MUTU 38
Mukowona kuti moyo ni mphaso ya ntengo wapatali
Sewo teŵanthu tukwanisha kuchita komasoti kusangalala na vinthu vosiyana-siyana chifukwa chakuti tili na moyo. Olo kuti tukumana na mavuto, nthawe zinyinji tukwanisha kusangalala na vinthu viyakine pa moyo wasu. Koma lomba tingawoneshe tyani kuti tutembeja Yehova chifukwa chotipasa mphaso ya moyo? Ndipo ndaŵa yanji tufunika kuchita vamene ivi?
1. Ndaŵa yanji tufunika kutembeja Yehova chifukwa chotipasa mphaso ya moyo?
Moyo ni mphaso yofumila kwa atata ŵasu wachikondi, Yehova. Tetyo tuwamila kumutembeja chifukwa cha mphaso yamene iyi. Baibolo yunena kuti yove ni “chisime cha moyo”—kutanthauza kuti niye elenga vamoyo vonse. (Salimo 36:9) Yunenasoti kuti: “Niyove opasa moyo ŵanthu wonse, umphuye, komasoti vinthu vonse.” (Machitidwe 17:25, 28) Yehova otipasa vinthu vonse vatufunikila kuti tiŵe na moyo. Kuyangijila pamene apa, Yehova otipasa vinthu viyakine vosiyana-siyana kuti tikokondwela na moyo.—Ŵelengani Machitidwe 14:17.
2. Kansi tingawoneshe tyani kuti tutembeja Yehova chifukwa chotipasa mphaso ya moyo?
Yehova ewona kuti nimwe wantengo wapatali kufumila pa nthawe yechinkhala na vumo amayi ŵanu. M’pemphelo yamene Yehova elola kuti ilembewe m’mawu ŵake, ntumiki wake Davide enena kuti: “Menso wanu eniwona penichingoyamba kupangika mmala.” (Salimo 139:16) Yehova owona kuti moyo ŵanu ni wantengo ukulu ngako. (Ŵelengani Mateyu 10:29-31.) Yehova vumuŵaŵa ngako akawona munthu ochosa moyo wake mwalona olosoti wa munthu muyakine.a (Ekisodo 20:13) Vumuŵaŵasoti ngako akawona tuchita vinthu mwalona vingaike moyo wasu pa ngozi olosoti tikokangiwa kukonkha malangizo angateteze moyo wasu komasoti wa ŵanthu ayakine. Tikoyeja-yeja kusamalila moyo wasu komasoti kulemekeza moyo wa ŵanthu ayakine, tuwonesha kuti tutembeja mphaso ya moyo yamene ni yantengo wapatali.
VATI TIPHUNZILE
Tiphunzile mwamungawoneshele kutembeja mphaso ya moyo.
3. Mukosamalila thanzi yanu
Nthawe zonse tuyeja-yeja kuchita vakufuna Yehova chifukwa chakuti temulonjeza kuti tikomutumikila na moyo wasu wonse. Tikochita vamene ivi tunkhala tupeleka miŵili yasu nsembe kwa Mulungu. Ŵelengani Aroma 12:1, 2, ndipo pavuli pake mukambilane makonsho aŵa:
Ndaŵa yanji mufunikila kusamalila thanzi yanu?
N’nga ni vinthu votyani vamungachite kuti muwoneshe kuti musamalila thanzi yanu?
4. Tikoyeja-yeja kupewa vinthu vingaike moyo wasu na wa ŵanthu ayakine pa ngozi
Baibolo yunena kuti tufunika kupewa vinthu vingaike moyo wasu na wa ŵanthu ayakine pa ngozi. Lolelani VIDIYO kuti muwone vinthu vamungachite kuti mupewe ngozi.
Ŵelengani Miyambo 22:3, ndipo pavuli pake mukambilane mwamungapewele ngozi mwewo komasoti ŵanthu ayakine . . .
mukankhala ku ng’anda.
mukankhala ku ntchito.
mukochita masoŵela osiyana-siyana.
mukoyendesha olo kukwela vinthu monga, motoka, honda, njinga, bote, ngolo na viyakine.
