Kansi mwewo mwakonzekela kuti mubatiziwe?

Mwewo mwaphunzila vinthu vinyinji vokhuza Yehova pa nthawe yonse yamwankhala muphunzila Baibolo. Tukaikilalini kuti mwachinja vinthu viyakine na cholinga chakuti mukokatishila ntchito vamwaphunzila m’Baibolo. Komalomba, vingachitike kuti pali vinthu viyakine vukukangishani kuti mulipeleke kwa Yehova komasoti kubatiziwa. M’mutu uno, tikambilane vinthu viyakine vukangisha ŵanthu kuti abatiziwe komasoti tikambilane vamungachite mwewo kuti vamene ivi osati vikukangisheni kubatiziwa.

1. Kansi mufunikila kuziŵa vinthu vinyinji tyani kuti mukabatiziwe?

Kuti mubatiziwe, mufunikila kuziŵa “choonadi molondola.” (1 Timoteyo 2:4) Vamene ivi vutanthauzalini kuti, kuti mukabatiziwe mufunikila kuyamba mwaziŵa yankho ya konsho iliyonse yangakukonsheni ŵanthu yokhuza Baibolo. Tunena tetyo ndaŵa olo Mkhilisitu wamene ebatiziwa nikale opitilija mphela kuphunzila vinthu viyakine. (Akolose 1:9, 10) Koma mwewo mufunikila kuyamba mwaziŵa mfundo zoyambilila za m’Baibolo kuti mukabatiziwe. Akulu ŵa mumpingo akuyavyeni kuziŵa kuti keno vamwaphunzila ni vokwanila lomba olo yayi vokhuza Baibolo.

2. Kansi ni vinthu 4 votyani vamufunikila kuchita kuti mubatiziwe?

Mukaliyebatiziwa, mufunikila “kulapa komasoti kuchinja.” (Ŵelengani Machitidwe 3:19.) Vamene ivi vutanthauza kuti mufunika kulimvwila chisoni chifukwa cha machimo ŵemwichita komasoti kumusenga Yehova kuti akukhululukileni. Komasoti mufunika kuyeja-yeja kupewa kuchita vinthu vakuwona Mulungu kuti ni viipa noyamba kuchita vakufuna yove. Kuyangijila pali vamene ivi, mufunikasoti kusonkhana na mpingo komasoti kulalikila monga wofalisa wosabatiziwa.

3. Ndaŵa yanji tufunikilalini kulola kuti wowa utikangishe kubatizika?

Ŵanthu ayakine oyopa kubatiziwa chifukwa owona kuti angakangiwe kukwanilisha vechilonjeza kwa Yehova. Ni chendi kuti nthawe ziyakine mungaphoniyeshe vinthu, koma ziŵani kuti olo analume na anakazi okhulupilika amene otomolewa m’Baibolo nawo enzephoniyesha vinthu viyakine. Koma Yehova oyembekezelalini kuti atumiki ŵake akochita vinthu mosaphoniyesha kanthu yayi. (Ŵelengani Salimo 103:13, 14.) Yehova okondwela keno muyeja-yeja kuchita viweme! Yove ni wokonzeka kukuyavyani. Ndipo Yehova otisimikijila kuti “paliye chamene chingatilekanishe na chikondi chake.”—Ŵelengani Aroma 8:38, 39.

VATI TIPHUNZILE

4. Yejani kumuziŵa luweme Yehova

Kansi mufunika kuziŵa vinthu vinyinji tyani vokhuza Yehova kuti mubatizike? Kuti mukokonda Yehova komasoti kuchita vinthu vumukondwelesha, mufunikila kumuziŵa luweme. Lolelani VIDIYO kuti muwone mwakuchitila ŵanthu ayakine amene ophunzila Baibolo pachalo chonse. Ndipo pavuli pake mukambilane konsho iyi.

VIDIYO: Vangachite munthu kuti abatizike (3:56)

• Mu vidiyo yamene iyi n’chinji chiyavya ŵanthu ali mwamene umu kukonzekela kuti akabatiziŵe?

Ŵelengani Aroma 12:2, ndipo pavuli pake mukambilane makonsho aŵa:

• Kansi mwewo pali chilichonse chamukaikila chokhuza vayuphunzisa Baibolo olo vakuphunzisa a Mboni za Yehova vokhuza choonadi?

• Keno ni tetyo, kansi n’chinji chamungachite?

