Malifalensi a Utumiki komasoti Moyo wasu wachikhilisitu kabuku kamisonkhano
© 2023 Watch Tower Bible and Tract Society of Pennsylvania
NOVEMBA 6-12
CHUMA CHUPEZEKA M’MAWU A MULUNGU | YOBU 13-14
“Munthu akamwalila, kansi azankhalesoti na moyo?”
Nsanja ya Mulonda 15/10/1999 pedji 3 ndim. 1–3
Tufuna kunkhala na moyo mpaka kala-kale
MASIKU ŵano ni ŵanthu oŵelengeka tyala amene angashushe kuti moyo wasu niufupi, olo kuti nkhani yamene iyi ilembewa vyaka 3.500 vapita. Ŵanthu okhutila lini na moyo wapalulu wamene ni wakanthawe katontho tyala, ndipo pavuli pake tukalamba nomwalila. Tetyo, ŵanthu ankhala oyeja-yeja kufwana njila zamene zingaŵayavye kuti ankhale na moyo utali.
Munthawe ya Yobu Aiguputo enzekulya vizo vofisika va nyama pofuna kuti osati akalambe, koma vamene ivi venzelini voyavya. Chimozi mwa volinga va Asayansi amene enzepanga mankhwala munthawe yamene iyo, chenze chakuti ayavye ŵanthu kunkhala na moyo kwa nthawe itali. Akaswili anyinji amene enze yeja-yeja kutalimphisha moyo wawo, enzekhulupilila kuti golide wopangiwa na ŵanthu ungapangishe kuti munthu osati afwe, ndipo kulyela m’mbale za golide kungapangishe kuti munthu ankhale na moyo kwa nthawe itali. Akaswili aku Tchaina wakale, enzeganiza kuti angakwanishe kusintha makimikozi am’muŵili, pokatishila ntchito maluso monga kuganiza ngako, masewela ochosa chiŵe komasoti kulya patontho, enzewona kuti kuchita vamene ivi kungaŵayavye kuti ankhale na moyo mpaka kale-kale.
Woyendela malo waku Spanish Juan Ponce de León oziŵika ngako chifukwa chofuna kujokela kuulumbwana. Dokota muyakine wa n’vyaka vakuvuli vam’ma 18 sauzande elemba malangizo m’buku yake yamene yutomolewa kuti Hermippus Redivivus kuti titole asimbi nowaika m’kachipinda munyengo yakupya notola miŵeso yaŵesa m’kachipinda mwameneumo noika m’kabotolo angaŵakatishile ntchito popanga mankhwala otalimphisha moyo. N’vowonekelatu kuti paliye olo njila imozi pa njila zonse zamene izo, yamene iyavya.
Nsanja ya Mulonda 15/04/2015 pedji 32 ndim. 1–2
Kansi chimuti chikatendewa chuphukilasoti?
CHIMUTI cha maolivi chuwonekalini luweme tikachilinganija na cham’kungudza [Olea europaea]. Koma chimuti cha maolivi chupilila mnyengo zovuta ngako. Ayakine afwanapo vimiti voteti vamene vankhalapo kwa vyaka 1.000. Chimuti chamene ichi chunkhala na miju itali-itali, ndipo vamene ivi vuchitisha kuti chikatendewa chiphukilesoti.
Yobu enzekhulupilila kuti akafwa azaushiwe. (Yob 14:13-15) Vuwoneka kuti—enzekhulupilila kuti Mulungu—azaushe ŵanthu, yove enena kuti: “Olo chimuti chunkhala na chiyembekezo,” Yobu enenasoti kuti: “Chikatendewa chuphukilasoti.” Vuwoneka kuti Yobu penzelemba vamene ivi enzeganizila chimuti cha maolivi. Kukachitika chilala chimuti chamene ichi chuyuma koma miju yake ikufwalini, ndipo mvula ikawela misambo yake yuyamba kuphukila “monga chimuti chanyowani.”—Yob 14:7–9.
Nsanja ya Mulonda 1/03/2011 pedji 22 ndim. 5
“Muzalake-lake ntchito ya manja ŵanu”
Vechinena Yobu vutiphunzisa mfundo yofunika ngako yokhuza Yehova. Mfundo yake niyakuti: Yove okonda ngako ŵanthu amene omudalila monga nimwenzechitila Yobu. Ŵanthu otetyo olola kuti Yehova aŵaumbe nonkhala ŵanthu aminkhalidwe iweme yamene Mulungu osangalala nayo. (Yes 64:8) Yehova owona kuti atumiki ŵake okhulupilika ni ŵanthu antengo wapatali ngako. Tetyo, yove “olaka-laka” kuwonasoti ŵanthu okhulupilika amene emwalila. Kaswili muyakine wa Baibolo enena kuti, mawu achiheberi amene palemba yamene iyi eŵamasulila kuti “kulaka-laka, ni amozi amawu amphamvu amene ofotokoza mwakumvwila munthu akankhala kuti ofunishisha chinthu chiyakine.” Sikuti Yehova okumbukila tyala atumiki ŵake koma yove olaka-laka kuŵaukisha kuti ankhalesoti na moyo.
Chuma chupezeka m’Mawu a Mulungu
Insight–1 pedji 191
Mulota
Mulota yenzepanamila soti chinthu chatyala-tyala kapena chosafunika, Abulahamu evomekeja pamenso pa Mulungu kuti, “Newo nine lito na mulota.” (Ge 18:27; Onanisoti Yes 44:20; Yob 30:19.) Ndipo Yobu eyelekezela mawu otonthoja a ŵanthu onyenga na “chinthu chatyala-tyala monga ni mulota.”—Yob 13:12.
NOVEMBA 13-19
CHUMA CHUPEZEKA M’MAWU A MULUNGU | YOBU 15-17
“Osati mukokonkheja Elifazi keno mupeleka chitonthojo”
Nsanja ya Mulonda 15/09/2005 pedji 26 ndim. 4–5
Mukopewa maganizo olakwika!
