Malifalensi a Utumiki komasoti Moyo wasu wachikhilisitu kabuku kamisonkhano
© 2023 Watch Tower Bible and Tract Society of Pennsylvania
SEKUTEMBA 4-10
CHUMA CHUPEZEKA M’MAWU A MULUNGU | ESITERE 1-2
“Mukoyeja-yeja kunkhala olichefya monga ni Esitere”
Nsanja ya Mulonda 01/2017 pedji 25 ndim. 11
Kansi tingachite tyani kuti nthawe zonse tikonkhala olichefya?
11 Kulichefya kunkhala kovuta keno tutamandiwa. Ganizilani vamene vichitikila Esitere. Yove enze muweme ngako, tetyo, emutola kuti akakhale m’gulu ya asimbi kuti asamaliliwe bwino kwa chaka chonse. Kwamene uko, yove enzenkhala na asimbi anyinji ofumila mmadera osiyana-siyana amene enzelamuliliwa na ufumu wa Perisiya. Pa nthawe yamene iyo, ŵanthu enzefuna kusankha munakazi wamene angasangalase mfumu. Koma Esitere, enkhala mphela waulemu komasoti wolichefya. Yove epitilija kuchita vamene ivi olo pechisankhiwa kuti ankhale mfumukazi.—Est 2:9, 12, 15, 17.
Tsanzirani pedji 130 ndim. 15
Epanamila ŵanthu a Mulungu
15 Nthawe peikwana yakuti Esitere akawonekele kwa mfumu, yove epasiwa ufulu wosankha chilichonse changafune, payakine yove sembe esankha kuliwamisha mopitilila malile. Koma molichefya, yove aliyesenge chilichonse kupatulapo tyala vinthu vechimuuja Hegai. (Est 2:15) Payakine yove eziŵa kuti kuwama pakweka kungachitishelini kuti mfumu imusankhe; yove enzeziŵa kuti chofunika ngako n’kunkhala wolichefya. Koma kansi vamene ivi viyavya chendi?
Nsanja ya Mulonda 01/2017 pedji 25 ndim. 12
Kansi tingachite tyani kuti nthawe zonse tikonkhala olichefya?
12 Kulichefya kuyavyasoti kuti tikovwala komasoti kuliwamisha mwaulemu. Munthu wolichefya opewa kuliwoneshela kapena kulitama, koma owonesha “mzimu wodekha na wofasa” (Ŵelengani 1 Petulo 3:3, 4; Yer 9:23, 24) Vatuchita komasoti kulaŵila vuwonesha vamene vili muntima mwasu. Mwachisanzo, ŵanthu ayakine okonda kulaŵila vinthu vowonesha kuti osangalala chifukwa chakuti ali na udindo uyakine, oziŵa vinsinsi viyakine, olo chifukwa chakuti okatijana na abale ayakine amaudindo. Ayakine okonda kulaŵila vinthu vowonesha kuti vinthu viyakine viyenda luweme chifukwa cha ove, noluŵa kuti ayakinesoti eyavyapo. Koma Yesu epeleka chisanzo chiweme pa nkhani ya kulichefya. Mfundo zinyinji zenzelaŵila yove zenze zofumila m’Malemba aChiheberi kapena vokhuza malemba amene awo. Yove echita vamene ivi nacholinga chakuti ŵanthu aziŵe kuti venzelaŵila venze vofumila kwa Yehova osati nzelu zake.—Yoh 8:28.
Kusakila-sakila Mfundo zingatiyavye
Nsanja yophunzila 11.2022 pedji 31 ndim. 3-6
Kansi mwewo muziŵa?
Ofufuza efwana zina yakuti Marduka (mu Chichewa Moredekai) pa volembewa va pamwala vaku Perisiya. Yove enze na udindo m’boma, ndipo vingachitike kuti enze woŵelenga chuma ku Susani. Arthur Ungnad, wamene ni kaswili wa mbili ya Kummawa, enena kuti “kuchosapo Baibolo, ni volemba tyala pa mwala wamene uyu vamene vutomolasoti za Moredekai.”
Kungofumila pa nthawe yechinena vamene ivi Arthur, akaswili ankhala omasulila volembewa pa miyala vinyinji va ku Perisiya. Iyakine mwa miyala yamene iyi eifwana mmatongwe a ng’anda yosungilamo vinthu pafupi na mpanda wa tauni. Miyala yamene iyi ilembewa pa nthawe ya Sasta Woyamba. Volembewa vamene ivi venze m’chilaŵilo cha Chielami ndipo vili na mazina ayakine opezeka m’buku ya Esitere.
Miyala iyakine yunena za zina ya Marduka, wamene enze mulembi ku ng’anda yachifumu ku Susani pa nthawe ya ulamulilo wa Sasta Woyamba. Mwala uyakine unena kuti Marduka enze womasulila. Vamene ivi vukatijana na vayunena Baibolo vokhuza Moredekai. Yove enze munthu waudindo mu khoti ya Mfumu Ahasiwero (Sasta Woyamba) ndipo enzelaŵila vilaŵilo vopitilila viŵili. Kanyinji-kanyinji, Moredekai enzenkhala pagedi ku ng’anda yachifumu ku Susani. (Est 2:19, 21; 3:3) Pa gedi yamene iyi penze ng’anda mwenzekatila ntchito ŵanthu audindo pa ng’anda yamene iyi yachifumu.
Penze kulingana kochitisha chidwi pakati pa Marduka otomolewa pa miyala yamene iyi na Moredekai otomolewa m’Baibolo. Ove enkhala na moyo pa nthawe yolingana na pamalo olingana komasoti enzekata ntchito pa maudindo olingana. Kulingana kwamene uku kuwonesha kuti vechifwana ofukula vinthu vakale vingankhale kuti vunena za Moredekai otomolewa m’buku ya Esitere.
