NKHANI YOPHUNZILA N.° 18
Kulimbikisana muyake na muyake pa misonkhano ya mpingo
“Tiyeni tiganizilane . . . , kuti tilimbikisane.”—AHE. 10:24, 25.
NYIMBO N.° 88 Niziŵisheni njila zanu
VATIKUTI TIPHUNZILEa
1. Ndaŵa yanji tuyankha pa misonkhano?
NDAŴA yanji tupezeka pa misonkhano ya mpingo? Chifukwa chikulu, ni kutamanda Yehova. (Sal. 26:12; 111:1) Tusonkhanasoti kuti tikolimbikisana mu nthawe ino yovuta. (1 Ates. 5:11) Tuyavya pokwanilisha volinga vamene ivi tikapanamika kwanja yasu noyankha pa misonkhano.
2. Kansi tili na mipata yotyani yoyankha pa misonkhano yasu?
2 Sondo iliyonse, tunkhala na mipata yoyankha pa misonkhano yasu. Mwachisanzo, kumapeto kwa sondo tingayankhe pa phunzilo ya Nsanja ya Mulonda. Pa misonkhano yasu ya mkati mwa sondo tingayankhe pa mbali za Kusakila-sakila Mfundo zingatiyavye, Phunzilo ya Baibolo ya Mpingo, komasoti nkhani ziyakine zokambilana.
3. Kansi ni mavuto otyani ŵatingakumane nawo, ndipo kansi lemba ya Aheberi 10:24, 25 ingatiyavye tyani?
3 Tonse tufuna kutamanda Yehova nolimbikisa olambila ayasu. Koma pali vinthu vamene vingachitishe kuti kuyankha nthawe ziyakine kunkhale kovuta. Tingankhale na nkhaŵa poyankha, payakine tingankhale ofunishisha kuti tipeleke ndemanga zinyinji koma nthawe ziyakine osogoja angotilatalini kaŵili-kaŵili monga mwatingafunile sewo. Kansi n’chinji chingatiyavye kulimbana na mavuto amene aŵa? Tufwana yankho ya konsho yamene iyi mu kalata ya Paulo yoluta kwa Aheberi. Polaŵila za kufunika kosonkhana pamozi, yove enena kuti tufunika kuganizila ngako za ‘kulimbikisana.’ (Ŵelengani Aheberi 10:24, 25.) Tizachitelini wowa ngako kupanamika kwanja yasu tikokumbukila kuti tingalimbikise ayakine olo na mawu osavuta owonesha chikhulupililo chasu. Ndipo olo keno tulatiwalini kaŵili-kaŵili kuti tiyankhe, tingankhale mphela osangalala poziŵa kuti ayakine mu mpingo ali na mwayi wopeleka ndemanga.—1 Pet. 3:8.
4. Kansi ni mfundo zitatu zotyani zatikuti tikambilane mu nkhani ino?
4 Mu nkhani ino, tiyambe na kukambilana mwatingalimbikisilane mu mpingo utontho mwamene muli ŵanthu atontho opeleka ndemanga. Pavuli pake tikambilane mwatingalimbikisilane mu mpingo ukulu mwamene muli ŵanthu anyinji opanamika kwanja kuti ayankhe. Posilijila, tikambilane mwatingalimbikisile ayakine na vatulaŵila popeleka ndemanga.
KULIMBIKISANA MUYAKE NA MUYAKE MU MPINGO UTONTHO
5. Kansi tingachite tyani kuti tikolimbikisana m’mipingo mwamene ni ŵanthu tyala atontho opezeka pa misonkhano?
5 Mu mpingo utontho olo kagulu, muliye ŵanthu anyinji opanamika manja kuti ayankhe ŵangasankhe wosogoja. Nthawe ziyakine, wosogoja angafunike kuyembekezela poyamba kuti ŵanthu ayakine apeleke ndemanga. Nsonkhano woteti ungawoneke monga uyendalini bwino—vamene vingankhale vosalimbikisa ngako. Kansi mungachite tyani? Mufunika kunkhala okonzeka kupanamika kwanja yanu pafupi-pafupi. Mukochita vamene ivi, mungalimbikise ayanu kuti nawo akopeleka ndemanga kaŵili-kaŵili.
6-7. Kansi tingachefye tyani nkhaŵa yatunkhala nayo poyankha?
6 Kansi mungachite tyani keno muchita ngako wowa kuti mupeleke ndemanga? Ŵanthu anyinji okumana na vuto yamene iyi. Koma lomba, kuti mulimbikise abale na alongo ŵanu, mungachite luweme kufwana njila zochefyelako nkhaŵa zanu poyankha. Kansi mungachite tyani vamene ivi?
