Ŵanthu anyinji eleka kuluta ku matchetchi chifukwa chakuti opezako lini thandizo yauzimu olo chitonthozo. Ndaŵa yanji mufunika kupezeka pa misonkhano ya Mboni za Yehova? Kansi muzafwaneko chinji kumisonkhano yasu?

Mukakondwele kunkhala na ŵanthu okondana nosamalilana. Akhilisitu a m’vyaka 100 voyambilila, enze m’mipingo yosiyana-siyana soti enzesonkhana kuti alambile Mulungu, aphunzile Malemba notang’ishana. (Aheberi 10:24, 25) Poziŵa kuti pa misonkhano yawo enzekondana, ove enzewona kuti ali pakati pa azishamwali ngawo-ngawo, abale na azilongosi ŵawo auzimu. (2 Atesalonika 1:3; 3 Yohane 14) Sewo nase tukonkha chisanzo chawo soti tutemwa ngako.

Kuwama kokonkha mfundo za m’Baibolo. Mu nthawe ya m’Baibolo, analume, anakazi na ŵana enzesonkhana pamozi. Niye mwavilili na masiku ŵano. Aphunzisi oyenelela okatishila ntchito Baibolo kuti atiyavye kuziŵa mwatingakatishile ntchito mfundo za m’Baibolo. (Deuteronomo 31:12; Nehemiya 8:8) Pa nkhani yokambilana na omvwishila na poimba nyimbo, onse onkhala na mwayi wolaŵila vapindulapo. Vamene ivi vutipasa mwayi wofotokoza za chiyembekezo chasu cha Chikhilisitu.​—Aheberi 10:23.

Munkhale na mwayi yotang’isha chikhulupililo chanu mwa Mulungu. Pa nthawe iyakine mtumwi Paulo euja mpingo uyakine kuti: “Nufunishisha kukuwonani, . . . kuti tizetang’ishane mu chikhulupililo, chanu na changu.” (Aroma 1:11, 12) Pa misonkhano yasu tukatijana na akwasu auzimu nthawi zonse, soti ivi vutang’isha chikhulupililo chasu na chilakolako chasu chokonkha mfundo za Chikhilisitu.

Tyani osawela ku msonkhano wasu sondo ino kuti muzawone mweka vatalaŵijana? Tizakulondeleni na manja aŵili. Misonkhano yasu ni mahala soti ponkhala lini kuyendesha mbale ya zopeleka.

• Kansi misonkhano yasu tukonkha chisanzo chotyani?

• Kansi kupezekapo kwasu pa misonkhano ya Chikhilisitu kuli na ubwino wotyani?

Olo kuti tupita m’malo okosa ovuta kupitako olo keno kuliyewuche bwino n’kozizila, nthawi zonse tupezekapo pa misonkhano Yachikhilisitu. Mboni za Yehova zukumana na mavuto pa moyo wawo soti zuŵeŵa na ntchito. Koma zulova lini ku misonkhano Yachikhilisitu. Ndaŵa yanji?

Misonkhano yutitang’isha. Ntumwi Paulo elaŵila kuti “tiganizilane.” Apa enzelaŵila za kuganizila ŵala ŵatusonkhana nawo. (Aheberi 10:24) Mawu amene aŵa otanthauza “kuganizilana mosamala ngako,” m’mawu ayakine, kuziŵana luweme muyake na muyake. Tetyo mawu a ntumwi Paulo amene aŵa otitag’isha kuti tikodela nkhaŵa ayasu. Tikayamba kuziŵana na mabanja ŵa Akhilisitu ayasu, tufwika poziŵa kuti ayakine mwa abale ŵasu apilila mavuto olingana na ŵasu, komasoti kuti ove angatiyavye kupilila.