SEKUTEMBA 11-17
CHUMA CHUPEZEKA M’MAWU A MULUNGU | ESITERE 3-5
“Mukoyavya ayakine kuti akochita vonse vangakwanishe”
Insight-2 pedji 431 ndim. 7
Moredekai
Ekana kugwadila Hamani. Pavuli pake, Hamani Mwagagi eikiwa kunkhala nduna ikulu na mfumu Ahasiwero, ndipo elamula kuti onse onkhala pa muliyango wa mpanda wa mfumu agwade pamenso pa Hamani pafupi na malo ŵake okwezeka. Moredekai ekana motang’a ntima kuchita vamene ivo, ndipo yove enena kuti enze Myuda. (Est 3:1–4) Pokana kuchilikiza vofuna va Hamani, Moredekai ewonesha kuti enzefunalini kuwononga ushamwali wake na Yehova Mulungu, monga Myuda wolipeleka. Yove enzeziŵa kuti kugwada pamenso pa Hamani kwenze pamikijapo vinyinji, kupambana kugwadila munthu waudindo wapalulu monga nimwenzechitila Aisiraeli. (2Sa 14:4; 18:28; 1Mf 1:16) Pankhani ya Hamani penze chifukwa chomvwika chamene chechitisha kuti Moredekai osati amugwadile. Vuwoneka kuti Hamani enze Mwamaleki, ndipo Yehova enena kuti azalimbane na ntundu wa Aamaleki “ku mibadwo-mibadwo yawo.” (Eks 17:16) Moredekai echita vamene ivo chifukwa chakukhulupilika kwake kwa Mulungu osati chifukwa cholimbilana udindo na Hamani.
Insight-2 pedji 431 ndim. 9
Moredekai
Emukatishila ntchito populumusha Aisiraeli. Peipelekewa lamulo yakuti Ayuda onse mu ufumu wamene uyo apaiwe, Moredekai ewonesha kuti enzekhulupilila kuti Esitere wapasiwa ulemu wonkhala mfumukazi pa nthawe yamene iyo, kuti apulumushe Ayuda. Moredekai ekumbusha Esitere za kukula kwa udindo wenze nawo, ndipo emulangiza kuti akaipapatile mfumu kuti iŵawamile ntima, komasoti kuti iŵayavye. Olo kuti vamene ivi sembe veika moyo wake pangozi, Esitere evomela kukonkheja malangizo amene awo.—Est 4:7–5:2.
Tsanzirani pedji 133 ndim. 22-23
Epanamila ŵanthu a Mulungu
22 Vuwoneka kuti Esitere echita wowa ngako pechimvwa vamene ivo. Pamene apa chikhulupililo chake chiyesewa ngako. Vechiyankha Esitere viwonesha kuti enze na wowa ngako. Yove ekumbusha Moredekai za lamulo yolesha kuyawonekela pamenso pa mfumu ikaliye kuita. Munthu akafwaya lamulo yamene iyo enzepaiwa. Yove enzepulumuka peka-peka keno mfumu yamulata na ndodo yake yagolide. Ndipo akaganizila vechitikila Vasiti pechikana kuyawonekela pamenso pa mfumu, Esitere enzewona kuti olo kuti yove enze mwanakazi wa mfumu, payakine mfumu ingamuchitile lini chifundo. Esitere euja Moredekai kuti penze pepita masiku 30 akaliye itiwa kuyawonekela pamenso pa mfumu. Vamene ivi vechitisha Esitere kuyamba kukaikila kuti mfumu yamene iyo, yamene yenzechelwalini kukalipa keno yenze ikali mukonda.—Est 4:9-11.
23 Moredekai eyankhasoti Esitere na mawu amphamvu kuti chikhulupiriro chake chitang’e. Emusimikijila kuti keno yove angachitepolini kanthu mokulumija chipulumuso cha Ayuda chifumile kuyakine. Koma kansi Esitere sembe epulumuka kuti lamulo yakuti Ayuda apaiwe iyamba kukata ntchito? Pa nthawe yamene iyo Moredekai ewonesha kuti enzekhulupilila ngako Yehova, wamene angalolelini kuti ŵanthu ŵake onse awonongewe kapena kulola kuti malonjezo ŵake osati akwanilishiwe. (Yos 23:14) Pavuli pake Moredekai ekonsha Esitere kuti: “Niŵani oziŵa? Payakine wewo wankhala mfumukazi kuti uyavye pa nthawe monga ni yamene iyi.” (Est 4:12-14) Moredekai enzekhulupilila Yehova Mulungu na ntima wonse. Kansi sewo nase tuchita tetyo?—Miy 3:5, 6.
Kusakila-sakila Mfundo zingatiyavye
Ufumu wa Mulungu pedji 160 ndim. 14
Kuniyatila ufulu wasu wolambila
14 Molingana na Esitere na Moredekai, atumiki a Yehova amasiku ŵano oniyatila ufulu wolambila Yehova mu njila yechitilamula. (Est 4:13-16) Kansi namwe mungayavyeko poniyatila ufulu wamene uyu? Eye. Mwewo mungopemphelela abale na alongo moweleja-weleja amene otamana chifukwa cha malamulo amene ali mu chalo chawo. Mapemphelo otetyo angankhale oyavya ngako kuli abale na alongo amene okumana na chinzunzo. (Ŵelengani Yakobo 5:16.) Koma kansi Yehova oyankha mapemphelo otetyo? Milandu yamene yatankhala tuwina yuwonesha kuti Yehova oyankha chendi mapemphelo amene aŵa.—Ahe 13:18, 19.
SEKUTEMBA 18-24
CHUMA CHUPEZEKA M’MAWU A MULUNGU | ESITERE 6-8
“Vatingachite kuti tikolaŵijana luweme na ŵanthu ayakine”
Tsanzirani pedji 140 ndim. 15-16
Echita vinthu mwanzelu, motang’a ntima, komasoti molipeleka
15 Chifukwa chakuti Esitere eyembekezelasoti nsiku iyakine, akaliyeiuja mfumu yamene iyo pempho yake, vichitisha kuti Hamani achite vinthu vamene vimuletela mavuto. Vingachitike kuti Yehova Mulungu niye enzechitisha kuti mfumu yamene iyo ilekeyona tulo. (Miy 21:1) N’chifukwa chake Mawu a Mulungu otilimbikisa kupitilija ‘kuyembekezela moleza mtima!’ (Ŵelengani Mika 7:7.) Keno tuyembekezela Mulungu kuti atiyavye pamavuto ŵasu, tizawone kuti yove ofwana njila iweme yosilijila mavuto ŵasu kupambana yatingakonkheje sewo.
Elaŵila montang’a ntima
16 Esitere ewona kuti n’viwemelini kuti mfumu ikoingoyembekezela kuti aiuje votyani. Tetyo, paphwando yokonkhapo yove ewona kuti ofunikila kuifotokozela vonse mwavilili. Lomba kansi sembe eyambila pani? Mwamwayi, mfumu yamene iyo imusengasoti kuti aifotokozele pempho yake. (Est 7:2) Esitere ewona kuti yamene iyi ni ‘nthawe iweme yolaŵila.’
