Osalola kuti chilichonse chikulekanisheni na Yehova

1. Kansi tuziŵa tyani kuti Yehova ofuna kuti tinkhale naye pa ushamwali?

YEHOVA otiuja kuti timuvwendelele. (Yak. 4:8) Yove ofuna kunkhala Mulungu wasu, Atata ŵasu, komasoti Nshamwali wasu. Yove oyankha mapemphelo ŵasu komasoti otiyavya pa nthawe yovuta. Otiphunzisasoti pokatishila ntchito gulu yake ndipo otiteteza. Lomba kansi tingachite tyani kuti tinkhale naye pa ushamwali?

2. Kansi tingachite tyani kuti tinkhale pa ushamwali na Yehova?

² Tingankhale pa ushamwali na Yehova popemphela kuli yove komasoti kuŵelenga Mawu ŵake noŵaganizila. Keno tuchita vamene ivi, tuyamba kumukonda ngako komasoti kumutembeja. Tufunishisha kumumvwila komasoti kumutamanda monga mwavufunikila. (Chiv. 4:11) Keno tumuziŵa ngako Yehova, niyesoti patumudalila ngako pamozi na gulu yawatipasa kuti ikotiyavya.

3. Kansi Mdyelekezi oyeja tyani kutilekanisha na Yehova, koma kansi n’chinji chingatiyavye kuti osati tisiye Mulungu wasu na gulu yake? (Salimo 31:13, 14)

³ Koma olo n’tetyo, Mdyelekezi ofuna kutilekanisha na Yehova, makamaka keno tukumana na mavuto. Kansi yove ochita tyani vamene ivi? Mwa patontho-patontho, yove ofuna kutichitisha kuleka kudalila Yehova na gulu yake. Olo n’tetyo, tingakwanishe kupewa maukuka ŵake. Keno tumukhulupilila Yehova komasoti kumudalila ngako, tingamusiyelini Mulungu wasu na gulu yake.—Ŵelengani Salimo 31:13, 14.

4. Kansi tikambilane chinji mu nkhani ino?

⁴ Mu nkhani ino, tikambilane mavuto atatu oyambishiwa na ichi chalo amene angachitishe kuti osati tikodalila ngako Yehova na gulu yake. Kansi mavuto amene aŵa angatilekanishe tyani na Yehova? Lomba tingachite tyani kuti mayeselo amene aŵa a Satana osati atisokoneze?

TIKAKUMANA NA MAVUTO

5. Kansi mavuto ŵatukumana nawo angachitishe tyani kuti osati tikokhulupilila ngako Yehova na gulu yake?

⁵ Nthawe ziyakine tukumana na mavuto—monga kushushiwa na achibale olo kusila kwa ntchito. Kansi mavuto amene aŵa angachitishe tyani kuti tilekane na Yehova komasoti kuti osati tikokhulupilila gulu yake? Keno tapilila vuto iyakine kwa nthawe itali, tingafoke noyamba kuwona kuti tiliye chiyembekezo. Satana opezelapo mwayi wotichitisha kuti tikokaikila keno Yehova otikonda. Yove ofuna kuti tikowona kuti Yehova na gulu yake niye ochitisha mavuto amene awo. Volingana na vamene ivi vichitikilapo Aisiraeli ku Iguputo. Poyamba ove enzekhulupilila kuti Yehova etumija Mose na Aroni kuti aŵachose ku ukapolo. (Eks. 4:29-31) Koma Farao pechichitisha kuti mavuto ŵawo ayangijilike, ove eyamba kuimba mulandu Mose na Aroni nonena kuti: “Mwatinunkhisha pamenso pa Farao na atumiki ŵake, mwakuti mwaŵapasa chibemba m’manja mwawo kuti atipaye.” (Eks. 5:19-21) Ove enzeimba mulandu atumiki okhulupilika a Yehova. Vamene ivi venze vomvwisha chisoni! Keno mwankhala mupilila mavuto ayakine kwa nthawe itali, kansi mungachite tyani kuti mukokhulupilila ngako Yehova na gulu yake?

