Malifalensi a Utumiki komasoti Moyo wasu wachikhilisitu kabuku kamisonkhano
© 2023 Watch Tower Bible and Tract Society of Pennsylvania
MAY 1–7
CHUMA CHUPEZEKA M’MAWU A MULUNGU | 2 MBIRI 17-19
“Mukowona ayakine monga ni mwakuŵawonela Yehova”
Nsanja yophunzila ya 03/2017 pedji 24 ndim. 7
Kansi mukonkheja na ntima wonse vinthu vilembewa?
7 Tiyeni lomba tikambilane chisanzo cha mwana wa Asa zina yake Yehosafati. Yove enze na minkhalidwe iweme ngako. Pa nthawe yenze dalila Yehova vinthu venze muyendela luweme ngako. Koma yove eyifyasoti vinthu viyakine. Mwachisanzo, ekonza zakuti mwana wake munalume alungule mwana munakazi wa Mfumu Ahabu ya Isiraeli yamene yenze iipa ngako. Pavuli pake echita nkatijano na Ahabu kuti akaniyatane na Asiriya, olo kuti enze echenjejewa na mneneli Mikaya kuti osati alute. Kunkhondo kwamene uko, Yehosafati epulumukila m’kamwa mwambuzi ndipo ejokela ku Yerusalemu. (2Mb 18:1-32) Tetyo, mneneli Yehu emukonsha kuti: “Kansi chithandizo chufunika kupelekewa kuli a iipa, ndipo kansi mufunika kukonda ŵanthu ozondana na Yehova?”—Ŵelengani 2 Mbiri 19:1-3.
Nsanja ya Olonda ya 8/15 2015 pedji 11-12 ndim. 8-9
Tikoganizila ngako chikondi cha Yehova
8 Yehova ofuna kuti tiziŵe kuti otikonda, komasoti ololesheshalini ngako pali vala vatuphoniya. Yove ofufuza vinthu viweme mu ntima mwasu. (2Mb 16:9) Mwachisanzo, echita vamene ivi na Mfumu Yehosafati yaku Yuda. Pa nthawe iyakine, Yehosafati epangana na Mfumu Ahabu yaku Isirayeli kuti akalonde tauni ya Ramoti-gileyadi kuli Asiria. Aneneli awenye okwana 400 emutalija wenye Ahabu kuti akapambane pa nkhondo yamene iyo. Koma mneneli wa Yehova zina yake Mikaya enena kuti akagonjesewe. Ahabu epayiwa chendi pa nkhondo yamene iyo, ndipo Yehosafati epulumukila m’kamwa mwa mbuzi. Olo venze tetyo, Yehu mwana wa Haneni ewuja Yehosafati kuti: “Pali vinthu viweme vapezeka muli mwewo.”—2Mb 18:4, 5, 18-22, 33, 34; 19:1-3.
9 Kumayambililo kwa ulamulilo wake, Yehosafati elamula Akalonga, Alevi, komasoti a nsembe kuti akophunzisa chilamulo cha Yehova m’mizinda yonse ya Yuda. Vamene ivi viyavya ngako mwakuti ŵanthu a nvyalo venze zenguluke Yuda eyamba kuyopa Yehova. (2Mb 17:3-10) N’chendi kuti Yehosafati echita vinthu vosayenela, koma Yehova ekumbukila mphela vinthu viweme vechichita. Sewo nase nthawe ziyakine tuchita vinthu vosayenela. Koma nkhani yamene iyi ya Yehosafati yutisimikijila kuti Yehova, apitilije kutikonda keno tuyeja-yeja na ntima wonse, kuchita vinthu vumusangalasa.
Kusakila-sakila Mfundo zingatiyavye
Nsanja yophunzila ya 03/2017 pedji 20 ndim. 10-11
Tikotumikila Yehova na ntima wonse!
10 Yehosafati “epitilija kuyenda mu njila za Asa Atata ŵake.” (2Mb 20:31, 32) Kansi echita tyani vamene ivi? Yove elimbikisa ŵanthu, kuti afunefune Yehova. Eyambishasoti ntchito yapadela yophunzisa ŵanthu “pokatishila ntchito Buku yachilamulo cha Yehova.” (2Mb 17:7-10) Yehosafati echiyafwika mpaka kudela ya Efuraimu, yamene yenze mu Ufumu wakumpoto wa Isiraeli “ndipo eyavya ŵanthu kuti ajokele kwa Yehova.” (2Mb 19:4) Baibolo yunena kuti Mfumu Yehosafati “esakila-sakila Yehova na ntima wake wonse.”—2Mb 22:9.
11 Nase tingakwanishe kuyavya ngako pa ntchito yophunzisa ŵanthu, yakufuna Yehova kuti tikoyikata masiku ŵano. Kansi mwewo mufunishisha kuphunzisa ŵanthu mawu a Mulungu mwezi uliwonse, nacholinga chakuti ayambe kutumikila Yehova? Keno tingachite nkhama, Yehova angatiyavye kuti tiyambe kuphunzila Baibolo na munthu. Kansi musenga Yehova kuti akuyavyeni pa nkhani yamene iyi? Ko muyeja-yeja kuphunzila na ŵanthu, olo pa nthawe yamene mwewo mwenzefuna kupumula? pala Yehosafati echiyayavya ŵanthu aku Efuraimu, kuti ajokele kwa Yehova. Sewo nase, tingachite luweme kuyavya ŵanthu amene afooka kuti ayambe soti kutumikila Mulungu. Nawosoti akulu ofunika kuyendela ŵanthu a mu gawo ya mpingo wawo, amene echosewa koma achinja.