Kutang’isha ushamwali wasu. Ŵanthu ŵatusonkhana nawo, ni ŵanthu lini ŵatuziŵana nawo tyala patali-patali yayi, koma ni azishamwali a pantima. Nthawe ziyakine, tunkhala na nthawi yotandala nawo pamozi. Kansi kutandala nawo pamozi kuli na ubwino wotyani? Kutandala nawo pamozi kwamene uku kutiyavya kuwona kuti tonse nise ofunika, soti vamene ivi vutang’isha chikondi chasu. Tetyo, ayasu akakumana na mavuto, tunkhala okonzeka kuŵayavya chifukwa nise azishamwali ŵawo ngawo-ngawo. (Miyambo 17:17) Keno tutandala na ŵanthu wonse a mumpingo, tuwonesha kuti “tusamalilana molingana.”​—1 Akorinto 12:25, 26.

Tukulimbikishani kusankha ŵanthu ochita chifunilo cha Mulungu kuti ankhale azishamwali ŵanu. Azishamwali amene aŵa mungaŵafwane pakati pa Mboni za Yehova. Osalola chilichonse kukusokonezani kukatijana nase.

• Kansi kukatijana kwasu pa misonkhano kuli na ubwino wotyani?

• Kansi ni nthawe yanji pamungafune kusonkhana nase kuti mutiziŵe luweme?

Misonkhano ya Akhilisitu oyambilila yenzeyangijilapo kuimba nyimbo, kupemphela, kuŵelenga nokambilana Malembo, soti penzenkhala lini mwambo ulionse wapadela. (1 Akorinto 14:26) Muzawone volingana na vamene ivi mukawela pa misonkhano yasu.

Malangizo ŵake ofumila m’Baibolo soti ni oyavya. Kosilijila kwa sondo, mpingo uliwonse usonkhana nomvwishila Nkhani ya m’Baibolo ya maminesi 30. Nkhani yamene iyi yufotokoza mwatingakatishile ntchito Malemba pa moyo wasu komasoti vakunena Malemba vokhuza nthawe yatunkhalamo. Wolaŵila nkhani pakuŵelenga Malemba, tonse tukonkha m’ma Baibolo ŵasu. Nkhani ikasila, ponkhala Phunzilo ya “Nsanja ya Olonda” ya 1 awa, soti onse opezekapo onkhala na ufulu woyankhapo pokambilana nkhani ya mu Nsanja ya Olonda yophunzila. Phunzilo yamene iyi yutiyavya kukatishila ntchito malangizo a m’Baibolo pa moyo wasu. Nkhani yamene iyi yuphunziliwa m’mipingo yonse yopitilila pa 110.000 pachalo chonse.

Tuyavyiwa kuyangijila luso yasu yophunzisa. Mkati mwa sondo, tunkhala soti na nsonkhano wa mbali zitatu uitiwa kuti Utumiki komasoti moyo wasu wa chikhilisitu, ufumila pa mfundo za m’kabuku ka Misonkhano ka Utumiki komasoti moyo wasu wa chikhilisitu, kamene kowela mwezi uliwonse. Mbali yoyamba ya msonkhano wamene uyu ni yakuti Chuma chupezeka m’mawu a Mulungu, yamene yutiyavya kumvwishisha mfundo za m’Baibolo. Mbali yachiŵili ni yakuti Kuphunzisa na luso mu utumiki, yunkhala na visanzo vamene vutiyavya mwatingalalikilile nkhani za m’Baibolo kuli ŵanthu ayakine. Mulangizi otipasa malangizo amene otiyavya kuyangijila luso yasu yoŵelenga nolaŵila nkhani. (1 Timoteyo 4:13) Mbali yosilijila ni yakuti Moyo wasu wa chikhilisitu yamene yutiyavya kuwona mwatingakatishile ntchito mfundo za m’Baibolo pa moyo wasu. Pa mbali yamene iyi ponkhala nkhani yokambilana olo kuti nkhani ya makonsho na mayankho yamene yutiyavya kumvwisha Baibolo.

