Malifalensi a Utumiki komasoti Moyo wasu wachikhilisitu kabuku kamisonkhano
© 2023 Watch Tower Bible and Tract Society of Pennsylvania
DJULAYI 3-9
CHUMA CHUPEZEKA M’MAWU A MULUNGU | EZARA 4-6
“Osasokonezewa pa ntchito”
Nsanja yophunzila ya 03.2022 pedji 18 ndim. 13
Kansi mwewo muwona vinthu vechiwona Zekariya?
13 Ntchito yomangasoti kachisi yenze ileshewa. Koma olo n’tetyo, Nkulu wa Ansembe zina yake Yesuwa (Yoswa) pamozi na Bwanankubwa zina yake Zerubabele, analume amene esankhiwa kuti akosogolela ŵanthu—‘eyamba kumangasoti ng’anda ya Mulungu.’ (Eza 5:1, 2) Ayuda ayakine payakine eganiza kuti chamene icho chenze chosankha chiipa. Venze vosakwanishika kuti vilekeziŵika kuti Ayuda omangasoti kachisi. Ndipo ove enzeziŵa kuti adani ŵawo azachite vonse vangakwanishe kuti aleshe ntchito yamene iyo yomanga. Analume aŵili amene enze na udindo, Yoswa pamozi na Zerubabele, enzefunika kusimikijiliwa kuti Yehova ali nawo. Ndipo esimikijiliwa chendi. Motyani?
Nsanja ya Olonda ya 2/1/1986 pedji 29, bokosi ndim. 2-3
Menso a Yehova “enzeloleshesha pali akulu-akulu”
Pavuli pakuti Ayuda ajokela kufumila ku Babulo, nthawe ya-vyaka 16-yosakata ntchito iyamba. Mneneli Hagai na Zekariya ekwanisha kutang’isha Ayuda kuti osati achite ulesi, ndipo ntchito yomangasoti kachisi wa Yehova iyambasoti. Koma pakaliyepita nthawe, akulu-akulu a ku Perisiya elesha ntchito yamene iyo ndipo oshusha amene awo ekonsha kuti: “Kansi niŵani wakulamulani kuti mumange ng’anda yamene iyi nosilija chipupa chamapulanga chamene ichi?”—Eza 5:1-3.
Yankho ya konsho yamene iyi yenze yovuta ngako. Kuti akulu-akulu amene awo echita wowa, kukonzasoti kachisi sembe kwipanamikiwa mosavuta. Ndipo kuti osogolela enze ekalipisha oshusha amene awo, sembe ntchito yomanga iliyepitilije. Tetyo, akulu-akulu (mosakaikila mosogolelewa na Kazembe wopanamila ŵanthu akuchalo chawo zina yake Zerubabele na Mkulu wa Ansembe Yosuwa), epeleka yankho yanzelu koma yokata ntima. Ove ekumbusha akulu-akulu aboma amene awo za lamulo yechipeleka Koresi yamene yenze iluŵika kwa nthawe itali yamene ipasa Ayuda chilolezo chakuti apitilije kukata ntchito yamene iyi. Pokumbukila lamulo ya Aperisiya yakuti osati achinje malamulo apelekewa, akulu-akulu amene awo echita vinthu mwanzelu kupewa kushusha lamulo ya mfumu. Tetyo, ntchito yamene iyo ipitilija mphela mpaka pamene Mfumu Dariyo pechipeleka chilolezo-chake!—Eza 5:11-17; 6:6-12.
Nsanja yophunzila ya 03.2022 pedji 15 ndim. 7
Kansi mwewo muwona vinthu vechiwona Zekariya?
7 Kuchinja kwamene uku kwichitisha kuti mitima ya ŵala enzemanga kachisi inkhale mmalo. Kansi kuchinja kwake n’kotyani? M’chaka cha 520 B.C.E., Dariyo woyamba echizankhala mfumu ya Perisiya. M’chaka chachiŵili cha ulamulilo wake yove echizaziŵa kuti kulesha ntchito yomanga kachisi kwenze kosaloleka. Pavuli pake, Dariyo enena kuti ove enzefunika kusilija ntchito yawo. (Eza 6:1-3) Lamulo yamene iyo ya mfumu idabwisa aliyense. Koma mfumu ichita vinyinji kupambana kuvomekeja ntchito yomanga. Mfumu ilamula ŵanthu ŵenzenkhala nawo pafupi kuti aleke kushushana na Ayuda, ndipo—ilamulasoti kuti aŵapase ndalama na vinthu vonse venzefunikila kuti asilije kumanga kachisi wamene uyo! (Eza 6:7-12) Monga vokonkhapo vake, Ayuda echizasilija ntchito yomanga kachisi wamene uyo papita tyala vyaka 4 mu 515 B.C.E.—Eza 6:15.
Nsanja yophunzila ya 03.2022 pedji 19 ndim. 16
Kansi mwewo muwona vinthu vechiwona Zekariya?