MAY 8-14
CHUMA CHUPEZEKA M’MAWU A MULUNGU | 2 MBIRI 20-21
“Khulupililani Yehova Mulungu wanu”
Nsanja ya Olonda ya 12/15 2014 pedji 23 ndim. 8
Tikokatijana ngako mapeto pakuvwendelela
8 Mu nthawe ya Mfumu Yehosafati, ŵanthu a Mulungu ekumanasoti na mavuto. Kwewela, “Chigulu chikulu” cha adani ofumila m’madela enze ŵazenguluke. (2Mb 20:1, 2) Chosangalasa n’chakuti Aisiraeli amene awo, edalila Yehova osati mphamvu zawo. (Ŵelengani 2 Mbiri 20:3, 4.) Ove echita vinthu mokatijana, osati mwenzefunila aliyense. Baibolo yunena kuti: “Ŵanthu onse aku Yuda, enze paname pa menso pa Yehova, kupamikijapo anakazi ŵawo na ŵana wawo, olosoti ŵana atontho-atontho.” (2Mb 20:13) Ŵanthu amisinkhu yonse, emvwila Yehova, mokatijana ndipo yove eŵateteza. (2Mb 20:20-27) Nase, tufunika kuchita vamene ivi tikakumana na mavuto?
Nsanja yophunzila ya 11/2021 pedji 16 ndim. 7
Mwewo amene mwilungulana kwalombapano—mukoika kutumikila Yehova pamalo oyamba
7 Yehova elaŵila na Yehosafati kupitila muli Mlevi muyakine zina yake Yahazieli. Yehova enena kuti: “Nkhalani mmalo ŵanu, panamani nowona Yehova okupulumushani.” (2Mb 20:13-17) N’chendi kuti njila yamene iyi niyelini yenzekatishila ntchito ŵanthu poniyata nkhondo! Koma malangizo amene aŵa aliyefumile ku munthu yayi; enze ofumila kwa Yehova. Yehosafati edalila ngako Mulungu ndipo echita vechiujiwa. Yove pamozi na ŵanthu ŵake pechiluta kuyakumana na adani ŵawo, etola analume oimba amene enzeve visulo vokwanila voniyatila nkhondo noŵaika pasogolo pa masodja, yove aliyetole masodja aluso ngako noŵaika pasogolo. Yehova aliyemukatishe chimwala Yehosafati, koma emugonjesela adani ŵake.—2Mb 20:18-23.
Kusakila-sakila Mfundo zingatiyavye
it-1 pedji 1271 ndim. 1-2
Yehoramu
Chifukwa chokakamijiwa na mwanakazi wake Ataliya, Yehoramu aliye konkheje njila zolungama za atata ŵake Yehosafati. (2Mf 8:18) Yehoramu aliye paye tyala enekwake na akalonga ayakine ayuda, koma epatusha ŵanthu ŵake kusiya Yehova noyamba kulambila milungu ya wenye. (2Mb 21:1-6, 11-14) Ulamulilo wake wonse wisokonezewa na mavuto ŵenze kumana nawo kuchokela pang’anda pake komasoti na mavuto ochokela kuli mafumu ayake. Choyamba Edomu emupandukila pavuli pake Elibina emupandukilasoti. (2Mf 8:20-22) M’kalata yoluta kuli Yehoramu mneneli Eliya emuchenjeja kuti: “Ona Yehova azakanthe ŵanthu wako, na ŵana wako, azinakazi ŵako, na chuma chako chonse.” Komasoti Mwewo mfumu Yehoramu, “muzankhale na matenda anyinji na nthenda ya m’mala ndipo mala ŵanu azatulike chifukwa cha matenda amene awo.”—2Mb 21:12-15.
Vonse vichitika chendi tetyo. Yehova elola a Alabu na Afilisiti kugonjesa chalo chamene icho, nakutola anakazi wa Yehoramu na ŵana wake analume. Mulungu elola kuti mwana ntontho wa Yehoramu, Yehoyahazi(woitiwa soti kuti Ahaziya) kuti apulumuke chifukwa cha pangano ya ufumu yechichita na Davide. “Pavuli pa vamene ivi Yehova emukantha [Yehoramu] ku mala ŵake na nthenda yosachijika.” Vyaka viŵili pavuli pake “mala ŵake etulika” ndipo patontho na patontho emwalila. Tetyo moyo wa muthu muyiipa wamene uyu wamene “eluta paliye kukumbukilika” wesila. Yove emuika m’manda mutauni ya Davide “koma osati m’manda a Mafumu.” Ahaziya mwana ŵake enkhala mfumu m’malo mwake.—2Mb 21:7, 16-20; 22:1; 1Mb 3:10, 11.
MAY 15-21
CHUMA CHUPEZEKA M’MAWU A MULUNGU | 2 MBIRI 22-24
“Yehova odalisa ŵanthu otang’a ntima”
Nsanja ya Olonda ya 4/1 2009 pedji 24 ndim. 1-2
Yehoasi eleka kutumikila Yehova chifukwa chotandala na ŵanthu ochita viipa
YENZE nthawe yovuta ngako ku Yerusalemu, tauni yamene mwenze kachisi wa Mulungu. Pa nthawe yamene iyi mfumu Ahaziya enze wangopaiwa kumene. Ndipo vechichita Ataliya amayi ŵake wa Ahaziya, venze vovuta kuvimvwisha. Yove epaya—azizukulu ŵake, ŵana analume ŵa Ahaziya.—Kansi uziŵa chifukwa chake?—Yove echita tetyo kuti ankhale wolamulila m’malo mwa azizukulu wake amene awo.
Koma lomba Yehoasi m’modzi wa azizukulu ŵa Ataliya pa nthawe yamene iyo enze lucheche. Yove epulumuka ndipo ambuya ŵake amene awo aliyeziwe chilichonse. Kansi ufuna kuziwa kuti epulumuka tyani?— mwana wamene uyu enze na akhazeni ŵake a Yoseba ndipo ove emutola nomufisa m’kachisi wa Mulungu. Ove ekwanisha kumufisa m’kachisi, chifukwa alume ŵawo a Yehoyada, enze nkulu wa ansembe. Tetyo, aŵili amene aŵa ewoneshesha kuti mwana wamene uyo niwotetezeka.
