohane 18:37, ndipo pavuli pake mukambilane konsho iyi:
Mokatijana na vechinena Yesu, kansi tingaŵaziŵe tyani Akhilisitu amene ali “kumbali ya kulambila kwa chendi”?
5. Ove olalikila chendi chupezeka m’Baibolo
Akhilisitu oyambilila enzekatishila ntchito enzelalikila
Yesu akaliyeluta kululu, yove epeleka ntchito kuli ophunzila ŵake kuti aikate ndipo yuchitikasoti masiku ŵano. Ŵelengani Mateyu 28:19, 20 komasoti Machitidwe 1:8, ndipo pavuli pake mukambilane konsho iyi:
Kansi ntchito yolalikila izachitike mpaka kufwika kuni?
6. Ove okatishila ntchito vinthu vakuphunzisa
Kansi n’chinji chimusimikijila mwanalume muyakine wa zina yakuti Tom kuti wafwana chendi Chikhilisitu ngacho-ngacho? Lolelani VIDIYO, ndipo pavuli pake mukambilane makonsho aŵa.
Monga mwatawonela mu vidiyo, kansi n’chinji chichitisha Tom kuti aleke kuluta ku chipembezo chake?
Ndaŵa yanji yove esimikijila kuti wafwana choonadi?
Vochita vupeleka uthenga wamphamvu kupambana mawu. Ŵelengani Mateyu 7:21, ndipo pavuli pake mukambilane konsho iyi:
Kansi Yesu owona kuti chofunika n’chinji, kulaŵila vinthu vatukhulupilila kapena kuwonesha chikhulupililo kupitila m’vochita vasu?
7. Okondana muyake na muyake
Akhilisitu oyambilila enzekatishila ntchito komasoti enzekondana
Kansi Akhilisitu esainako kale kuika moyo wawo pangozi chifukwa cha Akhilisitu ayawo? Lolelani VIDIYO, ndipo pavuli pake mukambilane konsho iyi:
Mu vidiyo yamene iyi, nchinji chechitisha kuti m’bale Likhwide asaine kuika moyo wake pangozi kuti m’bale Johansson osati apaiwe?
Kansi muganiza kuti echita vinthu monga ni Nkhilisitu ngaye-ngaye?
Ŵelengani Yohane 13:34, 35, ndipo pavuli pake mukambilane makonsho aŵa:
Kansi Akhilisitu ngawo-ngawo ofunika kuchita tyani vinthu na ŵanthu amitundu iyakine komasoti ofumila ku vyalo viyakine?
Lomba angachite tyani vamene ivi pa nthawe ya nkhondo?
ŴANTHU AYAKINE ONENA KUTI: “Akhilisitu ayakine ankhala ochita vinthu viipa ngako, lomba vingakwanishike tyani kuti chipembezo chawo chinkhale chiweme?”
Kansi munthu woteti mungamuŵelengele lemba yotyani yamene ingamuyavye kuŵaziŵa Akhilisitu ngawo-ngawo?
MFUNDO ZACHIDULE
Akhilisitu ngawo-ngawo okonkha vayuphunzisa Baibolo pamoyo wawo, owoneshana chikondi chololela kuvutika chifukwa cha ayawo komasoti olalikila choonadi cha m’Baibolo.
Makonsho oweleja
Kansi vinthu vakukhulupilila Akhilisitu ngawo-ngawo vufumila kuni?
Kansi Akhilisitu ngawo-ngawo owonesha nkhalidwe yotyani yamene ingatiyavye kuŵaziŵa?
Kansi Akhilisitu ngawo-ngawo okata ntchito yotyani?
PHUNZILANI VINYINJI
Ziŵani vinyinji vokhuza gulu ya ŵanthu amene oyeja-yeja kutolela chisanzo cha Yesu Khilisitu komasoti kukonkheja vinthu vakuphunzila.
Onani vinthu viyavya munthu muyakine wamene enze wakatolika kuti ankhale m’banja yukondana ya pa chalo chonse.
“Enzekatishila ntchito Baibolo poyankha konsho iliyonse” (Nsanja ya Olonda, 1 April, 2014)
Onani vakuchita Akhilisitu ngawo-ngawo powonesha kuti okonda Akhilisitu ayawo amene ofunikila thandizo.
Kuyavya abale ŵasu kukachitika masoka am’chilengedwe—Kambali kafupi (3:57)
Yesu enena vinthu vamene vingayavye ŵanthu kuŵaziŵa osatila ŵake. Sakilani kuti muwone mwamene Akhilisitu oyambilila na Akhilisitu ngawo-ngawo a masiku ŵano mwakukwanilishila vamene ivi.
“Kansi mungaŵaziwe tyani Akhilisitu achendi?” (Nsanja ya Olonda, 1 March, 2012)