Tsanzirani pedji 140 ndim. 17
Echita vinthu mwanzelu, motang’a ntima, komasoti molipeleka
17 Vuwoneka kuti Esitere epemphela chamuntima kuli Mulungu wake akaliye uja mfumu mawu akuti: “Keno munganiwamile ntima mfumu, komasoti keno vingakuwamileni, nusenga kuti mupulumushe moyo wangu komasoti kuti osati muwononge ŵanthu a ntundu wangu.” (Est 7:3) Esitere ewonesha kuti enzelemekeza vaingalaŵile mfumu mokatijana na vaingawone kuti n’viweme. Vechichita Esitere viwoneshelatu kuti yove enze wosiyana ngako na Vasiti, mwanakazi woyamba wa mfumu, wamene emvwisha nsoni mfumu mwalona. (Est 1:10–12) Ndipo, Esitere aliyenyoze mfumu, chifukwa chokhulupilila vinthu vawenye vechiujiwa na Hamani. Mmalomwake, esenga mfumu yamene iyo kuti imuteteze kuti osati apaiwe.
Tsanzirani pedji 141 ndim. 18-19
Echita vinthu mwanzelu, motang’a ntima, komasoti molipeleka
18 Pempho ya Esitere idabwisha ngako mfumu, ndipo yove iwona kuti yufunika kuchitapo chendi kanthu. Ndipo paliye mwanalume wamene angalekelele kuti mwanakazi wake apaiwe. Esitere epitilija kufotokoza kuti: “Newo pamozi na ŵanthu a ntundu wangu tagulisiwa kuti tiwonongewe, tipaiwe na kufafaniziwa. Kuti tenze tagulisiwa kuti tikankhale akapolo analume na akapolo anakazi sembe nankhala chelele. Koma osati mulole kuti soka yamene iyi ichitike chifukwa iwonongeshe vinthu vinyinji va mfumu” (Est 7:4) Onani kuti Esitere efotokoza vokhuza chiwembu chamene icho momvwika luweme, koma enenasoti kuti sembe ove ankhala akapolo tyala yove sembe aliyedandaule chilichonse. Komasoti kupaya ntundu wonse wamene uyo sembe kwikhudza soti mfumu, n’chifukwa chake yove enzewona kuti vingankhalelini luweme kuti ankhale chelele.
19 Chisanzo cha Esitere chutiphunzisa njila iweme yatingafotokozele maganizo ŵasu mokata ntima. Keno mufuna kufotokoza vuto iyakine kuli munthu wamukonda komasoti waudindo, kuchita vinthu mwaulemu komasoti kufotokoza vuto yamene iyo mosapita mbali kungakuyavyeni ngako.—Miy 16:21, 23.
Kusakila-sakila Mfundo zingatiyavye
Nsanja ya Mulonda 15/03/2006 pedji 11 ndim. 1
Mfundo zikulu-zikulu za m’buku ya Esitere
7:4—Kansi kuwonongewa kwa Ayuda sembe kwiwonongesha tyani ‘vinthu va mfumu’? Mfumu sembe ivutika kuti Ayuda egulisiwa nonkhala akapolo. Esitere efotokoza mwaingakhuziliwe mfumu chifukwa cha kuwonongewa kwawo. Ndalama zasiliva zokwana 10.000 zechilonjeza Hamani, zenzeve pindu polinganija na chuma cha mfumu, chamene sembe chipezeka kuti Hamani ekonza chiwebu chogulisa Ayuda kunkhala akapolo. Kuti chiwembu cha Hamani chamene icho chikwanishika, sembe mfumu iluza mwanakazi wake.
SEKUTEMBA 25–OKUTOBA 1
CHUMA CHUPEZEKA M’MAWU A MULUNGU | ESITERE 9-10
“Ekatishila ntchito ulamulilo wake kuti ayavye ŵanthu ayakine”
Insight-2 pedji 432 ndim. 2
Moredekai
Moredekai eloŵa mmalo mwa Hamani monga nduna ikulu, ndipo epasiwa mphete yodindila kuti akodindila vipepa. Esitere eika Moredekai kunkhala wololela ng’anda ya Hamani yamene yechipasiwa na mfumu. Pavuli pake Moredekai ekatishila ntchito chilolezo cha mfumu poshusha lamulo yechipeleka Hamani yolesha Ayuda kunkhala na ufulu wolitetezela. Kuwombolewa kwamene uku kwiŵaletela chisangalalo Ayuda. Ŵanthu anyinji mu ufumu wa Perisiya eyamba kukatijana na Ayuda, ndipo mwezi wa Adala 13 pewifwika kuti lamulo iyambe kukata ntchito Ayuda enze okonzeka. Akulu-akulu aboma enkhala kumbali yawo chifukwa cha udindo wenze nawo Moredekai. Kuniyatana kwamene uko kwipitilila mpaka nsiku yokonkhapo. Adani opitilila 75.000 a Ayuda mu ufumu wa Perisiya ewonongewa, kupamikijapo ŵana 10 ŵa Hamani. (Est 8:1–9:18) Esitere pechisimikijila, Moredekai elamula ŵanthu onse kuti akochita chikondwelelo chapachaka pa nsiku ya 14 na 15 ya mwezi wa Adala, chochitika chamene icho chuitiwa kuti “chikondwelelo cha Purimu,” chifukwa chosangalala na phwando yamene iyo, ove enzepasana mphaso muyake na muyake kupamikijapo osauka. Ayuda evomela kuchita vamene ivo ndipo elamula soti ŵana ŵawo na onse ŵenzechita nawo chikondwelelo chamene icho. Monga wachiŵili wa mfumu, Moredekai enzelemekezewa na Ayuda amene enze olipeleka kwa Mulungu, ndipo yove epitilija kuŵachitila viweme.—Est 9:19-22, 27-32; 10:2, 3.