Nsanja ya Olonda ya 4/1 2009 pedji 24 ndim. 3–5
Yehoasi eleka kutumikila Yehova chifukwa chotandala na ŵanthu aiipa
Yehoasi ebisiwa m’kachisi kwa vyaka 6, ndipo ali m’kachisi mwamene umo ephunzisiwa nfundo zonse za Mulungu, na malamulo ŵake. Pavuli pake Yehoasi pechikwanisha vyaka 7, Yehoyada echita vinthu vakuti Yehoasi ankhale mfumu. Kansi ungakonde kuziŵa mwamene Yehoyada mwechichitila vamene ivi, komasoti vichitikila mfumukazi iipa Ataliya amene enze a mbuya ŵake a Yehoasi?—
Yehoyada eita mofisa masodja enzegada mafumu aku Yerusalemu. Ndipo yove pamozi na mwanakazi wake eŵafotokozela mwechipulumusila Yehoasi mwana wa Mfumu Ahaziya. Pavuli pake Yehoyada, etola Yehoasi nomuwonesha kuli masodja amene awo, ndipo ove ewona kuti yove niye enze woyenelela ku nkhala Mfumu. Tetyo, ekonza njila yakuti amuzoze kunkhala mfumu.
Yehoyada efumiya Yehoasi kunja nomuvwajika chovwala cha Ufumu. Tetyo, ŵanthu eyamba “kuniyata m’manja nonena kuti: ‘Mfumu inkhale na moyo utali!’” Masodja ŵala ogada Mfumu ezenguluka Yehoasi pomuteteza. Koma Ataliya pechimvwa ŵanthu oŵilikija chifukwa cha chisangalalo, ewutuka kuti akaŵaleshe. Ndipo Yehoyada elamula kuti Ataliya, apayiwe ndipo masodja amene awo emupaya chendi.—2Mf 11:1-16.
it-1 pedji 379 ndim. 5
Malilo, malo oyikiwa
Yehoyada nkulu wa ansembe wokhulupilika eyikiwa m’manda mu “tawuni ya Davide pamozi na Mafumu,” ni munthu wamene uyu tyala enzelini mu nzela wachifumu, otomolewa kuti epasiwa ulemu wotetyo.—2Mb 24:15, 16.
Kusakila-sakila Mfundo zingatiyavye
it-2 pedji 1223 ndim. 13
Zekariya
12. Mwana wa Nkulu wa Ansembe Yehoyada. Yehoyada pechimwalila, Mfumu Yehoasi yeleka kulambila kwa chendi, ndipo emvwila malangizo ophoniyeka m’malo momvwila aneneli a Yehova. Zekariya, m’malume wake wa Yehoasi (2Mb 22:11), echenjeja ŵanthu mwamphamvu za vamene ivi, koma m’malo molapa, emufwaya na miyala nkati mwa kachisi. Mawu ŵechinena Zekariya pechisala patontho kufwa enze akuti: “Lekani Yehova asamalile vamene ivi na kuchitapo kanthu.” Pemphelo ya ulosi yamene iyi iyankhiwa, chifukwa Suriya aliye wononge tyala Yuda, koma m’malo mwake Yehoasi naye epayiwa na atumiki ŵake aŵili “chifukwa cha milopa ya mwana wa wansembe Yehoyada.” Septuagint Yachigiriki na Vulgate Yachilatini yunena kuti Yehoasi, epayiwa kuti ajoshele milopa ya “mwana” wa Yehoyada. Koma lomba malemba a Masoretic na Peshitta ya Chiyaramu, yenze na mawu akuti “ŵana,” mwina pokatishila ntchito manamba oyangijila pofuna kuwonesha ubwino na kuganizila kufunika kwa Zekariya mneneli-komasoti wansembe mwana wa Yehoyada.—2Mb 24:17-22, 25.
MAY 22-28
CHUMA CHUPEZEKA M’MAWU A MULUNGU | 2 MBIRI 25-27
“Yehova ali na njila zokupasilani vinyinji kupambana vamene ivo”
it-1 pedji 1266 ndim. 6
Yehoasi
Yehoasi elemba ganyu masodja ankhondo a Yuda okwana 100.000 kuti aniyatane na a Edomu. Koma olo n’tetyo, mokatijana na malangizo a “Munthu wa Mulungu wa chendi,” masodja amene awo echosewa ntchito olo kuti enzelipiliwa kale ndalama zokwana matalente 100 ($660.600) zasiliva. Pakaliye pita nthawe ove enkhala okalipa ngako chifukwa chakuti ejoshewa ku nkhondo, payakine chifukwa chakuti venzeyembekezela monga gawo ya vinthu vutolewa ku nkhondo kwamene uko, viliyekwanishike. Tetyo, pojokela kwawo ewononga minzi ya ku m’mwela kuyambila ku Samariya (Payakine kwamene uku niye kwenze tauni ikulu) mpaka ku Beti-horoni.—2Mb 25:6-10, 13.
Nsanja yophunzila ya 08/2021 pedji 30 ndim. 16
Kansi tingachite tyani kuti “tilaule”—ubwino wa Yehova?
16 Mukololela kulitana vinthu viyakine kuti mutumikile Yehova. Tufunikalini kusiya vinthu vonse viweme kuti tikokondwelesha Yehova. (Mla 5:19, 20) Olo n’tetyo, keno tingakwanishelini kuchita vinyinji potumikila Yehova, payakine pofuna tyala kusalitana vinthu viyakine, tingokungophoniyesha vinthu monga ni munthu wamufanizo ya Yesu wamene echita khama kuti akonkhala na moyo wawofuwofu koma enzeganilalini za Mulungu. (Ŵelengani Luka 12:16-21.) M’bale muyakine zina yake Christian, wamene onkhala ku France, enena kuti, “Newo nenzechitalini vonse vaningakwanishe potumikila Yehova komasoti kuyavya banja yangu.” Yove na nkazi wake eganiza zoyamba upainiya. Koma kuti akwanilishe cholinga chawo chamene ichi, enzefunikila kusiya ntchito zawo. Kuti akofwana vinthu vofunika pa moyo, ove eyamba kantchito katontho kopyela m’maofesi na m’mang’anda a ŵanthu ndipo ephunzila kunkhala okhutila na vinthu vitontho venze navo. Kansi ove eyamba kusangalala chifukwa cha vamene ivo vechichita? Christian enena kuti, “Tusangalala ngako na utumiki komasoti kuwona ophunzila Baibolo ŵasu na maulwendo oweleja ophunzila vokhuza Yehova.”
Kusakila-sakila Mfundo zingatiyavye
Nsanja ya Olonda ya 12/15 2007 pedji 10 ndim. 1-2
Kansi muli na mulangizi pa vinthu vauzimu?