7 Mungawone kuti n’koyavya kuŵelengako mfundo ziyakine zifalisiwa mmagazini a Nsanja ya Mulonda.b Mwachisanzo, konzekelani luweme. (Miy. 21:5) Mukaziŵa luweme nkhani zamene izo, niyesoti pamunkhala omasuka ngako kulipeleka poyankha. Komasoti, pelekani ndemanga zanu mwachidule. (Miy. 15:23; 17:27) Yankho ifupi yukuchitishani kuchefya nkhaŵa. Yankho ikankhala ifupi, payakine ili na mawu amozi olo aŵili, ingankhale yosavuta kuli abale na alongo ŵanu kuimvwishisha kupambana ndemanga itali yonkhala na mawu anyinji. Keno mungayankhe mwachidule komasoti m’mawu ŵanu-ŵanu, mungawoneshe kuti mwakonzekela luweme komasoti mwaimvwisha luweme nkhani yamene iyo.
8. Kansi Yehova oiwona tyani khama yasu?
8 Lomba tyani keno pavuli pokonkheja ayakine mwa malangizo amene aŵa muwona kuti mukalipitilija kuchita wowa kuti mupeleke ndemanga kamozi olo kaŵili tyala? Nkhalani osimikijila kuti Yehova azatembeje khama yanu pochita vonse vamungakwanishe. (Lk. 21:1-4) Kuchita vonse vatingakwanishe kutanthauzalini kuchita vinthu vatingaleke kwanisha pasewo seka. (Afil. 4:5) Mukoziŵa vinthu vamungakwanishe kuchita, nkhalani na cholinga chovichita, komasoti pemphelani kuti ntima wanu unkhale mmalo. Poyamba, cholinga chamene ichi chingankhale kupeleka ndemanga imozi yachidule.
KULIMBIKISANA MU MPINGO UKULU
9. Kansi ni vuto yotyani yunkhalapo m’mipingo ikulu-ikulu?
9 Keno mpingo wanu uli na ofalisa anyinji, mungakumane na mavuto ayakine. Payakine abale na alongo anyinji olipeleka kuti ayankhe mwakuti kanyinji-kanyinji kwanja yanu yunyalanyaziwa. Mwachisanzo, Danielle nthawe zonse okonda kuyankha pa misonkhano.c Yove owona kuti kuyankha kwamene uko ni mbali ya kulambila kwake, kulimbikisa ayakine, komasoti kutang’isha chikhulupililo chake pa choonadi cha m’Baibolo. Koma pechifulukila ku mpingo ukulu yove enzelatiwalini kaŵili-kaŵili—ndipo nthawe ziyakine enzelatiwalini olo kamozi tyala pa misonkhano yonse. Yove enena kuti, “Nikalipa ngako. Nenzewona monga naluza mwayi. Vikachitika moweleja-weleja, uyamba kuganiza kuti vachitika mwalona.”
10. Kansi tingayangijile tyani mwayi wasu woyankha?
10 Kansi mwewo mwelimvwapo kale monga mwechimvwila Danielle? Keno n’tetyo, mungafune kungoleka kumvwishila misonkhano. Koma osaleka kuyeja-yeja kuyankha. Kansi mungachite tyani? Mungachite luweme kukonzekela ndemanga zinyinji pa nsonkhano uliwonse. Keno aliye kupaseni mwayi woyankha kumayambililo kwa phunzilo, muzankhale mphela na mwayi woyankha nsonkhano wamene uyo paupitilija kusogolo. Mukokonzekela phunzilo ya Nsanja ya Mulonda, mukoganizila kukatijana kulipo pakati pa ndime iliyonse na mutu ukulu wa phunzilo yamene iyo. Mukachita vamene ivi, mungankhale na ndemanga ziweme zamunganene pa phunzilo yamene iyo. Kuyangijila pamene apo, mungakonzekele kuyankha pa ndime zamene zunena choonadi cha m’Baibolo chovuta kufotokoza. (1 Akor. 2:10) Ndaŵa yanji? Ndaŵa yakuti pangankhale olipeleka atontho tyala angayankhe pa nkhani zamene izo. Lomba kansi mungachite tyani keno pavuli poyeja-yeja njila zonse zamene izi mupezalini mwayi woyankha? Mungakambilane na wosogoja misonkhano ikaliyeyamba nomuuja konsho yamufuna mwewo kuti mukayankhe.