Mukazawela ku misonkhano yasu, tukhulupilila kuti muzakondwele ngako na maphunzilo apalulu a m’Baibolo yati mukalondele.​—Yesaya 54:13.

• Kansi mukaphunzile chinji mukazawela pa misonkhano ya Mboni za Yehova?

• Kansi ni nsonkhano wotyani wamungakonde kupezekapo?

Kansi mwaviona vithunzithunzi vili m’kabuku kano vuwonesha mwazuvwalila luweme Mboni za Yehova pa misonkhano yawo? Ndaŵa yanji tusamala kavwalidwe kasu na maonekedwe ŵasu?

Tufuna kulemekeza Mulungu wasu. N’chendi kuti Mulungu owona vinyinji osati tyala maonekedwe ŵasu. (1 Samueli 16:7) Koma patusonkhana kuti timulambile, tufuna kulemekeza yove na olambila ayasu. Keno tingankhale na mwayi wa kuyawonekela kwa pulezidenti, tingasamale mawonekedwe ŵasu polingalila za udindo wake. Tetyo, mawonekedwe ŵasu pa misonkhano owonesha kuti tulemekeza “Woweluza wa chalo chonse,” Yehova Mulungu na malo ŵasu olambilila.​—Genesis 18:25.

Tufuna kuwonesha kuti tukonkha mfundo zatuphunzila. Baibolo yulimbikisa Akhilisitu kuvwala “mwaulemu komasoti mwanzelu.” (1 Timoteyo 2:9, 10) Kuvwala “mwaulemu” kutanthauza kupewa vovwala vuwonesha monga tuliwoneshela komasot vowonesha kusalilemekeza. Soti ‘nzelu’ yutiyavya kupewa kuvwala motailila, monga kuvwala vovwala votina, vifupi, olo soti vikulu ngako. Mfundo zamene izi zupasa munthu ufulu wosankha vovwala vosiyana-siyana. Mawonekedwe ŵasu aweme ‘angawamishe chiphunziso cha Mpulumusi wasu’ na ‘kutamanda Mulungu’ paliye mawu. (Tito 2:10; 1 Petulo 2:12) Kuvwala kwasu luweme pa misonkhano kungayavye ayakine kunkhala na maganizo oyenela polambila Yehova.

Osalola kuti kavwalidwe kanu kakukangisheni kuwela ku Ng’anda ya Ufumu. Kavwalidwe koyenelela kotanthauza lini kuvwala vovwala vodula olo va mafashoni apalulu, koma kuvwala vituŵa na vowoneka luweme.

• Ndaŵa yanji nkhani ya kavwalidwe kasu polambila Mulungu ni ikulu?

• Kansi ni mfundo zotyani zingatiyavye pa nkhani ya kavwalidwe na maonekedwe?

Keno muphunzila Baibolo na wa Mboni za Yehova, niye kuti mukonzekelelatu phunzilo iliyonse. Kuti mupindule ngako, mukochita chimozi-mozi na misonkhano ya mpingo. Chofunika ngako kuti tikwanishe vamene ivi ni kunkhala na chiyoloŵezi chiweme.

Sankhani malo ŵati mukokonzekelela na nthawe yake. Kansi ni nthawe yanji yamusavutika kumvwa vamuŵelenga? Kansi ni m’mawa ngako mukaliyoyamba ntchito olo usiku pavuli pakuti ŵana ŵanu ayona? Olo kuti mukwanisha lini kuŵelenga nthawe itali, sankhani nthawe itontho yamungakwanishe, soti osalola chilichonse kukusokonezani. Nkhalani pa malo paliye zungo, komasoti zimwani wailesi, TV na foni kuti osati vikusokonezeni. Kupemphela mukaliyoyamba kukonzekela kukuyavyeni kuchefya nkhaŵa za nsiku yamene iyo kuti maganizo ŵanu wonse ankhale pa Mawu a Mulungu.​—Afilipi 4:6, 7.