Maulwendo onse atatu ŵechilaŵila, Elifazi ewonesha kuti n’vovuta kusangalasa Mulungu, ndipo paliye chinthu chilichonse chakuchita atumiki ŵake chakusangalala nacho yove. Elifazi euja Yobu kuti, “Ona! Okhulupililalini atumiki ŵake; ndipo Angelo ŵake kapena kuti amithenga oŵapezela vifukwa.” (Yob 4:18, mawu amnyansi) Pavuli pake Elifazi enenasoti kuti Mulungu: “Okhulupilila lini angelo ŵake, ndipo Kululu nikosayenelela m’meso mwake.” (Yob 15:15) Ndipo emukonsha kuti: “Kansi wamphamvu yonse, osangalala nawe kuti niwe wolungama?” (Yob 22:3) Bilidadi ekatijana nawo maganizo amene aŵa, chifukwa yove naye enena kuti: “Onani, kuli mwezi koma uŵalalini; ndipo nyenyezi n’zituŵalini pamenso pa [Mulungu].”—Yob 25:5.
Sewo nase, tufunikila kunkhala wosamala kuti osati tiyambe kaganizidwe koteti. Chifukwa maganizo amene aŵa angatichitishe kuyamba kuganiza kuti vakufuna Mulungu tingavikwanishelini. Kaganizidwe kamene aka kangatisokonezele ushamwali wasu wotang’a na Yehova. Lomba keno tingayambe kuganiza teti, kansi tingakwanishe kumvwila bwino-bwino malangizo ayakine ŵatingapasiwe? M’malo momvwila malangizo ŵatapasiwa, ntima wasu ungafwike “pokhumudwila Yehova ngaye-ngaye,” ndipo vamene ivi vingamukhumudwishe. (Miy 19:3) Vamene ivi vingatisokonezele ushamwali wasu na Mulungu!
Nsanja ya Mulonda 15/02/2015 pedji 9 ndim. 16
Nkhalani olichefya komasoti achifundo ngati Yesu
16 Vinthu vatulaŵila. Ntima wachifundo utiyavyasoti kulaŵila “motang’isha kuli a ntima wachisoni.” (1 At 5:14) Kansi tingaŵalimbikise motyani ŵanthu woteti? Tingaŵalimbikise poŵauja mawu owonesha kuti tuŵakonda ngako, komasoti kuŵaganizila. Mwachisanzo, tingaŵayamikile pa vinthu vakuchita luweme. Kuchita vamene ivi kungaŵayavye kuzindikila kuti ove ni ŵanthu ofunika ngako. Tingachitesoti luweme kuŵakumbusha kuti Yehova eŵadonsela kuli mwana wake chifukwa choona kuti ove ni antengo wapatali. (Yoh 6:44) Tingaŵasimikijilesoti kuti Yehova okonda ngako atumiki ŵake amene ali na “ntima wofwaika” komasoti amene “olimvwila chisoni.” (Sl 34:18) Tikolaŵila mwachifundo kuli ŵanthu achisoni, tuwatang’isha ngako.—Miy 16:24.
Chuma chupezeka m’Mawu a Mulungu
Nsanja ya Mulonda 15/03/2006 pedji 14 ndim. 11
Mfundo zikulu-zikulu za m’buku ya Yobu
7:9, 10; 10:21; 16:22—Kansi mawu a m’mavesi amene aŵa owonesha kuti Yobu enzekhulupililalini za kuukishiwa kwa akufwa? Apa Yobu, enzenena za kuukishiwa kwa munthawe yamene iyo osati zakusogolo. Lomba, kansi enzetanthauza chinji? Payakine enzetanthauza kuti keno angafwe vingakwanishikelini kuwonanasoti na ayake munthawe yamene iyo. Tetyo ove eyamba kuganizila kuti Yobu angakwanishelini kuuka, kujokela kung’anda kwake olo kuwonana naye mpaka nthawe yechilinganija Mulungu. Apa Yobu, enzetanthauza kuti paliye munthu angakwanishe kuuka kufumila kumanda payeka. Mfundo yakuti Yobu enzekhulupilila kuti kusogolo akufwa azauke tuyipeza pa lemba ya Yobu 14:13-15.
NOVEMBA 20-26
CHUMA CHUPEZEKA M’MAWU A MULUNGU | YOBU 18-19
“Osaŵataya olambila ayanu”
Nsanja ya Mulonda 01/2022 pedji 16 ndim. 9
Yesu elila chifukwa chodela nkhawa ayake
9 Mungakwanishe kutonthoja ŵanthu afwiliwa. Kuyangijila pa kulila na Marita pamozi na Mariya, Yesu enzeŵamvwishila komasoti kuŵatang’isha. Sewo nase tingachite chimozi-mozi keno tikumvwa chisoni. Nkulu muyakine waku Australia, zina yake Dan, enena kuti: “Pavuli pakuti naluza nkazi wangu, nenzefuna kulimbikisiwa. Abale anyinji komasoti azinakazi ŵawo enzenimvwishila nikowafotokozela. Ove enzenilola kuti nifotokoze nkhaŵa zangu ndipo enzenileshalini kulila nikayamba kumvwa chisoni. Enzenipasasoti thandizo yanufunikila monga kunisukila motoka, kuyanigulila vinthu ku mashopu, komasoti kunipikila chakulya akawona kuti paneka ningakwanishelini kuchita vamene ivi. Pavuli pake enzepemphela nane pamozi. Ivi venisimikijila kuti enze azishamwali ngawo-ngawo komasoti abale amene ‘evyalika kuti atiyavye pakachitika mavuto.’”—Miy 17:17.
Nsanja ya Mulonda 09/2021 pedji 30 ndim. 16
Keno munthu wamukonda wasiya kutumikila Yehova
16 Mukopitilija kuyavya achibale okhulupilika a munthu wamene wachosewa. Pa nthawe yamene iyi niye pamufunikila kuŵakonda ngako komasoti kuŵalimbikisa kupambana kale yonse. (Ahe 10:24, 25) Nthawe ziyakine achibale a munthu wamene wachosewa, payakine angolimvwa kuti oyikiliwalini nzelu na abale na alongo mumpingo. Koma osalola kuti akokumvwa tetyo! Achilumbwana amene makolo ŵawo esiya kutumikila Yehova, ofunikila ngako kuŵatembeja komasoti kuŵatang’isha. Maria, wamene mwanalume wake echosewa komasoti kusiya banja yake, enena kuti: “Azishamwali ŵangu ayakine enzewela kung’anda, kutipikila chakulya ndipo enzeniyavya nikophunzila na ŵana ŵangu. Ove enzekumvwa ululu monga ni wenenzekumvwa newo ndipo enzelila nane pamozi. Ove enzelaŵila vinthu viweme keno ŵanthu olaŵila vinthu vawenye vokhuza newo ndipo enzenitang’isha ngako!””—Aro 12:13, 15.