UZIYA enkhala Mfumu ya ufumu waku m’mwela kwa Yuda ali na vyaka 16 tyala. Elamulila kopitilila vyaka 50, kuyambila mu 829 B.C.E. mpaka mu 778 B.C.E. Kuyambila ali mwana, Uziya “echita voyenela pamenso pa Yehova.” Kansi n’chinji chimuyavya kuchita vinthu voyenela? Nkhani yamene iyi ya m’Baibolo yunena kuti: “[Uziya] enzesakila-sakila Mulungu m’masiku a Zekariya, wamene enze mulangizi kuti akoyopa Mulungu wachendi. Chifukwa cha vamene ivi, Yehova Mulungu wachendi echitisha kuti vinthu vimuyendele luweme.”—2Mb 26:1, 4, 5.
Ni nkhani tyala yamene iyi m’Baibolo, yamene yufotokoza za Zekariya, wamene enze mulangizi wa Mfumu. Koma lomba, Zekariya monga “wolangiza kuyopa Mulungu wachendi,” eyavya ngako Mfumu yachilumbwana yamene iyo, kuchita viweme pamenso pa Yehova Mulungu. Buku iyakine yufotokoza za Baibolo yutomolewa kuti Expositor’s Bible yunena kuti n’voziŵikilatu kuti Zekariya “enze munthu woziŵa luweme malemba, komasoti vinthu vauzimu, na woziŵa kuphunzisa vamene ivo venzeziŵa.” Kaswili muyakine wa Baibolo efwika ponena Zekariya kuti: “Enzeziŵa ngako maulosi. Komasoti enze wanzelu, wolipeleka, munthu muweme, ndipo vuwoneka kuti yove wamene uyu, niye eyavya ngako Uziya.”
MAY 29–JUNE 4
CHUMA CHUPEZEKA M’MAWU A MULUNGU | 2 MBIRI 28-29
“Mungakwanishe kutumikila Yehova olo kuti makolo ŵanu aliye kupaseni chisanzo chiweme”
Nsanja yophunzila ya 02/2016 pedji 14 ndim. 8
Konkhejani ŵanthu amene enze pa ushamwali wotang’a na Yehova
8 Mosiyana na Rute, Hezekiya evyalikila mu ntundu wa Aisiraeli amene elipeleka kwa Yehova. Koma ni Aisiraeli lini onse enzemvwila Yehova. Mwachisanzo Ahazi wamene enze atata ŵake a Hezekiya, enze Mfumu iipa ngako. Yove echitisha kuti ŵanthu aku Yuda, ayambe kulambila mafano ndipo enzelemekezalini kachisi wa Yehova waku Yerusalemu. Ahazi efwika mpaka poshoka ŵana ŵake ayakine ali moyo, noŵapeleka nsembe kuli mulungu wawenye. Tetyo, Hezekiya ali mwana enzekwanisha kuwona atata ŵake, ochita vinthu vinyinji viipa!—2Mf 16:2–4, 10-17; 2Mb 28:1–3.
Nsanja yophunzila ya 02/2016 pedji 14 ndim. 9-11
Konkhejani ŵanthu amene enze pa ushamwali wotang’a na Yehova
9 Vinthu viipa venzewona Hezekiya kwa atata ŵake, sembe vimukalipisha ngako mwakuti sembe ekwanisha kukalipila Mulungu. Masiku ŵano ŵanthu ayakine amene ekumanapo na mavuto owona kuti ali na vifukwa vomvwika vakuti “akokalipila Yehova” olo gulu yake. (Miy 19:3) Ochita vamene ivi olo kuti mavuto ŵawo, onkhalalini akulu monga ni a Hezekiya. Ayakinesoti ochita vinthu viipa poganiza kuti angachitilelini muyakine vinthu viweme, chifukwa akulila m’banja yamene muchitika vinthu viipa. (Eze 18:2, 3) Koma kansi vamene ivi n’vachendi?
10 Chisanzo cha Hezekiya chuwonesha kuti vamene ivi n’vachendi lini. Paliye chifukwa chomvwika chotichitisha kukalipila Yehova powona kuti yove niyelini ochitisha vinthu viipa vatukumana navo. (Yob 34:10) N’chendi kuti vochita vamakolo, vingachitishe kuti ŵana ŵawo akochita viweme olo viipa. (Miy 22:6; Akol 3:21) Koma ivi vutanthauzalini kuti munthu wamene wakulila m’banja mwamene muchitika vinthu viipa angankhalelini muweme. Tunena tetyo chifukwa chakuti Yehova, etipasa ufulu wosankha kuchita viweme—kapena viipa. (De 30:19) Kansi Hezekiya ekatishila ntchito tyani ufulu wamene uyu?
11 Olo kuti Hezekiya enze mwana wa Mfumu iipa ngako, pechikula enkhala Mfumu iweme. (Ŵelengani 2 Mafumu 18:5, 6.) Yove esankha kukonkheja chisanzo cha ŵanthu aweme osati cha atata ŵake. Enzekonkheja chisanzo cha ŵanthu monga Yesaya, Mika na Hoseya amene enze aneneli a Yehova. Hezekiya enzemvwila vonse venzenena aneneli amene awo, ndipo vimuyavya kuti awamiye vinthu viipa, vechiphoniyesha atata ŵake. Etuŵisha kachisi pochosa mafano m’chalo chonse, komasoti kusenga Yehova kuti akhululukile ŵanthu machimo ŵawo. (2Mb 29:1-11, 18-24; 31:1) Senakeribu Mfumu ya Asuri pechimuyofya kuti aukile tawuni ya Yerusalemu, Hezekiya echita vinthu motang’a ntima ndipo ewonesha kuti enzekhulupilila Yehova. (2Mb 32:7, 8) Pa nthawe iyakine, Hezekiya eyamba ntima wolikuja koma Yehova pechimuzuzula elichefya nochinja. (2Mb 32:24-26) Yove ni chisanzo chiweme kuli tonse, chifukwa aliyelole kuti chisanzo chiipa cha atata ŵake chimukangishe kunkhala munthu muweme. M’malo mwake echita vinthu vamene vimuyavya kunkhala pa ushamwali wotang’a na Yehova.