Chongani mfundo, komasoti konzekelani kuyayankhapo. Choyamba, fwanani chithunzi cha nkhani yonse. Ganizilani mutu wa nkhani olo chaputala, onani mwayukatijilana mitu itontho-itontho na mutu ukulu wa nkhani, soti onani vithunzi-thunzi na makonsho oweleja amene owonesha mfundo zikulu-zikulu za nkhani yamene iyo. Pavuli pake ŵelengani ndime iliyonse nofwana yankho ya konsho yake. Ŵelengani malemba onse osakatiwa mawu, soti onani mwayokatijilana na nkhani yamene iyo. (Machitidwe 17:11) Mukafwana yankho, chongani mawu oŵelengeka ofunika, olo kachiganizo m’ndime kamene kangakukumbusheni yankho. Pa misonkhano, mungapanamike kwanja noyankha m’mawu ŵanu-ŵanu.

Keno mukonzekela vatuphunzila sondo iliyonse pa misonkhano, muziŵe mfundo zinyinji za m’Baibolo.​—Mateyu 13:51, 52.

• Kansi muwamila kunkhala na chiyoloŵezi chotyani kuti mukokonzekela misonkhano?

• Kansi mungakonzekele tyani kuti mukayankheko pa misonkhano?

Kuyambila kale, Yehova ofuna kuti mabanja onse akopeza nthawe yonkhala pamozi kuti atang’ishe umoyo wawo wa kuuzimu na wa banja yawo. (Deuteronomo 6:6, 7) N’chifukwa chake a Mboni za Yehova opatula nthawi yochita kulambila kwa pabanja sondo iliyonse. Okambilana momasuka nkhani za kuuzimu molingana na vosoŵa va banja yawo. Olo kuti munkhala mweka, nthawe yamene iyi ni mpata uweme wovwendela pafupi na Mulungu mwa kuphunzila nkhani ya m’Baibolo yamungasankhe.

Ni nthawe yovwendela pafupi na Yehova. “Vwendelani kuli Mulungu, ndipo yove naye akuvwendeleleni.” (Yakobo 4:8) Patuphunzila za minkhalidwe ya Yehova na vochita vake kupitila m’Mawu ŵake, tumuziŵa luweme. Njila yosavuta yoyambila kulambila kwa pabanja ni kuŵelengela pamozi Baibolo mokweja mawu kwa maminesi oŵelengeka. Mungachite ivi mwa kukonkha ndandanda ya sondo iliyonse ya nsonkhano wa Utumiki komasoti moyo wasu wa chikhilisitu. Aliyense m’banja angapasiwe mbali yakuti aŵelenge, pavuli pake mungakambilane vamwaphunzila m’Malemba.

Ni nthawe yotang’isha mgwilizano pabanja. Mwanalume na mwanakazi wake, komasoti makolo na ŵana, otang’isha mgwilizano pabanja pakuphunzila Baibolo pamozi. Nthawe yamene iyi yuwamila kunkhala yosangalasa komasoti yantendele, yamene aliyense m’banja ofunishisha kupezekapo sondo iliyonse. Molingana na msinkhu wa ŵana, makolo angasankhe nkhani zoyavya, payakine angakatishile ntchito nkhani za mu Nsanja ya Olonda na Galamukani! olo nkhani zupezeka pa webusaiti yasu ya jw.org. Mungakambilane mavuto ŵakukumana nawo ŵana ŵanu ku sikulu na mwangachitile na mavuto amene awo. Mungalolele pulogilamu ya JW Broadcasting (tv.jw.org) pavuli pake mungakambilane monga banja. Mungaphunzile nyimbo zati zikaimbiwe pa misonkhano pavuli pake mungalyeko twakulya tuyakine twamungakonze.

Nthawe yapadela yamene iyi yolambila Yehova sondo iliyonse iyavye aliyense m’banja kukonda Mawu a Mulungu soti yove adalise ngako nthina yanu.​—Salimo 1:1-3.

