Kansi ni Mboni za Yehova zingani zamuziŵa? Ayakine a sewo tunkhala namwe pafupi, tuseŵenza namwe pamozi, olo tili m’kilasi imozi ku sikulu na mwewo. Payakine telaŵijanako namwe nkhani za m’Baibolo. Koma kansi nise ŵani makamaka, soti ndaŵa yanji tuwujako ayasu vatukhulupilila?

Nise olingana na ŵanthu ayakine onse. Tekulila kosiyana-siyana soti tili na minkhalidwe yosiyana-siyana. M’vuli umu ayakine ŵa sewo tenze m’vipembezo viyakine, soti ayakine enzokhulupilila lini Mulungu. Koma tikaliyenkhala Mboni, sewo tonse tepatula nthawi yofufuza luweme vayuphunzisa Baibolo. [2] (Machitidwe 17:11) Tevomeleja vetephunzila, komasoti aliyense payeka esalula kulambila Yehova Mulungu.

Kuphunzila Baibolo kutipindulisha. Sewo, monga ni ŵanthu ayakine onse, tukumana na mavuto soti tuphoniyesha mbali ziyakine. Koma chifukwa chakuti nsiku na nsiku tuyeja-yeja kukonkha mfundo za m’Baibolo pa moyo wasu, umoyo wasu unkhala uweme ngako. (Salimo 128:1, 2) Ichi niye chifukwa chiyakine chatuwujilako ayasu vinthu viweme vatuphunzila m’Baibolo.

Tukonkha mfundo za Mulungu. Mfundo za m’Baibolo zutiyavya kunkhala pa ntendele nonkhala aulemu, komasoti kunkhala na minkhalidwe monga chilungamo na chifundo. Mfundo za m’Baibolo zamene izi zuyavya ŵanthu kunkhala na moyo wathanzi komasoti kunkhala otang’ilila pa ntchito, soti zutang’isha mkatijano pa banja na minkhalidwe iweme. Tukhulupilila kuti “Mulungu aliye sankho,” tetyo nise banja ya pachalo chonse ya abale auzimu, soti pakati pasu paliye sankho olo mikangano yandale. Olo kuti tulingana na ŵanthu ayakine onse, gulu yasu ni yapadela.​—Machitidwe 4:13; 10:34, 35.

• Kansi a Mboni za Yehova olingana tyani na ŵanthu ayakine?

• Kansi a Mboni za Yehova aphunzila mfundo zotyani kufumila m’Baibolo?

Ŵanthu anyinji oganiza kuti zina yakuti Mboni za Yehova ni zina ya chipembezo chalombapano. Koma vyaka vopitilila 2.700 vapita, atumiki a Mulungu achendi enzeitiwa kuti “mboni” zake. (Yesaya 43:10-12) Chaka cha 1931 chikaliyefwika, tenzeitiwa kuti Ophunzila Baibolo. Ndaŵa yanji tesankha zina yakuti Mboni za Yehova?

Zina yamene iyi yuchitisha kuti ŵanthu aziŵe zina ya Mulungu wasu. M’mipukutu yakale ya Baibolo, zina ya Mulungu yakuti Yehova, yupezeka mmalo masauzande anyinji. Koma m’Mabaibolo anyinji zina yamene iyi eifumyamo noikamo mazina aulemu monga Abuye olo Mulungu. Koma Mulungu wachendi euja Mose kuti zina yake ni Yehova. Yove echiti: “Yamene iyi niye zina yangu mpaka kale-kale.” (Ekisodo 3:15) Apa, yove elisiyanisha na milungu yonse yawenye. Tumekela kuziŵika na zina ituŵa ya Mulungu.

Zina yamene iyi yufotokoza ntchito yasu. Ŵanthu anyinji akale, kuyambila na munthu wolungama Abele, echitila umboni za chikhulupililo chawo mwa Yehova. M’kupita kwa nthawe, Nowa, Abulahamu, Sara, Mose, Davide na ayakine enkhala m’gulu ikulu yamene iyi ya “mkumbi ukulu wa mboni.” (Aheberi 11:4–12:1) Mwachisanzo, munthu muyakine angankhale mboni m’khoti pa mulandu wa munthu wamene aliyelakwe, sewo nase nise okonzeka kuwujako ayasu za chendi chonena za Mulungu.

Tukonkheja chisanzo cha Yesu. Baibolo yunena kuti Yesu ni “mboni yokhulupilika komasoti yachendi.” (Chivumbulutso 3:14) Yesu elaŵila yeka kuti ‘eziŵikisha zina ya Mulungu’ ndipo ‘echitila umboni chendi’ chonena za Mulungu. (Yohane 17:26; 18:37) Tetyo osatila ngawo-ngawo a Yesu ofunikila kulengeza zina ya Yehova noiziŵikisha ku ŵanthu. Ivi niye vakulimbikila kuchita a Mboni za Yehova.

• Ndaŵa yanji Ophunzila Baibolo esankha zina yakuti Mboni za Yehova?

• Kansi Yehova wankhala na mboni pano pachalo kuyambila nthawe yanji?

• Kansi Mboni ikulu ya Yehova niŵani?

Baibolo yenenelatu kuti pavuli pa imfwa ya Khilisitu, pazankhale aphunzisi awenye pakati pa Akhilisitu oyambilila soti azasokoneze chendi cha m’Baibolo. (Machitidwe 20:29, 30) M’kupita kwa nthawe, vamene ivi vechitika chendi. Ove eyavija viphunziso va Yesu na viphunziso vachikunja, komasoti Chikhilisitu chawenye cheyamba. (2 Timoteyo 4:3, 4) Kansi tingaziŵe tyani kuti vatukhulupilila masiku ŵano niye vayuphunzisa chendi Baibolo?