Kusakila-sakila Mfundo zingatiyavye
Nsanja ya Olonda ya 02/15 2012 pedji 24-25
Natani—enze wokhulupilika ndipo enzelimbikisa kulambila kwachendi
Powona kuti Natani enzetumikila Yehova mokhulupilika, elimbikisa Davide kuti amange ng’anda yoyamba yakuti akolambililamo Mulungu pachalo chonse. Koma vuwoneka kuti pa nthawe yamene iyi, Natani echingonena maganizo ŵake m’malo monena vinthu mu zina ya Yehova. Tetyo usiku wamene uyo, Mulungu ewuja mneneli wamene uyo kuti akalaŵile kwa Mfumu yamene uyo uthenga wosiyana nawala weyilaŵila poyamba. Eluta kuyamuuja kuti amangelini kachisi wa Yehova. Munthu akuti azamange kachisi wamene uyu, enze mwana wa Davide. Koma Natani enenasoti kuti Mulungu achite pangano na Davide yakuti mpando wake wachifumu “uzankhazikike mpaka kale-kale.”—2Sa 7:4-16.
Maganizo a Mulungu enze osiyana na vechinena Natani vokhuza kumanga kachisi. Ivi pevichitika, mneneli wamene uyu wolichefya aliyedandaule m’malo mwake, emvwila nochita vinthu mokatijana na cholinga cha Yehova. Apa epeleka chisanzo chiweme ngako cha mwatingachitile keno Yehova otiyondolola pa nkhani iyakine. kVechichita Natani pavuli pake pa nkhani yamene iyi, viwonesha kuti ushamwali wake na Mulungu wenze uweme mphela. Ndipo vuwoneka kuti Yehova, euja Natani na Gadi amene enze amesomphenya kuti alimbikise Davide kunkhazikisha gulu ya ŵanthu okwana 4.000 kuti akoimbila Yehova pa kachisi.—1Mb 23:1–5; 2Mb 29:25.
JUNE 5-11
CHUMA CHUPEZEKA M’MAWU A MULUNGU | 2 MBIRI 30-31
“Kusonkhana pamozi ni chinthu chiweme kuli sewo”
it-1 pedji 1103 ndim. 2
Hezekiya
Wakhama pa kulambila kwachendi. Hezekiya ewonesha khama yake pa kulambila Yehova pechingonkhala pa mpando wachifumu ali na vyaka 25. Chinthu choyamba chechichita chenze kusegula na kuwamiyasoti kachisi. Pavuli pake, eita ansembe na Alevi, noŵawuja kuti: “Muntima mwangu nufuna kuchita pangano na Yehova Mulungu wa Isiraeli.” Yamene iyi yenze pangano ya kukhulupilika, monga ni pangano yachilamulo, yamene yenze ikalikata mphela ntchito koma yenze nyalanyaziwa,ndipo inkhazikishiwasoti mu tawuni ya Yuda. Na mphamvu zinyinji, yove elinganija Alevi mu utumiki wawo, ndipo enkhazikishasoti makonzedwe a vida voimbila potamanda Mulungu. Wenze mwezi wa Nisani, mwezi wa pasika, koma kachisi ansembe na Alevi enze akali oipishiwa. Pofwika nsiku ya 16 mwezi wa Nisani, kachisi enze wotuŵishiwa ndipo vida vake venze vikonzewasoti. Tetyo chitetezo chapadela chenzefunika kupangiwa kuli Aisirayeli onse. Choyamba, akalonga eleta nsembe za uchimo, na za ufulu pa malo opatulika, pavuli pake ŵanthu eleta nsembe masauzande kuti zipelekewe.—2Mb 29:1-36.
it-1 pedji 1103 ndim. 3
Hezekiya
Powona kuti kuipishiwa kwa ŵanthu kwikangisha kuchita pasika pa nthawe yoikiliwatu, Hezekiya epezelapo mwayi pa lamulo yolola ŵanthu oipishiwa kuchita pasika pavuli pa mwezi umozi. Yove eyita osati a Yuda ŵeka koma na Aisiraeli onse kupitila kuli ŵala enzepeleka mauthenga amene enzechita utuka kuchokela ku Beere-seba mpaka ku Dani. Amithenga amene awo ekumana na manyozo ngako koma ŵanthu maka-maka, Aseri, Manase, na Zebuloni, elichefya nowujako ayakine aku, Efurayimu na Isakara nosonkhana pamozi. Kuyangijila pali vamene ivi, penzesoti olambila Yehova anyinji amene enzelini Aisiraeli. Vuwoneka kuti yenze nkhani yovuta kuli ŵanthu a mu ufumu wakumpoto, amene enzepanamila pa kulambila kwachendi. Ove molingana na amithenga ŵala, eshushiwa nonyozewa powona kuti ufumu wa mafuko 10 wenze uipa wenzepanamila kulambila kwawenye, na kutamanishiwa na adani ŵa Asuri.—2Mb 30:1-20; Nu 9:10-13.
it-1 pedji 1103 ndim. 4-5
Hezekiya
Pavuli pa pasika, phwando ya mikate iliye chofufumisha, yenzechitika kwa masiku 7 mosangalala ngako mwakuti mpingo wonse weganiza zoyangijilakosoti masiku ayakine okwanila 7. Olo mu nthawe zoŵaŵisha monga n’zamene izi, daliso ya Yehova ipambana mwakuti “penze chisangalalo chikulu mu Yerusalemu.”—2Mb 30:21-27.
Mfundo yakuti uku kwenze kuwejelesha ngako-ngako na kusisimuliwa kwa kulambila kwachendi osati tyala kusonkhana kwa pawukwawo, olo kwa kanthawe kwiwonekela na vokonkhapo vake. Akaliye jokela kwawo okondwelela amene awo efuma nakuya pasula vipilala vopatulika kuwisha malo a m’mululu, maguwa ansembe nowishasoti mizati yopatulika, mu Yuda, m’Benjamini mpaka ku Efuraimu na Manase. (2Mb 31:1) Hezekiya epeleka chisanzo mwakufwaya-fwaya njoka ya nkuwa yechipanga Mose, chifukwa ŵanthu enzeipanga fano noyamba pelekelapo nsembe zausi. (2Mf 18:4) Pavuli pa phwando ikulu Hezekiya esimikija kupitilija pa nkhani ya kulambila kwachendi mwakulinganija magulu ansembe, na makonzedwe ochilikiziwa na mautumiki a pakachisi yove eŵalangiza kumvwila chilamullo ponena za chagawo 10 na vopeleka va vitwazi voyambilila kuli Alevi na ansembe, vechikondwela navo ŵanthu na ntima wonse.—2Mb 31:2-12.