• Ndaŵa yanji tupatula nthawi yochita kulambila kwa pabanja?

• Kansi makolo angachite chinji kuti aliyense m’banja akosangalala na kulambila kwa pabanja?

Ndaŵa yanji vinso va aŵa ŵanthu vuwoneka vosangalala? Ali pa umozi mwa misonkhano yasu ikulu-ikulu. Atumikia a Mulungu akale elamuliwa kuti akosonkhana katatu pa chaka. Sewo nase tuyembekezela mwachidwi misonkhano ikulu-ikulu. (Deuteronomo 16:16) Chaka chilichonse tunkhala na misonkhano itatu: misonkhano yadela iŵili ya siku imozi na nsonkhano wachigawo wa masiku atatu. Kansi misonkhano yamene iyi yutiyavya m’njila zotyani?

Yutang’isha ubale wasu wa chikhilisitu. Aisiraeli enzosangalala potamanda Yehova “pansonkhano.” Sewo nase tutemwa pomulambila pamozi pa misonkhano yapadela. (Salimo 26:12; mawu amnyansi 111:1) Misonkhano yamene iyi yutipasa shuko yowonana notandala na Mboni zofumila ku mipingo iyakine olo ku vyalo viyakine. Mzuŵa tulyela pamozi chakulya pa malo a msonkhano. Vamene ivi vutang’isha mzimu wa ushamwali pa maphwando auzimu amene aŵa. (Machitidwe 2:42) Pa misonkhano yamene iyi tuzionela seka chikondi chamene chugwilizanisa “gulu yonse ya abale” ya pachalo chonse.​—1 Petulo 2:17.

Yutiyavya kupita pasogolo mwauzimu. Aisiraeli epindula soti mwa ‘kumvwisha luweme mawu’ a m’Malemba yechiŵafotokozela. (Nehemiya 8:8, 12) Sewo nase tuwona kuti malangizo a m’Baibolo yatulondela pa misonkhano yasu ni yofunika ngako. Mutu wa msonkhano uliwonse ufumila m’Malemba. Tuphunzila mwatingachitile chifunilo cha Mulungu pa moyo wasu kupitila mu nkhani zulaŵiliwa na munthu m’mozi, nkhani zosiilana na visanzo. Tutang’ishiwa tikamvwa za ayasu opilila mavuto ŵakukumana nawo nthawi ino yovuta chifukwa chonkhala Akhilisitu. Pa nsonkhano wachigawo, ponkhala masewelo yamene yotiyavya kumvwishisha nkhani za m’Baibolo notiphunzisa mfundo zofunika ngako. Pa nsonkhano uliwonse ukulu, ponkhala ubatizo kwa ŵala elitwala kwa Mulungu.

• Ndaŵa yanji misonkhano ikulu-ikulu yunkhala nthawi yosangalasa?

• Kansi mungapindule m’njila zotyani keno mupezeka pa misonkhano yasu ikulu-ikulu?

Pa nthawe yakuti wasala patontho kufwa, Yesu elaŵila kuti: “Uthenga uweme uyu wa Ufumu uzalalikiliwe pachalo chonse kuli ŵanthu, kuti unkhale umboni ku mitundu yonse, pamene apo mapeto azafwike.” (Mateyu 24:14) Kansi ntchito yamene iyi yolalikila pachalo chonse sembe yekwanishika tyani? Sembe yekwanishika mwa kukonkha chisanzo chechisiya Yesu penze pachalo.​—Luka 8:1.