Insight-2 pedji 716 ndim. 5
Chikondwelelo cha Purimu
Cholinga. Chikondwelelo cha Purimu chamene chenzekondwelela Ayuda, ŵano masiku chuziŵika ngako monga miyambo yachikunja kupambana nkhalidwe ya chipembezo, ndipo nthawe ziyakine ingalingane ngako. Umu niyelini mwevenzele pa nthawe yoyamba yechinkhazikishiwa. Moredekai na Esitere, enze atumiki a Mulungu wachendi Yehova, ndipo chikondwelelo chamene icho chinkhazikishiwa kuti chikolemekeza Yehova. Kupulumushiwa kwa Ayuda kwilemekeza Yehova Mulungu, ndipo nkhani yamene iyo ichitika chifukwa cha kukhulupilika kwa Moredekai pankhani yolambila Yehova yeka. Vuwoneka kuti Hamani enze Mwamaleki ntundu wechitembelela Yehova kuti uwonongewe, Moredekai emvwila lamulo ya Mulungu ndipo aliye vomele kugwadila Hamani. (Est 3:2, 5; Eks 17:14-16) Komasoti, mawu ŵechiuja Esitere (Est 4:14) ewonesha kuti yove enzesakila thandizo kuli munthu wamphamvu ngako kuti apulumushe Ayuda, ndipo kuleka kulya kwa Esitere akaliyeluta kuyawonekela kwa mfumu, noiitila ku phwando, viwonesha kupapatila kwake Mulungu posenga nthandizo.—Est 4:16.
Yandikirani pedji 101-102 ndim. 12-13
“Mukokonkheja Mulungu” pokatishila ntchito mphanvu zanu
12 Yehova wapeleka akulu kuti akosogolela mipingo ya Chikhilisitu. (Ahe 13:17) Analume osogolela amene aŵa ofunika kukatishila ntchito udindo wapasiwa na Mulungu poyavya gulu ya mbelele komasoti kuchitisha mbelele zamene izo kunkhala na moyo uweme. Kansi udindo wamene uyo uŵapasa ufulu wochita ulamulilo kuli okhulupilila ayawo? Yayi olo patontho! Akulu ofunika kuwona ntchito yalinayo mumpingo mosamala ngako komasoti molichefya. (1Pe 5:2, 3) Baibolo yulimbikisa opanamila kuti: “Ŵetelani mpingo wa Mulungu, wamene eugula na milopa ya Mwana wake ngaye-ngaye.” (Mac 20:28) Chamene ichi niye chifukwa chikulu ngako chuŵachitisha kuti akochita vinthu mowama ntima na mbelele iliyonse payeka mu gulu yamene iyo.
13 Mwachisanzo, tiyelekezele kuti shamwali wanu wapantima wakusengani kuti mumusungile katundu wantengo wapatali. Mwewo muziŵa kuti shamwali wanu wamene uyo eulipila modula ngako katundu wamene uyo. Kansi mungausungelini mosamala ngako kuti osati uwonongeke? Molingana na vamene ivi, Mulungu wapasa akulu udindo wosamalila katundu wantengo wapatali ngako wamene ni mpingo na ŵanthu ŵake amene olinganijiwa na mbelele. (Yoh 21:16, 17) Yehova okonda ngako mbelele zake; mwakuti ezigula na milopa ya ntengo wapatali ya Mwana wake wovyalika yeka, Yesu Khilisitu. Kwenzeve soti ntengo uyakine wodula ngako kupambana wamene uyu, wamene Yehova sembe elipilila mbelele zake. Akulu olichefya okumbukila vamene ivi ndipo osamalila mbelele za Yehova molichefya.
Kusakila-sakila Mfundo zingatiyavye
Nsanja ya Mulonda 01/03/2006 pedji 11 ndim. 4
Mfundo zikulu-zikulu za m’buku ya Esitere
9:10, 15, 16—Olo kuti lamulo ivomeleja kutola vinthu vutolewa ku nkhondo, ndaŵa yanji Ayuda aliyechite vamene ivo? Kukana kwawo kwiwonesha kuti ove enzengofuna tyala kulitetezela osati kutchuka.
OKUTOBA 2-8
CHUMA CHUPEZEKA M’MAWU A MULUNGU | YOBU 1-3
“Pitilijani kuwonesha kukula kwa chikondi chanu pa Yehova”
Nsanja ya Mulonda 02/2018 pedji 6 ndim. 16-17
Konkhejani chikhulupililo na kumvwila kwa Nowa, Daniel, komasoti Yobu
16 Mavuto ŵechikumana nawo Yobu. Vinthu vinyinji vechinja pa moyo wa Yobu. Yove akaliye kumana na mayeselo, enze “munthu wolemekezeka ngako kuli ŵanthu onse a m’dela yamene iyo.” (Yob 1:3) Yobu enze wolemera, wotchuka komasoti ŵanthu anyinji enzemulemekeza. (Yob 29:7–16) Olo kuti venze tetyo, yove enzeliwonalini kunkhala wapalulu ngako olo kuliwona kuti enzefunikilalini thandizo ya Mulungu. Tetyo, Yehova eita Yobu kuti “ntumiki wangu” ndipo yove enena kuti: “Yobu ni munthu aliye chophoniya, wowongoka ntima, woyopa Mulungu, komasoti wopewa viipa.”—Yob 1:8.
17 Tetyo, munthawe itontho tyala vinthu pa moyo wa Yobu vichinjilatu. Katundu wake wonse ewonongeka, ndipo yove ekalipa ngako mwakuti enzelaka-laka kufwa. Tuziŵa kuti Satana niye eyambisha vonse vamene ivi, pa nthawe yechitala wenye wakuti Yobu enzelambila Mulungu na cholinga chakuti afwane pindu. (Ŵelengani Yobu 1:9, 10.) Yehova aliye nyalanyaze vechilaŵila Satana. Koma epeleka mwayi kuli Yobu kuti awoneshe kuti enzemutumikila chifukwa chomukonda na ntima wonse, osati chifukwa chakuti afwane pindu.
Nsanja ya Mulonda 02/2019 pedji 5 ndim. 10
Pitilijani kunkhala na ntima wosayaŵanika!
10 Satana oshushasoti zakuti aliyense wa sewo angapitilije kunkhala na ntima wosayaŵanika. Kansi vamene ivi vukukhuzani tyani mwewo? Keno mukhulupilila vakulaŵila Satana kuti mukondalini ngako Yehova Mulungu, muzafoke mukezekumana na chiyeso, ndipo muzaleke kunkhala na ntima wosayaŵanika. (Yob 2:4, 5; Chv 12:10) Kansi mukumvwa tyani mukakumbukila vamene ivi? N’vowonekelatu kuti mukhumudwa navo. Koma kumbukilani mfundo iyi: Yehova okukhulupililani ngako mwakuti olola kuti Satana akuyeseni. Yove oziŵa kuti muzapitilije mphela kunkhala na ntima wosayaŵanika ndipo muzawoneshe kuti Satana ni wawenye. Komasoti Yehova olonjeza kuti azakuyavyeni kuchita vamene ivi. (Ahe 13:6) Kulaŵila chendi, ni mwayi ukulu ngako kuziŵa kuti Yehova otikhulupilila teti. Vili tetyo chifukwa tuwonesha kuti Satana ni wawenye, tulemekeza zina iweme ya Atata ŵasu, komasoti tuwonesha kuti tili kumbali ya ulamuliro wake. Koma kansi n’chinji chingatiyavye kunkhala na ntima wosayaŵanika?