5. Mungakwanishe kusilija chinthu chingakukangisheni kuti mubatiziwe

Aliyense okumana na mavuto akasankha kulipeleka kwa Yehova komasoti kubatiziwa. Kuti muwone chisanzo cha vamene ivi, lolelani VIDIYO, ndipo pavuli pake mukambilane makonsho aŵa:

VIDIYO: Ekwanisha kusilija vinthu vamene sembe vimukangisha kuti abatiziwe (5:22)

• Kansi Narangerel ekwanisha kusilija vinthu votyani vamene sembe vimukangisha kutumikila Yehova?

• Kansi kukonda Yehova kwimuyavya tyani kuti akwanishe kusilija vinthu vamene sembe vimukangisha kuti abatiziwe?

Ŵelengani Miyambo 29:25 na 2 Timoteyo 1:7, ndipo pavuli pake mukambilane konsho iyi:

• Ndaŵa yanji tutang’a ntima nosilija vinthu vamene venzefuna kutikangisha kutumikila Yehova?

6. Mukokhulupilila kuti Yehova angakuyavyeni

Yehova angakuyavyeni kuti mukomukondwelesha. Lolelani VIDIYO, ndipo pavuli pake mukambilane makonsho aŵa:

VIDIYO: Yehova Mulungu akuyavyeni (2:50)

• Umu mu vidiyo, kansi sembe ni chinji chimukangisha wala wophunzila Baibolo kuti abatiziwe?

• Kansi ni mfundo yotyani yechiphunzila imuyavya kuti osati akokaikila kuti Yehova amuyavye?

Ŵelengani Yesaya 41:10, 13, ndipo pavuli pake mukambilane konsho iyi:

• Ndaŵa yanji mufunikalini kukaikila kuti mungakwanishe vonse vemwilonjeza pa nthawe yemwenzelipeleka kwa Yehova?

7. Pitilijani kumutembeja Yehova chifukwa cha chikondi chechikuwoneshani

Mukoganizila ngako chikondi chechikuwoneshani Yehova, niye pamumutembeja ngako ndipo vamene ivi vingakuchitisheni kuti mufune kumutumikila kwa moyo wanu wonse. Ŵelengani Salimo 40:5, ndipo pavuli pake mukambilane konsho iyi:

• Kansi ni vinthu votyani vawakuchitilani Yehova vamene muvitembeja ngako?

Mneneli Yeremiya enzekonda Yehova na mawu ŵake komasoti enzetembeja ngako mwayi woziŵika na zina ya Yehova. Yove enena kuti: “Mawu ŵanu onisangalasa nokondwelesha ntima wangu, pakuti newo nuziŵika na zina yanu, mwewo Yehova Mulungu.” (Yeremiya 15:16) Yankhani makonsho aŵa:

• Ndaŵa yanji kunkhala wa Mboni za Yehova ni mwayi wapadela?

• Kansi mwewo mufuna kubatizika nonkhala wa Mboni za Yehova?

• Kansi pali chilichonse chukukangishani kubatizika?

• Kansi mungachite tyani kuti mukwanilishe cholinga chanu chakuti mubatizike?

MFUNDO ZACHIDULE

Yehova angakuyavyeni kusilijana na vuto iliyonse yamene ingakukangisheni kuti mubatizike.

Makonsho oweleja

• Kansi mufunika kuziŵa vinthu vinyinji votyani kuti mubatizike?

• Kansi mufunikila kuchinja vinthu votyani pa moyo wanu kuti mubatizike?

• Ndaŵa yanji mufunikilalini kuyopa kubatiziwa?

PHUNZILANI VINYINJI

Onani chifukwa chake kukonda Yehova n’kofunika ngako kuti munthu abatizike.

“Kansi nimwe okonzeka kubatiziwa?” (Nsanja ya Olonda, March 2020)

Ŵelengani nkhani iyi kuti muziŵe vamungachite keno pali viyakine vukukangishani kubatiziwa.

“Kansi n’chinji chunilesha kubatiziwa?” (Nsanja ya Olonda, March 2019)

Onani vechichita munthu muyakine kuti asilijane na vinthu vamene venzemukangisha kubatiziwa.

‘Ndaŵa yanji muwaya-waya kubatizika?’ (1:10)

Poyamba munthu muyakine, zina yake Ataa enzewaya-waya kubatiziwa. Onani chamene chimusimikijila kuti ofunikila kubatiziwa.

Nine wowamilachendi kulondela madaliso onse amene aŵa? (7:21)