Nsanja ya Mulonda 1/09/1990 pedji 22 ndim. 20
Kansi mulaka-laka kukhala paudindo?
20 Bungwe ya Akulu yufunika kuzindikila kuti kuchosa munthu paudindo paliye vifukwa vomvwika, kungachishe kuti ŵala enzetumikila monga akulu kapena atumiki othandiza, ayambe maganizo olakwika olo kuti esiya udindo wamene uyo molifunila. Keno aliye chosewe koma akulu awona kuti m’bale wamene uyo ovutika maganizo, ofunikila kumuyavya na malangizo achikondi am’Baibolo. (1 At 5:14) Ofunikila kumuyavya kuti akolimvwa kuti niwofunika mumpingo. Olo angapasiwe uphungu wamphamvu, pangapitelini nthawe kuti m’bale wolichefya komasoti woyamikila, alandilesoti maudindo ayakine mu mpingo.
Chuma chupezeka m’Mawu a Mulungu
Nsanja ya Mulonda 1/10/1994 pedji 32
Kufunika kolaŵila mawu achifundo
Pa nthawe yenzefunikila kulimbikisiwa Yobu, Elifazi na ayake aliye laŵile mawu aweme. Ove eyimba mulandu Yobu chifukwa cha mavuto wenzekumana nawo, ndipo enzelaŵila kuti Yobu pali chinthu chiyakine chechilakwisa. (Yob 4:8) Buku yachingelezi yakuti The Interpreter Bible inena kuti: “Chenzefuna Yobu nikuchitiliwa chifundo na ŵanthu ayakine. Zechifwana yove ni nkhani ‘zachendi’ komasoti ziweme ngako zokhuza miyambo yachipembezo na zokhuza minkhalidwe iweme.” Yobu ekhumudwa ngako kumvwa venzelaŵila Elifazi na ayake mwakuti ekakamijika kuwakonsha kuti: “Kansi muzatamanishe moyo wangu mpaka lini, na kunilasa na mawu?”—Yob 19:2.
Tufunika lini kuchitisha mnkhilisitu muyasu kulila chifukwa cha kalaŵilidwe kasu kosaganizila ayakine komasoti kulaŵila mwaukali. (Yelekezelani na Deuteronomo 24:15.) Mwambi uyakine wa m’Baibolo utichenjeja kuti: “Volaŵila vanu vingasunge moyo wanu kapena kuuwononga; tetyo mufunikila kuganizila mukaliye laŵila.”—Miy 18:21.
NOVEMBA 27–DISEMBA 3
CHUMA CHUPEZEKA M’MAWU A MULUNGU | YOBU 20-21
“Tingakwanishe kunkhala olungama olo kuti nise osauka”
Nsanja ya Mulonda 1/08/2007 pedji 29 ndim. 12
Kansi nimwe “olemela kwa Mulungu”?
12 Yesu esiyanisha nkhani ya kunkhala wolemela kwa Mulungu nakuliwunjikila chuma chakuthupi. Tetyo, Yesu enze tanthauza kuti cholinga chasu chikulu pamoyo osati chinkhale kuliunjikila chuma chakuthupi nosangalala nacho. Mmalomwake tufunikila kukatishila ntchito chuma chasu chameneyicho potang’isha ushamwali wasu na Yehova. Kuchita vamene ivi kuzatiyavye kuti tinkhale olemela kwa Yehova. Ndaŵa yanji? Ndaŵa yakuti yove otidalisa ngako tikachita vamene ivo. Baibolo yunena kuti: “Madaliso a Yehova niye olemelesha ndipo oyangijilapo lini ululu.”—Miy 10:22.
Chuma chupezeka m’Mawu a Mulungu
Nsanja ya Mulonda 1/01/1995 pedji 9 ndim. 19
Kugonjesa satana na ntchito zake
19 Nivokondwelesha kuti ntumiki wa Mulungu Yobu, eyenja-yenja kulimbana na “volinga”vechipeleka Satana kupitila mwa Elifazi na Zofari. (Yob 4:13-18; 20:2, 3) Tetyo, Yobu evutika na “mavuto” yamene yemuchitisha kuti ayambe kulaŵila “vatyala-tyala” na “voyofwa” vamene venze sausha maganizo ŵake. (Yob 6:2–4; 30:15, 16) Elihu emumvwishila Yobu mofasa ndipo emuyavya kuwona mwamene Yehova mwakuchitila vinthu mwanzelu. Nichimozi-mozi masiku ŵano akulu omvwishisha owonesha kuti osamalila akhilisitu amene okumana na mavuto mwa “kuŵayavya” panthawi yovuta. Mmalomwake molingana na Elihu ove oŵamvwishila moleza ntima, ndipo owonesha kuti oŵazoleka mafuta otonthonja a mawu a Mulungu. (Yob 33:1–3, 7; Yak 5:13-15) Tetyo aliyense wamene maganizo ŵake osokonezewa navochitisha wowa ngavo-ngavo olo vakungoganizila komasoti amene ali na “wowa na maloto kapena mensomphenya” angafwane chitonthojo cha m’Malemba kufumila kwa akulu mumpingo.—Yob 7:14; Yak 4:7.
DISEMBA 4-10
CHUMA CHUPEZEKA M’MAWU A MULUNGU | YOBU 22-24
“Kansi munthu angankhale wopindulisha kwa Mulungu?”
Nsanja ya Mulonda 15/09/2005 pedji 27 ndim. 1–3
Mukopewa maganizo olakwika!