Kusakila-sakila Mfundo zingatiyavye
Nsanja yophunzila ya 09/2018 pedji 6 ndim. 14-15
“Keno vamene ivi muviziŵa, nimwe osangalala mukovichita”
14 Chinthu chiyakine chamene chuwonesha kuti nise olichefya, ni vatuchita ŵanthu ayakine akotilaŵija. Pala lemba ya Yakobo 1:19 yunena kuti: ‘tinkhale wokulumija kumvwa.’ Yehova n’chisanzo chiweme ngako pa nkhani yamene iyi. (Ge 18:32; Yos 10:14) Mwachisanzo ganizilani nkhani ya pa Ekisodo 32:11-14. (Ŵelengani.) Olo kuti Yehova sembe ekwanisha kuchita vinthu paliye kumvwako maganizo ŵa Mose, emupasa mpata kuti yove afotokozeko venzeganiza. Ŵanthu anyinji angatayelini nthawe yawo kumvwishila maganizo a munthu wamene nthawe zinyinji maganizo ŵake onkhala osalongosoka ndipo angakwanishelini kukonkheja vawanena. Koma Yehova omvwishila moleza ntima ŵanthu amene opemphela kuli yove mwachikhulupililo.
15 Yehova elichefya kuti amvwishile ŵanthu monga Aburahamu, Rakele, Mose, Yoswa, Manowa, Eliya, komasoti Hezekiya. Tetyo aliyense angachite bwino kulikonsha kuti: ‘Keno Yehova emwishila ŵanthu amene aŵa kuli tyani newo? Kansi newo nane nuyeja-yeja kulemekeza Abale na alongo noŵamvwishila keno olaŵila komasoti kukonkheja malangizo ŵawo amene ni oyavya? Kansi pali munthu muyakine mumpingo kapena m’banja mwangu wamene ofunikila ngako kuti nikomumvwishilla? Kansi nufunika kuchita chinji?’—Ge 30:6; Owe 13:9; 1Mf 17:22; 2Mb 30:20.
JUNE 12-18
CHUMA CHUPEZEKA M’MAWU A MULUNGU | 2 MBIRI 32-33
“Mukolimbikisa a bale ŵanu pa nthawe ya mavuto”
it–1 pedji 204 ndim. 5
Asuri
Senakeribu. Senakeribu, mwana wa Sarigoni wachiŵili, ewukila Ufumu wa Yuda muchaka cha14 cha Hezekiya. (732 B.C.E.). (2Mf 18:13; Yes 36:1) Hezekiya epandukila goli ya Asuli yamene iikiwa chifukwa cha vochita va atata ŵake Ahazi. (2Mf 18:7) Senakeribu echita vamene ivi mwakuvala mu Yuda, ndipo egonjesa matauni 46 (yelekezelani na Yesaya 36:1, 2), tetyo mu nsasa wake ku Lakisi, elamula Hezekiya kuti amupase matalente 30 a golide. (c. $11.560.000) na matalente a siliva 300 (c. $1.982.000). (2Mf 18:14-16; 2Mb 32:1; yelekezelani na Yesaya 8:5–8.) Olo kuti ndalama zamene izo zipelekewa, Senakeribu etumija omulaŵilila amithenga ŵake kuti akawuje ŵanthu aku Yerusalemu kuti angogonja paliye vifukwa vomwvika. (2Mf 18:17–19:34; 2Mb 32:2-20) Pavuli pake Yehova ewononga masodja ŵake okwana 185.000 usiku umozi tyala ndipo elamula m’Suli wolikuja wamene uyu kuti achokeko, nojokela ku Nineve. (2Mf 19:35, 36) Ali kwamene uko pavuli pake epayiwa na ŵana ŵake analume aŵili, ndipo pa mpando wachifumu enkhalapo ni mwana muyakine munalume zina yake Esari-hadoni. (2Mf 19:37; 2Mb 32:21, 22; Yes 37:36-38) Vochitika vamene ivi, kusiyapo kuwonongewa kwa magulu ankhondo a Asuri, vilembewasoti pa prisma ya Senakeribu na iyakine ya Esari-hadoni.—VITHUNZI, Vol. 1, pedji. 957.
Nsanja ya Olonda ya 11/15 2013 pedji 19 ndim. 12
Kansi achiŵeta 7 na asogoleli 8—opanamila ŵani masiku ŵano?
12 Yehova ni wofunishisha kuti akotiyavya ngako, koma oyembekezela kuti sewo nase tichiteko mbali yasu. Hezekiya “ekatijana na akalonga ŵake na analume ŵake amphamvu kuti avale nyenje za manzi, amene enze kunja kwa tauni yamene iyo, kuyangijila pamene apo . . . [Hezekiya] etang’a ntima kumanga vipupa vonse va mpanda wamene wenze-wegumuka. Emanga nsanjika palulu pa mpanda wamene uyo, ndipo kunja kwake emangakosoti mpanda uyakine . . . Ndipo epanga vida vinyinji na vishango.” (2Mb 32:3–5) Kuti ateteze komasoti kusogolela ŵanthu ŵake, Yehova ekatishila ntchito analume amphamvu anyinji monga—Hezekiya, akalonga ŵake, komasoti aneneli okhulupilika.