Tufwikila ŵanthu m’mang’anda mwawo. Yesu ephunzisa ophunzila ŵake kulalikila uthenga uweme ku ng’anda na ng’anda. (Mateyu 10:11-13; Machitidwe 5:42; 20:20) Alaliki a m’vyaka 100 voyambilila amene awo epasiwa magawo olalikilamo. (Mateyu 10:5, 6; 2 Akorinto 10:13) Olo masiku ŵano, ntchito yasu yolalikila yuchitika mwadongosolo, soti mpingo uliwonse unkhala na gawo. Vamene ivi vutiyavya kumvwila lamulo ya Yesu yakuti “tilalikile kuli ŵanthu na kupeleka umboni wokwanila.”​—Machitidwe 10:42.

Tuyeja-yeja kuŵafwikila ŵanthu kulikonse kwangapezeke. Yesu epeleka soti chisanzo mwa kulalikila ŵanthu ku malo osiyanasiyana, monga mmbali mwa nyanja olo pa chisime. (Maliko 4:1; Yohane 4:5-15) Sewo nase tulaŵijana na ŵanthu nkhani za m’Baibolo kulikonse kwatingaŵapeze​—m’miseu, m’malo a malonda, m’mapaki olo pa foni. Tikankhala na mpata uweme, tulalikila soti ŵanthu ŵatunkhala nawo pafupi, ayasu a kuntchito, ayasu a kusikulu na abanja ŵasu. Njila zonse izi zayavya kuti ŵanthu mamiliyoni pachalo chonse amvwe ‘uthenga uweme wa chipulumuso.’​—Salimo 96:2.

Mwa niŵani wamungafune kuwujako uthenga uweme wa Ufumu wa Mulungu na vati ukaŵachitile kusogolo? Osaleka kuŵawuja za uthenga wa chiyembekezo wamene uyu, awujeni kamangu!

• Kansi ni “uthenga uweme” wotyani watufunika kulalikila?

• Kansi a Mboni za Yehova okonkha tyani chisanzo cha Yesu polalikila?

Kanyinji-kanyinji mawu akuti “mpainiya” onena za munthu opeza malo anyowani nosegulila ayakine njila kuti akonkhe. Yesu enze monga ni mpainiya chifukwa etumijiwa pachalo kuzakata ntchito yopasa moyo nosegula njila ya chipulumuso. (Mateyu 20:28) Masiku ŵano, osatila ŵake otolela chisanzo chake mwa kuseŵenza nthawe ikulu pa ntchito yopanga ophunzila. (Mateyu 28:19, 20) Ayakine okata ntchito yamene iyi yuitiwa kuti utumiki wa upainiya.

Mpainiya ni munthu wamene ntchito yake ni kulalikila nthawe zonse. A Mboni za Yehova onse olalikila uthenga uweme. Koma ayakine achinja vinthu pa moyo wawo kuti ankhale apainiya a onkhazikika, soti oseŵenza maola 70 mwezi uliwonse pa ntchito yolalikila. Kuti akwanishe kuchita vamene ivi, anyinji opeza ntchito ya maola atontho. Ayakine osankhiwa kunkhala apainiya apadela kuti akatumikile kumalo kufunika antchito anyinji. Olalikila maola 130 olo kupitililapo mwezi uliwonse. Apainiya okhutila na moyo wosafuna vinyinji, soti odalila Yehova kuti aŵapase vosoŵa vawo. (Mateyu 6:31-33; 1 Timoteyo 6:6-8) Ŵala amene angakwanishe lini kuchita upainiya wa nthawe zonse, angankhale apainiya othandiza keno angakwanishe. Amene aŵa angayangijile ntchito yawo yolalikila kuti akwanishe maola 30 olo 50 pa mwezi.

Mpainiya okonda Mulungu na ŵanthu. N’nga ni Yesu, tuzindikila kuti ŵanthu anyinji masiku ŵano ali na njala yauzimu. (Maliko 6:34) Koma sewo tili na uthenga uweme wamene ungaŵayavye noŵapasa chiyembekezo chotang’a cha msogolo. Mpainiya okatishila ntchito nthawe yake na mphamvu zake zonse poyavya ayakine mwauzimu chifukwa cha chikondi. (Mateyu 22:39; 1 Atesalonika 2:8) Vokonkhapo vake n’vakuti, chikhulupililo cha mpainiya chunkhala chotang’a soti ovwendela pafupi na Mulungu, komasoti onkhala otemwa ngako.​—Machitidwe 20:35.