Maganizo akuti Mulungu niwovuta kumusangalasa okatijana na maganizo akuti Mulungu owona ŵanthu kunkhala wosafunika. Ulwendo wachitatu wechilaŵila, Elifazi enena mawu akuti: “Kansi mwanalume wamphamvu angankhale wapindu kuli Mulungu, kapena kansi aliyense wozindikila angankhale wapindu kuli yove?” (Yob 22:2) Apa Elifazi enzetanthauza kuti Mulungu owona ŵanthu kunkhala wosafunika ngako kuli yove. Bilidadi naye esimikijilasoti mfundo yamene iyi pechinena kuti: “Kansi munthu angankhale tyani wolungama pamenso pa Mulungu, kapena wovyalika kuli mwanakazi angankhale tyani n’tuŵa?” (Yob 25:4) Kunkhala na maganizo amene aŵa kungatichitishe kuti tikolikonsha kuti, pakuti Yobu enze munthu, kansi enzelivutishilanji kuganiza kuti angakwanishe kunkhala wolungama pamenso pa Mulungu?
Ŵanthu anyinji masiku ŵano, ovutika na maganizo olakwika okhuza moyo. Payakine oganiza teti chifukwa cha mwechilelelawa m’banja mwawo, mavuto ŵakumana nawo pa moyo wawo, komasoti kusankhiwa m’tundu na mfuko. Koma satana na viwanda vake osangalala ngako kutamanisha ŵanthu okhulupilika. Yove oziŵa kuti akangochitisha munthu kulimvwa kuti paliye changachite chamene chingasangalase Mulungu, nivosavuta kuti munthu wamene uyo ayambe maganizo olakwika. Ndipo patontho na patontho munthu wamene uyo, angayambe kufoka olo kusiyilatu choonadi.—Ahe 2:1; 3:12.
Ukalamba komasoti matenda, vutikangisha kuchita vinthu vinyinji vauzimu. Payakine tingowona kuti tukangiwa kuchita vinthu vinyinji muutumiki wa Ufumu, poyelekezela na vetenzechita tikali achilumbwana a thanzi komasoti amphamvu. Tufunikila kuziŵa kuti satana na viwanda vake ofuna kuti tikonkhala na maganizo otifokesha akuti vatuchita palipano vusangalasa lini Mulungu! Tiyeni tikoyeja-yeja kupewelatu maganizo amene aŵa.
Nsanja ya Mulonda 15/02/1995 pedji 27 ndim. 6
Njila yamene ingatiyavye kulimbana na mavuto
Ayake atatu a Yobu efotokoza maganizo ofokesha osati maganizo otang’isha kapena mfundo za m’Baibolo. Elifazi efwika ponena kuti ‘Mulungu okhulupililalini atumiki ŵake’ ndipo aliye navo ntchito vakuti Yobu niwolungama kapena yayi. (Yob 4:18; 22:2, 3) Vunkhala vovuta kuganizila mawu ofokesha—komasoti—awenye! Nivosadabwisa kuti pavuli pake Yehova, ezuzula elifazi na ayake chifukwa cha mwano wechichita. Yove enena kuti “Chifukwa mwewo muliye nene vachendi vokhuza newo.” (Yob 42:7) Koma olo ntetyo, enze akali na mawu ayakine ofokesha.
Nsanja ya Mulonda 15/04/2003 pedji 14-15 ndim. 10-12
Achilumbwana amene okodwelesha ntima wa Yehova
10 Monga mwayuwoneshela nkhani ya m’Baibolo yamene iyi, Satana ekayikila kukhulupilika kwa Yobu kupamikijapo atumiki ayakine a Mulungu —komasoti mwewo. Yehova emuyankha Satana kuti: “Nkhanda kulipila nkhanda [osati Yobu yeka] koma aliyense angavomele kupeleka chilichonse chalinacho kuti apulumuse moyo wake.” (Yob 2:4) Kansi muwona mbali yamufunikila kunkhala pa nkhani yofunika ngako yamene iyi? Monga mwayawoneshela lemba ya Miyambo 27:11, Yehova olaŵila kuti pali chinthu chiyakine chamungapeleke kuli yove—chamene chingamuyavye kuti akwanishe kumuyankha watonjo wamene ni Satana. Wolamulila—wachilengedwe chonse, okusengani mwewo kumuyavya kuyankha nkhani ikulu ngako kupambana nkhani zonse. Kulaŵila chendi mwewo muli na udindo komasoti mwayi ukulu ngako! Kansi mungakwanishe kuchita vakukusengani Yehova? Enena tetyo Yobu. (Yob 2:9, 10) Yesu naye echitasoti chimozi-mozi kumuyavya Yehova kuyakha nkhani ikulu yamene iyi pamozi na atumiki ayakine anyinji kuyambila kale-kale mpaka masiku ŵano, kupamikijapo achilumbwana anyinji. (Afi 2:8; Chv 6:9) Mwewo namwe mungachitesoti chimozi-mozi. Koma chamufunikila kuziŵa ni chakuti mufunika kutolapo mbali pa nkhani ikulu yamene iyi. Ndipo vochita vanu vizawoneshe kuti muli kumbali ya tonjo ya Satana kapena kumbali ya yankho ya Yehova. Kansi muzasankhe kunkhala kumbali ya ŵani?
Yehova okusamalilani mwewo!
11 Kansi vamwasankha kuchita vukhuza Yehova? Kansi ŵanthu anyinji awonesha lini kale kukhulupilika vamene vingamuyavye Yehova kumuyankha mwamphamvu Satana? Nichendi kuti M’dyerekezi enena kuti, paliye munthu wamene otumikila Yehova chifukwa chomukonda, koma pofwika pano tawona umboni wosimikijilika wakuti enzenena vawenye. Koma olo kuti vilitetyo, Yehova ofuna kuti mwewo munkhale kumbali yake pankhani ya Ulamulilo yamene iyi, chifukwa okusamalilani mwewo monga munthu wofunika ngako. Yesu enena kuti: “Molingana na vamene ivi Atata ŵanu akululu, ofunalini kuti m’mozi wa tuŵana twamene utu azawonongeke.”—Mt 18:14.