16 Njila iyakine yakupelekela malangizo Yehova ni kupitila muli “kapolo wokhulupilika na wanzelu.” (Mt 24:45) Nthawe ziyakine, kapolo wamene uyu payakine angapeleke malangizo amene tuŵamvwishalini bwino-bwino. Mwachisanzo, tingalondele malangizo otikonzekelesha kuti tipulumuke ku masoka achilengedwe ŵatuganiza kuti angachitikelini ku dela kwatunkhala sewo. Olo payakine tingoganiza kuti kapolo wamene uyu otisamalila tyala luweme muno nkati mwa mulili. Kansi tufunika kuchita chinji keno tawona kuti malangizo amene awo apelekewa ni osathandiza? Tufunika kuganizila mwechipindulila Aisiraeli chifukwa chokonkheja malangizo epelekewa kupitila muli Yoswa na Zerubabele. Tufunikasoti kuganizila nkhani ziyakine za m’Baibolo zatuŵelenga. Nthawe ziyakine, ŵanthu a Mulungu elondela malangizo amene enzewoneka kunkhala osathandiza koma amene epulumusha miyoyo yawo.—Nu 7:7; 8:10.
Kusakila-sakila Mfundo zingatiyavye
Nsanja ya Olonda ya 6/15/1993 pedji 32 ndim. 3-5
Kansi mungaikhulupilile Baibolo?
Ndalama yamene iyi ipangiwa ku Tariso, tauni yaku m’mwela koma chaku m’mawa kwa mbali yaku Turkey. Ndalama yamene iyi ipangiwa mu ulamulilo wa Bwanankubwa Mazaeus wa ku Perisiya mvyaka va m’ma 300 B.C.E. Otomolewa kuti bwanamkubwa wa ku “silya iyakine ya m’mana,” Kutanthauza kuti, M’mana wa Firate.
Koma kansi chifukwa n’chinji mawu amene aŵa ni okondwelesha? Chifukwa chakuti mungaŵafwane M’baibolo yanu. Pa lemba ya Eza 5:6–6:13 Yunena za kulembelana makalata kwa pakati pa mfumu Dariyo ya Perisiya na bwanamkubwa woitiwa kuti Tatenai. Nkhani yake yenzenena za kumangasoti kachisi wa ku Yerusalemu kuli Ayuda. Ezara enze mulembi wanzelu m’chilamulo cha Mulungu, ndipo tingamuyembekezele kunkhala wachendi, pa mawu ŵechilemba. Onani pa lemba ya Ezara 5:6 na 6:13 kuti etomola Tatenai kunkhala “bwanankubwa wa silya ino ya m’mana wamene uyu.”
Ezara elemba vamene ivi cha m’ma 460 B.C.E., vyaka 100 ndalama yamene iyi ikaliye pangiwa. Eye, pali ŵanthu ayakine angoganiza kuti kutomola munthu wa udindo wakale-kale ni nkhani itontho. Koma keno mungakhulupilile olemba Baibolo pa nkhani zitontho-zitontho teti, kansi vamene ivi vufunikalini kuyangijila chikhulupililo chanu pa vinthu viyakinesoti vechilemba?
DJULAYI 10-16
CHUMA CHUPEZEKA M’MAWU A MULUNGU | EZARA 7-8
“Nkhalidwe ya Ezara ilemekeza Yehova”
Nsanja ya Olonda ya 10/1/2000 pedji 14 ndim. 8
Kuphunzila—nikoyavya komasoti kokondwelesha
8 Eye, kukonda kwasu mawu a Yehova kufumila mu ntima mwasu, chamene nichimake cha malingalilo ŵasu. Tufunikila kuganizilasoti mfundo ziyakine zataŵelega lombapano mu ndime zakuvuli. Tufunikila kuganizila mozama mfundo za uzimu, komasoti zufunika kunkhazikika mu ntima mwasu, nosinkhasinkha mfundo zamene izo. Vamene ivi vufuna kuganizila modenkha komasoti kuviika mpemphelo. Monga ni Ezara, tufunikila kukonzekelesha mitima yasu poŵelenga Baibolo komasoti kuphunzila mawu a Mulungu. Elemba zokhuza yove kuti: “Pakuti Ezara ekonzekelesha ntima wake kuti aphunzile chilamulo cha Yehova na kuchichita komasoti kuti aphunzise mu Isiraeli malamulo na chilungamo.” (Eza 7:10) Onani volinga vitatu vechikonzekeleshela ntima wake Ezara: kuphunzila mawu a Mulungu, kuŵakatishila ntchito pa moyo wake, komasoti kuphunzisa ayakine. Tufunikila kukonkheja chisanzo chake.
si pedji 75 ndim. 5
Buku ya M’baibolo namba 13—1 Mbiri
5 Paliye wamene enze woyenelela kupambana Ezara kulemba mbili yachendi na yasiteleti monga ni yamene iyi. “Pakuti Ezara ekonzekelesha ntima wake kuti aphunzile chilamulo cha Yehova na kuchichita komasoti kuti aphunzise mu Isiraeli malamulo na chilungamo.” (Eza 7:10) Yehova emuyavya na nzimu utuŵa. Wolamulila wa Perisiya ezindikila nzelu za Mulungu kupitila muli Ezara ndipo emupasa mawulamulilo anyinji mudela yonse ya Yuda. (Eza 7:12-26) Tetyo ponkhala wosogolelewa na ulamulo wa Mulungu na wa mfumu, Ezara ekwanisha kulemba makalata ŵake kufumila m’mabuku anyinji aweme amene enzepo pa nthawe yamene iyo.