Kusakila-sakila Mfundo zingatiyavye
Nsanja yophunzila 04.2021 pedji 11 ndim. 9
Vatuphunzila pa mawu osilijila a Yesu
9 Kansi Yesu elaŵila chinji? Wasala patontho kufwa, Yesu eŵilikija kuti: “Mulungu wangu, Mulungu wangu, mwanisiilanji newo?” (Mt 27:46) Baibolo yufotokozalini chifukwa chechilaŵilila mawu amene aŵa Yesu. Tetyo, ganizilani vatingaphunzile kufumila pa mawu amene aŵa. Chinthu chimozi chatuphunzilapo ni chakuti, polaŵila mawu amene aŵa, Yesu enzekwanilisha ulosi wamene upezeka pa lemba ya Salimo 22:1. Komasoti, mawu amene aŵa ewonesha luweme kuti Yehova ‘aliye muchingilije’ Mwana wake. (Yob 1:10) Yesu emvwisha kuti Atata ŵake enzelekelela kuti ŵala enzemuzonda ayese chikhulupililo chake chonse mpaka kufwa. Paliye munthu aliyense wamene eyesewapo kale monga ni Yesu. Kuyangijila pali vamene ivi, mawu amene aŵa esimikijila kuti yove aliyechite mulandu uliwonse wofunikila kufwa.
OKUTOBA 9-15
CHUMA CHUPEZEKA M’MAWU A MULUNGU | YOBU 4-5
“Chenjelani na nkhani za wenye”
Insight-1 pedji 713 ndim. 11
Elifazi
2. Mmozi wa ayake atatu a Yobu. (Yob 2:11) Mwanalume waku Temani, wamene payakine enze mbadwa yoyamba ya Abulahamu komasoti enze mkwake wa Yobu. Yove pamozi na mbadwa zake elilemekeza chifukwa cha nzelu zawo. (Yer 49:7) Pa ayake atatu amene “enzemulimbikisa,” Elifazi niye enze munthu wofunika ngako komasoti wamphamvu, ndipo vuwonesha kuti yove niye enze nkulu. Yove niye enzeyamba kulaŵila penzekangana na ayake, ndipo enzelaŵila mfundo zomvwika.
Nsanja ya Mulonda 15/09/2005 pedji 26 ndim. 2
Pewani maganizo ophoniyeka!
Elifazi penzekumbukira mensomphenya odabwisa ŵechiwona nthawe iyakine, yove enena kuti: “Pamenso pangu pepita nzimu, ndipo sisi ya mmutu mwangu iyamba kukweŵa-kweŵa.” (Yob 4:15, 16) Kansi ni mzimu wotyani wamene wemusokoneza maganizo Elifazi? Mawu osalimbikisa ŵechinena pavuli polaŵila vamene ivi, ewonesha kuti mzimu wamene uyo wenzelini wofumila kwa Mulungu. (Yob 4:17, 18) Koma mzimu wamene uyo wenze chiŵanda. N’chifukwa chake Yehova ezuzula Elifazi na ayake aŵili kuti alaŵila vinthu vawenye. (Yob 42:7) N’chendi, Elifazi enze esokonezewa maganizo na viŵanda. Ndipo mawu ŵechifotokoza ewonesha kuti enzelini magaizo a Mulungu.
Nsanja ya Mulonda 15/02/2010 pedji 19 ndim. 5-6
Pewani nkhani za wenye za Satana
Satana ekatishila ntchito Elifazi, na ayake atatu amene eluta kwa Yobu, kuyalaŵila nkhani yawenye yakuti munthu angankhalelini wotang’a keno oyesewa. Ove enena kuti munthu ni ‘wofumila ku lito,’ ndipo ewuja soti Yobu kuti: “Maziko ŵawo ali mu lito. Ove angothufyuliwa monga ni abemphenwa. Kufumila m’mawa mpaka n’chingulo owonongeka kosasila, paliye munthu wamene okhuziwa navo.”—Yob 4:19, 20.
Malemba ayakine olinganija ŵanthu na “voumbiwa na lito” vamene vuchelwalini kufwaika. (2Ak 4:7) N’chendi kuti uchimo wetitolela kuli makolo ŵasu oyambilila komasoti kusoŵa ungwilo, vutichitisha kuti tikonkhala ofoka. (Aro 5:12) Mwakuti paseka tingakwanishelini kulimbana na Satana. Koma pakuti nise Akhilisitu, Yehova otiyavya. Olo kuti tili na vofoka nise antengo wapatali ngako pamenso pa Mulungu. (Yes 43:4) Komasoti Yehova opeleka mzimu utuŵa kuli ŵala amene omusenga. (Lu 11:13) Mzimu wake ungakwanishe kutipasa “mphamvu kupambana zovyalika nazo,” zamene zingatiyavye kulimbana na mavuto aliwonse amene Satana ŵakutiletela. (2Ak 4:7; Afi 4:13) Tikoyeja-yeja kulimbana na Mdyelekezi, nonkhala “otang’a m’chikhulupililo,” Mulungu angatitang’ishe nonkhala amphamvu. (1Pe 5:8-10) Tetyo, tufunikalini kumuyopa Satana Mdyerekezi.
Kusakila-sakila Mfundo zingatiyavye
Nsanja ya Mulonda 15/05/2003 pedji 22 ndim. 5-6
Nkhalani osanyang’anyika kuti mupambane pa mpikishano waku moyo
Kunkhala mu gulu yapachalo chonse ya Akhilisitu achendi, kungatilimbikise ngako. Ni daliso ikulu kunkhala pakati pa abale achikondi apachalo chonse monga ni amene aŵa! (1Pe 2:17) Tetyo, olo sewo nase tingakwanishe kulimbikisa Akhilisitu ayasu.