11. Kansi lemba ya Afilipi 2:4 yutilimbikisa kuchita chinji?
11 Ŵelengani Afilipi 2:4. Moujiliwa, ntumwi Paulo elimbikisa Akhilisitu kuti akoganizila vofuna va ayakine. Kansi malangizo amene aŵa tingaŵakatishile ntchito tyani pa misonkhano? Mwakukumbukila kuti ayakine ali monga ni sewo ndipo angakonde kuyankhako.
Monga mwamuchitila kulola ŵanthu ayakine kuti alaŵileko pamutandala, mukolola ŵanthu ayakine kupelekako ndemanga pa misonkhano (Onani ndime 12)
12. Kansi ni njila yotyani iweme yolimbikisila ayakine pa misonkhano? (Onanisoti chithunzi.)
12 Ganizilani ivi. Tiyelekezele kuti mutandala na azishamwali ŵanu, kansi mungolaŵila ngako mpaka ove kuchita kusoŵa mpata wakuti alaŵileko? N’vowonekelatu kuti mungachitelini tetyo! Mwewo mungafune kuti mukoyaŵana nawo pa vamukambilana. Molingana na vamene ivi, pa misonkhano tufuna kulola ŵanthu anyinji kuti ayankhe. Ndipo njila imozi iweme ngako yolimbikisila abale na alongo ni kuŵapasa mpata kuti afotokoze vakukhulupilila. (1 Akor. 10:24) Tiyeni tiwone mwatingachitile vamene ivi.
13. Kansi tingalole tyani omvwishila anyinji kuti ayankheko?
13 Chifukwa chimozi chopelekela ndemanga zachidule, n’chakuti tunkhala tupeleka mpata kuli ayakine kuti ayankheko. Akulu na ofalisa ayakine oziŵa vinyinji angapeleke chisanzo. Olo pamupeleka ndemanga kaŵili-kaŵili, pewani kulaŵila mfundo zinyinji. Keno mungafotokoze mfundo zonse za mu ndime pangankhale paliyesoti mwayi wakuti ayakine ayankheko. Mwachisanzo, mu ndime ino muli malingalilo aŵili—kuyankha mwachidule komasoti kupewa kulaŵila mfundo zinyinji. Keno nimwe oyamba kulatiwa kuti muyankhe mu ndime yamene iyi, tyani kufotokozako mfundo imozi tyala mwa mfundo zamene izi?
Kansi ni pa nthawe yotyani patufunika kupewa kupanamika kwanja yasu pa misonkhano? (Onani ndime 14)f
14. Kansi n’chinji chingatiyavye patusankha kupaka kwa ndemanga zatufuna kupeleka? (Onanisoti chithunzi.)
14 Katishilani ntchito nzelu pamusankha kupaka kwa ndemanga zamufuna kupeleka. Keno tupanamika kwanja yasu kaŵili-kaŵili, tingachitishe wala osogoja kuwona kuti okakamijika kutilata moweleja-weleja olo kuti ayakine akaliye yankhako. Vamene ivi vingakangishe ayakine kupanamika kwanja yawo.—Mlal. 3:7.
15. (a) Kansi tufunika kuchita chinji keno tiliyelatiwe kuti tiyankhe? (b) Kansi osogoja angawoneshe tyani kuti oganizila aliyense? (Onani bokosi yakuti “Keno musogoja.”)
15 Ofalisa anyinji akopanamika kwanja pa phunzilo, tingakwanishelini kuyankha maulwendo anyinji monga mwetenzefunila. Nthawe ziyakine, wosogoja angakwanishelini kutilata. Vamene ivi vingatikhumudwise, koma tufunika kuyeja-yeja kuti tikopewa kukhumudwa akaleka kutilata.—Mlal. 7:9.
16. Kansi tingalimbikise tyani ayakine amene apeleka ndemanga?
16 Keno mungakwanishelini kuyankha maulwendo anyinji monga ni mwamufunila, tyani osamvwishila mwatchelu ayakine pakuyankha ndipo pavuli pa misonkhano noŵatembeja chifukwa cha ndemanga zawo? Keno mungachite vamene ivi, abale na alongo angalimbikisiwe molingana na ndemanga zamungapeleke. (Miy. 10:21) Kutembeja ni njila iyakinesoti yolimbikisilana muyake na muyake.
NJILA ZIYAKINE ZATINGALIMBIKISILANE MUYAKE NA MUYAKE
17. (a) Kansi makolo angayavye tyani ŵana ŵawo kukonzela ndemanga zokatijana na nsinkhu wawo? (b) Mokatijana na vidiyo, kansi ni vinthu 4 votyani vatingachite pokonzekela ndemanga? (Onanisoti mawu am’nyansi.)