it-1 pedji 1158 ndim. 4
Kulichefya
Opeleka malangizo oyenelela. Munthu wamene olichefya pa menso pa Mulungu angoyembekezela kusogolelewa na Mulungu. Ezara enze na udindo ukulu ku Yerusalemu wosogolela analume opitilila 1.500 osaŵelengela ansembe, Anetini, anakazi na ŵana. Kuyangijila pamene apo, enyamula golide na siliva unyinji ngako wowamililishila kachisi wa Mulungu wamene enze ku Yerusalemu. Enzefunikila chitetezo pa ulwendo wamene uyu, koma Ezara aliyefune kusenga mfumu ya Perisiya kuti amupelekeje na masodja ndipo chifukwa cha vamene ivi ewonesha kudalila mphamvu zake-zake. Kupatulapo pamene apa, enze elaŵilakale kwa mfumu kuti: “Kwanja ya Mulungu wasu ili na onse omufuna-funa kuti aŵachitile viweme.” Tetyo elengeza kuti aleke kulya, kuti ŵanthu alichefye pamenso pa Yehova. Ove esenga kwa Mulungu, ndipo yove eŵamwvishila noŵateteza kwa adani amene enze tandija panjila, tetyo ove eyenda ulwendo wawo wamene uyo paliye vuto iliyonse. (Eza 8:1-14, 21-32) Mneneli Danieli, penze ku ukapolo ku Babulo, enzekondewa ngako na Mulungu mwakuti emutumijila mngelo kupitila mmesompheya, chifukwa cha kulichefya pamenso pa Mulungu, Danieli enzefunishisha kusogolelewa na yove.—Da 10:12.
Kusakila-sakila Mfundo zingatiyavye
Nsanja ya Olonda ya 1/15/2006 pedji 19 ndim. 10
Mfundo zikulu-zikulu za m’buku ya Ezara
7:28–8:20—Chifukwa nchinji Ayuda anyinji ku Babulo aliyefune kuluta ku Yerusalemu na Ezara? Olo kuti penze pepita vyaka 60 gulu yoyamba ya Ayuda peyijokela kwawo, ku Yerusalemu kwenze ŵanthu atontho tyala. Munthu angajokele ku Yerusalemu ofunika kuyamba moyo wanyowani komasoti wonkhala na mavuto anyinji osiyana-siyana. Pa nthawe yamene iyo kuli Ayuda ŵala amene vinthu venze ŵayendela luweme ku Babulo, sembe aliye kwanishe kunkhala ku Yerusalemu chifukwa kwenzeve moyo wapalulu wangakumbwileko. Komasoti ulwendo wake wenze woyofya. Ŵanthu ojokela ku Yerusalemu kwamene uko enzefunikila ku nkhala na chikhulupililo chotang’a kwa Yehova, khama pa kulambila kwachendi, komasoti enzefunikila kutang’a ntima kuti afuluke. Olo Ezara naye efunikila kulitang’isha chifukwa kwanja ya Yehova yenzepali yove. Ezara elimbikisa—mabanja 1.500, kuti afuluke, amene payakine enze—ŵanthu 6.000, tetyo nawo efuluka. Ezara epitilijasoti kulimbikisa ŵanthu, ndipo Alevi 38 na Anetini 220 efulukasoti.
DJULAYI 17-23
CHUMA CHUPEZEKA M’MAWU A MULUNGU | EZARA 9-10
“Khalidwe ya Ezara ilemekeza Yehova”
Nsanja ya Olonda ya 1/15/2006 pedji 20 ndim. 1
Mfundo zikulu-zikulu za m’buku ya Ezara
9:1, 2—Kansi kulungulana na ŵanthu akuchalo chamene ichi kwenze koyofya tyani? Ntundu wamene uyu wowejeleshewa wenzefunika kunkhala chimake cha kulambila Yehova mpaka mesiya kuwela. Kulungulana na ŵanthu amitundu iyakine sembe kwisokoneza kulambila kwa chendi. Poona kuti ŵanthu ayakine enze elungulana na ŵanthu amitundu yenze lambila mafano, ntundu wonse wamene uyo sembe wetolelako vochita va ŵanthu akunja amene awo. Tetyo, kulambila kwachendi sembe kwesililatu pachalo chonse. Lomba kansi mesiya sembe echokela ku ntundu wotyani? N’chifukwa chake Ezara ekhumudwa ngako pechiwona vamene ivi venzechitika.
Nsanja ya Olonda ya 10/1/2009 pedji 10 ndim. 6
Kansi Yehova ofuna kuti tikochita tyani?
Yehova ofuna kuti tikomumvwila mwakufuna kwasu ndipo tikachita vamene ivi yove azatidalise. Mose elemba kuti: “Mukosunga malamulo . . . ŵanukupasani lelo, kuti vinthu vikokuyendelani luweme.” (Vesi 13) N’chendi, chilichonse chakutiuja Yehova—kuti tichite chunkhala chiweme—kapena kuti chothandiza. Tetyo, paliye chingatikangishe kunkhala wosangalala. Baibolo yunena kuti: “Mulungu niye chikondi”. (1Yoh 4:8) N’chifukwa chake etipasa malamulo amene angatiyavye kuti tinkhale na moyo uweme ngako. (Yes 48:17) Kuchita vakufuna Yehova kuti tikochita kutiyavya kupewa vinthu vinyinji viipa palipano, ndipo kusogolo tizapeze madaliso anyinji mu Ufumu wake.
Kusakila-sakila Mfundo zingatiyavye
Nsanja ya Olonda ya 1/15/2006 pedji 20 ndim. 2
Mfundo zikulu-zikulu za m’buku ya Ezara
10:3, 44—Chifukwa n’chinji ŵana echosewa pamozi na anakazi? Kuti ŵana amene awo esala, anakazi amene awo ochosewa sembe ejokelasoti mosavuta pofuna ŵana ŵawo. Komasoti, ŵana atontho-atontho nthawe zinyinji ofuna kusamaliliwa na a mayi ŵawo.