Ganizilani ntchito zoyavya ŵanthu zamene munthu wolungama Yobu zenzechita. Olo Elifazi wamene enze otonthoja wawenye evomekeleja kuti: “Mawu ŵako eyavya ŵala amene enzefuna kupona, ndipo walimbikisasoti wa nkhokola ziliye mphamvu.” (Yob 4:4) Kansi sewo nase tuyavya soti ayasu? Aliyense wa sewo ali na udindo woyavya abale na alongo ŵasu auzimu kuti akokwanisha kupilila potumikila Mulungu. Keno tuchita nawo vinthu pamozi, tikochita mokatijana na maŵu aŵa akuti: “Tang’ishani manja aliye mphamvu komasoti tang’ishani nkhokola zogwendela.” (Yes 35:3) Tetyo, tyani kunkhalako na cholinga chotang’ishako Akhilisitu ayanu mmozi yeka olo aŵili nthawe iliyonse mukakumana? (Ahe 10:24, 25) Mawu otang’isha komasoti oŵatembeja chifukwa chopitilija mphela kukondwelesha Yehova, angaŵayavye kuti ankhale otang’a komasoti kuti azapambane pa mpikishano waku moyo.
OKUTOBA 16-22
CHUMA CHUPEZEKA M’MAWU A MULUNGU | YOBU 6-7
“Keno muwona kuti moyo wanu ni wovuta ngako kuupilila”
Nsanja ya Mulonda 15/03/2006 pedji 14 ndim. 10
Mfundo zikulu-zikulu za m’buku ya Yobu
7:1; 14:14—Kansi mawu akuti “ntchito yokakamija” otanthauza chinji? Yobu enze etamana ngako mwakuti moyo wake enzengouwona monga ni ntchito yokakamija. (Yob 10:17) Pakuti munthu onkhalalini mmanda mwakufuna kwake—kufumila pa nthawe yawamwalila kuyafwika pa nthawe yakuti azaushiwe,—Yobu eiyelekezela na ntchito yochita kakamijiwa.
Nsanja ya Mulonda 12/2020 pedji 16 ndim. 1
“Yehova . . . opulumusha ŵanthu ofwaika ntima”
Moyo wasu, ni ufupi komasoti ni “wozula na masauso.” (Yob 14:1) Vamene ivi vuchitisha kuti nthawe ziyakine tikonkhala achisoni. Mmasiku akuvuli atumiki ayakine a Yehova vamene ivi viŵachitikila soti. Mwakuti ayakine efwika powona kuti vingankhale luweme kufwa. (1Mf 19:2-4; Yob 3:1-3, 11; 7:15, 16) Koma nthawe zonse Yehova—wamene wenzekhulupilila—enzeŵatang’isha komasoti kuŵapasa mphamvu. Nkhani za ŵanthu amene aŵa zilembewa kuti zikotilimbikisa komasoti kutilangiza.—Aro 15:4.
Ukani! 01/2012 pedji 16-17
Kansi mungachite tyani mukankhala na maganizo ofuna kulipaya?
Olo kuti mungowona kuti mavuto amene ŵamukumana nawo ni osapililika, mukokumbukila kuti ni mwewo mweka lini amene mukumana na mavuto, ndipo pafupi-fupi aliyense olimbana na vuto iyakine. Baibolo yunena kuti: “Chilengedwe chonse chumimila pamozi na kumvwa voŵaŵa mpaka pano.” (Aro 8:22) Olo kuti palipano mwewo mungowona kuti mavuto ŵanu amene awo azasilelini, chendi chake n’chakuti vinthu vuchinja pakapita nthawe. Lomba kansi palipano mufunikila kuchita chinji?
Mukoujako muyanu wamudalila za mavuto ŵamukumana nawo. Baibolo yunena kuti: “Shamwali ngaye-ngaye okukonda nthawe zonse, ndipo yove ni m’bale wamene evyalikila kuti akuyavye pakawoneka mavuto.” (Miy 17:17) Baibolo yuwonesha kuti Yobu, wamene enze munthu wokhulupilika enzeujako ayake za mavuto ŵake. Pa nthawe yamene yove ‘enzenyansiwa na moyo wake’ Yobu enena kuti: “Nilaŵile mwamphamvu vokhuza nkhaŵa zangu. Nilaŵile chifukwa cha kuŵaŵa kwa moyo wangu.” (Yob 10:1) Mukaujako ŵanthu ayakine za mavuto ŵanu, mumvwako luweme ndipo vingakuyavyeni kuti muyambe kuwona mavuto ŵanu amene awo mwanjila iyakine.
Mukopemphela kwa Yehova. Ŵanthu ayakine oganiza kuti pemphelo ingoyavya tyala ŵanthu kumvwako luweme patontho, koma Baibolo yufotokoza vosiyana na vamene ivo. Lemba ya Salimo 65:2 yunena kuti Yehova ni Mulungu “Wakumvwa pemphelo,” komasoti lemba ya 1 Petulo 5:7 yunena kuti: “Okudelani nkhaŵa.” Baibolo yunena moweleja-weleja za kufunika kodalila Mulungu. Wonani malemba aŵa okonkhapo:
“Khulupilila Yehova na ntima wako wonse, soti osadalila luso yako yomvwisha vinthu. Ukom’kumbukila m’jila zako zonse, tetyo yove azayondolole njila zako.”—MIYAMBO 3:5, 6.
“Soti ŵanthu omuyopa [Yehova] akaŵachitile vofuna vawo, akamvwe kulila kwawo kosenga thandizo ndipo akaŵapulumushe.”—SALIMO 145:19.
“Ndipo ichi nichikhulupililo chatili nacho muli yove, viliye kanthu kuti tumusenga vinthu votyani mokatijana na chifunilo chake, otimvwa.”—1 YOHANE 5:14.
“Yehova onkhala kutali na ŵanthu aipa, koma yove akumvwa pemphelo ya ŵanthu olungama.”—MIYAMBO 15:29.
Mukomuuja Mulungu mavuto ŵamukumana nawo, yove azakuyavyeni. N’chifukwa chake Baibolo yutilimbikisa kuti “mukhulupilileni nthawe zonse. . . . Mukhutulileni vili mu ntima mwanu.”—SALIMO 62:8.