Nsanja ya Olonda ya 11/15 2013 pedji 19 ndim. 13
Kansi achiŵeta 7 na asogoleli 8
—opanamila ŵani masiku ŵano?13 Pavuli pake Hezekiya echita chinthu chofunika ngako kupambana kuvala nyenje za manzi olo kumangasoti vipupa vonse va mpanda. Yove enze nchiŵeta woganizila ngako ŵanthu ŵake, ndipo eŵaunganisha noŵalimbikisa na mawu akuti: “Osati muyope olo kuchita wowa na Mfumu ya Asuri . . . , chifukwa sewo tili na anyinji kupambana ali na Mfumu ya Asuri yamene iyo. Yove yudalila mphamvu za ŵanthu, koma sewo tili na Yehova Mulungu wasu kuti atiyavye notiniyatila nkhondo zasu.” Mawu amene aŵa enze olimbikisa ngako ndipo ekumbusha ŵanthu amene awo—kuti Yehova azaŵaniyatile nkhondo yamene iyo. Ayuda pechimvwa vamene ivi “eyamba kutang’a ntima chifukwa cha mawu a Hezekiya Mfumu ya Yuda.” Onani kuti “mawu a Hezekiya” niye eyavya ŵanthu kuti atang’e ntima. Mfumu pamozi na akalonga ŵake, na analume ŵake amphamvu komasoti aneneli Mika na Yesaya, enze chendi achiŵeta aweme, monga mwechiloselela Yehova kupitila muli mneneli wake.—2Mb 32:7, 8; ŵelengani Mika 5:5, 6.
Kusakila-sakila Mfundo zingatiyavye
Nsanja yophunzila ya 10 2021 pedji 4-5 ndim. 11-12
Kansi kulapa ngako-ngako kutanthauza chinji?
11 Papita nthawe, Yehova eyankha mapemphelo a Manase ndipo ewona kuti wachinja chendi chifukwa cha vinthu vechitomola m’mapemphelo ŵake. Tetyo, emukhululukila ndipo emujoshela pa ufumu wake. Manase echita vonse vangakwanishe kuti awoneshe kuti enze elapa chendi kufumila pansi pa ntima. Yove echita vinthu vosiyana na vechichita Ahabu mwakuti echinja nkhalidwe yake. Eyeja-yeja kushusha kulambila kwawenye nolimbikisa ŵanthu kuti akolambila Yehova. (Ŵelengani 2 Mbiri 33:15, 16.) Kuchita vamene ivi kwenzefunika kutang’a ntima komasoti chikhulupililo chifukwa kwa vyaka vinyinji Manase enze chisanzo chiipa kuli ŵanthu a m’banja yake, ŵanthu a udindo mu ufumu wake komasoti kuli ŵanthu ayakine ŵenzelamulila. Koma chakumapeto kwa moyo wake, eyeja-yeja kukonza viyakine mwa vinthu viipa vechichita. Vingachitike kuti yove payakine niye epeleka chisanzo chiweme kuli Yosiya wamene echizankhala mfumu iweme ngako.—2Mf 22:1, 2.
12 Kansi tingaphunzile chinji kufumila pa chisanzo cha Manase? Yove elichefya komasoti echita vinthu viyakine vinyinji. Epemphela kwa Yehova kuti amuchitile chifundo ndipo echinja nkhalidwe yake. Ewamyasoti vinthu vechiphoniyesha ndipo echita vonse vangakwanishe kuti akolambila Yehova komasoti kuyavya ayakine kuti akochita chimozi-mozi. Chisanzo cha Manase chingayavyesoti olo ŵala ŵanthu amene achita vinthu viipa ngako. Pamene apa tuwona umboni wamphamvu wakuti Yehova ni Mulungu muweme ndipo ni “wokonzeka kukhululuka.” (Sal. 86:5) Yehova okhululukila—ŵanthu ŵala amene alapa chendi kufumila pansi pa ntima.
JUNE 19-25
CHUMA CHUPEZEKA M’MAWU A MULUNGU | 2 MBIRI 34-36
“Kansi mwewo mupindula nawo mokwanila Mawu a Mulungu?”
it–1 pedji 1157 ndim. 4
Hulida
Yosiya pechimvwa “buku yachilamulo” yuŵelengewa na Hilikiya nkulu wa ansembe pa ntchito yokonza kachisi, etumija nthumi kuti akakonshe kwa Yehova. Ove eluta kwa Hulida wamene enze mneneli wa Yehova, ndipo yove eŵauja kuti masoka onse okhuza kusamvwila enzelembewe mu “buku” yamene iyo, azaponele mtundu wosamvwila wamene uyo. Hulida eyangijila kuti chifukwa chakuti Yosiya elichefya pamenso pa Yehova, enzefunikalini kuika ngako nzelu pa soka yamene iyo chifukwa yenze mukhuzalini mpaka yove kumwalila kuluta kumanda mwantendele.—2Mf 22:8-20; 2Mb 34:14-28.
Nsanja ya Olonda ya 06/15 2009 pedji 10 ndim. 20
Nkhalani akhama pa ng’anda ya Yehova!
20 Mfumu Yosiya ewuja ŵanthu kuti akonze kachisi. Pa nthawe yamene iyi, Hilikiya wamene enze mkulu wa ansembe “efwana buku yachilamulo cha Yehova yolembewa na Mose.” Yove epeleka buku yamene iyo kwa Safani wamene enze mulembi, ndipo Safani wamene uyu echiyaŵelengela Yosiya buku yamene iyo. (Ŵelengani 2 Mbiri 34:14-18.) Lomba kansi Mfumu Yosiya echita tyani? Nthawe yamene iyo ekezula vovwala vake chifukwa cha chisoni ndipo ewuja ŵanthu kuti apemphele kwa Yehova. Kupitila muli mneneli munakazi zina yake Hulida, Mulungu epeleka uthenga wozuzula miyambo ya chipembezo yamene yenzechitika mu Yuda. Olo kuti Yehova elosela za soka yewikumana nawo ntundu wamene uyu, yove ewona komasoti etembeja khama yechiwonesha Yosiya pochosa kulambila mafano. (2Mb 34:19-28) Kansi tuphunzilapo chinji pamene apa? Tufunika kunkhala na ntima monga ni wenze nawo Yosiya. Tikamvwa malangizo a Yehova tufunika kuŵakonkheja mokulumija. Tufunika kukumbukilasoti vamene vingachitike, keno patontho na patontho tingayambe kuchita vinthu vampatuko olo vosakhulupilika. Tikachita tetyo, tingankhale lini okayikila kuti Yehova owona, ndipo otembeja khama yatuwonesha pa kulambila kwa chendi monga ni mwechichitila Yosiya.