12 Eye, Yehova owona vamwasankha kuti muchite. Kupambana vonse, yove okhuziwa na vinthu vatusankha. Baibolo yufotoza momvwika luweme kuti, vinthu viweme kapena viipa vakuchita ŵanthu vumukhuza ngako. Mwachisanzo, Aisiraeli pechipanduka moweleja-weleja, Yehova “vemuŵaŵa.” (Sl 78:40, 41) Chikaliye fwika chigumula cham’nthawe ya Nowa panthawe yamene iyo “ŵanthu aipa epakila-pakila,” ndipo Yehova “vemuŵaŵa ngako mu ntima mwake.” (Ge 6:5, 6) Ganizilani tanthauzo ya vinthu vamene ivi. Keno mungasankhe kuchita vinthu viipa, muzakhumudwise Mulengi wanu. Vamene ivi vutanthauza lini kuti Mulungu niwofoka, kapena kuti kutoleka maganizo kumulamulila ayi. M’malo mwake, yove okukondani ndipo osamalila moyo wanu. Koma keno muyeja-yeja kuchita vinthu viweme mukondwelesha ntima wa Yehova. Osangalala koma osati chifukwa chakuti wapeza yankho iyakine yangayankhe Satana, koma chifukwa chakuti muli na mwayi wolondela moyo wosasila. Ndipo niye vakuyembekezela kukuchitilani. (Ahe 11:6) Kulaŵila chendi Yehova Mulungu ni atata ŵanu achikondi!
Chuma chupezeka m’Mawu a Mulungu
Nsanja ya Mulonda 15/07/2004 pedji 21-22
Nkhalani na volinga vauzimu kuti mulemekeze Nyamalenga wanu ndipo nkhalani ofunishisha kuvikwanilisha
Ganizilani mwamene Yehova mwechikwanilishila ntchito yake yolenga vinthu. Pechinena kuti “penze m’chingulo komasoti penze m’mawa,” Yehova owonesha kuti egaŵa nthawe iliyonse yechilenga vinthu. (Ge 1:5, 8, 13, 19, 23, 31) Pachiyambi pa nthawe iliyonse yechilenga vinthu, yove enze ziŵa luweme cholinga chake kapena kuti chenzefuna kuti achikwanilishe panthawe yamene iyo. Ndipo Mulungu ekwanilisha cholinga chake chakuti alenge vinthu. (Chv 4:11) Kolo yakale Yobu enena kuti “vaulaka-laka moyo wake [Yehova] yove ovichita,”. (Yob 23:13) Vuwoneka kuti Yehova ekondwela ngako kuwona kuti “Vonse vechipanga” ndipo eleŵila kuti “venze viweme ngako”!—Ge 1:31.
Kuti sewo nase tikwanilishe volinga vasu, tufunikila kunkhala wofunishisha kuti tivikwanilishe. Kansi n’chinji chingatiyavye kuti tinkhale na ntima wofunishisha kuvikwanilisha? Pano pachalo pakaliye chilichonse, Yehova enzekwanisha kuwona mwati chizankhalile akazekwanilisha cholinga chake;—enzewona kuti chizankhale ngati mwala wokongola wantengo wapatali wa m’mulenga-lenga. Ndipo chizachitishe kuti yove alondele ulemelelo komasoti kulemekezewa. Nichimozi-mozi na sewo nase, tingankhale wofunishisha kukwanilisha volinga vasu keno tuganizila luweme mwatitizapindulile tikazekwanilisha cholinga chasu chamene icho. Ivi niye vechitikila Tony wamene ali na vyaka 19. Yove aliyeluŵe mwechimvwila nthawe yoyamba yechipita kuyawona Ofesi ya nthambi ya Mboni za Yehova kuchalo chiyakine chamene chili kum’chingulo kwa Western Europe. Kufumila pa thawe yamene iyo, konsho yenzengolikonsha tony yenze yakuti, ‘Kansi ningamvwe tyani kunkhala komasoti kuyatumikila pamalo amene ŵala?’ Tony enze wosimikijila kuchita vamene ivi, ndipo aliyesiye kuyeja-yeja pofuna kukwanilisha cholinga chake. Papita vyaka vinyinji yove esangalala ngako pechiziŵa kuti wavomekejewa kuyatumikila pa nthambi yamene iyo!
DISEMBA 11-17
CHUMA CHUPEZEKA M’MAWU A MULUNGU |YOBU 25-27
“Tingakwanishe kukhala okhulupilika olo kuti tiliye ungwilo”
Insight–1 pedji 1210 ndim. 4
Kukhulupilika
Yobu. Vuwoneka kuti Yobu enze na moyo pavuli pa imfwa Yosefe, koma Mose akaliye yamba kusogolela ntundu wa Aisiraeli, ndipo ofotokozewa kuti nimwanalume wamene “enzeve chophoniya [Heb., tam] woyondoloka ntima, woyopa Mulungu komasoti wopewa viipa.” (Yob 1:1) Mfundo yakuti kukhulupilika kwa ŵanthu ninkhani yamene tufunikila kusankha pakati pa Yehova Mulungu na Satana nivowonekelatu kuti Mulungu ekosha mdani wa Yobu wamene ni Satana pechiwonekela pansonkhano wa angelo kululu. Satana enena kuti Yobu enze navolinga vawenye pankhani yolambila Mulungu, yove enena kuti Yobu enze tumikila Mulungu osati chifukwa cholipeleka koma chifukwa cha lyela, ivi vuwonesha kuti Satana enzekayikila kukhuluplika kwa Yobu kuli Mulungu. Yobu ekumana na mavuto monga matenda, kusokonezeka kwa chuma chake, komasoti kufwa kwa ŵana ŵake, koma olo n’tetyo Satana ekangiwa kusokoneza chikhulupilo cha Yobu kapena kuti ushamwali wamene wenzepo pakati Yobu na Yehova. (Yob 1:6–2:3) Pavuli pake, yove enena kuti Yobu enzekhulupilila kuti keno angapulumuke yove apitilije kunkhala okhulupilika olo kuti wakumana na mavuto monga kusokonezeka kwa chuma chake komasoti kufwiliwa ŵana ŵake. (Yob 2:4, 5) Pavuli pake emupasa matenda yoŵaŵa ya vilonda komasoti vofokesha ndipo mwanakazi wake enze laŵilasoti mawu ofokesha, nawosoti ayake atatu eyamba kumuzuzula kumunyoza kulaŵila mawu otukwana komasoti kupotoza mfundo za m’mawu a Mulungu. (Yob 2:6-13; 22:1, 5-11) Yobu enzenena kuti ningakane lini kuti nine munthu wokhulupilika. “Mpaka newo kumwalila nizasiye lini kunkhala na ntima wosayaŵanika! Nakata chilungamo changu ndipo nizachisiye lini. Ntima wangu uzaninyozelini masiku ŵangu onse.” (Yob 27:5, 6) Kukhulupilika kwake kwiwonesha kuti mdani wa Mulungu ni wawenye.