Kusakila-sakila Mfundo zingatiyavye
Nsanja ya Mulonda 04/2020 pedji 16 ndim. 10
Tikomvwishila ayakine, kuŵaziŵa luweme, komasoti kuŵachitila chifundo
10 Sewo nase tufunikila kukonkheja Yehova poyeja-yeja kuŵamvwisha luweme ayasu. Tikoyeja-yeja kuti tiŵaziŵe luweme abale na alongo ŵasu. Tikotandala nawo misonkhano ikaliyeyamba komasoti ikasila, tikoluta nawo muutumiki, ndipo keno n’vokwanishika tikoŵaita kuti tizalye nawo chakulya. Mukachita tetyo payakine muzadabwe kuwona kuti mulongo wamene owoneka kuti okondalini kutandala na ayake ali na vuto ya nsoni, m’bale wamene owoneka monga okonda ndalama ali na ntima wolondela alwendo, komasoti banja yamene yufwika mochelwa pamisonkhano yushushiwa. (Yob 6:29) N’chendi kuti tufunikila kupewa ‘kuloŵelela nkhani za ŵanthu ayakine.’ (1Ti 5:13) Koma vingankhale luweme kuziŵa vinthu viyakine vokhuza abale na alongo ŵasu komasoti vinthu viyakine vakukumana navo pa moyo wawo.
OKUTOBA 23-29
CHUMA CHUPEZEKA M’MAWU A MULUNGU | YOBU 8-10
“Chikondi chokhulupilika cha Mulungu chutiteteza ku wenye wa Satana”
Nsanja ya Mulonda 01/07/2015 pedji 12 ndim. 3
Kansi sewo taŵanthu tingamukondweleshe chendi Mulungu?
Yobu ekumana na mavuto anyinji mokonkhejana-konkhejana, ndipo mavuto amene awo enzewoneka monga kuti yove enzefunikila lini kukumana nawo. Vamene ivi vimuchitisha kuti aganize mophoniyeka nowona kuti Mulungu aliye navo ntchito vakuti yove ni munthu wokhulupilika. (Yob 9:20-22) Yobu enzeliwona kuti ni munthu wolungama ngako mwakuti ŵanthu ayakine enzeganiza kuti Yobu wamene uyo enze wolungama ngako kupambana Mulungu.—Yob 32:1, 2; 35:1, 2.
Nsanja yophunzila 11/2021 pedji 6 ndim. 14
Kansi chikondi chokhulupilika cha Yehova chutanthauza chinji kuli mwewo?
14 Kuwama ntima kosasila kwa Mulungu kutiteteza mwauzimu. Popemphela kwa Yehova, Davide eyamba na mawu akuti: “Nimwe malo ŵangu ofisamamo, muzaniteteze ku masauso. Muzachitishe kuti chisangalalo chinizenguluke pamunipulumusha. . . . Munthu okhulupilila Yehova ozengulukiwa na kuwama ntima kosasila.” (Sl 32:7, 10) Kale, matauni enzenkhala ozengulukiwa na mipanda yamene yenzeteteza ŵanthu kuli adani ŵawo. Molingana na vamene ivi, kuwama ntima kosasila kwa Yehova kuli monga ni mpanda wamene utiteteza ku chinthu chilichonse chamene chingawononge ushamwali wasu na yove. Kuyangijila pamene apo, kuwama ntima kosasila kwa Yehova kumuchitisha kuti atidonsele kuli yove.—Yer 31:3.
Kusakila-sakila Mfundo zingatiyavye
Nsanja ya Mulonda 15/10/2010 pedji 6-7 ndim. 19-20
“Niŵani oziŵa maganizo a Yehova?”
19 Kansi taphunzila chinji pa nkhani ya “maganizo a Yehova”? Sewo tufunikila kulola kuti Mawu a Mulungu akotiyavya kuziŵa luweme maganizo a Yehova. Pakuti sewo taŵanthu tuziŵalini vinyinji, tufunikila lini kuweluza Yehova mokatijana na mfundo komasoti maganizo ŵatuyendela. Yobu enena kuti: “[Mulungu] ni munthu lini monga newo kuti nimuyankhe, kapena kuti nimuimbe mulandu.” (Yob 9:32) Molingana na Yobu, sewo tikayamba kuŵaziŵa luweme maganizo a Yehova tizaŵilikije kuti: “Vamene ivi nikambali katontho tyala ka vochita vake, ndipo tikumvwa tyala kuŵeleŵesha kwapansi-pansi kwa mawu ŵake. Koma kansi kugunda kwake kwamphamvu, niŵani angakumvwishe?”—Yob 26:14.
20 Tikoŵelenga Malemba, kansi tufunikila kuchita tyani keno tafwana nkhani iyakine yovuta kuimvwisha maka-maka yokhuza mwakuganizila Yehova? Keno tafufuza nkhani yamene iyo ndipo tiliyefwane yankho yomvwika luweme, tufunikila kuwona kuti wamene uyo nimwayi wasu wowonesha kuti tukhulupilila ngako Yehova. Tikokumbukila kuti Yehova ali na minkhalidwe iweme. Tiyeni tinkhale olichefya novomeleja kuti tingamvwishelini vochita vake vonse. (Mla 11:5) Vamene ivi vizatiyavye kuyamikija mawu a ntumwi Paulo akuti: “N’chendi, madaliso ŵakupeleka Mulungu ni anyinji ngako. Nzelu zake n’zonoka, komasoti yove oziŵa ngako vinthu. Viweluzo vake ni vosasanthulika, ndipo ni ŵani angaziŵe njila zake? Pakuti “niŵani oziŵa maganizo a Yehova, kapena niŵani angankhale mulangizi wake?” Kapena soti, “Niŵani wamene emupasako kale kanthu kuti yove amuwejele?” Chifukwa vinthu vonse vufumila kuli yove ndipo yove niye evipanga komasoti ni vake. Ulemelelo unkhale wake mpaka kale-kale. Ame.”—Aro 11:33-36.
OKUTOBA 30–NOVEMBA 5
CHUMA CHUPEZEKA M’MAWU A MULUNGU | YOBU 11-12
“Njila zitatu zatingafwanile nzelu nopindula nazo”
Nsanja ya Mulonda 15/04/2009 pedji 6 ndim. 17
Yobu elemekeza zina ya Yehova
17 Kansi n’chinji chimuyavya Yobu kuti apitilije kunkhala na ntima wosayaŵanika? N‘voziŵikilatu kuti yove enze etang’ishilatu ushamwali wake na Yehova akaliye kumana na masoka. Olo kuti tiliye umboni wamene uwonesha kuti Yobu enzeziŵa kuti Satana enzemushusha Yehova ponena za yove, Yobu esimikija ntima kunkhala mphela wokhulupilika. Yove enena kuti: “Mpaka newo kumwalila nizalekelini kunkhala na ntima wosayaŵanika!” (Yob 27:5) Kansi Yobu echita chinji kuti ankhale pa ushamwali wotang’a tetyo na Mulungu? Mosakaikila, yove echimvwa vamene Mulungu vechichitila Abulahamu, Isaki na Yakobo amene enze enekwake ndipo yove enzevikhulupilila. Komasoti yove ephunzila za minkhalidwe inyinji ya Yehova powona chilengedwe.—Ŵelengani Yobu 12:7–9, 13, 16.