5. Mukowona kuti moyo wa mwana wamene akaliye vyalika ni wantengo wapatali
Davide efotokoza kuti Yehova ochita chidwi na chilichonse chamene chuchitika mwana akokula mmala mwa amayi ŵake. Ŵelengani Salimo 139:13-17, ndipo pavuli pake mukambilane konsho iyi:
Kansi Yehova owona kuti moyo uyamba pa nthawe yotyani, pamene mama wangotola vumo olo mwana akavyalika?
Malamulo ŵenzepeleka Yehova kwa Aisiraeli enzoteteza mama komasoti mwana akaliye vyalika. Ŵelengani Ekisodo 21:22, 23, ndipo pavuli pake mukambilane makonsho aŵa:
Kansi Yehova enzewona tyani munthu wamene wapaya mwana akaliye vyalika mwangozi?
Lomba kansi angawone tyani munthu wamene wapaya mwana akaliye vyalika mwalona?b
Kansi mwewo muwona kuti maganizo a Mulungu pa nkhani yamene iyi ni womvwika?
Nthawe ziyakine olo kuti mama wamene owona kuti moyo wa mwana akaliye vyalika ni wantengo wapatali, angakwanishe kukumana na vuto yamene ingamuchitishe kuwona kuti paliye muyakine mochitila koma kungotaya vumo mphela. Ŵelengani Yesaya 41:10, ndipo pavuli pake mukambilane makonsho aŵa:
Keno mama okakamijiwa kuti ataye vumo, kansi ofunikila kudalila ŵani kuti amuyavye? Ndaŵa yanji mwanena tetyo?
ŴANTHU AYAKINE ONENA KUTI: “Mwanakazi ali na ufulu wosankha—kutaya vumo olo yayi.”
Kansi chukusimikijilani n’chinji kuti Yehova owona kuti moyo wa mama komasoti wa mwana akaliye vyalika ni wantengo wapatali ngako?
MFUNDO ZACHIDULE
Baibolo yutilonjeza kuti tufunikila kukonda, kulemekeza, na kuteteza mphaso ya moyo yechitipasa Yehova. Vamene ivi vupamikijapo moyo wasu komasoti wa ŵanthu ayakine.
Makonsho oweleja
Ndaŵa yanji Yehova owona kuti moyo ni wantengo wapatali?
Kansi Yehova akumvwa tyani munthu akalipaya olo akapaya munthu muyakine mwalona?
Kansi mwewo mutembeja mphaso ya moyo?
PHUNZILANI VINYINJI
Kansi tingawoneshe tyani kuti tutembeja Yehova chifukwa chotipasa mphaso ya moyo?
Fwanani yankho yakonsho yakuti: Kansi Mulungu angamukhululukile mama etayapo vumo?
“Kansi Baibolo yunena votyani pa nkhani yotaya vumo?” (Nkhani yapa webisaiti)
Onani mwamene kuziŵa maganizo a Mulungu pa nkhani yokhuza moyo mwakungatiyavyile kusankha vosangalasa vamene vingaikelini moyo wasu pa ngozi.
Tyani keno munthu ali na maganizo ofuna kulipaya? Onani mwamene Baibolo mwaingayavyile munthu pa nkhani yamene iyi.
a Yehova osamalila ŵanthu ofwaika ntima. (Salimo 34:18) Ŵanthu oteti onkhala na ululu ukulu mu ntima mwawo mwakuti ofuna kulipaya. Koma Yehova oŵamvwisha ndipo ofunishisha kuŵayavya. Kuti muwone mwamene malangizo a m’Baibolo mwangayavyile munthu kuti aleke kuganizila zofuna kulipaya, ŵelengani nkhani yakuti, “Keno nufuna kulipaya—Kansi Baibolo inganiyavye keno nili na maganizo amene aŵa?” pa mbali yakuti Phunzilani vinyinji mmutu wamene uyu.
b Ŵanthu amene etayapo vumo ofunikilalini kuliimba mulandu ngako chifukwa—Yehova angakwanishe kuŵakhululukila. Kuti muziŵe vinyinji, ŵelengani nkhani yakuti, “Kansi Baibolo yunena votyani pa nkhani yotaya vumo?” pa mbali yakuti Phunzilani vinyinji mmutu uno.