Nsanja ya Mulonda 02/2019 pedji 3 ndim. 3–5
Nkhalani okhulupilika!
3 Tikokatishiliwa ntchito monga atumiki a Mulugu, chikhulupililo chasu chuwonesha kuti tukonda Mulungu na ntima wasu wonse, tulipeleka kuli yove monga ŵanthu ŵake, ndipo tufunika kuika Ufumu wa Mulungu pamalo oyamba kupambana vonse. Tawona mweyiyambila tanthauzo imozi ikulu ya mawu a m’Baibolo yutomolewa kuti “kuyondoloka ntima” yutanthauza kuti: Kukwanilisha, kumvwikisha luweme komasoti na ntima wonse. Mwachisanzo, Aisiraeli enzepeleka nsembe za nyama kwa Yehova, ndipo chilamulo chenzenena kuti nyama zamene izo zenzefunikilalini kunkhala zolemala. (Le 22:21, 22) Ŵanthu a Mulungu enzelolewa lini kupeleka nsembe za nyama zamene ziliye kwendo, kwatu kapena linso; komasoti yolwala. Yehova enzefuna kuti nyama yamene iyo ikonkhala yokwanila komasoti iliye chilema. (Mki 1:6–9) Tingamvwishe chifukwa chake Yehova osamala za nkhani ya kunkhala watyala-tyala komasoti osamvwila. Tikagula chinthu kaya chitwazi, buku, kapena chisulo, tufunalini kuti chinkhale chobowoka kapena kusoŵa. Tufuna kuti chinkhale chotang’a komasoti chiweme. Yehova naye akumvwasoti chimozi-mozi pa nkhani ya chikondi chatilinacho kuli yove, komasoti kukhulupilika kwasu. Chikondi chasu chufunika kunkhala chotang’a komasoti chokwanila.
4 Kuti tipitilije kunkhala mphela okhulupilika, kansi tufunikila kunkhala angwilo? Payakine tingoliwona kuti tiliye nzelu, kapena kuti nise ŵanthu atyala-tyala. Onani vifukwa viŵili vamene vingatiyavye kuti osati tikochita wowa. Chinthu choyamba, Yehova onkhalilalini kuganizila vophoniya vasu. Mawu ŵake otiuja kuti: “Mwewo Ya, kuti munkhalila kulolesha volakwa sembe niŵani epanama pamenso panu, mwewo Yehova?” (Sl 130:3) Yove oziŵa kuti nise ŵanthu tiliye ungwilo, komasoti ochimwa ndipo otikhululukila na ntima wonse. (Sl 86:5) Chachiŵili Yehova oziŵa vinthu vatingaleke kwanisha ndipo oyembekezelalini kuti tikochita vinthu vamene tingavikwanishelini. (Ŵelengani Salmo 103:12-14.) Lomba kansi tingankhale am’ngwilo, tiliye chilema komasoti okwanila munjila yotyani?
5 Chinthu chamene chingayavye atumiki a Mulungu kunkhala woyondoloka ntima ni chikondi. Kukonda kwasu Mulungu, kulipeleka kwasu mokhulupilika kuli yove monga Atata ŵasu akululu, kufunika kunkhala mphela kokwanila komasoti kwa mphamvu. Keno chikondi chasu chingankhale mphela chotetyo olo pa nthawe yatuyesewa, tizankhalemphela okhulupilika. (1 Mb 28:9; Mt 22:37) Ganizilani soti za Mboni zitatu zamene zafotokozewa kumayambililo kwa nkhani ino. Ndaŵa yanji echita vamene ivi? Kansi nsimbi wamene uyu ozondana na kusangalala kusukulu, kapena kansi mulumbwana wamene uyo ochita nsoni akankhala pang’anda, kapena mwanalume wa pabanja ofuna kuchosewa ntchito? Eye vilitetyo. Koma olo ntetyo, ove oziŵa kuti Yehova ali na malangizo aweme, ndipo vamene ivi vuŵayavya kuti akoyika maganizo ŵawo pa vinthu vamene vukondwelesha atata ŵawo wakululu. Chikondi chawo kuli yove chuŵalimbikisa kuti akoyika Yehova pasogolo posankha vinthu. Tetyo oyeja-yeja kuwonesha kukhulupilika kwawo.
Chuma chupezeka m’Mawu a Mulungu
Nsanja ya Mulonda 11/2016 pedji 9 ndim. 3
Yehova ni Mulungu wa dongosolo
3 Chilengedwe chake chuwonesha kuti niwadongosolo, Baibolo yunena kuti “Yehova eyika maziko a ichi chalo mwanzelu,” Yunenasoti kuti. “Enkhazikisha kululu mozindikila.” (Miy 3:19) Sewo taŵanthu tuziŵa tyala “kambali katontho tyala ka vochita va [Mulungu],” ndipo “tikumvwa tyala kuŵelekesha kwapansi-pansi kwa mawu ŵake.” (Yob 26:14) Koma olo ntetyo vinthu vitontho tyala vatuziŵa, vutiyavya kuzindikila kuti Mapulaneti, Nyenyezi komasoti mulalang’amba vipangiwa mwadongosolo ngako. (Sl 8:3, 4) Mulalang’amba uli na Nyenyezi mamiliyoni anyinji, koma vonse vuyenda mwadongosolo. Pulaneti iliyonse ili na malo ŵake ŵayuyenda mozenguluka zuŵa ndipo vunkhala ngati kuti mapulaneti amene aŵa okonkheja malamulo apa nsewu! Vonse vamene ivi vukwanishika chifukwa chakuti Yehova evipanga mwanjila yakuti mapulaneti na nyenyezi vikoyenda mwadongosolo. Yove epanga kululu nachalo “mwanzelu” tetyo tufunikila kumutamanda, kumulambila komasoti kunkhala wokhulupilika kuli yove.—Sl 136:1, 5–9.
