Vonse vechitika chifukwa chomwetulila!

ASIMBI aŵili enzeyenda pamozi ku malo ochitila malonda mu tauni ya Baguio ku Philippines. Ove ewona kashelufu kolalikilila ku malo opezeka ŵanthu anyinji, koma aliyefwike pafupi. Helen, mulongo wamene enzelalikila na kashelufu, eŵamwetulila ngako. Anakazi amene awo epitilija ulwendo wawo, koma edabwisika ngako na kumwetulila mwachikondi kwa Helen.

Pavuli pake, asimbi amene awo pechikwela basi pojokela kung’anda, ewona chikwangwani chikulu cha webusaiti ya jw.org chenzematike ku Ng’anda ya Ufumu. Ove ekumbukila kuti enze mabii ŵamo na ŵamo ŵenze ewona pa kashelufu kolalikilila. Onse aŵili pechiseluka m’basi, eluta ku N’ganda ya Ufumu ndipo pechifwika ewona ndandanda ya misonkhano ya mipingo yosiyanasiyana yamene yenzematike pamulyango wa mpanda wa N’ganda ya Ufumu.

Onse anakazi amene aŵa aŵili epezeka pamisonkhano yokonkhapo. Lomba kansi niŵani wechiwona ove wamene enzeloŵa mu N’ganda ya Ufumu? Ove edabwisika ngako kuwona Helen oloŵa mu N’ganda ya Ufumu! Ove emuziŵa pa nthawe yamene iyo kuti ni munthu omwetulila ngako. Helen enena kuti: “Peniŵawona nenkhala na nkhaŵa patontho ndaŵa nenzeziŵalini chifukwa chenzewelela kuli newo. Newo niganiza kuti payakine chilipo chanaphoniya.” Koma anakazi amene aŵa efotokozela Helen vamene vechitika pechimuwona pakashelufu.

Asimbi amene awo ekondwela ngako na misonkhano komasoti nkatijano, ove echimvwa bwino ngako kunkhala pamozi na abale komasoti alongo ndipo enzekumvwa monga ali kung’anda. Pechiwona ayakine opyela mu N’ganda ya Ufumu peisila misonkhano, ove ekonsha keno angayavyeko. Mmozi mwa anakazi amene aŵa onkhalalinisoti ku Philippines, koma muyakine eyamba kupezeka pamisonkhano ndipo eyamba kuphunzila Baibolo—Vonse vechitika chifukwa chomwetulila!