Nthawe yefwika yakuti Yehova awulule chendi cha m’Baibolo. Yove elaŵililatu kuti ‘m’nthawe yosilijila, ŵanthu azaziŵe vinthu vinyinji vachendi.’ (Danieli 12:4) Mu 1870, kagulu ka ŵanthu enzesakila-sakila chendi cha m’Baibolo eziŵa kuti viphunziso va m’matchetchi anyinji venzelini va m’Malemba. Tetyo ove eyamba kusakila-sakila chendi cha m’Baibolo kuti apeze viphunziso vake ngavo-ngavo, soti Yehova eŵadalisa na chiziŵiso pa vinthu vauzimu.

Analume olitwala ephunzila Baibolo mosamala. Ophunzila Baibolo akhama amene awo, amene enkhalapo sewo tikaliyevyalika, epeza njila yophunzilila Baibolo yatukatishila ntchito mpaka pano. Ove enzetola nkhani imozi m’Baibolo noyamba kambilana. Akafwana lemba yovuta kuimvwisha m’Baibolo, enzewona malemba ayakine ofotokoza lemba yamene iyo. Akafwana mfundo yokatijana na Malemba onse, enzeilemba. Poilola Baibolo kuti ifotokoze yeka, ove efwana chendi chonena za zina ya Mulungu na Ufumu wake, cholinga chake pa ŵanthu na chino chalo, m’nkhalidwe wa akufwa, na chiyembekezo cha chiukililo. Vechipeza veŵamasula ku vikhulupililo na miyambo inyinji yawenye.​—Yohane 8:31, 32.

Pofwika mu 1879, ophunzila Baibolo eziŵa kuti yenze nthawi yakuti afalise chendi cha m’Baibolo. Tetyo, chaka chamene icho eyamba kufalisa magazini ya Nsanja ya Olonda Yolengeza Ufumu wa Yehova, yatufalisa mpaka pano. Masiku ŵano, tuwuja ŵanthu chendi cha m’Baibolo m’vyalo vokwanila 240 na m’vilaŵilo vopitililala 750. Kufumila kale, viliyechitikepo kuziŵa vinthu vachendi vinyinji tetyi!

• Pavuli pa imfwa ya Khilisitu, n’cinji chechitikila chendi cha m’Baibolo?

• Kansi n’chinji chatiyavya kupeza soti choonadi cha m’Mawu a Mulungu?

Kwa vyaka vinyinji, Mboni za Yehova zenzekatishila ntchito ma Baibolo osiyana-siyana. Enzepanga soti ma Baibolo ayakine noŵafalisa. Koma tewona kuti penzefunika Baibolo yomasuliliwa luweme kuti iyavye ŵanthu “kuziŵa choonadi molondola,” chamene niye chifunilo cha Mulungu ku ŵanthu onse. (1 Timoteyo 2:3, 4) Tetyo, mu 1950 teyamba kufalisa mbali za Baibolo yasu yuitiwa kuti Baibulo la Dziko Latsopano m’chilaŵilo chamakono. Pali pano Baibolo yamene iyi yamasuliliwa mokhulupilika komasoti molondola m’vilaŵilo vopitilila 130.

Penzefunika Baibolo yosavuta kumvwa. Vilaŵilo vuchinja m’kupita kwa nthawe, soti ma Baibolo anyinji onkhala na mawu akale amene ni ovuta kumvwa. Komasoti mipukutu yolondola yakale yamene yusiyana lini ngako na mipukutu yoyambilila ipezeka. Mipukutu yamene iyi yayavya kumvwishisha Chiheberi, Chiaramu na Chigiriki cha m’Baibolo.

Penzefunika Baibolo yamene yufotokoza mawu a Mulungu mokhulupilika. Omasulila Baibolo aliye ufulu wosintha malemba owujiliwa a Mulungu. Ove ofunika kukonkha mokhulupilika velembewa m’mipukutu yoyambilila. Olo n’tetyo, omasulila anyinji Okatishila lini ntchito zina ya Mulungu yakuti Yehova m’Malemba Opatulika.

Penzefunika Baibolo yamene yulemekeza Wolemba wake. (2 Samueli 23:2) M’Baibulo la Dziko Latsopano, ejoshelamosoti zina ya Yehova yamene yenzepezeka m’malo pafupifupi 7.000 m’mipukutu yakale ngako yoyambirira ya Baibolo, molingana na mwachuwoneshela chisanzo chili pansi apa.[2] (Salimo 83:18) Baibolo yamene iyi yumvwika luweme ngako kuŵelenga chifukwa yufotokoza luweme maganizo a Mulungu. Ivi vili tetyo chifukwa chakuti kwa vyaka vinyinji pechitika ntchito ikulu yosakila-sakila maumboni osiyana-siyana. Keno muli na Baibulo la Dziko Latsopano olo muliye, tukulimbikisani kunkhala na chizoloŵezi choŵelenga Mawu a Yehova nsiku iliyonse.​—Yoswa 1:8; Salimo 1:2, 3.

• Ndaŵa yanji tewona kuti penzefunika Baibolo yokonzewa soti?

• Kansi ni chizoloŵezi chotyani chakufunikila kunkhala nacho munthu kuti aphunzile chifunilo cha Mulungu?