6. Kansi tingaphunzile chinji kwa Habakuku pa nkhani yopilila mavuto? (Habakuku 3:17-19)

⁶ Mukopemphela kwa Yehova na ntima wonse kuti akuyavyeni. Mneneli Habakuku ekumana na mavuto anyinji. Pa nthawe iyakine, yove enzekaikila keno Yehova enzemuganizila. Tetyo, epemphela kuli yove mofumila pansi pa ntima. Yove enena kuti: “Mwewo Yehova, kansi nililile thandizo yanu koma mwewo osanimvwa mpaka nthawe yanji? . . . Ndaŵa yanji mupitilija kuloleshesha nkhalidwe iipa?” (Hab. 1:2, 3) Yehova eyankha pemphelo ya ntumiki wake wamene uyu wokhulupilika. (Hab. 2:2, 3) Pechiganizila mwechipulumushila ŵanthu ŵake Yehova masiku akuvuli, Habakuku eyambasoti kunkhala wosangalala. Yove esimikijila kuti Yehova omuganizila komasoti kuti omuyavya kupilila mayeselo aliwonse. (Ŵelengani Habakuku 3:17-19.) Kansi tuphunzilapo chinji? Mukakumana na mavuto, mukopemphela kwa Yehova nomuuja mwamumvwila. Pavuli pake, mukomudalila kuti akuyavyeni. Mukachita tetyo, mungankhale osimikijila kuti Yehova akupaseni mphamvu zamufunikila kuti mupilile. Ndipo mukawona kuti wakuyavyani, muyambe kumukhulupilila ngako.

7. Kansi achibale a Shirley eyeja-yeja kumuchitisha kuti achite tyani, lomba n’chinji chimuyavya kuti osati aleke kukhulupilila Yehova?

⁷ Mukopitilija kuchita vinthu vokhuza kulambila. Ganizilani mwamene kuchita vamene ivi mwekuyavyila mulongo muyakine waku Papua New Guinea zina yake Shirley, pechikumana na mavuto.b Banja yake yenze yosauka, ndipo nthawe ziyakine yenzevutika kufwana chakulya chokwanila. Wachibale muyakine eyeja-yeja kumuchitisha kuti osati akodalila Yehova. Wachibale wamene uyo enena kuti: “Wewo unena kuti mzimu utuŵa wa Mulungu ukuyavya, lomba apa ukuyavya tyani? Banja yako ikali yosauka. Ungotaya nthawe na kulalikila.” Shirley enena kuti: “Nelikonsha kuti: ‘Kansi Mulungu otiganizila chendi olo yayi?’ Tetyo, nthawe yamene iyo nipemphela kwa Yehova nomuuja vonse venze muntima mwangu. Nipitilija kuŵelenga Baibolo na mabuku ŵasu, kulalikila, komasoti kupezeka pamisonkhano.” Papita kanthawe katontho, yove eziŵa kuti Yehova enzesamalila banja yake. Ove eliyeyonepo na njala ndipo enzesangalala. Shirley enena kuti: “Niwona kuti Yehova enzeyankha mapemphelo ŵangu.” (1 Tim. 6:6–8) Keno nthawe zonse muchita vinthu vokhuza kulambila, namwe mulolelini kuti kukaikila olo mavuto ŵamungakumane nawo, vikulekanisheni na Yehova.

KENO ABALE AUDINDO OTAMANISHIWA

8. Kansi n’chinji chingachitikile abale amene osogolela m’gulu ya Yehova?

⁸ Kupitila m’mawailesi, m’manyunzipepala komasoti pa intaneti, adani ŵasu ofalisa nkhani zawenye zokhuza abale amene osogolela m’gulu ya Yehova. (Sal. 31:13) Abale ayakine amangiwa komasoti kuimbiwa milandu monga ni vigaŵenga. Vamene ivi niye vichitikilasoti Akhilisitu oyambilila ntumwi Paulo pechiimbiwa milandu yawenye komasoti kumangiwa. Lomba kansi ove echita tyani?

9. Kansi Akhilisitu ayakine echita tyani Paulo pechimangiwa?

⁹ Akhilisitu ayakine a m’nthawe ya atumwi eleka kuyavya Paulo pechiikiwa mu djeli ku Roma. (2 Tim. 1:8, 15) Ndaŵa yanji? Kansi enzechita naye nsoni chifukwa chakuti ŵanthu ayakine enzemuwona monga ni chigaŵenga? (2 Tim. 2:8, 9) Olo enzeyopa kuti nawo angatamanishiwe? Keno enze na vifukwa votyani, ganizilani mwechimvwila Paulo. Yove enze epilila mavuto anyinji olosoti kuika moyo wake pa ngozi chifukwa cha ove. (Mac. 20:18-21; 2 Akor. 1:8) Osati tikonkhala monga ni ŵanthu amene emutaya Paulo pa nthawe yenzefunikila thandizo yawo! Kansi tufunika kukumbukila chinji keno abale osogolela otamanishiwa?

10. Kansi tufunika kukumbukila chinji keno abale osogolela otamanishiwa, lomba ndaŵa yanji?

¹⁰ Mukokumbukila chifukwa chake tutamanishiwa komasoti wamene ochitisha vamene ivi. Lemba ya 2 Timoteyo 3:12 yunena kuti: “Onse ofuna kunkhala na moyo wolipeleka kwa Mulungu mwa Khilisitu Yesu, nawo azatamanishiwe.” Tetyo, osati tikodabwa kuwona kuti Satana olimbana ngako na abale amene osogolela. Cholinga chake ni kuŵachitisha kuti aleke kunkhala okhulupilika komasoti kuti sewo tichite wowa.—1 Pet. 5:8.