DJULAYI 24-30
CHUMA CHUPEZEKA M’MAWU A MULUNGU | NEHEMIYA 1-2
“Nthawe yamene iyo nipemphela”
Nsanja ya Olonda ya 2/15/2008 pedji 3 ndim. 5
Mukoika Yehova pasogolo panu nthawe zonse
5 Nthawe ziyakine, tingafunikile kusenga thandizo kwa Mulungu mwachidule. Nsiku iyakine, Mfumu Aritasasita yaku Perisiya iwona kuti Nehemiya wamene enze wopelekela kapu, enze wachisoni. Mfumu yamene iyo imukonsha kuti; “Ufuna chinji wewo?” Pamene apo [Nehemiya] epemphela kwa Mulungu wakululu.” Apa nivowonekelatu kuti sembe viliye kwanishike Nehemiya kupeleka pemphelo itali ya mu ntima. Koma Mulungu eyankha mphela pemphelo yake, chifukwa mfumu yamene iyo imuyavya Nehemiya kuti amange mpanda wa Yerusalemu. (Ŵelengani Nehemiya 2:1-8.) N’chendi, Mulungu oyankha pemphelo olo ingankhale yachidule, na yamu ntima.
be pedji 177 ndim. 4
Mukakonshewa mosayembekezeleka
Mukakonshewa kuti mufotokoze vamukhulupilila mwachisawawa, kansi n’chinji chingakuyavyeni kuti yankho yanu inkhale yokata ntima? Konkhejani Nehemiya, wamene epemphela chamuntima akaliye yankha konsho yechikonshewa na mfumu Aritasasita. (Ne 2:4) Tetyo, konzani autilaini ya m’maganizo mokulumija. Mfundo zikulu-zikulu zingandandalikiwe moteti: (1) Sankhani mfundo imozi kapena ziŵili zamene kafotokozedwe kake kofunika kunkhala komvwika (Mungasankhe kukatishila ntchito mfundo zopezeka m’buku ya Kukambitsirana za M’malemba). (2) Sankhani malemba ŵamungakatishile ntchito poyankha makonsho amene awo. (3) Konzani mwamungayambile kafotokozedwe kanu mwanzelu kuti wokonsha wamene uyo ankhale wofunishisha kumvwishila. Pavuli pake yambani kulaŵila.
Kusakila-sakila Mfundo zingatiyavye
Nsanja ya Olonda ya 2/15/1986 pedji 25
Kulambila kwachendi kwipambana
Chifukwa nthawe zonse Nehemiya enzepemphela “usiku na nzuŵa” chifukwa chakuti Yerusalemu enze matongwe. (1:4, 6) Pechipasiwa mwayi wowuja mfumu Aritasasita za vofuna vake vomangasoti mpanda wa Yerusalemu, Nehemiya epemphelasoti, tetyo echita venzechita masiku onse moweleja-weleja. Yankho iweme ya Yehova ifuma pa ntchito yomangasoti mpanda wa tauni yamene iyi.
Vatuphunzilapo: Nehemiya edalila Yehova kuti amusogolele. Patuchita vosankha vasu vikulu-vikulu, sewo nase tufunika ‘kulimbikila kupemphela’ komasoti kuchita vinthu mokatijana na chifunilo cha Yehova.—Aro 12:12.
DJULAYI 31–OGASITE 6
CHUMA CHUPEZEKA M’MAWU A MULUNGU | NEHEMIYA 3-4
“Kansi muganiza kuti nimwe wofunika ngako mwakuti mungakatelini ntchito zakuthupi?”
Nsanja ya Olonda ya 2/1/2006 pedji 10 ndim. 1
Mfundo zikulu-zikulu za M’buku ya Nehemiya
3:5, 27. Osati tikoziwona kuti nise apalulu ngako mwakuti tingakatelini ntchito zamene zuwoneka monga nizonyozeka zamene zupitisha pasogolo kulambila kwa chendi, monga mwechichitila Atekoa “otchuka,” kapena kuti apalulu. M’malo mwake, tikokonkheja Atekoa amene enzelini otchuka kamasoti amene elipeleka mwakufuna kwawo.
Nsanja yophunzila ya 10.2019 pedji 23 ndim. 11
Kansi Yehova azakuchitisheni kunkhala chinji?
11 Papita vyaka vinyinji, ŵana anakazi asalumu eyavyako pa ntchito yomanga mpanda wa Yerusalemu. (Ne 2:20; 3:12) Olo kuti Atata ŵawo enze kalonga, ove elipeleka kukata nawo ntchito yovuta komasoti yoyofya yamene iyi. (Ne 4:15-18) Vamene ivi vechichita venze vosiyana navechichita ŵanthu otchuka pakati pa Atekoa. Koma ŵanthu otchuka pakati pa Atekoa aliyemvwile mfumu yawo nakuitumikila. (Ne 3:5) Ŵana anakazi Asalumu owoneka kuti esangalala ngako kuona kuti ntchito yamene iyo yasilapapita tyala masiku 52. (Ne 6:15) Masiku ŵano, alongo ayakine olipeleka kuti atumikile—Yehova pa ntchito zomanga-manga kapena kuwamya malo amene epelekewa kwa Yehova. Luso yawo, khama yawo komasoti kukhulupilika kwawo kuyavya ngako kuti ntchito zamene izi zikoyenda luweme.