Kusakila-sakila Mfundo zingatiyavye
Nsanja yophunzila ya 03/2017 pedji 27 ndim. 15-17
Kansi mukonkheja na ntima wonse vamene vilembewa?
15 Posilijila tiyeni tikambilane vatingaphunzilepo pa vinthu vichitikila mfumu Yosiya. Kansi n’chinji chichitisha kuti yove agonjesewe na kufwa? (Ŵelengani 2 Mbiri 35:20-22.) Yosiya “echiyaniyatana” na Mfumu Neko yaku Iguputo, olo kuti mfumu yamene iyo inena kuti iliye wele kuzaniyatana na yove. Baibolo yunena kuti mawu a Neko enze “ochokela pakamwa pa Mulungu.” Lomba ndaŵa yanji Yosiya eluta kuyaniyatana na Neko? Baibolo yunenalini chifukwa chake.
16 Koma kansi Yosiya sembe eziŵa tyani kuti mawu a Neko, enze ochokela chendi kwa Yehova? Yove sembe ekonsha Yeremiya, wamene enze mneneli wokhulupilika. (2Mb 35:23, 25) Koma paliye umboni uwonesha kuti echita vamene ivi. Chiyakinesoti chenzefunika kuganizila n’chakuti, Neko enzekuya ku Carikemesi kuyaniyatana na “ntundu uyakine,” osati Yerusalemu. Ndipo nkhani yamene iyi yenzekhuzalini zina ya Yehova chifukwa Neko, aliye nyoze Yehova kapena ŵanthu ŵake. Tetyo Yosiya, aliye ganize luweme pakuyaniyatana na Neko ndipo Yehova aliye muteteze. Lomba kansi tuphunzilapo chinji? Tikakumana na vuto, tikosakila-sakila poyamba maganizo a Yehova pa nkhani yamene iyo.
17 Tikakumana na vuto tufunika kusakila-sakila mfundo zonse za m’Baibolo zamene zukhuzana na vuto yamene iyo, nowona kuti tingazikonkheje tyani. Nthawe ziyakine tingafunike kukonsha nzelu kuli akulu. N’chendi kuti sewo tingaziŵe vinthu viyakine vokhuza nkhani yamene iyo ndipo payakine tafufuza kale mfundo ziyakine. Koma vingachitike kuti pangankhale mfundo ziyakinesoti zangatiyavye akulu kuti tiziganizile. Tiyelekezele kuti pali mulongo muyakine wamene munalume wake ni Mboni lini. Mulongo wamene uyu oziŵa kuti ofunika kulalikila uthenga uweme. (Mac 4:20) Lomba wakonza zakuti nsiku iyakine alute mu utumiki. Koma munalume wake ofuna kuti pa nsiku yamene iyo akanyunge pamozi. Munalume wamene uyo owona kuti nikale pezichitilako vinthu pamozi. Mwanakazi wamene uyo payakine angaganizile lamulo ya Yesu yakuti tikaphunzise ŵanthu, komasoti mfundo yakuti tufunika kumvwila Mulungu. (Mt 28:19, 20; Mac 5:29) Koma angachitesoti bwino kuganizila mfundo yakuti anakazi ofunika kugonjela analume ŵawo komasoti akonkhala ololela. (Aef 5:22-24; Afi 4:5) Kansi munalume wake wamene uyo omulesha kuluta kuyalalikila? Kapena ongofuna tyala kuti pa nsiku yamene iyo, osati achokepo kuti achitile pamozi vinthu viyakine? Chisanzo chamene ichi chuwonesha kuti tufunika kunkhala osamala pochita vinthu kuti tinkhale na chikumbuntima chiweme potumikila Mulungu.
JUNE 26–JULY 2
CHUMA CHUPEZEKA M’MAWU A MULUNGU | EZARA 1–3
“Mukolola kuti Yehova akukatishileni ntchito”
Nsanja yophunzila ya 03/2022 pedji 14 ndim. 1
Kansi mwewo muwona vinthu vechiwona Zekariya?
AYUDA enkhala okondwela ngakosoti. Yehova Mulungu “etang’isha ntima wa Koresi Mfumu ya Perisiya” kuti amasule Aisiraeli amene enze enkhala ku ukapolo ku Babulo kwa vyaka vinyinji. Mfumu yamene iyi ilengeza kuti Ayuda ajokele kwawo “na kuyamangasoti ng’anda ya Yehova Mulungu wa Aisiraeli.” (Eza 1:1, 3) Vamene ivi venze vokondwelesha ngakosoti! Vamene ivi, venzetanthauza kuti Ayuda azakwanishe kulambilasoti Mulungu wachendi m’chalo chechiŵapasa.
Nsanja ya Olonda ya 10/2017 pedji 26 ndim. 2
Tutetezewa na magaleta komasoti chisote chachifumu
2 Zekariya enzeziŵa kuti Ayuda amene ejokela ku Yerusalemu, enze ŵanthu okhulupilika. Pala enze ŵanhtu amene “Mulungu wachendi etang’isha mitima yawo” kuti asiye ng’anda zawo komasoti mabizinesi ŵawo. (Eza 1:2, 3, 5) Ayuda amene awo echoka mu chalo chenze edjaila kufulukila mu chalo chamene anyinji a ove enze akaliye kandamo. Ngati elolela kuyenda ulwendo wovuta wa makilomita 1.000 miles (1.600 km) kupita m’malupili na m’vipululu, niyekuti enzewona kuti kumangasoti kachisi wa Yehova nikofunika ngako.
Kusakila-sakila Mfundo zingatiyavye
Nsanja ya Olonda ya 01/15 2006 pedji 19 ndim. 1
Mfundo zikulu-zikulu za m’buku ya Ezara
1:3–6. Monga ni Aisiraeli ayakine amene esala ku Babulo, pali a Mboni za Yehova anyinji amene angakwanishelini kuchita utumiki wa nthawe zonse-kapena kutumikila ku madela kwamene kuliye ofalisa okwanila. Koma lomba oyavya na kulimbikisa ŵanthu amene angakwanishe kuchita tetyo, ndipo mwakufuna kwawo opeleka thandizo yopitisha pasogolo-ntchito yolengeza Ufumu na-kupanga ophunzila.