11. Kansi tuphunzilapo chinji pa chisanzo cha Onesiforo? (2 Timoteyo 1:16-18)

¹¹ Mukopitilija kuyavya abale ŵanu ndipo mukonkhala okhulupilika kuli ove. (Ŵelengani 2 Timoteyo 1:16-18.) Paulo pechimangiwa, Mkhilisitu muyakine zina yake Onesiforo echita vinthu mosiyana na ayakine. Yove “aliyechite nsoni na nsimbi [za Paulo].” Mmalomwake, yove emusakila-sakila ndipo pechimupeza eyeja-yeja kumuyavya. Pochita vamene ivi, Onesiforo eika moyo wake pangozi. Kansi tuphunzilapo chinji? Osati tikolola kuti kuyopa ŵanthu kutisokoneze olo kutikangishe kuyavya abale ŵasu amene otamanishiwa. Mmalomwake, tikochita vonse vatingakwanishe kuti tiŵayavye. (Miy. 17:17) Ove ofunikila chikondi chasu na thandizo yasu.

12. Kansi tuphunzila chinji kufumila kuli abale na alongo ŵasu aku Russia?

¹² Ganizilani mwamene abale na alongo ŵasu ku Russia mwakuyavyila Akhilisitu ayawo amene amangiwa. Ayakine akoimbiwa milandu kukhoti, abale na alongo anyinji oluta kwamene uko powonesha kuti ali ku mbali yawo. Kansi tuphunzilapo chinji? Keno abale amene osogolela onyozewa, kumangiwa olo kutamanishiwa, osati mukochita wowa. Mukoŵapemphelela, kusamalila ŵanthu a m’banja yawo, komasoti kusakila njila ziyakine zamungaŵayavyile.—Mac. 12:5; 2 Akor. 1:10, 11.

KENO TUNYOZEWA

13. Kansi kunyozewa kungachitishe tyani kuti osati tikodalila ngako Yehova na gulu yake?

¹³ Achibale komasoti ayasu akuntchito olo akusikulu, angotinyoza chifukwa chakuti tulalikila olosoti chifukwa chokonkheja mfundo za Yehova za minkhalidwe iweme. (1 Pet. 4:4) Ove angonena kuti: “Wewo niwe munthu muweme, koma chipembezo chanu chuyumisha vinthu komasoti chuyendela mfundo zakale.” Ayakine angotizuzula chifukwa cha mwatuchitila vinthu na ŵanthu ochosewa, ponena kuti: “Lomba munganene tyani kuti nimwe ŵanthu achikondi?” Mawu monga ni amene aŵa, angachitishe kuti tiyambe kunkhala na maganizo okaikila. Payakine tingayambe kulikonsha kuti: ‘Niyekuti Yehova onipanikiza? Kansi gulu yake yamene iyi yuyumisha ngako vinthu?’ Keno mukumana na vinthu monga n’vamene ivi, kansi mungachite tyani kuti mupitilije kunkhala okatijana na Yehova na gulu yake?

14. Kansi tufunika kuchita tyani keno ayakine otinyoza chifukwa chokonkheja mfundo za Yehova? (Salimo 119:50-52)

¹⁴ Mukonkhala osimikijila kuti mupitilije kukonkheja mfundo za Yehova. Yobu enzekonkheja mphela mfundo za Yehova olo kuti enzenyozewa chifukwa chochita vamene ivi. Mmozi mwa ŵanthu amene enzenena kuti ni azishamwali ŵake eyeja kumuchitisha kuti akowona kuti Mulungu enzeikilakolini nzelu kuti okonkheja mfundo zake. (Yobu 4:17, 18; 22:3) Koma Yobu aliyekhulupilile wenye wamene uyu. Yove enzeziŵa kuti mfundo za Yehova zokhuza chiweme na chiipa n’ziweme, ndipo enze wosimikijila kuzikonkheja. Yobu aliyelole kuti ayakine amuchitishe kunkhala wosakhulupilika. (Yobu 27:5, 6) Kansi tuphunzilapo chinji? Osati mukolola kuti kunyozewa kukuchitisheni kuyamba kukaikila mfundo za Yehova. Mukoganizila vamene vankhala vukuchitikilani mwewo pamweka. Kansi muwonalini mweka moweleja-weleja kuti mfundo za Yehova n’zachendi komasoti kuti zukuyavyani? Nkhalani osimikija kupitilija kunkhala m’gulu yamene yukonkheja mfundo zamene izi. Mukachita tetyo, mupitilije mphela kutumikila Yehova olo ŵanthu akunyozeni tyani.—Ŵelengani Salimo 119:50-52.