Nsanja ya Olonda ya 8/1/2004 pedji 18 ndim. 16
Nkhalani na maganizo a Khilisitu pa nkhani yakuti n’kulu niŵani
16 Akhilisitu onse, ŵana na akulu, ofunikila kuyeja-yeja kunkhala na maganizo a Khilisitu pa nkhani ya kunkhala nkulu. Mumpingo munkhala ntchito zosiyana-siyana. Tufunikalini kukhumudwa tikasengewa kukata ntchito yamene yuwoneka kuti ni ntchito wamba. (1Sa 25:41; 2Mf 3:11) Makolo, kansi mulimbikisa ŵana ŵanu, atontho-atontho komasoti achilumbwana kuti akokata mosangalala ntchito iliyonse yapasiwa, kaya nipang’anda ya Ufumu, pamalo ansonkhano wadela, kapena wachigawo? Kansi okuwonani tyani mwewo mukokata ntchito yamene yuwoneka yonyozeka? M’bale muyakine, wamene palipano otumikila kulikulu ya pachalo chonse ya Mboni za Yehova, okumbukila luweme chisanzo cha makolo ŵake. Yove enena kuti: “Mwenzekatila ntchito yotuŵisha pang’anda ya Ufumu komasoti pamalo amisonkhano vuwonesha kuti ove enzewona ntchito yamene iyo kunkhala yofunika. Nthawe zinyinji enzelipeleka kukata ntchito zoyavya mpingo kapena zoyavya abale onse, mosaganizila kuti ntchito yamene iyo yuwoneka yonyozeka motyani. Ntima wamene uyu wiŵayavya kulondela mosakakamijika ntchito iliyonse yapasiwa pano pa Beteli.”
Kusakila-sakila Mfundo zingatiyavye
Nsanja ya Olonda ya 2/1/2006 pedji 9 ndim. 1
Mfundo zikulu-zikulu za m’buku ya Nehemiya
4:17, 18—Kansi munthu angakate tyani ntchito yomanga na kwanja imozi? Vamene ivi vingankhalelini vovuta kuli munthu wamene wanyamula katundu. Akayika katundu pamutu olo pa pewa, angakate katundu wamene uyo na kwanja imozi ndipo ‘kwanja iyakine angakate chida.’ Omanga amene enzefunikila kukatishila ntchito manja onse aŵili, ‘emangilila chibemba muluunda mwawo noyamba kukata ntchito.’ Enze okonzeka kuliteteza adani wawo akawaukila.
OGASITE 7-13
CHUMA CHUPEZEKA M’MAWU A MULUNGU | NEHEMIYA 5–7
“Nehemiya enzefuna kutumikila osati kutumikiliwa”
Nsanja ya Olonda ya 11/1/2002 pedji 27 ndim. 3
Ŵanthu oyavya kulambila kwachendi—akale-kale komasoti amasiku ŵano
Nehemiya ethandizila vinthu vinyinji kuyangijila pa kukatishila ntchito nthawe yake komasoti luso yake polinganija vinthu. Ekatishila ntchito chuma chake poyavya kulambila kwachendi. Ekatishilasoti ndalama zake powombola akwake achiyuda ku ukapolo. Ekongolesha ndalama zake paliye kujoshelewa kalikonse. Yove “aliyevutishe” Ayuda poŵauja kuti akomulipila monga bwanankubwa, vamene nivinthu venzefunika kuchitika. M’malo mwake, yove ku ng’anda kwake enzelondela komasoti kulyesha “ŵanthu okwana 150 onse pamozi na enze ŵazenguluke.” Nsiku iliyonse enzepeleka “ng’ombe imozi na mbelele zokwana 6 komasoti nkhuku’’ kuli alwendo ŵake. Kuyangijila pamene apo, kamozi pa masiku 5 aliwonse, yove enzewapasa “vinyo unyinji wamitundu-mitundu”—enzechita vamene ivi pokatishila ntchito ndalama za n’thumba mwake.—Ne 5:8, 10, 14-18.
Nsanja yophunzila ya 09.2016 pedji 6 ndim. 16
“Manja ŵanu osati afoke”
16 Yehova eyavya Nehemiya pamozi na ayake kuti atang’ishe manja ŵawo nosilijisha ntchito yomanga mpanda wa Kachisi. Ntchito yamene iyi yesila papita tyala masiku 52! (Ne 2:18; 6:15, 16) Sikuti Nehemiya enzengosogolela tyala ntchito yamene iyi, koma nayesoti enzekata nawo. (Ne 5:16) Masiku ŵano, akulu anyinji okonkheja chisanzo cha Nehemiya pokata nawo ntchito zomanga-manga komasoti kusuka nawo m’ng’anda za Ufumu. Ove otang’ishasoti manja a ŵanthu wofoka poyenda nawo mu utumiki komasoti kuŵachita maulwendo awubusa.—Ŵelengani Yesaya 35:3, 4.
Nsanja ya Olonda ya 2/1/2000 pedji 32
Kansi Yehova azakukumbukileni tyani?
Mosakayikila, Baibolo yuwonesha kuti kwa Mulungu, “Kukumbukila” kutanthuza kuchitapo kanthu. Mwachisanzo, chigumula pechisila masiku 150, “Mulungu ekumbukila Nowa . . . , ndipo Mulungu eyambisha chimphepo pachalo chonse, mwakuti manzi eyamba kupwila.” (Ge 8:1) Vyaka vinyinji pavuli pake, Samisoni, pechituliwa menso komasoti kumangiwa na Afilisiti, epemphela kuti: “Yehova Ambuye nkulu ngako, munikumbukile, ndipo munitang’ishe na kunipasa mphamvu kamozi tyala” Yehova ekumbukila Samisoni pomupasa mphamvu yopambana yachibadwa kuti awejele chilango kwa adani a Mulungu. (Owe 16:28-30) Ponena za Nehemiya, Yehova edalisa khama yake, ndipo kulambila kwachendi kwiwejeleshewa ku Yelusalemu.