• Kansi mungalaŵile kuti mpainiya ni ŵani?

• Ndaŵa yanji ayakine ochita upainiya wa nthawi zonse?

Maphunzilo aumulungu ankhala chizindikilo cha Mboni za Yehova kwa nthawi itali. Atumiki a nthawi zonse olondela maphunzilo apadela amene oŵayavya ‘kukwanilisha mbali zonse za utumiki wawo.’​—2 Timoteyo 4:5.

Sikulu ya utumiki wa upainiya. Mpainiya wamene wakwanisha chaka chimozi, oloŵa sikulu ya masiku 6 yamene yuchitikila pa Ng’anda ya Ufumu ya kudela kwawo. Cholinga chake ni kuyavya apainiya kuvwendela pafupi na Yehova, kunkhala aluso m’mbali zonse za ulaliki nopitilija kutumikila mokhulupilika.

Sikulu ya Akhilisitu Olalikila za Ufumu. Sikulu yamene iyi yuchitika kwa myezi iŵili. Cholinga chake ni kuphunzisa apainiya amaluso amene ni okonzeka kufuma kwawo na kuyatumikila ku madela kwamene kufunika antchito anyinji. Otolela chisanzo cha Mlaliki mkulu wamene enkhalako pano pachalo Yesu Khilisitu, soti olaŵila kuti, “Newo nilipo! Nitumijeni.” (Yesaya 6:8; Yohane 7:29) Kutumikila ku madela ayakine kwamene ni kutali na kwawo kungafunike kusintha nophunzila kankhalidwe ka kwamene uko. Chinkhalidwe, nyengo na vakulya vingankhale vosiyana ngako na va kwawo. Pangafunikile soti kuphunzila chilaŵilo cha kwamene uko. Sikulu yamene iyi yuyavya abale na alongo amene ni mbeta komasoti ŵala ali pa banja amene ali na vyaka va pakati pa 23 mpaka 65. Sikulu yamene iyi yuŵayavya kukulisha minkhalidwe yauzimu yamene ni yofunika ngako mu utumiki wawo nonkhala na maluso amene angaŵayavye kutumikila Yehova na gulu yake.

Sikulu ya Giliyadi. Mu Chiheberi, mawu akuti “Giliyadi” otanthauza “Mulu wa Mboni.” Kufumila mu chaka cha 1943, amishonale opitilila pa 8.000 atumijiwa m’vyalo vosiyana-siyana kuyachitila umboni “mpaka kolekejela kwa chino chalo.” Soti pali vokonkhapo viweme. (Machitidwe 13:47) Amishonale pechitumijiwa ku chalo cha Peru, kwenzeve mpingo uliwonse. Koma lomba kuli mipingo yupitilila pa 1.000. Amishonale pechiyamba kutumikila ku Japan, kwenze Mboni zosakwanila 10. Koma lomba kuli Mboni zupitilila pa 200.000. Sikulu ya Giliyadi, yamene yuchitika kwa myezi 5, yuyangijilapo kuphunzila Mawu a Mulungu mofwikapo. Ŵala otumikila monga apainiya apadela olo amishonale na ŵala ali pa ofesi ya nthambi olo opanamila oyendayenda niye oitiwa kuloŵa sikulu yamene iyi kuti alondele maphunzilo ofwikapo kuti ayavye notang’isha ntchito yolalikila pachalo chonse.

• Kansi cholinga cha Sikulu ya Utumiki wa Upainiya n’chinji?

• Kansi niŵani oyenelela kuloŵa Sikulu ya Akhilisitu Olalikila za Ufumu?