17 Kansi tingalimbikisane soti tyani pa misonkhano yasu? Keno nimwe kolo, yavyani ŵana ŵanu kukonzekela ndemanga zokatijana na nsinkhu wawo. (Mt. 21:16) Nthawe ziyakine, nkhani zikulu-zikulu monga nkhani za mavuto, mfundo zachinkhalidwe, zulaŵiliwa pa phunzilo, koma n’vowonekelatu kuti pangankhale ndime imozi olo ziŵili zangayankheko mwana. Komasoti yavyani ŵana ŵanu kuziŵa chifukwa chake angalatiwelini nthawe iliyonse yangapanamike kwanja yawo. Kuŵafotokozela vamene ivi kungaŵayavye kuti osati akokalipa muyawo akalatiwa mmalo mwa ove.—1 Tim. 6:18.d
18. Kansi tingapewe tyani kuliwoneshela popeleka ndemanga? (Miyambo 27:2)
18 Tonse tingakonzekele ndemanga zolimbikisa zamene zingalemekeze Yehova komasoti kulimbikisa Akhilisitu ayasu. (Miy. 25:11) Olo kuti nthawe ziyakine tingalaŵile mwachidule vinthu vetichitikila, tufunika kupewa kulaŵila ngako nkhani zokhuza sewo. (Ŵelengani Miyambo 27:2; 2 Akor. 10:18) Mmalo mwake tuyeja-yeja kuika maganizo ŵasu onse kwa Yehova, Mawu ŵake komasoti ŵanthu ŵake. (Chiv. 4:11) Koma olo n’tetyo, keno konsho ya mu ndime yamene iyo yutisenga kulaŵila vokhuza sewo, tingafunike kuchita tetyo. Tiyeni tiwone chisanzo cha vamene ivi mu ndime yokonkhapo.
19. (a) Keno tuganizila ayasu apezeka pa misonkhano, kansi vokonkhapo vake vizankhale votyani? (Aroma 1:11, 12) (b) Kansi n’chinji chamutembeja mwewo pamweka pankhani yopeleka ndemanga pa misonkhano?
19 Olo kuti paliye malamulo asitiliti onena za mwatingapelekele ndemanga, tonse tingoyeja-yeja kuchitisha ndemanga zasu kunkhala zolimbikisa. Vamene ivi vingatanthauze kupewa kupanamika kwanja kaŵili-kaŵili. Nthawe ziyakine vamene ivi vingatanthauzesoti kukhutila na mwayi watili nawo wopeleka ndemanga komasoti kunkhala wosangalala kuti ayakine ali na mwayi wopeleka ndemanga. Keno tuganizila vofuna va ayakine pa misonkhano ya mpingo, tonse tingankhale osangalala ndipo “tizatang’ishane.”—Ŵelengani Aroma 1:11, 12.
NYIMBO N.° 93 Mudalise nsonkhano wasu
a Tulimbikisana muyake na muyake keno tupeleka ndemanga pa misonkhano. Koma ayakine onkhala na nkhaŵa popeleka ndemanga. Ayakine osangalala kuyankha, koma ofunishisha kuti akolatiwa kaŵili-kaŵili. Mulimonse mwavingankhalile, kansi tingawoneshe tyani kuti tuganizilana vamene vingachitishe kuti tikolimbikisiwa? Ndipo kansi tingapeleke tyani ndemanga zamene zingalimbikise abale na alongo ŵasu pa chikondi na ntchito ziweme? Nkhani ino ifotokoze vamene ivi.
b Kuti muziŵe vinyinji, onani nkhani ya mu Nsanja ya Olonda Yophunzira ya January 2019, pedji 8-13, komasoti nkhani ya mu Nsanja ya Olonda ya 1 September, 2003, pedji 19-22.
c Mazina ayakine achinjiwa.
d Lolelani vidiyo ya pa jw.org yamutu wakuti Khalani Bwenzi la Yehova—Uzikonzekera Zimene Ukayankhe.
e Onani nkhani ya mu Nsanja ya Olonda ya 15 July, 2013 pedji 32, na ya 1 September, 2003 pedji 21-22.
f MAWU OFOTOKOZA CHITHUNZI: Mu mpingo ukulu, m’bale wamene wapelekako kale ndemanga opeleka mpata kuli ayakine kuti ayankheko pa misonkhano.