Kusakila-sakila Mfundo zingatiyavye
Nsanja ya Olonda ya 7/1/2007 pedji 30 ndim. 15
“Pitilijani kugonjesa chiipa mwakuchita chiweme”
15 Chachitatu, Adani a Nehemiya ekatishila ntchito Semaya, Muisiraeli wopatulika, kuti achitishe Nehemiya kufwaya malamulo a Mulungu. Semaya ewuja Nehemiya kuti: “Tikumane kung’anda ya Mulungu m’kati mwa kachisi, tivalesoti pamuliyango wa kachisi, pakuti akuza kuzapaya wewo.” Semaya ewuja Nehemiya kuti moyo wake uli pangozi koma angapulumuke keno angafisame m’kachisi. Koma pakuti Nehemiya enzelini wa nsembe, sembe echimwa kuti enze efisama mng’anda ya Mulungu. Kansi Nehemiya efwaya malamulo a Mulungu pofuna kupulumusa moyo wake? Nehemiya eyankha kuti: “Nineŵani newo kuti nikaloŵe m’kachisi nopulumusa moyo wangu? Nizaloŵemo lini.” Kansi ndaŵa yanji Nehemiya aliye ponele m’mavuto enzefuna kumuchitikila? Chifukwa enzeziŵa kuti olo Semaya enze Muisiraeli muyake, “aliye tumiwe na Mulungu” ndipo, mneneli wachendi angamuujelini kuti afwaye malamulo a Mulungu. Nehemiya aliye lolele kuti agonjesewe na ŵanthu aipa amene enzemushusha. Papita nthawe itontho ekwanisha kulaŵila kuti: “Mpanda wesilijiwa pa nsiku ya 25 mwezi wa Eluli m’masiku tyala 52.”—Ne 6:10-15; Nu 1:51; 18:7.
OGASITE 14-20
CHUMA CHUPEZEKA M’MAWU A MULUNGU | NEHEMIYA 8-9
“Chisangalalo cha Yehova niye malo ŵanu achitetezo”
Nsanja ya Olonda ya 10/15/2013 pedji 21 ndim. 2
Kansi tuphunzilapo chinji pa pemphelo ikonzewa luweme?
2 Ayuda echita nsonkhano papita mwezi umozi kufumila pechisilija kumanga mpanda wa Yerusalemu. (Ne 6:15) Ŵanthu a Mulungu esilija ntchito yomanga papita tyala masiku 52 ndipo enzefuna kuti awungane pamozi nophunzila za Mulungu. Tetyo pansiku yoyamba ya mwezi wa Tishiri ewungana pamalo amozi kuti amvwishile Ezara komasoti Alevi ayakine amene enze ŵelenga nomvwishila chilamulo. Ŵanthu wonse m’banja “sembe ekwanisha kumvwishila noziŵa tanthauzo ya venzeŵelenga” ndipo ove epanama nomvwishila “kuyambila m’mawa mpaka n’zuwa.” Chamene ichi nichisanzo chiweme ngako kuli sewo masiku ŵano amene tuungana mung’anda za Ufumu ziweme. Kansi nthawe ziyakine mukankhala pamisonkhano muyamba kuganizila vinthu vosafunika? Ngati vilitetyo, mungachite bwino kuganizila visanzo va Aisiraeli amene aŵa. Ove emvwishila mwatchelu mawu amene awo ndipo eŵafwika pa ntima mpaka efwika polila chifukwa choona kuti akangiwa kukonkheja chilamulo cha Mulungu.—Ne 8:1-9.
Nsanja ya Olonda ya 7/15/2007 pedji 22 ndim. 9-10
Kansi “mupitilija kuyenda mwa mzimu”?
9 Mawu akuti chimwemwe otanthauza chisangalalo chikulu. Yehova ni “Mulungu wachisangalalo.” (1Ti 1:11; Sl 104:31) Mwana wake okondwela kuchita chifunilo cha Atata ŵake. (Sl 40:8; Ahe 10:7-9) “Pakuti chisangalalo chakupeleka Yehova niye malo ŵanu achitetezo [yasu].”—Ne 8:10.
10 Tikochita chifunilo cha Mulungu, olo pa nthawe ya mavuto, chisoni, na chinzunzo, tunkhala okondwela chifukwa cha chisangalalo chakutipasa Mulungu. Tetyo tunkhala osangalala “tikamuziŵa Mulungu.” (Miy 2:1-5) Tunkhala paushamwali wotang’a na Mulungu keno tumuziŵa luweme komasoti keno tukhulupilila sembe ya dipo ya Yesu. (1Yoh 2:1, 2) Nisesoti osangalala chifukwa chakuti tili pa ukwawo ngawo-ngawo wa pachalo chonse. (Zef 3:9; Hag 2:7) Chiyembekezo chasu chokhuza ufumu komasoti ntchito yolalikila uthenga uweme vutiyavya kunkhala osangalala. (Mt 6:9, 10; 24:14) Chiyembekezo chasu cha moyo wosasila chutipasa chisangalalo. (Yoh 17:3) Pakuti tinachiyembekezo chodabwisa chamene ichi, tufunikila “kusangalala nacho.”—De 16:15.