DISEMBA 18-24
CHUMA CHUPEZEKA M’MAWU A MULUNGU | YOBU 28-29
“Kansi muli na mbili yolingana na ya Yobu?”
Nsanja ya Mulonda 15/05/2002 pedji 22 ndim. 19
Wamilani ntima ŵanthu amene ofunikila thandizo
19 Nkhani za m’Baibolo zatakambilana, zumvwikisha mfundo yowonesha kuwama ntima kuli ŵanthu amene aliye vofunikilia va pamoyo komasoti amene angakwanishelini kuvipeza paŵeka. Abrahamu enzefunikila thandizo ya Betuele kuti ŵanthu a m’banja mwake kapena kuti am’tundu wake apitilije kunkhalapo. Yakobo enzefunikila thandizo ya Yosefe kuti n’tembo wake ukayikiwe kukanani. Ndipo Naomi enzefunikila thandizo ya Rute kuti zina ya mwana wake ipitilije kunkhalapo pa ng’anda yake. Abrahamu, Yakobo na Naomi sembe aliyekwanishe kuchita vamene ivo paliye kuthandiziwa. Chimozi-mozi masiku ŵano tufunikila kuwonesha kuwama ntima maka-maka kuli ŵanthu amene ofunikila thandizo. (Miy 19:17) Tufunika kukonkheja Yobu kolo yakale wamene “penze nzunzika esenga thandizo kwa Yehova; monga ni mwana wamasiye wamene ofunikila thandizo” ndipo “kuti yove aliyesenge sembe efooka.” Komasoti chisanzo cha Yobu ‘chetang’isha nakukondwelesha ntima wa mwanakazi wamasiye’ komasoti enze ‘menso ya wanthu osalola na olemala.’—Yob 29:12-15.
Insight–1 pedji 655 ndim. 10
Kavwalidwe
Mawu anyinji ophiphilisila okondakambiwa ponena za vovwala. Munthu akavwala inifomo oziŵika kuti ali pa ntchito kapena kampani iyakine. Nichimozi-mozi na vovwala vamene vakatishiliwa ntchito pophiphilisila mawu a m’Baibolo. Apa Baibolo yuwonesha kuti vochita komasoti nkhalidwe ya munthu yuwonesha kuti ali kumbali ya Yehova kapena kumbali ya chalo; vamene ivi vukatijana na fanizo ya Yesu yunena za chovwala chenzefunikila kuvwaliwa keno munthu akuya kuukwati. (Mt 22:11, 12) Lemba ya Chivumbulutso 16:14, 15, Ambuya ŵasu Yesu Khilisitu, otichenjeja kuti tufunikila kunkhala menso novwala malaya akunja amene otiziŵikisha monga Mboni yokhulupilika ya Mulungu wachendi. Tizazizimushiwe keno tingaleke kunkhala wokonzeka maka-maka “pansiku ya nkhondo ikulu ya Mulungu wamphamvu yonse.”
Nsanja ya Mulonda 1/02/2009 pedji 15 ndim. 3–4
Kansi muli na mbili yotyani?
Tingakwanishelini kusankha seka zina yangatipase tikavyalika. Koma olo ntetyo, mbili yatuziŵika nayo tuyipanga seka. (Miy 20:11) Tyani kulikonsha kuti: ‘Yesu komasoti Angelo ŵake kuti enze na mwayi wonipasa zina, kansi sembe enipasa zina yotyani? Kansi zina iweme yofokoza mbili yangu komasoti nkhalidwe yangu ingankhale yotyani?’
Konsho yamene iyi tufunikila kuiganizila ngako. Ndaŵa yanji tunena tetyo? Mfumu yanzelu Solomo elemba kuti “Vingankhale luweme kusankha zina iweme, kusiyana na chuma chinyinji”. (Miy 22:1) Kulaŵila chendi, keno tili na zina iweme komasoti mbili iweme m’dela yatunkhala niye kuti tili na chuma cha ntengo wapatali. Koma chofunika ngako n’chakuti keno tingankhale na zina iweme kuli Mulungu wasu, niye kuti tizapeze chuma chosasila. Kansi vamene ivi vingachitike motyani? Mulungu olonjeza kuti azalembe mu “buku ya chikumbukilo” mazina ya ŵanthu amene omuyopa ndipo azaŵapase moyo wosasila.—Mki 3:16; Chv 3:5; 20:12-15.
Chuma chupezeka m’Mawu a Mulungu
Ukani! wa 08/07/2000 pedji 11 ndim. 3
Kumwetulila—ninkhalidwe yofunika ngako kuli mwewo!
Kansi kumwetuli kukuyavyani kunkhala wosangalala? Chabwino, kansi mukumbukila kumwetuliliwa na munthu muyakine mwekukupangishilani kunkhala womasuka? Kapena kansi kusakumwetulilani kwa munthu muyakine, kwekupangishani kunkhala na wowa komasoti kuliwona kunkhala wosafunika? Kulaŵila chendi, kumwetulila kupangisha munthu kunkhala wosangalala. Vunkhala vosangalasa kuli munthu wamene omwetulila muyake, komasoti wamene omwetuliliwa. Munthu muyakine wamene otomolewa m’Baibolo zina yake Yobu, enena za adani ŵake kuti: “Nenzeŵamwetulila koma ove—enzekhulupilila lini —ndipo kungweleŵela kwa nkhope yangu enzekuzimwisha lini.” (Yob 29:24) “Kuwala” kwa nkhope ya Yobu, payakine kwenzetanthauza kukhulupilika komasoti chisangalalo chenze nacho.