15. Ndaŵa yanji Brizit enzenyozewa?

¹⁵ Ganizilani vichitikila mulongo muyakine waku India, zina yake Brizit. Yove enzenyozewa na achibale ŵake chifukwa cha chikhulupililo chake. Pechingobatiziwa mu 1997, mulume wake wamene enzelini wa Mboni ntchito imusilila. Tetyo, eganiza zakuti yove pamozi na banja yake akonkhala na makolo ŵake amene enzenkhala mu tauni iyakine. Vamene ivi vichitisha kuti Brizit akumane na mavuto ayakine akulu. Pakuti mulume wake enzelini pa ntchito, Brizit enzefunika kukata ntchito masiku onse kuti akoyavya banja yawo. Kuyangijila pamene apo, mpingo wapafupi wenze pa nsenga wa makilomita pafupi-fupi 350. N’vomvwisha chisoni kuti achibale a mulume wake eyamba kumushusha chifukwa cha chikhulupililo chake. Vinthu vefwika povuta ngako mwakuti banja ya Brizit ifulukasoti. Ndipo pavuli pake mosayembekezeleka, mulume wake emwalila. Papita kanthawe, mwana wawo mwanakazi emwalila na khansa ali na vyaka tyala 12. Vinthu veipasoti ngako achibale a Brizit pechiyamba kumuimba mulandu kuti ni yove wachitisha vonse vamene ivi. Ove enzenena kuti mavuto onse amene aŵa, sembe aliyechitike kuti yove ni wa Mbonilini za Yehova. Koma olo n’tetyo, yove epitilija kudalila Yehova nonkhala mphela mu gulu yake.

16. Kansi Brizit edalisiwa tyani chifukwa chakuti aliyesiye Yehova na gulu yake?

¹⁶ Pakuti Brizit enzenkhala kutali na mpingo, wopanamila dela emulimbikisa kuti akolalikila m’dela ya kwamene uko kwawo komasoti kuti akochitila m’ng’anda mwake misonkhano. Poyamba yove enzewona kuti vamene ivi n’vovuta ngako. Koma olo n’tetyo, ekonkheja malangizo amene awo. Yove enzelalikila uthenga uweme kuli ayakine, kuchita misonkhano m’ng’anda mwake, komasoti enzechita kulambila kwa pabanja na ŵana ŵake. Kansi vokonkhapo vake vinkhala votyani? Brizit eyamba kuchitisha maphunzilo a Baibolo anyinji, ndipo ŵanthu anyinji ŵenzephunzila nawo ebatiziwa. Mu 2005, yove eyamba upainiya wonkhazikika. Brizit edalisiwa chifukwa chodalila Yehova komasoti kunkhala mphela wokhulupilika ku gulu yake. Palipano, ŵana ŵake otumikila Yehova mokhulupilika ndipo lomba mu dela yawo yamene iyo muli mipingo iŵili! Brizit okaikilalini kuti Yehova emupasa mphamvu kuti akwanishe kupilila mavuto ŵechikumana nawo komasoti kunyozewa na achibale ŵake.

PITILIJANI KUNKHALA OKHULUPILIKA KWA YEHOVA NA GULU YAKE

17. Kansi tufunika kunkhala osimikijila kuchita chinji?

¹⁷ Satana ofuna kuti tikokhulupilila kuti Yehova otisiya tikakumana na mavuto, komasoti kuti kunkhala mu gulu yake kuyangijila mavuto. Ofunasoti kuti tikochita wowa keno abale amene osogolela gulu ya Mulungu onyozewa, kutamanishiwa olosoti kuikiwa mu djeli. Komasoti ofuna kuti kunyozewa kutichitishe kuleka kukhulupilila mfundo za Yehova na gulu yake. Koma olo n’tetyo, sewo tuŵaziŵa luweme maukuka ŵake aipa ndipo tusemphewalini. (2 Akor. 2:11) Tiyeni tikonkhala osimikijila kukana wenye wa Satana nopitilija mphela kunkhala okhulupilika kwa Yehova na gulu yake. Tikokumbukila kuti Yehova atisiyelini olo patontho. (Sal. 28:7) Tetyo, osalola kuti chilichonse chikulekanisheni na Yehova!—Aro. 8:35-39.

18. Kansi tizakambilane chinji mu nkhani ikuza?

¹⁸ Mu nkhani ino, takambilana mavuto ŵatingakumane nawo amene owela kufumila kuli ŵanthu asatumikila Yehova. Koma nthawe ziyakine, mavuto ŵatingakumane nawo mumpingo angachitishesoti kuti tileke kudalila Yehova na gulu yake. Lomba kansi tingachite tyani kuti tilimbane na mavuto amene aŵa? Tizakambilane vamene ivi mu nkhani ikuza.