Kusakila-sakila Mfundo zingatiyavye
it-1 pedji 145 ndim. 2
Chiaramu
Pepapita vyaka vitontho Ayuda ewelako kufumila ku ukapolo ku Babulo, wansembe Ezara eŵelenga buku yachilamulo kuli Ayuda amene esonkhana ku Yerusalemu, ndipo moweleja-weleja eŵafotokozela ŵanthu amene awo, Nehemiya 8:8 yunena kuti: “Ndipo epitilija kuŵelenga mokweja mawu buku ya Chilamulo cha Mulungu wachendi, nofotokoza momvwika luweme komasoti kumvwikisha tanthauzo yake; ndipo enzeyavya ŵanthu kumvwisha mawu amene enzeŵelengewa.” Kutanthauzila kwamene uku kuwoneka kuti kwenze kumasulila malemba Achiheberi M’chiaramu, ndipo payakine Chiaramu chewela na Aheberi kufumila ku Babulo. Kutanthauzila kwamene uko, kwenzepamikijapo kufotokoza momvwika luweme kuli Ayuda, olo kuti enzekumvwa Chiheberi, sembe aliye mvwishe tanthauzo ngayo-ngayo ya venze ŵelengewa.
OGASITE 21-27
CHUMA CHUPEZEKA M’MAWU A MULUNGU | NEHEMIYA 10-11
“Elipeleka kwa Yehova na ntima wonse”
Nsanja ya Olonda ya 10/15/1998 pedji 22 ndim. 13
Yerusalemu wolingana na zina yake
13 Pangano yonkhazikika yamene yepangiwa munthawe ya Neheniya yekonzekelesha ŵanthu akale-kale a Mulungu za kupatulila kwa mpanda wa Yerusalemu. Koma penze nkhani iyakine yamene yenzefunika kusamaliliwa mokulumija. Lomba pechizenguluka kumanga mpanda ukulu wamene wenze na miliyango yokwana 12, Yerusalemu ezefunikila kunkhala na ŵanthu anyinji. Olo kuti mwenzenkhala Aisiraeli ayakine, “munzi wamene uyo wenze womasuka, komasoti ukulu koma ŵanthu enze mwamene umo enze oŵelengeka.” (Ne 7:4) Kuti asilije vuto yamene iyi, ŵanthu “echita majiki, kuti iwele imozi mwa magawo 5 kuti inkhale mu Yerusalemu, munzi wopatulika.” Kukonkheja makonzedwe amene aŵa mofunishisha, kwelimbikisa ŵanthu kudalisa “analume onse elipeleka mwaufulu kuti azankhale mu Yerusalemu.” (Ne 11:1, 2) Chamene ichi nichisanzo chiweme ngako kuli olambila achendi masiku ŵano amene thanzi yawo yuŵalola kufulukila ku dela kwamene kufunika thandizo ya akhilisitu otang’a mwauzimu!
Nsanja ya Olonda ya 2/15/1986 pedji 26
Kulambila kwachendi kupambana
Kusiya choloŵa nofulukila ku Yerusalemu sembe kweleta ndalama zinyinji komasoti mavuto ayakine. Payakine ŵanthu enzekhala n’tauni yamene iyi enzekumana na mavuto osiyana-siyana. Chifukwa cha minkhalidwe yamene iyi, ayakine enzewona ŵala olipeleka kunkhala olemekezeka ndipo mosakaikila epemphela kwa Yehova kuti aŵadalise.
Nsanja yophunzila ya 04.2016 pedji 8 ndim. 15
Yehova odalisa ŵanthu okhulupilika
15 Petizipeleka kwa Yehova telonjeza kuti tikochita vonse vakufuna. Tenzeziŵa kuti tufunika kulitana vinthu viyakine kuti tikwanishe kuchita vamene ivi. Olo kuti vili tetyo, nthawe ziyakine vunkhala vovuta kuti tichite vinthu vatenzeleka ganizila kuti tingavichite. Koma tikovomekeja tuwonesha kuti nise okhulupilika kwa Yehova. Ndipo vokonkhapo vake vunkhala viweme chifukwa chakuti Yehova otidalisa ngako. (Mki 3:10) Lomba tiyeni tikambilane chisanzo cha mwana wa Yefita.
Kusakila-sakila Mfundo zingatiyavye
Nsanja ya Olonda ya 2/1/2006 pedji 11 ndim. 1
Mfundo zikulu-zikulu za m’buku ya Nehemiya
10:34—Ndaŵa yanji ŵanthu enzefunika kupeleka nkhuni? Muchilamulo cha Mose mwenzeve lamulo ya chopeleka cha nkhuni. Koma pa nthawi yamene iyi enzefunika kuchita vamene ivi. Chifukwa chake nichakuti penzefunika nkhuni zinyinji zonyeshela sembe pa guwa. Vuwoneka kuti penzeve Anetini okwanila, akapolo apakachisi amene enzelini Aisiraeli. Tetyo, echita maele osimikijila kuti nkhuni zikopezeka nthawe zonse.