DISEMBA 25-31
CHUMA CHUPEZEKA M’MAWU A MULUNGU | YOBU 30-31
“Vechichita Yobu kuti ankhale ntuŵa”
Nsanja ya Mulonda 15/04/2010 pedji 21 ndim. 8
Tufunikila kunkhala wolilesha!
8 Nawosoti Akhilisitu ŵachendi onkhalasoti na chilako-lako cha menso komasoti cha muŵili. Chifukwa chake mawu a Mulungu otilimbikisa kunkhala wolilesha pa nkhani ya vinthu vatuwona komasoti vatukumbwila. (1 Ak 9:25, 27; ŵelengani 1 Yohane 2:15-17.) Munthu wolungama Yobu, ezindikila kuti pali kukatijana pakati pa kuwona na kukumbwila. Yove enena kuti: “Nachita pangano na menso ŵangu. Lomba ningaloleshe tyani ndola?” (Yob 31:1) Yobu enzefuna lini kukumya mwanakazi na cholinga chofuna kuchita naye chiwele-wele, komasoti yove aliyelole olo patontho kuganizila za vinthu vamene ivo. Yesu emvwikisha luweme mfundo yakuti tufunikalini kuganizila za viwele-wele. Yove enena kuti: “Koma newo nukuuja kuti aliyense wololesha mwanakazi mpaka kumukumbwila wachita naye kale chigololo muntima mwake.”—Mt 5:28.
Nsanja ya Mulonda 1/09/2008 pedji 11 ndim. 4
Ganizilani za “Mapeto ŵake”
Mukaliye yamba ulwendo, mukolikonsha kuti, ‘Kansi njila yamene iyi ikuyakuni?’ Kuyamba mwaganizila poyamba za “nkhani yamene iyo” kungakuyavyeni kupewa kuchita vinthu vamene vingakuloŵesheni m’mavuto. Ŵanthu wonse amene onyalanyaza malangizo okhuza viwele-wele, okumana na mavuto monga matenda a YEZI, matenda osiyana-siyana opasilana poyonana, kutola vumo yapasanga, kutaya vumo, kusila kwa mabanja, kuzondana na ŵanthu ayakine komasoti kuvutika na chikumbuntima. Mtumwi Paulo efotokoza momvwika luweme vokonkhapo va ŵanthu amene ochita viwele-wele. Yove enena kuti “azaloŵelini mu Ufumu wa Mulungu.”—1 Ak 6:9, 10.
Nsanja ya Mulonda 15/11/2010 pedji 5–6 ndim. 15-16
Achilumbwana—mukolola kuti Mawu a Mulungu akokusogolelani
15 Kansi mwewo muwona kuti mungayesewe ngako pa nkhani yonkhala—wokhulupilika pa menso pa Mulungu mukankhala pagulu ya ŵanthu kapena mukankhala mweka? Tukayikilani kuti mukankhala kusukulu kutchito, muyeja-yeja kunkhala wosamala na vinthu vamene vingawononge ushamwali wanu na Mulungu. Panthawe yamupumula kusukulu kapena kutchito, mufunika kunkhala ngako wosamala chifukwa ninthawe yamene ingasokoneze minkhalidwe yanu komasoti kugonjesewa na viyeso mosavuta.
16 Ndaŵa yanji mufunikila kumvwila Yehova olo panthawe yamuli mweka? Mukokumbukila ivi: Vochita vanu vingachitishe kuti mukondweleshe ntima wa Yehova kapena kumumvwisha chisoni. (Ge 6:5, 6; Miy 27:11) Vochita vanu vukhuzasoti Yehova chifukwa chakuti yove “okudelani nkhaŵa.” (1 Pe 5:7) Yove ofuna kuti mukomumvwila na cholinga chakuti vinthu vikokuyendelani luweme. (Yes 48:17, 18) Mu nthawe ya Asiraeli Atumiki ŵake enze nyalanyaza malangizo ŵake, vamene ivi venzechitisha kuti Yehova akokumvwa ohisoni. (Sl 78:40, 41) Nneneli Daniel enzekondewa ngako na Yehova mwakuti m’ngelo emuuja kuti yove enze “munthu wokondewa ngako.” (Da 10:11) Ndaŵa yanji venze tetyo? Ndaŵa yakuti Daniel nthawe zonse enzenkhala wokhulpilika kwa Mulungu akankhala pagulu pa ŵanthu komasoti akankhala payeka.—Ŵelengani Danieli 6:10.
Chuma chupezeka m’Mawu a Mulung
Nsanja ya Mulonda 15/11/2005 pedji 11 ndim. 3
Mukomvwishila mwachikondi
Ayake a Yobu emvwishila nkhani pafupi-fupi 10 zechiwafotokozela Yobu. Yobu enena kuti: “Nulaka-laka kunkhala na munthu muyakine wonimvwishila!” (Yob 31:35) Ndaŵa yanji yove enena tetyo? Chifukwa chakuti kumvwishila kwawo kwenze kosayavya. Aliye muganizile komasoti aliye mvwishe maganizo ŵake. Kulaŵila chendi ove aliye khuziwe muntima mwawo monga mwakumvwila munthu wamene ni wachifundo. Koma mtumwi Paulo epeleka uphungu wakuti: “Monse munkhale a maganizo amozi, omvwilana chisoni, okonda abale, achifundo chikulu komasoti amaganizo olichefya.” (1 Pe 3:8) Kansi tingawoneshe tyani kuti nise achifundo? Njila imozi ni kumvwishila komasoti kukhuziwa na mavuto ŵakutifotokozela muyasu. Mawu otonthoja ŵatingalaŵile ni njila imozi yowonesha kuti tukhuziwa. Mwachisanzo tingalaŵile kuti “vamene ivi nivokhumudwisha chendi,” kapena kunena kuti “koma niye venze voŵaŵa chendi.” Njila iyakine nikufotokoza mfundo ziyakine zaŵatiuja munthu wamene uyo pa nthawe yatumulimbikisa, ivi vingawoneshe kuti tenzemumvwishila penzetifotokozela. Kumvwishila mwachikondi kutanthauza kumvwa mosamala osati mawu ŵeka ayi koma kuziŵa vakuganiza munthu wamene uyo olo kuti aliye tifotokozele vonse.