Nsanja yophunzila 06/2021 pedji 10 ndim. 10-12
Na thandizo ya Yehova mwewo mulilini mweka
10 Pangani ushamwali na Akhilisitu okhulupilika. Fwanani azishamwali mumpingo amene mungaphunzilepo kanthu kuli ove. Azishamwali amene awo angankhale achikulile olo achilumbwana kupambana mwewo, payakine angankhale na chinkhalidwe chosiyana na chanu. Baibolo yutikumbusha kuti ‘nzelu yupezeka muli okalamba.’ (Yob 12:12) Achikulile nawo angaphunzile vinyinji kufumila kuli achilumbwana a mumpingo. Davide enze wachilumbwana ntontho ngako poyelekezela na Yonatani. (1Sa 18:1) Davide na Yonatani enzeyavyana muyake na muyake kuti akotumikila Yehova olo penzekumana na mavuto anyinji. (1Sa 23:16-18) Mulongo muyakine zina yake Irina wamene ni yove yeka wa Mboni m’banja mwawo, enena kuti: “Abale ŵasu komasoti alongo kulaŵila chendi angankhale monga ni makolo ŵasu olo achibale ŵasu. Yehova angaŵakatishile ntchito kuti atiyavye pa vosoŵa vasu.”
11 Kupanga azishamwali anyowani kungankhale kovuta, maka-maka keno mwewo nimwe wa nsoni. Mulongo muyakine wa nsoni zina yake Ratna wamene ephunzila choonadi olo kuti enzeshushiwa, enena kuti: “Newo nenzefunika kuziŵa kuti nenzefunikila thandizo ya abale ŵangu komasoti alongo mumpingo.” Vamene ivi vingankhale vovuta kuujako munthu muyakine mwamumvwila, koma kukambilana momasuka kwamene uku niye maziko a ushamwali wapantima. Azishamwali ŵanu ofuna kukulimbikisani mwewo komasoti kukuyavyani, olo n’tetyo, ove ofunikila kuti muŵaziŵishe mwangachitile vamene ivi.
12 Imozi mwa njila ziweme zofwanila azishamwali ni kulalikila na Akhilisitu ayakine. Carol, wamene watatomola kale, enena kuti: “Newo nafwana azishamwali aweme chifukwa choyenda na alongo osiyana-siyana muutumiki komasoti kuchita vinthu viyakine potumikila Yehova. Yehova waniyavya kwa vyaka vinyinji kupitila muli azishamwali amene aŵa.” Vamene ivi vunkhala vopindulisha nthawe zonse keno tupanga ushamwali na Akhilisitu okhulupilika. Yehova okatishila ntchito azishamwali amene aŵa kuti akutang’isheni mwewo mukankhala okhumudwa, olo keno mulimvwa kuti muli mweka.—Miy 17:17.
Insight-2 pedji 1190 ndim. 2
Nzelu
Nzelu yofumila kululu. Nzelu ya ntundu uliwonse yufumila kwa Yehova Mulungu wamene ni “yove yeka wa nzelu” mwanjila yamene iyi. (Aro 16:27; Chv 7:12) Chiziŵisho chuyendela pamozi na kuziŵa luweme vinthu, ndipo pakuti Yehova niye Nyamalenga “kufumila kale-kale mpaka kale-kale,” (Sl 90:1, 2) yove oziŵa vonse vokhuza chilengedwe chonse, mwechipangiliwa komasoti vinthu vamene vili nkati mwake, yove oziŵa mbili yake yonse mpaka lelo. Malamulo achilengedwe, mwavuyendela vinthu va m’chilengedwe, komasoti mfundo zake vamene niye vakudalila ŵanthu pochita kafuku-fuku nopanga vinthu, ndipo paliye vinthu vamene ivo, ove paliye chinthu chilichonse changapange kapena malo onkhazikika ŵangachipangile. (Yob 38:34-38; Sl 104:24; Miy 3:19; Yer 10:12, 13) N’pomvwika kuti mfundo za Yehova za minkhalidwe iweme n’zofunika ngako kuti munthu ankhale wonkhazikika mwauzimu, woganiza luweme, komasoti kuti vinthu vikomuyendela luweme. (De 32:4-6; Onani nkhani yakuti JEHOVAH [A God of moral standards].) Paliye chinthu chiyakine chupambana kuzindikila kwake. (Yes 40:13, 14) Payakine Yehova angalole kuti vinthu vosemphana na mfundo zake zachilungamo vichitike, olo kuyenda luweme kwakanthawe, koma vokonkhapo vake vunkhala vokatijana na chifunilo chake ndipo yove “azakwanilishe cholinga chake.”—Yes 55:8-11; 46:9-11.
Kusakila-sakila Mfundo zingatiyavye
Nsanja ya Mulonda 01/08/2008 pedji 11 ndim. 5
Kulaŵila na achilumbwana
▪ ‘Kansi numvwisha tanthauzo ya vakunena?’ Lemba ya Yobu 12:11 yunena kuti: “Kansi kwatu yukwanishalini kuziŵa mawu? Kansi mkamwa mulaŵalini chakulya?” Mosiyana na poyamba, mufunikila “kuziŵa” tanthauzo ngayo-ngayo ya vakulaŵila mwana wanu. Alumbwana nthawe zinyinji okonda kulaŵila moyangijila mawu, mwakuti keno olaŵila vuto iyakine vunkhala monga kuti vuŵachitikila nthawe zonse. Mwachisanzo, mwana wanu angalaŵile kuti: “Nthawe zonse muniwona monga nine kamwana!” Komasoti “Munimvwishalini kuyambila kale-kale!” Mmalo moganizila ngako za mawu ŵawanena akuti: “Nthawe zonse” komasoti kuti “kuyambila kale-kale,” Mungachite luweme kuganizila vakutanthauza mwana wanu. Mwachisanzo, mawu akuti “Mwewo nthawe zonse muniwona monga nine kamwana” angatanthauze kuti “Nuwona kuti munikhulupilila lini,” ndipo akuti “Munimvwishalini kuyambila kale-kale” angatanthauze kuti “Nufuna nikuujeni mwanumvwila.” Yejayejani kumvwisha tanthauzo ya vakunena mwana wanu.