OGASITE 28–SEKUTEMBA 3
CHUMA CHUPEZEKA M’MAWU A MULUNGU | NEHEMIYA 12-13
“Mukonkhala okhulupilika kwa Yehova keno musankha azishamwali”
it-1 pedji 95 ndim. 5
Aamoni
Pavuli pa kufumya Tobiya panja pa kachisi, lamulo ya Mulungu pa Deuteronomo 23:3-6 yunena kuti Aamoni na Amowabu, onse ofunikalini kuloŵa mumpingo wa Mulungu wachendi mpaka kale-kale, ndipo ikatishiliwa ntchito. (Ne 13:1-3) Lamulo yamene iyi, yeikiwa vyaka pafupi-fupi 1.000 kuvuli chifukwa chakuti Aamoni na Amowabu ekana kuyavya Aisiraeli penze vwendelela chalo cholonjezewa, kanyinji-kanyinji yenzemvwikisha mfundo yakuti ŵanthu amene aŵa sembe aliye kwanishe kunkhala na maudindo akulu-akulu wolamulila mu ntundu wa Isiraeli na mphamvu zonse. Komasoti kunkhala na ufulu wonkhala na maudindo. Koma vamene ivi vutanthauzalini kuti Aamoni na Amowabu sembe aliye katijane olo kunkhala pakati pa Aisiraeli komasoti kulondela madaliso pakati pa ŵanthu a Mulungu, ndipo ivi viwonekela luweme pa kupamikijiwapo kwa Zeleki, wamene otomolewa kumayambililo kwa pakati pa mfumu Davide kupamikijaposoti vechilemba Rute M’mowabu.—Ru 1:4, 16-18.
Nsanja ya Olonda ya 8/15/2013 pedji 4 ndim. 5-6
Mwapatuliwa
5 Ŵelengani Nehemiya 13:4-9. N’chalo ichi mulivinthu vinyinji viipa, tetyo kupitilija kunkhala atuŵa ninkhani lini itontho. Ganizilani za Eliyasibu na Tobia. Eliyasibu enze nkulu wa ansembe pamene Tobia wamene enze wachiamoni, owoneka kuti enze na udindo uyakine mu ulamulilo wa pelisiya kuyudeya. (Ne 2:10) Komasoti Aamoni enzelolewalini kuluta kukachisi. (De 23:3) Tetyo konsho niyakuti: Ndaŵa yanji n’kulu wa ansembe elola kuti Tobia ankhale muchipinda cholyelamo nkachisi?
6 Tobia enzekatijana ngako na Eliyasibu. Tobia komasoti mwana wake Yehohanani elungula anakazi Achiyuda. Komasoti Ayuda anyinji enzelemekeza ngako Tobia. (Ne 6:17-19) N’zukulu muyakine wa Eliyasibu elungula mwana wa Sanibalati, wamene enze bwanankubwa wa Samaliya komasoti muyake wapa ntima ngako wa Tobia. (Ne 13:28) Payakine vamene ivi vechisha Eliyasibu kuti achite venzefuna Tobia olo kuti enze munthu wosakhupilila komasoti woshusha Yehova. Koma Nehemiya ewonesha kuti enze wokhulipilika kwa Yehova pofumya katundu wa Tobia nchipinda cholyelamo nkachisi.
Nsanja ya Olonda ya 3/15/1996 pedji 16 ndim. 6
Kusilija vuto ya kusakhulupilila
6 Keno nise okhulupilika kwa Yehova Mulungu, tikopewa kutandala na ŵanthu onse amene na adani ŵake. Chifukwa chake wophunzila Yakobo elemba kuti: “Mwewo achigololo, kansi muziŵalini kuti kupanga ushamwali na chalo nikuliika pa udani na Mulungu?” (Yak 4:4) Tufunika kunkhala na chikhulupililo monga cha Mfumu Davide wamene enena kuti: “Kansi mufunikalini kuzondana na ŵala ozondana na Yehova? Ndipo nuzondana nawo ngako. Ankhala adani ŵangu ngawo-ngawo.” (Sl 139:21, 22) Tufunalini kuchita ushamwali na ŵanthu ochita machimo mwalona, chifukwa tunkhala osiyana. Kansi kukhulupilika kwa Yehova kutileshalini kukatijana na adani a Yehova aliwonse, keno ni menso na menso olo nkhani zunaunsiwa pawailesi?
Kusakila-sakila Mfundo zingatiyavye
it-2 pedji 452 ndim. 9
Nyimbo
Kuyimba kwenze kofunika ngako pa kachisi. Vamene ivi vuwonekela luweme M’malemba anyinji ofotokoza za oimba amene awo komasoti mfundo yakuti: “Ove enzepasiwalini ntchito ziyakine” zamene Alevi ayakine zenzekata kuti alipeleke na ntima wonse pa utumiki wawo. (1Mb 9:33) Enkhala gulu imozi yosimikijilika mwapadela na ŵala efumila ku Babulo. (Eza 2:40, 41) Olo mu ulamulilo wa mfumu ya Perisiya Aritasasita (Longimanus) epeleka lamulo yolesha nsonkho chifukwa cha ove, komasoti kuŵamasula ku magulu ayakine apa dela, ‘ku nsonkho wakatundu na wamunjila.’ (Eza 7:24) Pavuli pake, mfumu yamene iyo ilamula kuti “pankhale lamulo yoikiliwatu ya oimba, monga mwavufunikila nsiku na nsiku.” Olo kuti Aritasasita otembejewa pa lamulo yamene iyi, mwachiwonekele ipelekewa na Ezara pa malamulo amphamvu ŵechipasiwa na Aritasasita. (Ne 11:23; Eza 7:18-26) Tetyo, mpomvwika kuti, olo kuti oimba onse amene awo enze Alevi, Baibolo yuŵatomola kuti gulu yapadela, ponena za “oimba na Alevi.”—Ne 7:1; 13:10.